EZRA

1 Hi lembe la ku sungula la ku fuma ka Korexe+ hosi ya Persiya, Yehovha a nyike Korexe hosi ya Persiya mimpimiso ya ku yendla leswi yena Yehovha a nga swi hlaya hi ku tirhisa Yeremiya+ leswaku a tivisa hinkwavu ka mfumu wa yena ni ku tlhela a tsala+ a ku:

2 “Korexe hosi ya Persiya a li: ‘Yehovha Xikwembu xa matilo a ni nyike mimfumu hinkwayu ya misava+ naswona a ni rhume swaku ni mu yakela yindlo aYerusalema,+ le Yuda. 3 Mun’wani ni mun’wani xikarhi ka n’wina lweyi a lumbaka vanhu va yena, Xikwembu a xi ve na yena. A a fambi aYerusalema le Yuda a ya pfuxa yindlo ya Yehovha Xikwembu xa Israyele leyi a yi li Yerusalema,* hikusa i Xikwembu xa ntiyiso. 4 Mun’wani ni mun’wani lweyi a taka hi ka tiko lin’wani,+ a ku na mhaka swaku a tshama kwini, a a pfuniwi hi vavhizinyu va yena, va mu nyika prata, woru, swilo swa vona, swifuyu ku patsa ni gandzelo la ku tirhandzela la yindlo ya Xikwembu xa ntiyiso,+ leyi a yi li Yerusalema.’”

5 Kutani varhangeli va mindjangu ya Yuda ni ya Benjamini ni vaprista, Valevhi, hinkwavu lava Xikwembu xi nga va yendla va navela* ku tirha, va lunghekele ku ya pfuxa yindlo ya Yehovha leyi a yi li Yerusalema. 6 Vavhizinyu va vona va va pfunile hi ku va nyika* swibya swa prata, swa woru, swilo swa vona, swifuyu ni minchumu yin’wani ya lisima, ku patsa ni hinkwaswu leswi a swi ta tirhisiwa ka magandzelo ya ku tirhandzela.

7 Hosi Korexe a tlhele a humesa swibya swa yindlo ya Yehovha, leswi Nebukadinazara a nga swi teka aYerusalema a swi veka ka yindlo ya xikwembu xa yena.+ 8 Hosi Korexe wa le Persiya a nyike Miteredata muhlayisi wa male, ntirho wa ku swi humesela a tlhela a swi kontela, a gama a swi nyika Xexibazari*+ murhangeli wa le Yuda.

9 Hi leyi numeru ya swona: 30 wa swibya swa ku fana ni mindzhava leswi nga yendliwa hi woru, 1.000 wa swibya swa ku fana ni mindzhava leswi nga yendliwa hi prata, 29 wa swibya swin’wani, 10 30 wa switijelani swa woru, 410 wa switijelani swa prata ni 1.000 wa swibya swin’wani. 11 Swibya hinkwaswu swa woru ni swa prata a swi li 5.400. Xexibazari a fambe na swona hinkwaswu nkama swikarawa+ swi nga suka Babilona swi tlhelela Yerusalema.

2 Hi lava Vayuda va le provhinsiya* lava va nga huma awukaraweni,+ lava Hosi Nebukadinazara wa le Babilona a nga va yisa awukaraweni aBabilona,+ lava va nga gama va vuya aYerusalema ni le Yuda, mun’wani ni mun’wani ka doropa la yena,+ 2 lava va nga ta na Zerubabele,+ Yexuwa,+ Nehemiya, Seraya, Reyelaya, Mordekayi, Bilixani, Mizipari, Bigivhayi, Rehumi na Bahana.

Numeru ya vavanuna va Israyele a yi patsa:+ 3 2.172 wa vana va Paroxi; 4 372 wa vana va Xefatiya; 5 775 wa vana va Ara;+ 6 2.812 wa vana va Pahati-Mowabu,+ vandjangu wa Yexuwa na Yowabu; 7 1.254 wa vana va Elamu;+ 8 945 wa vana va Zatu;+ 9 760 wa vana va Zakayi; 10 642 wa vana va Bani; 11 623 wa vana va Bebayi; 12 1.222 wa vana va Azigadi; 13 666 wa vana va Adonikami; 14 2.056 wa vana va Bigivhayi; 15 454 wa vana va Adini; 16 98 wa vana va Ateri, lava va nga vatukulu va Hezekiya; 17 323 wa vana va Bezayi; 18 112 wa vana va Yora; 19 223 wa vana va Axumi;+ 20 95 wa vana va Gibari; 21 123 wa vana va Betlehema; 22 56 wa vavanuna va le Netofa; 23 128 wa vavanuna va le Anatoti;+ 24 42 wa vana va Azimavheti; 25 743 wa vana va le Kiriyati-Yerimi, Kefira ni le Beroti; 26 621 wa vana va le Rama+ ni le Jeba;+ 27 122 wa vavanuna va le Mikimasi; 28 223 wa vavanuna va le Betele ni le Ayi;+ 29 52 wa vana va Nebo;+ 30 156 wa vana va Migibixi; 31 1.254 wa vana va Elamu lweyi mun’wani; 32 320 wa vana va Harimi; 33 725 wa vana va Lodi, Adidi na Onu; 34 345 wa vana va le Yeriko; 35 3.630 wa vana va le Sena.

36 Vaprista:+ 973 wa vana va Yedaya+ va ndjangu wa Yexuwa;+ 37 1.052 wa vana va Imiri;+ 38 1.247 wa vana va Paxahuri;+ 39 1.017 wa vana va Harimi.+

40 Valevhi:+ 74 wa vana va Yexuwa na Kadimiyeli,+ vana va Odavhiyawi. 41 Vayimbeleli:+ 128 wa vana va Azafi.+ 42 Vana va vagwardu va tinyanghwa:+ Vana va Xalumi, vana va Ateri, vana va Talmoni,+ vana va Akubi,+ vana va Atita, vana va Xobayi, hinkwavu a va li 139.

43 Vatirhi va le tempeleni:*+ Vana va Ziha, vana va Asufa, vana va Tabawoti, 44 vana va Kerosi, vana va Siya, vana va Padoni, 45 vana va Lebana, vana va Agabayi, vana va Akubi, 46 vana va Hagabi, vana va Salmayi, vana va Hanani, 47 vana va Gideli, vana va Gahari, vana va Reyaya, 48 vana va Rezini, vana va Nekoda, vana va Gazami, 49 vana va Uza, vana va Paseya, vana va Besayi, 50 vana va Asina, vana va Meyunimi, vana va Nefuxesimi, 51 vana va Bakibuki, vana va Hakufa, vana va Haruri, 52 vana va Baziluti, vana va Mehida, vana va Arxa, 53 vana va Barikosi, vana va Sisera, vana va Tema, 54 vana va Neziya, vana va Atifa.

55 Vana va vatirhi va Solomoni: Vana va Sotayi, vana va Sofereti, vana va Peruda,+ 56 vana va Yala, vana va Darikoni, vana va Gideli, 57 vana va Xefatiya, vana va Atili, vana va Pokereti-Hazebayimi, vana va Ami.

