Mahungu Ya Ku Tsakisa Ya Ku Tsaliwa Hi Luka

13 Hi nkama wolowo, ku ve ni vanhu lava nga byela Yesu hi ta Vagalileya lava Pilatu a nga va dlaya na va li ku nyikeleni ka magandzelo. 2 Kutani a va hlamula a ku: “Mi pimisa swaku Vagalileya lava nga weliwa hi nghozi leyi, a va djohe hintamu ku tlula Vagalileya lavan’wani hinkwavu? 3 Ihim; kambe loko mi nga tisoli, hinkwenu mi ta helisiwa ku fana na vona.+ 4 Kumbe lava 18 va nga weliwa hi prediyu* la le Silowama li va dlaya; mi pimisa swaku a va djohe hintamu ku tlula vanhu hinkwavu lava tshamaka Yerusalema? 5 Ihim; kambe loko mi nga tisoli, hinkwenu mi ta helisiwa ku fana na vona.”

6 Se a va byela xifaniso a ku: “Wanuna mun’wani a a ni nsinya wa nkuwa lowu a wu byaliwe ka nsimu ya yena ya mawuvha, se a ya lava mihandzu ka wona, kambe a nga kumanga nchumu.+ 7 Kutani a byela mutirhi a ku: ‘Se ku hundza malembe manharhu na ni ta lava mihandzu ka nkuwa lowu kambe a ni kumi nchumu. Wu tsemi hikusa a wu pfuni nchumu!’ 8 A mu hlamula a ku: ‘Hosi ya mina, wu tshikinyana lembe leli, ni ta txela matlhelweni ka wona ni chela xitrumi. 9 Loko wo psala mihandzu, swi ta va swinene kambe loko wu nga psali, wu tsemi.’”+

10 Siku lin’wani Yesu a a li ku djondziseni ka sinagoga* hi Savata. 11 A ku ni wansati mun’wani lweyi se a a ni 18 wa malembe na a karhatiwa hi dimoni; a a korhama loko a famba* naswona a a nga swi koti ku wololoka. 12 Se nkama Yesu a nga mu vona a ku: “Wansati, hanya ka mavabyi ya wena.”+ 13 Se a mu tlhateka mavoko, kutani a wololoka hi nkama wolowo a sungula ku dzunisa Xikwembu. 14 Kambe murhangeli wa sinagoga a kwata hileswi Yesu a nga hanyisa wansati lweyi hi Savata, kutani a byela vanhu a ku: “Ku ni 6 wa masiku lawa ku faneleke ku tirhiwa ka wona;+ tanani hi masiku wolawo swaku mi ta hanyisiwa, ku nga li hi siku la Savata.”+ 15 Kambe Hosi yi mu hlamula yi ku: “Vakanganyisi ndzin’wina,+ a mi yi tlhantlhi homu ya n’wina kumbe mbongolo ya n’wina hi Savata swaku mi ya yi nwisa mati?+ 16 Kutani wansati lweyi wa lixaka la Abrahamu, lweyi Sathana a nga mu boha 18 wa malembe, a swi nga fanelanga swaku a tlhantlhiwa ku bohiweni loku hi siku la Savata?” 17 Nkama a nga gama ku hlaya leswo, hinkwavu lava a va mu kaneta va dana, kambe xitshungu hinkwaxu xi tsaka hileswi a nga swi yendla.+

18 Kutani a ku: “Mfumu wa Xikwembu wu fana ni yini? Ni nga wu fanisa ni yini ke? 19 Wu fana ni mbewu ya sinapi* leyi munhu a nga yi teka a ya yi byala ka nsimu ya yena, kutani yi kula yi va nsinya, swinyanyani swi za swi yaka swisaka ka tigadja ta wona.”+

20 Kutani a tlhela a ku: “Mfumu wa Xikwembu wu fana ni yini? 21 Wu fana ni fermentu* leli wansati a nga li teka a li pfuva ni 10 wa makilu ya mpupu, anze mpupu hinkwawu wu kukumuka.”+

22 Yesu a a famba hi madoropa ni swidoropani a djondzisa, na a li ndleleni ya ku ya Yerusalema. 23 Wanuna mun’wani a mu vutisa a ku: “Hosi, i ntiyiso swaku i vatsongo lava nga ta ponisiwa?” A va hlamula a ku: 24 “Tikarhateni leswaku mi nghena hi xipfalu xa ku lala,+ hikusa na mi byela: Va ku tala va ta swi navela ku nghena kambe a va nga ta swi kota. 25 Nkama n’winyi wa munti a nga ta pfuka a khiya xipfalu, mi ta nyima handle mi gongondza mi ku: ‘Hosi, hi pfuleli.’+ Kambe a ta mi hlamula a ku: ‘A ni swi tivi leswaku mi ta hi kwini.’ 26 Kutani mi ta ku: ‘A hi dla na wena hi tlhela hi nwa na wena, naswona u hi djondzisile ka switaratu swa doropa la hina.’+ 27 Kambe a ta mi hlamula a ku: ‘A ni swi tivi swaku mi ta hi kwini. Sukani lani ka mina, n’wina vayendli va swa ku biha!’ 28 Hi lanu mi nga ta ba nkosi mi tlhela mi karhateka* loko mi ta vona Abrahamu, Izaki, Yakobe ni vaprofeta hinkwavu ka Mfumu wa Xikwembu, kuve n’wina mi txukumeteliwe handle.+ 29 Naswona vanhu va ta ta hi le wuxeni, hi wupeladlambu, hi norte* ni le sul,* va fika va tshama* mezeni ka Mfumu wa Xikwembu. 30 Phela lava wugamu va ta va va ku sungula kasi va ku sungula va ta va va wugamu.”+

31 Hi nkama wolowo Vafarisi van’wani va ta ka yena va fika va ku: “Suka u famba, hikusa Heroda a lava ku ku dlaya.” 32 A va hlamula a ku: “Fambani mi ya byela mukanganyisi* lwiyani mi ku: ‘Namuntlha ni mundzuku ni ta hlongola madimoni ni tlhela ni hanyisa lava vabyaka naswona hi siku la wunharhu ni ta va ni gamile.’ 33 Kambe ni ta tama ni tirha namuntlha, mundzuku ni mundlwana, hikusa muprofeta a fanele a dlayiwa Yerusalema.+ 34 Yerusalema, Yerusalema, mudlayi wa vaprofeta ni lweyi a va baka hi maribye lava rhumiwaka ka wena+ . . . I kangaki ni nga lava ku hlengeleta vana va wena, ku fana ni leswi huku yi hlengeletisaka xiswona switxiwani swa yona hansi ka timpapa ta yona! Kambe a wu swi lavanga.+ 35 Phela Xikwembu xi ta tsukula yindlo* ya n’wina.+ Na mi byela: A mi nge he ni voni anze ku fika siku leli mi nga ta ku: ‘A katekile lweyi a taka hi vito la Yehovha!’”*+