HOSIYA
1 Yehovha a vulavule na mina Hosiya* n’wana wa Beri nkama a ku fuma Uziya,+ Yothamu,+ Akazi+ na Hezekiya,+ ku nga tihosi ta Yuda,+ ni hi nkama lowu a ku fuma Yerobuwamu+ n’wana wa Yowaxi,+ hosi ya Israyele. 2 Nkama Yehovha a nga sungula ku vulavula na mina, Yehovha a ni byele a ku: “Famba u ya chada ni nghwavani, yi ta ku psalela vana va ku kala va nga li va wena, hikusa tiko li tshike ku landzela Yehovha hi mhaka ya wunghwavani la lona.”+
3 Se ni famba ni ya chada na Gomeri n’wana wa Diblayimi, a gama a va ni nyimba a ni psalela n’wana wa djaha.
4 Yehovha a ni byela a ku: “Mu chule swaku i Yezreyeli,* hikusa ku nga li khale ni ta khatisa ndjangu wa Yewu+ hi mhaka ya ku halata ngati aYezreyeli naswona ni ta helisa wuhosi la yindlo ya Israyele.+ 5 Hi siku lolelo ni ta tshova ligubu la Israyele ka Nkova wa Yezreyeli.”
6 Kutani Gomeri a tlhela a va ni nyimba a gama a psala n’wana wa ntombhi. Se Xikwembu xi ni byela xi ku: “Mu chule swaku i Loruwama,* hikusa a ni nga ha ta tlhela ni va ni timpsalu+ ka yindlo ya Israyele, ni ta va hlongola.+ 7 Kambe ni ta va ni timpsalu ka vanhu va Yuda,+ ni ta va ponisa, mina Yehovha Xikwembu xa vona;+ a ni nga ta va ponisa hi ligubu kumbe hi xipada, kumbe hi nyimpi, kumbe hi makavhalu, kumbe hi vafambisi va makavhalu.”+
8 Loko Gomeri se a lumule Loruwama, a tlhele a va ni nyimba a psala n’wana wa djaha. 9 Se Xikwembu xi ni byela xi ku: “Mu chule swaku i Lowami,* hikusa n’wina a mi vanhu va mina naswona mina a ni nga ta va Xikwembu xa n’wina.
10 “Vanhu va Israyele va ta tala ku fana ni misava ya lwandle, leyi kalaka yi nga pimeki kumbe ku konteka.+ Se ka ndhawu leyi va nga byeliwa leswaku: ‘A mi vanhu va mina,’+ va ta byeliwa leswaku: ‘N’wina mi vana va Xikwembu lexi hanyaka.’+ 11 Vanhu va Yuda ni va Israyele va ta hlengeletana va va ntlawa wun’we,+ va ta tilangela murhangeli mun’we va huma tikweni, hikusa siku la Yezreyeli+ li ta va likulu.
2 “Byelani vamakwenu va xinuna mi ku: ‘Mi vanhu va mina!’*+
Ni vamakwenu va xisati mi ku: ‘N’wina vavasati lava nga kombiwa timpsalu!’*+
2 Mu nyikeni nandzu mamani wa n’wina; mu nyikeni nandzu,
Hikusa a hi nsati wa mina+ naswona mina a ni nuna wa yena.
A fanele a tshika wunghwavani leli a li yendlaka
A tlhela a tshika ni ku mbuyeta ka yena,*
3 Loko a nga tshiki ni ta mu hlivila a sala na a nga yambalanga nchumu, ku fana ni siku leli a nga psaliwa hi lona,
Ni ta mu yendla a fana ni mananga,
Ni ta mu yendla a fana ni tiko leli kalaka li nga na mati,
A ta fa hi torha.
4 A ni nga ta va ni timpsalu ka vana va yena,
Hikusa a va psale wunghwavanini.
5 Hikusa mamani wa vona a yendle wunghwavani.+
Mamani wa vona lweyi a nga va psala a yendle swa ku danisa,+ hikusa a te:
‘Ni ta landzelela swigangu swa mina,+
Leswi ni nyikaka pawu ni mati,
Ni mpahla ya mina ya ku yendliwa hi mavoya ni mpahla ya mina ya ku yendliwa hi panu,* mafurha ya mina ni vhinyu la mina.’*
6 Kutani ni ta pfala ndlela ya yena hi mimintwa;
Ni ta pfala ndlela ya yena hi maribye,
Leswaku a nga hundzi.