58 Vatirhi hinkwavu va le tempeleni* ni vana va vatirhi va Solomoni a va li 392.

59 Hi lava vanhu lava va taka hi Teli-Mela, aTeli-Arixa, aKerubi, aAdoni ni le Imiri, lava va kalaka va nga swi kotanga ku tsumbula mindjangu ya vapapayi va vona hambi ku tiva swaku i va lixaka la Vayisrayele kumbe a hi va lona:+ 60 652 wa vana va Delayi, vana va Tobiya, vana va Nekoda. 61 Vana va vaprista: Vana va Abayaya, vana va Hakozi,+ vana va Barzilayi, lweyi a nga teka nsati ka vana va Barzilayi+ wa le Jiliyadi, a gama a chuliwa vito la papayi wa nsati wa yena. 62 Lava hi lava va nga ya lavetela lomu va nga tsaliwa kona ka lixta la swib’ongo swaku va kuma xib’ongo xa vona, kambe a va ku kumanga lomu va nga tsaliwa kona, kutani va tshikisiwa ntirho wa wuprista.*+ 63 Govhernadori* a va byele swaku va nga dli swakudla swa ku kwetsima ngopfu+ anze ku va ni muprista lweyi a nga ta vutisa hi ku tirhisa Urimi ni Tumimi.+

64 Vanhu hinkwavu a va li 42.360,+ 65 na ku nga kontiwi 7.337 wa swikarawa swa vona swa xinuna ni swa xisati; funtshi a ku ni 200 wa vayimbeleli va xinuna ni va xisati. 66 Makavhalu ya vona a ma li 736, timbongolo ta vona tatikulu a ti li 245, 67 makamela ya vona a ma li 435, timbongolo ta vona a ti li 6.720.

68 Nkama va nga fika ka yindlo ya Yehovha aYerusalema, varhangeli van’wani va mindjangu va yendle magandzelo lama yendliwaka hi ku swi rhandza+ ya yindlo ya Xikwembu xa ntiyiso, swaku va ta tlhela va yi yaka* lomu a yi li kona.+ 69 Hi ku ya hi leswi va nga na swona va humese 61.000 wa tidrakma* ta woru, 5.000 wa timina* ta prata,+ ni 100 wa minkhantxu ya ku leha ya vaprista, va nyikela hi swona lomu ku hlayisiwaka kona xuma xa ku pfuxa tempele. 70 Se vaprista, Valevhi ni vanhu van’wani, vayimbeleli, vagwardu va tinyanghwa ni vatirhi va le tempeleni* va tshama ka madoropa ya vona, ni Vayisrayele lavan’wani hinkwavu va tshamiseka ka madoropa ya vona.+

3 Nkama ku nga fika wheti ya wu 7+ na Vayisrayele se va li ka madoropa ya vona, va hlengeletanile aYerusalema hi xikongomelo xin’we. 2 Yexuwa+ n’wana wa Yehozadaki ni vaprista van’wani na Zerubabele+ n’wana wa Salatiyele+ ni vamakwavu, va sungule ku yaka altari ya Xikwembu xa Israyele, swaku va ta yendla magandzelo ya ku hisiwa henhla ka yona, hi ku landza leswi nga tsaliwa ka Nawu wa Moxe+ mutirheli wa Xikwembu xa ntiyiso.

3 Se va yaka altari lomu a ku ni altari ya khale, hambileswi a va chava vanhu va matiko lawa a ma li matlhelweni ka vona,+ va sungule ku hisela Yehovha magandzelo ka yona, magandzelo ya ku hisiwa ya nimixo ni ya nimadlambu.+ 4 Kutani va hamba Fexta la Minchacha* hi ku landza leswi nga tsaliwa,+ va nyikela magandzelo hinkwawu ya ku hisiwa lama lavekaka siku ni siku.+ 5 Kutani va gama va yendla magandzelo ya ku hisiwa ya siku ni siku+ ni ya ku huma ka n’weti+ ni ya mafexta* hinkwawu ya ku kwetsima+ ya Yehovha, ku patsa ni magandzelo hinkwawu ya ku tirhandzela lama tisiwaka hi mun’wani ni mun’wani lweyi hi ku swi rhandza a nga nyikela gandzelo la ku tirhandzela+ ka Yehovha. 6 Va sungule ku yendlela Yehovha magandzelo ya ku hisiwa ku sukela ka siku la ku sungula la wheti ya wu 7,+ hambileswi masungulo* ya tempele ya Yehovha a ma nga se vekiwa.

7 Va nyike male vatsemi va maribye+ ni lava va tivaka ntirho wa mavoko,+ va tlhela va nyika Vasidoni ni Vatiru swakudla, swa ku phuza ni mafurha, hi mhaka ya leswi a va va tisela mapulangu ya nsinya wa mukedari hi le lwandle na va sukela aLebanoni anze Yopa,+ hi ku landza mpfumelelo lowu va nga nyikiwa wona hi Hosi Korexe wa le Persiya.+

8 Hi lembe la wumbirhi ka wheti ya wumbirhi loko se va fikile ka yindlo ya Xikwembu xa ntiyiso aYerusalema, Zerubabele n’wana wa Salatiyele, Yexuwa n’wana wa Yehozadaki ni vamakwavu hinkwavu, vaprista ni Valevhi ni hinkwavu lava va nga vuya aYerusalema na va huma hi wukaraweni,+ va sungule ntirho; va veke Valevhi lava va nga ni 20 wa malembe ku ya henhla swaku va kongomisa ntirho wa ku yakiwa ka yindlo ya Yehovha. 9 Se Yexuwa, vana va yena ni vamakwavu na Kadimiyeli ni vana va yena, ku nga vana va Yuda, va tirha xikan’we swaku va vonelela lava va yendlaka ntirho wa ku yaka yindlo ya Xikwembu xa ntiyiso, ku patsa ni vana va Enadadi,+ vana va vona ni vamakwavu, ku nga Valevhi.

10 Nkama vayaki va nga veka masungulo ya tempele ya Yehovha,+ vaprista lava va nga yambala mpahla ya wuprista va khome timhalamhala,*+ kuve Valevhi ku nga vana va Azafi, va khome swilo swa ku fana ni maparatu ya nsimbi,* va suka va nyima va dzunisa Yehovha hi ku landza leswi Hosi Davhida wa le Israyele, a nga va byela swona.+ 11 Va sungula ku yimbelela+ va dzunisa ni ku khensa Yehovha va ku: “Hikusa i munene; lirhandzu la yena lalikulu ka Vayisrayele a li heli.”+ Se vanhu hinkwavu va ba minkulungwani va dzunisa Yehovha hileswi ku nga vekiwa masungulo ya yindlo ya Yehovha. 12 Vaprista va vanyingi, Valevhi, varhangeli va mindjangu, vamadala lava va nga vona yindlo ya ku sungula,+ va rila hintamu nkama va nga vona masungulo ya yindlo leyi, kasi ku tala ka lavan’wani a va ba minkulungwani hileswi a va tsakile.+ 13 Kutani a va nga swi koti ku hambanisa guwa la minkulungwani ni ku rila ka vanhu, hikusa vanhu lava a va huwelela va za va twiwa ni le kule hintamu.

4 Nkama valala va Yuda na Benjamini+ va nga twa swaku vanhu lava va nga vuya hi wukaraweni+ vo pfuxa tempele ya Yehovha Xikwembu xa Israyele, 2 va yo vhela va ya ka Zerubabele ni varhangeli va mindjangu, va fika va ku: “Hi tshikeni hi yaka xikan’we na n’wina; hikusa na hina hi gandzela* Xikwembu xa n’wina+ naswona a hi xi gandzela ku sukela ka masiku ya Hosi Ezaradoni+ wa le Asiriya lweyi a nga hi tisa lani.”+ 3 Kambe Zerubabele na Yexuwa ni varhangeli va mindjangu ya Israyele, va va byela leswi: “A hi lavi mi yendla nchumu swaku mi hi pfuna ku yakela Xikwembu xa hina yindlo,+ hi hina hi nga ta yakela Yehovha Xikwembu xa Israyele hi ku landza leswi Hosi Korexe wa le Persiya a nga hi rhuma swona.”+

4 Vanhu va tiko a va tshamela ku heta Vayuda matimba swaku va ta tshika ku yaka.+ 5 Va thole vatsundzuxi swaku va ta phazamisela ntirho wa vona+ ka masiku hinkwawu ya ku fuma ka Hosi Korexe wa le Persiya anze ka nkama wa ku fuma ka Hosi Dariyosi+ wa le Persiya. 6 Nkama ku nga sungula ku fuma Asuwerusi, va tsale karta* la ku lumbeta lava va tshamaka Yuda ni le Yerusalema. 7 Naswona hi nkama wa ku fuma ka Hosi Artaxexe wa le Persiya, Bixalami, Miteredata, Tabele ni vatirhi van’wani hinkwavu, va tsalele hosi Artaxexe karta leli nga hundzuluxeliwa hi Xiaramu.*+

8 * Rehumi lweyi a a li murhangeli ka mfumu na sekretariyu* Ximixayi, va tsalele Hosi Artaxexe karta la ku lumbeta lava va tshamaka Yerusalema, va ku: 9 (A karta a li ta hi ka Rehumi lweyi a a li murhangeli ka mfumu na sekretariyu Ximixayi ni vatirhi lavan’wani hinkwavu, vayavanyisi, varhangeli, vasekretariyu, vanhu va le Ereki,+ Vababilona, vanhu lava va tshamaka Suza+ ku nga Vaelamu,+ 10 ni matiko hinkwawu lawa Asenapari lweyi a a dumile a tlhela a va ni matimba a nga ma yisa wukaraweni, a ma nyika madoropa ya Samariya+ ni hinkwavu lava va nga Wuxeni ka Nambu wa Ewufrata; 11 hi lawa marito ya karta leli va nga mu rhumela lona.)

“Hosi Artaxexe, hi ku tsalela karta leli hina vatirhi va wena lava va tshamaka ka tiko leli nga Wuxeni ka Nambu wa Ewufrata: 12 Swi tive wena hosi swaku Vayuda lava va nga suka seno va ta seni ka hina, va fikile aYerusalema. Va le ku pfuxeteni ka doropa leli delelaka ni ku yendla swa ku biha naswona va le ku hetiseni ka ku yaka mimuru+ ni ku lunghisa masungulo.* 13 Se swi tive wena hosi swaku loko doropa leli lo tlhela li yakiwa ni mimuru ya lona yi hela, vanhu lava a va nge he hakeli rhesa*+ kumbe swin’wani leswi hosi yi nga ta swi lava, kutani tihosi ti ta lahlekeliwa hi xuma. 14 Leswi hi holeliwaka ndlwini ya hosi* naswona hi kalaka hi nga swi lavi ku vona hosi yi lahlekeliwa, hi ku byela mhaka leyi, 15 swaku ku kambisisiwa buku ya matimu ya vavhovho va wena.+ Se u ta swi kuma ka buku ya matimu swaku doropa leli i doropa la ku delela, leli terekelaka tihosi ni maprovhinsiya, vanhu va lona va dume hi ku terekela tihosi ku sukela khale. Hi leswo swi nga yendla swaku doropa leli li helisiwa.+ 16 Hi tivisa hosi swaku loko doropa leli lo tlhela li yakiwa ku tlhela ku hetiwa ni mimuru ya lona, hosi a yi nge he swi koti ku fuma tiko leli nga Wuxeni ka Nambu wa Ewufrata.”+

17 Hosi yi rhumele rito ka Rehumi lweyi a a li murhangeli ka mfumu na sekretariyu Ximixayi ni ka hinkwavu lava a va tirha na vona lava a va tshama Samariya ni ka tindhawu hinkwatu leti nga Wuxeni ka Nambu wa Ewufrata yi ku:

“Xewani! 18 Ni li yamukelile karta leli mi nga ni tsalela lona funtshi li lerhiwe swi twala* phambheni ka mina. 19 Ni va rhumile swaku va yi kambisisa kahle mhaka leyi, va tsumbule swaku doropa lolelo a li terekela tihosi li tlhela li ti delela ku sukela khale naswona a li tshamela ku pfuxa mpfilumpfilu.+ 20 A ku ni tihosi ta matimba leti a ti fuma aYerusalema, leti a ti fuma ni tiko hinkwalu leli nga Wuxeni ka Nambu wa Ewufrata naswona rhesa a li hakeliwa ka tona. 21 Swoswi humesani nawu swaku vavanuna volavo va tshika ntirho, swaku doropa lolelo li nga tlheli li yakiwa anze va rhumiwa hi mina. 22 Yi lulamiseni hi ku hantlisa mhaka leyi, swaku hosi yi nga lahlekeliwi ku tlula mpimu.”+

23 Nkama karta la Hosi Artaxexe li nga lerheliwa Rehumi, sekretariyu Ximixayi ni lava va tirhaka na vona, va yo vhela va tsutsuma va ya Yerusalema ka Vayuda va ya va sindzisa ku tshika ntirho. 24 Ku sukela kolanu ntirho wa ku yaka yindlo ya Xikwembu leyi a yi li Yerusalema wu nyimile; wu nyimise swoleswo anze ku fika lembe la wumbirhi la ku fuma ka Hosi Dariyosi wa le Persiya.+

5 Kutani muprofeta Hagayi+ na muprofeta Zakariya+ ntukulu wa Ido+ va profetela Vayuda lava a va li Yuda ni le Yerusalema, hi vito la Xikwembu xa Israyele lexi a xi va pfuna. 2 Ku ve hi nkama wolowo Zerubabele+ n’wana wa Salatiyele na Yexuwa+ n’wana wa Yehozadaki va nga sungula ku tlhela va yaka yindlo ya Xikwembu,+ leyi a yi li Yerusalema; naswona vaprofeta va Xikwembu a va li na vona va va seketela.+ 3 Hi nkama wolowo, govhernadori Tatenayi lweyi a a fuma tiko leli nga Wuxeni ka Nambu wa Ewufrata, na Xeta-Bozenayi ni van’wani lava a va tirha na vona va ya ka vona va fika va ku: “I mani lweyi a nga mi pfumelela ku yaka yindlo leyi ni ku gongondzela timhandzi leti ke?” 4 Va tlhela va ku: “Hi byeleni mavito ya vanhu lava yakaka lani.” 5 Kambe Xikwembu a xi ma seketela* madoda ya Vayuda+ naswona a va zanga va tshikisiwa ku tirha anze mhaka leyi yi rhumeliwa ka Dariyosi leswaku a ta rhumela papela la ximfumu hi mhaka leyi.

6 Hi leli karta leli govhernadori Tatenayi lweyi a fumaka tiko leli nga Wuxeni ka Nambu wa Ewufrata na Xeta-Bozenayi ni lava va tirhaka na vona ku patsa ni vapfunisi va vagovhernadori lava tshamaka aWuxeni ka Nambu wa Ewufrata, va nga li rhumela ka Hosi Dariyosi; 7 va mu rhumele karta leli a va tsale leswi:

“Ka Hosi Dariyosi:

“Ku rhula a ku ve na wena! 8 Hosi a yi swi tive swaku hi ye ka provhinsiya la Yuda ka yindlo ya Xikwembu lexikulu naswona yi le ku yakiweni hi maribye yamakulu, funtshi makhumbi ya kona ma yakiwa hi timhandzi. Vanhu va yaka hi ku hiseka swinene naswona ntirho wolowo wu ya phambheni. 9 Se hi vutise madoda ya vona hi ku: ‘I mani lweyi a nga mi pfumelela ku yaka yindlo leyi ni ku gongondzela timhandzi leti ke?’+ 10 Hi tlhele hi va vutisa mavito ya vona swaku hi ta ku tsalela wona, hi ku byela mavito ya vavanuna lava rhangelaka.