7 A ta landzelela swigangu swa yena, kambe a nga ta swi kuma;+
A ta swi lavetela, kambe a nga ta swi kuma.
Se a ta gama a ku: ‘Ni ta tlhelela ka nuna wa mina,*+
Hikusa nkama na na ha li na yena a swi ni fambela kahle ku tlula swoswi.’+
8 A a nga swi tivi swaku hi mina ni nga mu nyika trigu+ ni vhinyu la nyuwani ni mafurha,
Ni swaku hi mina ni nga mu nyika prata la linyingi
Ni woru, leswi va nga swi tirhisa nkama na va gandzela Bali.+
9 ‘Kutani ni ta ya ni ya teka trigu* la mina hi nkama wa ku tshovela
Ni vhinyu la mina la nyuwani hi nkama wa ku hlengeleta mawuvha,+
Ni ta teka mpahla ya mina ya ku yendliwa hi mavoya ni mpahla ya mina ya ku yendliwa hi panu leyi a a fanele a yambala yona.
10 Ni ta funungula* tingana ta yena swaku ti voniwa hi swigangu swa yena,
A ku nga ta va ni munhu lweyi a nga ta mu ponisa ka voko la mina.+
11 Ni ta helisa swilo hinkwaswu leswi mu tsakisaka,
Mafexta ya yena,+ ku kulungela ka yena ku huma ka n’weti, tisavata ta yena ni minkama ya yena ya ku tsaka.
12 Ni ta helisa minsinya ya yena ya mawuvha ni ya makuwa, leswi a nga vulavula hi swona a ku:
“Hi leswi swigangu swa mina a swi ni hakela hi swona”;
Ni ta swi txintxa swi va khwati,
Swi ta dliwa hi swiharhi.
13 Ni ta mu khatisa hi mhaka ya masiku lawa a a gandzela swifaniso swa Bali hi wona,+
Lani a a tisasekisela hi switlan’wani* swa yena ni swiphatiphati a gama a landzelela swigangu swa yena,
Kambe mina a ni khohlwile,’+ ku vula Yehovha.
14 ‘Kutani ni ta mu khongotela,
Ni ta mu yisa mananga,
Ni ta mu byela leswi nga ta tsakisa mbilu ya yena.
15 Hi nkama wolowo ni ta mu tlhelisela masimu ya yena ya mawuvha,+
Naswona Nkova wa Akori+ wu ta va nyanghwa wa ku nghena hi wona ka tiko la ntshembo;
A ta ni hlamula na a li koseniyani ku fana ni nkama na a ha li jovhem,
Ku fana ni siku leli a nga huma hi lona ka tiko la Gibita.+
16 Kutani hi siku lolelo,’ ku vula Yehovha,
‘U ta ni vitana Nuna wa mina, a wu nga ha ta ni vitana N’winyi wa mina.’*
17 ‘A ni nga ha ta mu pfumelela swaku a vitana mavito ya swifaniso swa Bali,+
Naswona mavito ya swona a ma nga ha ta khumbukiwa.+
18 Hi siku lolelo ni ta yendla ntwananu xikarhi ka vanhu va mina ni swiharhi,+
Ni swinyanyani ni swiharhi leswi fambaka hi khwirhi;+
Ni ta helisa ligubu, xipada ni nyimpi atikweni,+
Va ta tshama hi ku rhula na va hlayisekile.+
19 Ni ta va wa wena masiku hinkwawu;
Ni ta tshembeka ka wena ni tlhela ni ku khoma hi ndlela ya ku lulama,
Hi lirhandzu la ntiyiso ni hi timpsalu.+
20 Ni ta tshembeka ka wena, ni ta va wa wena,
Kunene u ta ni tiva, mina Yehovha.’+
21 ‘Hi siku lolelo ni ta swi yendla,’ ku vula Yehovha,
‘Ni ta yendla swaku matilo ma kuma leswi ma swi kombelaka,
Naswona wona ma ta humesela misava leswi yi swi kombelaka;+
22 Misava yi ta humesa leswi kombeliwaka hi trigu* ni vhinyu la nyuwani ni mafurha;
Se swona swi ta humesela Yezreyeli*+ leswi a nga swi kombela.