11 “Va hi hlamule va ku: ‘Hina hi vatirhi va Xikwembu xa matilo ni misava naswona hi le ku pfuxeteni ka yindlo leyi nga yakiwa khale hintamu, leyi a yi yakiwe hi hosi leyikulu ya Israyele yi tlhela yi yi heta.+ 12 Kambe vapapayi va hina va kwatise Xikwembu xa le tilweni,+ kutani xi va nyiketa ka Hosi Nebukadinazara+ wa Babilona, wa Mukalidiya, lweyi a nga dilizela yindlo leyi,+ se a teka vanhu a va yisa awukaraweni aBabilona.+ 13 Kambe hi lembe la ku sungula la Hosi Korexe wa Babilona, Hosi Korexe a rhumise swaku yindlo leyi ya Xikwembu yi tlhela yi yakiwa.+ 14 Hosi Korexe a tlhele a humesa tempeleni ya Babilona swibya swa woru ni swa prata swa yindlo ya Xikwembu leswi Nebukadinazara a nga swi teka tempeleni aYerusalema a swi yisa ka tempele ya le Babilona.+ Swi nyikiwe Xexibazari,*+ wanuna lweyi Korexe a nga mu veka swaku a va govhernadori.+ 15 Korexe a mu byele leswi: “Teka swibya leswi, famba u ya swi veka tempeleni leyi nga Yerusalema naswona yindlo ya Xikwembu a yi tlhele yi yakiwa lomu a yi yakiwe kona.”+ 16 Kutani Xexibazari yelweyo a fika a veka masungulo* ya yindlo ya Xikwembu,+ leyi nga Yerusalema; ku sukela ka nkama wolowo anze swoswi ya ha yakiwa, a yi se hetiwa.’+

17 “Kutani loko hosi yi swi vona swi li swinene, a ku rhumiwe munhu a ya kambisisa ka mabuku lawa ma nga ka yindlo leyi hlayisaka minchumu ya lisima koseno Babilona, swaku ku ta tiyisekiwa swaku vhela Hosi Korexe a tshame a rhumisa swaku ku tlhela ku yakiwa yindlo yoleyo ya Xikwembu aYerusalema;+ se hosi a yi gami yi hi byela leswi yi nga ta swi boha ka mhaka leyi.”

6 Ku ve hi nkama wolowo Hosi Dariyosi a nga rhumisa swaku ku ya kambisisiwa ka mabuku lama nga ka yindlo leyi ku hlayisiwaka ka yona minchumu ya lisima aBabilona. 2 Se ku kumiwe buku* ka yindlo ya wuhosi leyi nga Ebatana, ka provhinsiya la Meda funtshi a ku tsaliwe leswi ka lona:

3 “Hi lembe la ku sungula la ku fuma ka Hosi Korexe, Hosi Korexe a rhumise leswi hi ta yindlo ya Xikwembu leyi nga Yerusalema:+ ‘Vayuda a va tlhele va yaka yindlo swaku va ta kota ku yendla magandzelo ka yona, masungulo* ya yona ma fanele ma yendliwa ma tiya; yi fanele yi leha kolomuyani ka 27 wa mametru* yi tlhela yi yanama kolomuyani ka 27 wa mametru,+ 4 yi yakiwa hi maribye yamakulu ma va mafila manharhu, kasi fila la wu 4 a li ve la timhandzi;+ hinkwaswu swi ta hakeliwa hi hosi.+ 5 Naswona swibya swa woru ni swa prata swa yindlo ya Xikwembu leswi Nebukadinazara a nga swi teka ka tempele leyi a yi li aYerusalema a swi tisa Babilona,+ swi fanele swi tlheliseliwa ka tempele leyi nga Yerusalema swi ya vekiwa ka yindlo ya Xikwembu.’+

6 “Se wena Tatenayi govhernadori wa tiko leli nga aWuxeni ka Nambu wa Ewufrata na wena Xeta-Bozenayi ku patsa ni lava va tirhaka na n’wina, ku nga vapfunisi va vagovhernadori va tiko leli nga aWuxeni ka Nambu wa Ewufrata,+ mi nga swi ngheneleli. 7 Mi nga kavanyeti ntirho wa yindlo yoleyo ya Xikwembu. Govhernadori wa Vayuda ni madoda ya Vayuda va ta tlhela va yaka yindlo ya Xikwembu lomu a yi li kona. 8 Funtshi ni tlhela ni mi rhuma leswi mi faneleke mi swi yendla swaku mi pfuna madoda ya Vayuda swaku ma tlhela ma yaka yindlo ya Xikwembu: Hantlisani mi va nyika male leyi lavekaka vavanuna volavo swaku ntirho wu ta ya phambheni wu nga kavanyetiwi; yi suseni lomu ku hlayisiwaka kona xuma xa hosi,+ ku nga rhesa* leyi hakeliwaka hi matiko lama nga Wuxeni ka Nambu wa Ewufrata.+ 9 Va nyikeni hinkwaswu leswi lavekaka, swihon’wani swa xinuna,+ tinyempfu,+ swinyempfani+ swa magandzelo ya ku hisiwa ya Xikwembu lexi nga tilweni, trigu,+ munyu,+ vhinyu+ ku patsa ni mafurha,+ hi ku landza leswi vaprista lava va nga Yerusalema va swi vulaka, va fanele va swi kuma siku ni siku na va nga kavanyetiwi, 10 swaku va ta tama va yendla magandzelo lama tsakisaka Xikwembu xa le tilweni ni ku khongelela hosi ku patsa ni vana va yona.+ 11 Ni tlhele ni humesa nawu wa leswaku lweyi a nga ta tshuka a nga wu yingisi nawu lowu, ku ta tlomuliwa mhandzi ka yindlo ya yena a gongodzeliwa ka yona naswona yindlo ya yena yi ta va xikoti* xa vanhu hinkwavu hi mhaka ya leswi a nga tlula nawu lowu. 12 Naswona Xikwembu lexi nga yendla swaku vito la xona li tshama kolanu+ a xi hlule hosi yin’wani ni yin’wani ni vanhu lava va nga ta tlula nawu lowu, kutani va wonha yindlo yoleyo ya Xikwembu leyi nga Yerusalema. Nawu lowu wu huma ka mina Dariyosi. A swi yendliwe hi ku hantlisa.”

13 Se Tatenayi govhernadori wa tiko leli nga Wuxeni ka Nambu wa Ewufrata, Xeta-Bozenayi+ ni lava va tirhaka na vona, va yendla hinkwaswu leswi Hosi Dariyosi a nga va rhuma swona hi ku hantlisa. 14 Kutani madoda ya Vayuda ma tama ma yaka+ hi ku landza leswi nga hlayiwa hi muprofeta Hagayi+ na Zakariya+ ntukulu wa Ido; se va yake va heta hi ku landza nawu wa Xikwembu xa Israyele+ ni hi ku landza nawu wa Korexe,+ Dariyosi+ na Hosi Artaxexe+ wa le Persiya. 15 Va hete yindlo leyi hi siku la wunharhu la wheti leyi vuliwaka Adara,* hi lembe la wu 6 la ku fuma ka Hosi Dariyosi.