23 Ni ta mu byala ku fana ni mbewu amisaveni,+
Naswona ni ta mu komba timpsalu lweyi a kalaka a nga kombiwanga timpsalu;*
Lava kalaka va nga li vanhu va mina* ni ta va byela ni ku: “N’wina mi vanhu va mina,”+
Kasi vona va ta ku: “Wena u Xikwembu xa hina.”’”+
3 Kutani Yehovha a ni byela a ku: “Famba u ya tlhela u rhandza nsati wa wena lweyi a mbuyetaka,+ lweyi a rhandziwaka hi wanuna mun’wani, ku fana ni leswi Yehovha a rhandzaka vanhu va Israyele+ hambileswi va gandzelaka swikwembu swin’wani+ ni ku rhandza mabolu* lama nga hambiwa hi mawuvha ya ku womisiwa.”
2 Ni mu xave hi 15 wa swikhemu swa prata ni kolomuyani ka 195 wa makilu* ya maxalani.* 3 Se ni mu byela ni ku: “U ta va wa mina nkama wa ku leha. U nga tshuki u yendla wunghwavani, u nga tshuki u famba masangu ni wanuna mun’wani, na mina a ni nga ta famba masangu na wena.”
4 Hikusa vanhu va Israyele va ta tshama nkama wa wunyingi* na va nga na hosi,+ va nga na murhangeli, va nga yendli magandzelo, va nga li ni timhandzi ta swikwembu swa mavunhwa, va nga na efodi*+ ni swifaniso swa terafimi.+ 5 Se vanhu va Israyele va ta gama va vuya va ta lavetela Yehovha Xikwembu xa vona,+ na Davhida hosi ya vona+ naswona ka masiku ya wugamu va ta ta ka Yehovha na va rhurhumela hi ku lava ku kombiwa wunene la yena.+
4 Yingisani rito la Yehovha, N’wina vanhu va Israyele,
Yehovha a ni mhaka leyi a lavaka ku yi thetha ni lava tshamaka atikweni,+
Hikusa a va tshembeki, a va na lirhandzu la ntiyiso naswona a va xi tivi Xikwembu.+
2 Wufakazi la mavunhwa, ku hemba,+ ku dlaya,+
Ku yiva ni ku mbuyeta+ swi tale hintamu,
Va tshamela ku halata ngati.+
3 Tiko li ta rila hi mhaka ya leswo+
Naswona lava tshamaka atikweni va ta hela ntamu;
Swiharhi ni swinyanyani,
Hambi ni tihlampfi ta le lwandle, swi ta fa.
4 “Kambe ku nga tshuki ku va ni munhu lweyi a holovaka kumbe ku sola mun’wani,+
Hikusa mi fana ni vanhu lava holovisaka muprista.+
5 Mi ta wa, na dlambu li vona,
Na yena muprofeta a ta wa na n’wina, ingaku mo famba ka munyama.
Ni ta dlaya mamani wa n’wina.
6 Vanhu va mina va ta dlayiwa, hikusa a va ni tivi.
Leswi va kalaka va nga swi lavi ku ni tiva,+
Na mina ni ta va tshikisa ku va vaprista va mina;
Naswona leswi va nga khohlwa nawu wa Xikwembu xa vona,+
Na mina ni ta va khohlwa vana va vona.
7 Nkama vaprista va yaka va tala, va ya va ni djohela swinene.+
Ni ta txintxa ku dzuneka ka vona ku va tingana.*
8 Loko vanhu va mina va djoha, vaprista va dla nyama ya magandzelo ya kona,
Va hisekela ku yendla swa ku biha.
9 Leswi swi nga ta yendleka ka vanhu swi ta yendleka ni ka vaprista;
Ni ta yendla swaku va tihlamulela hi mhaka ya mintirho ya vona,
Ni ta va khatisa hi mhaka ya swidjoho swa vona.+
10 Va ta dla kambe a va nge xurhi.+
Va ta yendla wunghwavani kambe a va nga ta va ni vana,+
Hikusa a va mu hloniphi Yehovha.
11 Wunghwavani, vhinyu la khale ni vhinyu la nyuwani
Swi yendla swaku munhu a nga swi lavi ku yendla swaswinene.+
12 Vanhu va mina va vutisa ka swikwembu swa vona swa ku yendliwa hi timhandzi,
Va yendla leswi nhonga* ya vona yi va byelaka swona;
Hikusa wunghwavani la va djikisa,
Va yala ku tiveka hansi ka Xikwembu xa vona hi mhaka ya wunghwavani la vona.
13 Va yendla magandzelo ahenhla ka tintshava,+
Va tlhela va hisa magandzelo ka maganga,
Ahansi ka nsinya lowu vitaniwaka oku, ni lowu vitaniwaka xitoraki ni minsinya hinkwayu yayikulu,+
Hikusa mindzhuti ya yona i yinene.
Hi leswo swi yendlaka swaku vana va n’wina va tintombhi va yendla wunghwavani
Ni vamamanyani* va n’wina va mbuyeta.
14 A ni nga ta va khatisa vana va n’wina va tintombhi hi mhaka ya wunghwavani la vona,
Ni vamamanyani va n’wina hi mhaka ya ku mbuyeta ka vona.
Hikusa vavanuna va famba ni tinghwavani,
Va yendla magandzelo ni tinghwavani ta le tempeleni;
Vanhu volavo va ku kala va nga twisisi+ va ta helisiwa.
15 Hambileswi wena Israyele u yendlaka wunghwavani,+
Wena Yuda a wu fanelanga u va ni nandzu wa ku fana ni lowo.+
Mi nga yi aJiligali+ kumbe aBeti-Avheni,+
Naswona mi nga fungi mi ku: ‘Na funga hi Yehovha Xikwembu lexi hanyaka!’+
16 Hikusa Israyele a tiwomise nhloko ku fana ni homu leyi tiwomisaka nhloko.+
Indjhe Yehovha a ta va risa ku fana ni xihon’wani lexi nga ka ndhawu ya ku lusela ka yona leyi nga pfuleka?*
17 Efrayimi a rhandza swikwembu.+
Mu tshikeni!
Tihosi* ta yena ti swi rhandza swinene swilo swa ku danisa.+
19 Moya wu ta mu phutsela* hi timpapa ta wona,
Va ta dana hi mhaka ya magandzelo ya vona.”
5 “Twanani leswi, n’wina vaprista,+
Yingisani, n’wina vanhu va Israyele,
Yingisani, n’wina ndjangu wa hosi,
Mi ta yavanyisiwa;
Hikusa mi ntlhamu aMizpa
Ni redi leli nga yandlaliwa ahenhla ka Tabori.+
3 Na mu tiva Efrayimi,
Israyele a nge ni tumbeleli.
Hikusa wena Efrayimi u yendle wunghwavani;
Na yena Israyele a tichakisile.+
4 Mintirho ya vona a yi va pfumeleli swaku va tlhelela ka Xikwembu xa vona,
Hikusa ku ni ntungu wa wunghwavani xikarhi ka vona;+
Funtshi a va na mhaka na Yehovha.
5 Ku tibyela ka Israyele ku nyikele wufakazi leli lwisanaka na yena;+
Israyele na Efrayimi va wisiwe hi swidjoho swa vona,
Na yena Yuda a we xikan’we na vona.+
6 Va fambe ni ntlhambi wa vona wa tinyempfu ni wa tihomu, va lavetela Yehovha,
Kambe a va mu kumanga.
A va tshikile.+
Kutani hi wheti yin’we ntsena va ta helisiwa ni tshomba* la vona.*
8 Chayani limhondzo+ aJibiya, mi chaya mhalamhala* aRama!+
Vangani guwa* la nyimpi aBeti-Avheni,+ rhangela wena Benjamini!