16 Kutani Vayisrayele, vaprista, Valevhi+ ni hinkwavu lava va nga vuya hi wukaraweni, va khangula* yindlo leyi ya Xikwembu na va tsakile hintamu. 17 Nkama ku nga khanguliwa yindlo leyi ya Xikwembu, va nyikele 100 wa tihomu, 200 wa tinyempfu, 400 wa swinyempfani ni 12 wa swiphongo swaku swi va magandzelo ya swidjoho swa Vayisrayele hinkwavu, hi ku landza numeru ya tinxaka ta Israyele.+ 18 Kutani va langa vaprista ni Valevhi hi ku landza mintirho ya vona swaku va ta yendla ntirho wa Xikwembu aYerusalema,+ hi ku ya hi leswi nga tsaliwa ka buku la Moxe.+

19 Se Vayisrayele lava va nga vuya hi wukaraweni va yendla Paxkwa hi diya 14 ka wheti ya ku sungula.+ 20 Vaprista ni Valevhi hinkwavu va tibasisile, kutani hinkwavu a va basile;+ se va dlaya swifuyu swa ku yendla magandzelo ya Paxkwa la hinkwavu lava va nga vuya hi wukaraweni, ya vaprista lavan’wani hinkwavu ni ya vona vinyi. 21 Kutani Vayisrayele lava va nga vuya hi wukaraweni va dla, ku patsa ni hinkwavu lava a va li na vona lava va nga tshika mahanyelo ya ku biha ya vanhu va matiko, swaku va ta gandzela Yehovha Xikwembu xa Israyele.+ 22 Va tlhele va heta 7 wa masiku na va hamba Fexta la Mapawu ya Ku Kala Fermentu+ na va tsakile, hikusa Yehovha a yendle swaku va tsaka naswona a yendle swaku hosi ya Asiriya yi va tsakela swinene+ yi za yi va pfuna ka ntirho wa ku yaka yindlo ya Xikwembu xa ntiyiso, Xikwembu xa Israyele.

7 Loko swilo leswi se swi hundzile, hi nkama lowu a ku fuma Hosi Artaxexe+ wa Persiya, Ezra*+ a tlhelele ka tiko la yena. A a li n’wana wa Seraya,+ n’wana wa Azariya, n’wana wa Hilikiya,+ 2 n’wana wa Xalumi, n’wana wa Zadoki, n’wana wa Ayitubi, 3 n’wana wa Amariya, n’wana wa Azariya,+ n’wana wa Merayoti, 4 n’wana wa Zerahiya, n’wana wa Uzi, n’wana wa Buki, 5 n’wana wa Abixuwa, n’wana wa Feniyasi,+ n’wana wa Eliyazari,+ n’wana wa Aroni+ muprista wamukulu. 6 Ezra lweyi, a te hi Babilona. A a li mutsali lweyi a wu tivaka kahle Nawu wa Moxe,+ lowu nga nyikeliwa hi Yehovha Xikwembu xa Israyele. Hosi yi mu nyike hinkwaswu leswi a nga swi kombela, hikusa Yehovha Xikwembu a a li na yena.*

7 Vayisrayele van’wani, vaprista, Valevhi,+ vayimbeleli,+ vagwardu va tinyanghwa+ ni vatirhi va tempeleni*+ va ye Yerusalema hi lembe la wu 7 la ku fuma ka Hosi Artaxexe. 8 Ezra a fike Yerusalema hi wheti ya wu 5, hi lembe la wu 7 la ku fuma ka hosi. 9 Hi siku la ku sungula la wheti ya ku sungula, a suke Babilona, a yendza a ya fika aYerusalema hi siku la ku sungula la wheti ya wu 5, hikusa Xikwembu a xi li na yena.+ 10 Ezra a a lulamisele mbilu ya yena* swaku a kambisisa Nawu wa Yehovha ni ku hanya hi leswi nga tsaliwa ka wona+ ni ku djondzisa nawu ni matirhelo ya wona aIsrayele.+

11 Leli i karta leli Hosi Artaxexe a nga li nyika muprista Ezra lweyi a a li mutsali, a a swi tiva kahle* leswi Yehovha a swi lavaka ni minawu leyi a nga yi nyika Vayisrayele:

12 * “Hi mina Artaxexe,+ hosi ya tihosi, ni tsalela wena muprista Ezra, mutsali wa Nawu wa Xikwembu xa le tilweni: U va ni ku rhula kakukulu. 13 Ni rhumise swaku mun’wani ni mun’wani wa Vayisrayele ku patsa ni vaprista ni Valevhi lava va nga ka mfumu wa mina lava va lavaka ku tlhelela aYerusalema na wena, va fanele va famba loko va swi lava.+ 14 Hikusa u rhumiwe hi hosi ni 7 wa vatsundzuxi va yona leswaku u ya kambisisa swaku Nawu wa Xikwembu xa wena lexi nga na wena wa landzeliwa aYuda ni le Yerusalema ke, 15 funtshi u fanele u teka prata ni woru leswi hosi ni vatsundzuxi va yona va nga swi nyikela hi ku swi rhandza ka Xikwembu xa Israyele lexi tshamaka Yerusalema, 16 ni prata hinkwalu ni woru leli u nga ta li kuma ka maprovhinsiya hinkwawu ya Babilona, ku patsa ni leswi vanhu ni vaprista va nga swi nyikela ka yindlo ya Xikwembu xa vona leyi nga Yerusalema.+ 17 Male leyi u fanele u hantla u yi tirhisa swaku u xava tihomu,+ tinyempfu,+ swinyempfani,+ ni leswi lavekaka swaku ku yendliwa magandzelo ya swakudla+ ni ya vhinyu,+ kutani u ta swi nyikela ka altari leyi nga ka yindlo ya Xikwembu xa n’wina le Yerusalema.

18 “Se xin’wani ni xin’wani lexi n’wina ni vamakwenu mi vonaka xi li xinene swaku mi xi yendla hi prata hinkwalu ni woru, mi nga xi yendla, hi ku ya hi leswi laviwaka hi Xikwembu xa n’wina. 19 Naswona swibya hinkwaswu leswi mi nyikiwaka swona swaku mi ta swi tirhisa ka yindlo ya Xikwembu xa n’wina, swi yiseni ka xona aYerusalema.+ 20 Minchumu yin’wani leyi nga ta laveka ka yindlo ya Xikwembu xa wena, u ta yi xava hi male ya hosi.+

21 “Mina Hosi Artaxexe, ni rhume hinkwavu lava va khomaka male ka tiko leli nga aWuxeni ka Nambu wa Ewufrata, swaku hinkwaswu leswi muprista Ezra,+ mutsali wa Nawu wa Xikwembu xa le tilweni a swi kombelaka ka n’wina, mi fanele mi swi yendla hi ku hantlisa, 22 mi fanele mi mu nyika ku ya fika ka 3.420 wa makilu ya prata,* 16.000 wa makilu ya trigu,* 2.200 wa malitru ya vhinyu,*+ 2.200 wa malitru ya mafurha*+ kasi munyu+ mu nyikeni lowu a wu lavaka. 23 Hinkwaswu leswi Xikwembu xa le tilweni xi rhumisaka swaku swi yendliwa, a swi yendliwe hi ku hiseka, swi yendleliwa yindlo ya Xikwembu xa le tilweni,+ swaku ku nga vi ni khombo leli nga ta wela mfumu wa hosi ni vana va yona.+ 24 Ni tlhela ni mi khumbukisa swaku swa tsimbisiwa ku hakelisa rhesa*+ lin’wani ni lin’wani ka vaprista ni Valevhi, vayimbeleli,+ vagwardu va tinyanghwa, vatirhi va le tempeleni*+ ni hinkwavu lava va tirhaka ka yindlo ya Xikwembu.

25 “Se wena Ezra, hi ku tirhisa wutlharhi leli u nga li kuma ka Xikwembu xa wena, langa lava va nga ta tirha tribunali ni vayavanyisi lava va nga ta yavanyisa vanhu hinkwavu lava va nga ka tiko leli nga Wuxeni ka Nambu wa Ewufrata, hinkwavu lava va tivaka minawu ya Xikwembu xa wena;* naswona lava va kalaka va nga yi tivi, u ta va djondzisa.+ 26 Kutani mun’wani ni mun’wani lweyi a nga ta tshuka a tlula Nawu wa Xikwembu xa wena ni nawu wa hosi, a a yavanyisiwi hi ku hantlisa, ku nga ha va hi ku yavanyiseliwa lifu, ku hlongoliwa tikweni, multa kumbe ku petiwa djele.”

27 A a dzunisiwi Yehovha Xikwembu xa vapapayi va hina, lweyi a nga pfuna hosi swaku yi kota ku sasekisa yindlo ya Yehovha aYerusalema!+ 28 A tirhise hosi,+ vatsundzuxi+ va yona ni varhangeli hinkwavu va matimba lava a nga na vona, swaku a ni komba swaku wa ni rhandza. Se ni tiya nhlana* hikusa Yehovha Xikwembu xa mina a a na mina, kutani ni hlengeleta vavanuna lava va nga varhangeli* aIsrayele swaku va famba na mina.

8 Hi lawa mavito ni swib’ongo swa varhangeli va mindjangu ya lava va nga suka na mina Babilona hi nkama lowu a ku fuma Hosi Artaxexe:+ 2 Ka vana va Feniyasi,+ Jerixomu; ka vana va Itamari,+ Daniyele; ka vana va Davhida, Atuxi; 3 ka vana va Xekaniya, ka vana va Paroxi, Zakariya, lweyi a nga tsalisiwa ni 150 wa vavanuna; 4 ka vana va Pahati-Mowabu,+ Eliyeho-Henayi n’wana wa Zerahiya, a a ni 200 wa vavanuna; 5 ka vana va Zatu,+ Xekaniya n’wana wa Yahaziyele, a a ni 300 wa vavanuna; 6 ka vana va Adini,+ Ebedi n’wana wa Yonatani, a a ni 50 wa vavanuna; 7 ka vana va Elamu,+ Yexaya n’wana wa Ataliya, a a ni 70 wa vavanuna; 8 ka vana va Xefatiya,+ Zebadiya n’wana wa Mikayele, a a ni 80 wa vavanuna; 9 ka vana va Yowabu, Obadiya n’wana wa Yehiyele, a a ni 218 wa vavanuna; 10 ka vana va Bani, Xelomiti n’wana wa Yosifiya, a a ni 160 wa vavanuna; 11 ka vana va Bebayi,+ Zakariya n’wana wa Bebayi, a a ni 28 wa vavanuna; 12 ka vana va Azigadi,+ Yohanani n’wana wa Hakatani, a a ni 110 wa vavanuna; 13 ka vana va Adonikami+ lava a va li va wugamu, hi lawa mavito ya vona: Elifeleti, Yeyiyele na Xemaya, a va ni 60 wa vavanuna; 14 ka vana va Bigivhayi,+ Utayi na Zabudi, a va ni 70 wa vavanuna.

15 Ni va hlengelete ka nambu lowu mati ya kona ma yaka Ahava,+ kutani hi gwimba matende kolanu masiku manharhu. Kambe nkama ni nga txuvukisisa vanhu ni vaprista, ni tsumbule swaku Valevhi a va nga li kona. 16 Se ni rhuma vanhu swaku va ya vitana Eliyezere, Ariyeli, Xemaya, Elinatani, Yaribi, Elinatani, Natani, Zakariya na Mexulami lava a va li varhangeli ku patsa na Yowaribi na Elinatani, lava a va li vadjondzisi. 17 Kutani ni va rhuma swaku va ya ka Ido lweyi a nga murhangeli wa le Kasifiya. Ni va byela swaku va byela Ido ni vamakwavu, lava nga vatirhi va le tempeleni* lava a va li Kasifiya, swaku va hi rhumela vanhu lava nga ta tirha ka yindlo ya Xikwembu xa hina. 18 Leswi Xikwembu xa hina a xi li na hina,* va hi tisele wanuna wa ku tlhariha wa vana va Mahili+ ntukulu wa Levhi n’wana wa Israyele, ku nga Xerebiya+ ni vana va yena ni vamakwavu, 18 wa vavanuna; 19 na Axabiya lweyi a nga ta na Yexaya lweyi a humaka ka Vamerari,+ vamakwavu ni vana va vona, hinkwavu a va li 20. 20 Naswona a ku ni 220 wa vatirhi va le tempeleni* lava a va langiwe hi Davhida ni varhangeli* swaku va ta pfuna Valevhi, lava mavito ya vona hinkwavu a ma tsaliwile ka buku.

21 Kutani ni va byela swaku hi titsona swakudla kolanu ka nambu wa Ahava, hi tiveka hansi phambheni ka Xikwembu xa hina, swaku xi ta hi kongomisa ka liyendzo la hina xi tlhela xi vhikela ni vana va hina ni minchumu ya hina hinkwayu. 22 A swi ni danisa ku kombela hosi swaku yi hi nyika masonchwa ni vafambisi va makavhalu swaku ma ta hi vhikela ka valala andleleni, hikusa a hi byele hosi hi ku: “Xikwembu xa hina xi ni hinkwavu lava va xi lavaka,+ kambe matimba ni ku kwata ka xona swi lwisana ni hinkwavu lava xi tshikaka.”+ 23 Se hi titsone swakudla hi tlhela hi kombela ka Xikwembu xa hina swaku xi hi pfuna ka mhaka leyi naswona xi hi yingisile.+

24 Kutani ni langa 12 wa tindota ta vaprista, ku nga Xerebiya na Axabiya+ ni 10 wa vamakwavu va vona. 25 Se ni va nyika prata ni woru ni swibya, ku nga munyikelo lowu hosi ni vatsundzuxi va yona ni varhangeli va yona ni Vayisrayele hinkwavu lava a va li kona kolanu va nga swi nyikela ka yindlo ya Xikwembu xa hina.+ 26 Se ni va nyika 22.230 wa makilu* ya prata, 100 wa swibya swa prata leswi a swi xaviwa hi titalenta timbirhi, 100 wa titalenta ta woru, 27 20 wa switijelani swa woru leswi a swi xaviwa hi 1.000 wa tidarika* ni switijelani swimbirhi swa kobre, leswi phatimaka ku fana ni woru.

28 Ni gama ni va byela leswi: “Ma kwetsima ka Yehovha+ ni swibya swa kwetsima, kasi prata ni woru i magandzelo ya ku tirhandzela lama yaka ka Yehovha Xikwembu xa vavhovho va n’wina. 29 Swi hlayiseni kahle anze mi swi peza phambheni ka tindota ta vaprista ni Valevhi ni varhangeli va mindjangu ya Israyele aYerusalema,+ ka tindhawu ta ku dlela ka tona ka yindlo ya Yehovha.” 30 Kutani vaprista ni Valevhi va teka prata ni woru ni swibya leswi va nga pezeliwa swona swaku va swi yisa Yerusalema ka yindlo ya Xikwembu xa hina.