9 Wena Efrayimi, vanhu va ta chava siku leli u nga ta khatisiwa hi lona.+
Ni byele tinxaka ta Israyele leswi nga ta humelela ka tona.
10 Varhangeli va Yuda va fana ni lava susaka xa ku markara hi xona ndhawu.*+
Ni ta chulula ku kwata ka mina henhla ka vona ku fana ni mati.
11 Efrayimi a karhatekile, a peziwa hi ku yavanyisiwa ka yena,
Hikusa a a tinyimisele ku landzelela nala wa yena.+
12 A ni fana ni muhlwa* lowu wonhetelaka ka Efrayimi
Ni tlhela ni fana ni nchumu wa ku bola ka vanhu va Yuda.
13 Nkama Efrayimi a nga vona mavabyi ya yena, ni nkama Yuda a nga vona xilondza xa yena,
Efrayimi a ye aAsiriya,+ a rhume vanhu ka hosi leyikulu.
Kambe yona a yi swi kotanga ku mi daha,
Yi tsandzekile ku holisa xilondza xa n’wina.
14 Ni ta fana ni xinghonyamani ka Efrayimi,
Ni nghonyama ya matimba ka vanhu va Yuda.
Ni ta va phatlulela, ni va rhwala;+
Ni famba na vona funtshi a ku na munhu lweyi a nga ta va ponisa.+
15 Ni ta famba ni tlhelela ka ndhawu ya mina anze va khatisiwa hi mhaka ya nandzu wa vona,
Se va ta lava swaku ni va pfuna.+
Va ta ni lavetela loko va li ku hluphekeni.”+
6 “Tanani, a hi tlheleleni ka Yehovha,
Hikusa a hi phatlulelile,+ kambe a ta hi daha.
A hi bile, kambe a ta bohelela swilondza swa hina.
2 A ta hi pfuxa loko se ku hundze masiku mambirhi.
Hi siku la wunharhu a ta hi nyimisa,
Se hi ta hanya phambheni ka yena.
3 Hi ta tiva Yehovha, hi ta lwela ku mu tiva.
Ku fana ni dlambu leli humaka nimixo, ha tiyiseka swaku a ta ta ka hina;
A ta ta ka hina ku fana ni mpfula leyi naka hi matimba,
Ku fana ni mpfula leyi naka swaku yi tsakamisa misava hi nkama lowu minchumu yi sungulaka ku hluka.”
4 “Se ni ta ku yini hi wena Efrayimi?
Ni ta yendla yini hi wena Yuda?
Hikusa lirhandzu la n’wina li fana ni marhefu ya nimixo,
Li fana ni mberha* leyi hantlaka yi nyamalala.
5 Hi leswo swi nga ta yendla swaku ni mi helisa hi ku tirhisa vaprofeta;+
Ni ta mi dlaya hi marito ya nomo wa mina.+
Ku yavanyisiwa ka n’wina ku ta phatima ku fana ni ku voninga.+
6 Kambe ni tsakisiwa hi ku va mi ni rhandza ku nga li hi magandzelo,
Ni ku va mi ni tiva mina Xikwembu ku nga li magandzelo ya ku hisiwa.+
7 Kambe vanhu va mina ku fana ni vanhu lava nga ni xidjoho, va tlule ntwananu wa mina.+
Va ni xengile ka tindhawu toleto.
8 Jiliyadi i doropa la vanhu lava yendlaka swa ku biha,+
I doropa leli dlayetelaka vanhu va vanyingi.+
9 Vaprista va fana ni ntlawa wa swigevenga leswi tumbelelaka vanhu.
Va dlaya vanhu ka ndlela leyi yaka Xikemi,+
Leswi va swi yendlaka swa danisa.
10 Ni vone nchumu lexi tsemaka nhlana ka vanhu va Israyele.
11 Kambe wena Yuda, u vekeliwe nkama, u ta hlengeletiwa ku fana ni leswi hlengeletiwaka hi nkama wa ku tshovela,
Nkama ni nga ta vuyisa vanhu va mina lava a va li wukaraweni.”+
7 “Ka nkama lowu ni nga ta daha Israyele,
Xidjoho xa Efrayimi xi ta voneka,+
Ni swilo swa ku biha swa Samariya swi ta voneka.+
Hikusa va hanya hi wukanganyisi;+
Vayivi va pfhanya va nghena ka miminti kasi hala handle swigevenga swa wonhetela.+
2 Kambe a va swi voni swaku wubihi la vona hinkwalu ni ta li khumbuka.+
Va tiphasile hi swidjoho swa vona;
Swi yo mphaa, aphambheni ka mina.