31 Hi wugamu hi suke ka nambu wa Ahava+ hi siku la wu 12 la wheti ya ku sungula+ swaku hi ya Yerusalema, naswona Xikwembu xa hina a xi li na hina, xi hi vhikelile ka valala ni ka swigevenga andleleni. 32 Se hi fike Yerusalema+ lomu hi nga tshama masiku manharhu. 33 Kutani hi siku la wu 4, hi sungule ku peza prata ni woru ni swibya ka yindlo ya Xikwembu xa hina+ hi swi nyika Meremoti+ n’wana wa muprista Yuriya; a a na Eliyazari n’wana wa Feniyasi, ni Valevhi ku nga Yozabadi+ n’wana wa Yexuwa na Nowadiya n’wana wa Binuyi.+ 34 Hinkwaswu a swi kontiwile swi tlhela swi peziwa, pezu la swona hinkwalu a li tsaliwile. 35 Lava va nga vuya hi wukaraweni va nyikele magandzelo ya ku hisiwa ka Xikwembu xa Israyele, 12 wa tihomu ta xinuna+ ta tiko hinkwalu la Israyele, 96 wa tinyempfu ta xinuna,+ 77 wa swinyempfani swa xinuna ni 12 wa swiphongo+ swaku swi va gandzelo la xidjoho; hinkwaswu leswi swi ve gandzelo la ku hisiwa ka Yehovha.+

36 Kutani hi nyika varhangeli va hosi*+ lava nga ka maprovhinsiya ni vagovhernadori lava nga ka tiko leli nga Wuxeni ka Nambu wa Ewufrata+ minawu leyi taka hi ka hosi, kutani va seketela vanhu ni ntirho wa yindlo ya Xikwembu xa ntiyiso.+

9 Loko swilo leswi se swi yendlekile, varhangeli* va vanhu va tile ka mina va fika va ku: “Vayisrayele, vaprista ni Valevhi a va tihambanisanga ni vanhu va matiko ni mintirho ya vona ya ku nyenyentsa+ ya Vakanana, Vaheti, Vaperezi, Vayebusi, Vaamoni, Vamowabu, Vagibita+ ni Vaamori.+ 2 Va teke van’wani va vana* va matiko lawa swaku va va vasati va vona ni swaku va va vasati va vana va vona.+ Kutani vona, ku nga vana va ku kwetsima+ va titlhanganise ni vanhu va matiko.+ Varhangeli ni vapfunisi va tihosi hi vona va nga rhanga va yendla manyala lawa.”

3 Nkama ni nga twa mhaka leyi ni handzule mpahla ya mina ni nkhantxu wa mina wa ku kala wu nga na mavoko, ni tsuvula misisi yin’wani ka nhloko ya mina ni malepfu, ni gama ni tshama hansi na ni tsemeke nhlana. 4 Kutani hinkwavu lava chavaka marito ya Xikwembu xa Israyele va hlengeletanile lomu a ni li kona hi mhaka ya leswi vanhu lava nga vuya hi wukaraweni va kalaka va nga tshembekanga; mina a na ha tsemeke nhlana anze ku yendliwa gandzelo la swakudla la nimadlambu.+

5 Hi nkama wa gandzelo la swakudla la nimadlambu,+ ni sekeleka lomu a ni rilela kona ni mpahla ya mina ya ku handzukela, se ni khizama ni tlakusa mavoko ya mina ka Yehovha Xikwembu xa mina. 6 Kutani ni ku: “Xikwembu xa mina, phela swa ni danisa ni za ni vona swi nga ni faneli ni ku khongela ka wena, Xikwembu xa mina, hikusa swidjoho swa hina i swinyingi hintamu naswona minandzu ya hina yi talile lakakuva yi fika ni le tilweni.+ 7 Hi ve ni nandzu wawukulu ku sukela ka nkama wa vavhovho va hina anze swoswi;+ naswona hi mhaka ya swihoxo swa hina, hina, tihosi ta hina ni vaprista va hina hi nyiketiwe ka voko la tihosi ta matiko, ka xipada,+ awukaraweni,+ ka ku tekeliwa minchumu ya hina*+ ni ku danisiwa, ku nga leswi hi swi vonaka namuntlha.+ 8 Kambe Yehovha Xikwembu xa hina, u hi kombe timpsalu swa nkamanyana hi ku pfumelela swaku hina hi nga sala hi huma awukaraweni ni hi ku hi yendla hi hanya na hi vhikeliwile ka ndhawu ya wena ya ku kwetsima,+ swaku u hi nyika ku tsaka, wena Xikwembu xa hina ni ku hi hefemulisanyana ka wukarawa la hina. 9 Hikusa hambileswi hi nga swikarawa,+ wena Xikwembu xa hina a wu hi tshikanga wukaraweni la hina; kambe u hi kombe lirhandzu phambheni ka tihosi ta Persiya,+ swaku ti hi pfuna hi tlhela hi yaka yindlo ya Xikwembu xa hina+ ni ku tlhela hi lulamisa leswi a swi hohlokelile* ni ku tlhela hi yaka muru wa ku hi vhikela aYuda ni le Yerusalema.

10 “Kambe swoswi Xikwembu xa hina, hi ta ku yini hi mhaka leyi? Hikusa hi tshike minawu ya wena, 11 leyi u nga hi nyika yona hi ku tirhisa vatirhi va wena ku nga vaprofeta, u ku: ‘Tiko leli mi nghenaka swaku mi ya li teka i tiko leli nga chaka, hi mhaka ya nsila ya vanhu va matiko, hi mhaka ya mintirho ya vona ya ku nyenyentsa; va tate tiko hi chaka la vona ku sukela ka magamu man’wani ku ya ka magamu man’wani.+ 12 Kutani mi nga tshiki vana va n’wina va tekiwa hi vana va vona, hambi vana va vona mi nga va tshiki va tekiwa hi vana va n’wina;+ mi nga tshuki mi yendla nchumu lexi nga ta va tisela ku rhula ni lexi nga ta yendla swaku swilo swi va fambela kahle,+ loko mi yendla leswo mi ta va ni matimba funtshi mi ta dla swaswinene leswi kumekaka ka tiko leli, mi tlhela mi li siyela vana va n’wina swaku li va tshomba hi masiku ni masiku.’ 13 Hambileswi hi nga kumana ni swikarhatu hi mhaka ya mintirho ya hina ya ku biha ni nandzu wa hina wawukulu, wena Xikwembu xa hina a wu hi khatisanga hi ku ya hi xihoxo xa hina,+ naswona u pfumelele van’wani va hina lava nga lani swaku hi pona.+ 14 Indjhe hi ta tlhela hi tlula minawu ya wena hi tekana ni vanhu lava yendlaka swilo leswi swa ku nyenyentsa?+ Indjhe a wu nge hi kwateli hintamu u za u hi helisa swa wugamu, u nga siyi munhu? 15 Yehovha Xikwembu xa Israyele, u lulamile+ hikusa hi ponile anze namuntlha. Swoswi hi nyime phambheni ka wena hi mhaka ya nandzu wa hina, hikusa a swi koteki ku nyima phambheni ka wena hi mhaka ya leswi.”+

10 Nkama Ezra na a khongela+ ni ku pfula xifuva xa yena, a a rila na a wumbuluke hansi phambheni ka yindlo ya Xikwembu xa ntiyiso, kuve xitshungu xaxikulu xa vavanuna, vavasati ni vana va Vayisrayele va hlengeletanile va mu rhendzela hikusa vanhu a va rila hi xiviti. 2 Kutani Xekaniya n’wana wa Yehiyele+ wa vana va Elamu+ a byela Ezra a ku: “A hi tshembekanga ka Xikwembu xa hina hi ku teka vasati va matiko.+ Kambe Vayisrayele va nga ha tsetseleliwa. 3 Swoswi a hi yendleni ntwananu ni Xikwembu xa hina,+ hi hlongola vavasati lava hinkwavu ni vana va vona hi ku landza leswi hi nga byeliwa hi Yehovha ni lava va chavaka nawu wa Xikwembu xa hina.+ A hi yendleni leswi Nawu wu swi hlayaka. 4 Suka u nyima, hikusa mhaka leyi yi lava wena, hina hi ta ku seketela. U nga chavi, yendla leswi faneleke.”

5 Se Ezra a sekeleka, a rhuma tindota ta vaprista, Valevhi ni Vayisrayele hinkwavu swaku va funga ku yendla leswi nga hlayiwa.+ Se va funga. 6 Kutani Ezra a suka phambheni ka yindlo ya Xikwembu xa ntiyiso, a nghena ka ndhawu ya ku dlela ka yona ya Yehohanani n’wana wa Eliyaxibi. Hambileswi a nga nghena kolanu a nga dlanga nchumu hambi ku phuza mati, hikusa a a li ku rileni hi mhaka ya leswi vanhu lava nga vuya hi wukaraweni va kalaka va nga tshembekanga.+

7 Se va byela tiko hinkwalu la Yuda ni la Yerusalema swaku hinkwavu lava nga vuya hi wukaraweni va hlengeletana aYerusalema; 8 naswona hi ku ya hi leswi nga bohiwa hi varhangeli* ni madoda, mun’wani ni mun’wani lweyi a a ta tsandzeka ku ta anze ku hundza masiku manharhu, a a ta tekeliwa minchumu ya yena hinkwayu naswona a a ta hlongoliwa xikarhi ka lava va nga vuya hi wukaraweni.+ 9 Na ku nge se hundza masiku manharhu vavanuna hinkwavu va Yuda na Benjamini va hlengeletanile aYerusalema, hi siku la wu 20, ka wheti ya wu 9. Vanhu hinkwavu a va tshame handle* ka yindlo ya Xikwembu xa ntiyiso, na va rhurhumela hi mhaka ya leswi nga yendleka ni hi mhaka ya mpfula leyi a yi na hintamu.

10 Se muprista Ezra a suka a nyima a ku: “N’wina a mi tshembekanga hikusa mi teke vasati va matiko,+ kutani mi yengetele nandzu wa Israyele. 11 Kutani tisoleni ka Yehovha Xikwembu xa vavhovho va n’wina, mi yendla ku rhandza ka yena. Tihambaniseni ni vanhu va matiko ni vavasati lava.”+ 12 Se vanhu hinkwavu va hlamula hi rito la ku twala va ku: “Hi ta yendla hinkwaswu leswi u swi hlayaka. 13 Kambe ku ni vanhu va vanyingi naswona i nkama wa timpfula. A swi koteki ku nyima handle naswona mhaka leyi a yi nge lulamisiwi hi siku lin’we kumbe mambirhi, hikusa hi delele hintamu. 14 Kutani hi kombela swaku varhangeli va hina ku va vona va salaka lani swaku va nyimela vanhu hinkwavu+ swaku va hi lulamisela mhaka leyi. Se hinkwavu lava va nga ka madoropa ya hina lava va nga teka vasati va matiko va ta vekeliwa nkama lowu va nga ta ta hi wona ni madoda ni vayavanyisi va doropa lin’wani ni lin’wani, anze Xikwembu xa hina xi pumba ku kwata ka xona kakukulu ka mhaka leyi.”

15 Kambe Yonatani n’wana wa Azayeli na Yahazeya n’wana wa Tikivha a va nga nyimi na yona mhaka leyi naswona Mexulami na Xabetayi+ lava a va li Valevhi a va va seketela. 16 Kambe lava nga vuya hi wukaraweni va yendla leswi ku nga twananiwa ka swona; se muprista Ezra ni varhangeli va mindjangu, hinkwavu ka vona hi ku ya hi mavito ya vona, va sungula ku kambisisa mhaka leyi hi siku la ku sungula la wheti ya wu 10; 17 hi siku la ku sungula la wheti ya ku sungula, va heta ku lulamisa mhaka ya vavanuna hinkwavu lava nga teka vasati va matiko. 18 Kutani ku tsumbuliwe swaku van’wani va vana va vaprista va teke vasati va matiko:+ Ka vana va Yexuwa+ n’wana wa Yehozadaki ni vamakwavu, ku tsumbuliwe Mazeya na Eliyezere na Yaribi na Gedaliya. 19 Kambe va tshembise ku hlongola vasati va vona naswona leswi a va ni nandzu, a va ta humesa nyempfu ya gandzelo ka ntlhambi wa vona swaku va hakela nandzu.+

20 Ka vana va Imiri+ a ku na Hanane na Zebadiya; 21 ka vana va Harimi+ a ku na Mazeya, Eliya, Xemaya, Yehiyele na Uziya; 22 ka vana va Paxahuri+ a ku na Eliyowenayi, Mazeya, Ismayeli, Nataneli, Yozabadi na Eliyaza. 23 Ka Valevhi, a ku na Yozabadi, Ximeyi, Kelaya (ku nga Kelita), Petahiya, Yuda na Eliyezere; 24 ka vayimbeleli a ku na Eliyaxibi; ka vagwardu va tinyanghwa a ku na Xalumi, Telemi na Uri.

25 Ka Israyele, ka vana va Paroxi,+ a ku na Ramiya, Iziya, Malikiya, Mijamini, Eliyazari, Malikiya na Benaya; 26 ka vana va Elamu+ a ku na Mataniya, Zakariya, Yehiyele,+ Abidi, Yeremoti na Eliya; 27 ka vana va Zatu+ a ku na Eliyowenayi, Eliyaxibi, Mataniya, Yeremoti, Zabadi na Aziza; 28 ka vana va Bebayi+ a ku na Yehohanani, Ananiya, Zabayi na Atilayi; 29 ka vana va Bani a ku na Mexulami, Maluki, Adaya, Yaxubi, Xeyali na Yeremoti; 30 ka vana va Pahati-Mowabu+ a ku na Adina, Kelali, Benaya, Mazeya, Mataniya, Bezaleli, Binuyi na Manasi; 31 ka vana va Harimi+ a ku na Eliyezere, Ixiya, Malikiya,+ Xemaya, Ximiyoni, 32 Benjamini, Maluki na Xemariya; 33 ka vana va Axumi+ a ku na Matenayi, Matata, Zabadi, Elifeleti, Yeremayi, Manasi na Ximeyi; 34 ka vana va Bani a ku na Madayi, Amirami, Uweli, 35 Benaya, Bedeya, Keluhi, 36 Vhaniya, Meremoti, Eliyaxibi, 37 Mataniya, Matenayi na Yasu; 38 ka vana va Binuyi a ku na Ximeyi, 39 Xelemiya, Natani, Adaya, 40 Makinadebayi, Xaxayi, Xarayi, 41 Azareli, Xelemiya, Xemariya, 42 Xalumi, Amariya na Yosefa; 43 ka vana va Nebo a ku na Yeyiyele, Matitiya, Zabadi, Zebina, Yadayi, Yuwele na Benaya. 44 Hinkwavu lava, a va teke vasati va matiko,+ kambe va va hlongolile ni vana va vona.+