3 Va tsakisa hosi hi wubihi la vona,
Ni varhangeli hi mavunhwa ya vona.
4 Hinkwavu va mbuyeta,
Va psha, va fana ni ndzilu lowu tshiveliwaka hi lweyi a hambaka mapawu,
Lweyi a tshikaka ku wu hlanganyeta loko se a pfuve mbila anze yi kukumuka.
5 Hi siku la hosi ya mina, varhangeli va vabyile,
Va kwatile hi mhaka ya leswi va nga phuza vhinyu.+
Hosi i munghanu wa lava poyilanaka.
6 Timbilu ta vona ti hisa ku fana ni ndzilu wa muhambi wa mapawu hikusa va lava ku yendla swilo swa ku biha ntsena.*
Muhambi wa mapawu a yetlela wusiku hinkwalu;
Nimixo ndzilu wa yena wu pfurha swinene.
7 Hinkwavu va hisa ku fana ni ndzilu wa muhambi wa mapawu,
Va dlaya tihosi* ta vona.
8 Efrayimi a tipatsa ni matiko.+
Efrayimi a fana ni bolu la redondu leli nga woxiwa ka tlhelo lin’we li nga hundzuketiwi seni kun’wani.
9 Vanhu va ku ta hi ka matiko man’wani va mu hete ntamu,+ kambe a nga swi tivi.
Misisi ya yena yi txintxe yi va ya ku basa, kambe a nga swi tsumbuli.
10 Ku tibyela ka vanhu va Israyele ku nyikele wufakazi leli lwisanaka na vona,+
Kambe a va tlhelelanga ka Yehovha Xikwembu xa vona,+
Naswona a va mu lavetelanga hambiloko va kumana ni makhombo.
11 Efrayimi a fana ni tuva la ku kala li nga tlharihanga, leli kalaka li nga twisisi.*+
A kombele ku pfuniwa aGibita;+ ni le Asiriya.+
12 Hinkwaku lomu va yaka kona, ni ta va phasa hi redi la mina.
Ni ta va phasa ku fana ni swinyanyani.
Ni ta va laya hi ku ya hi switsundzuxu leswi va nga nyikiwa swona ka nhlengeletanu ya vona.+
13 Khombo ka vona hikusa va ni balekile!
Va ta weliwa hi khombo hikusa a va wu yingisanga nawu wa mina!
A ni lava ku va ponisa kambe va vulavule mavunhwa hi mina.+
14 A va ni kombelanga hi timbilu ta vona hinkwatu swaku ni va pfuna,+
Hambileswi a va tshamela ku rila ka mibedu ya vona.
Va titsemelela hi ku lava trigu* ni vhinyu la nyuwani;
Va ni tshikile.
15 Hambiloko ni va laya ni tlhela ni va nyika matimba,
Va yendla maplanu* ya ku biha, a va na mhaka na mina.
16 Va vuyile, kambe a va vuyanga ka wugandzeli la ntiyiso;
A va nga tshembeki ku fana ni ligubu la ku kala li nga tiyanga kahle.+
Varhangeli va vona va ta dlayiwa hi xipada hi mhaka ya nkanu ya vona.
Hi leswo swi nga ta yendla swaku va poyiliwa ka tiko la Gibita.”+
8 “Chayani limhondzo!+
2 Va huwelela ka mina va ku: ‘Wena u Xikwembu xa hina, hina Israyele ha ku tiva!’+
3 Israyele a tshike ku yendla swaswinene.+
Nala a a mu txatxi.
4 Va tivekele tihosi na va nga ni vutisanga nchumu.
Va tivekele varhangeli na ni nga va pfumelelanga.
5 Wena Samariya, xihon’wani xa wena a xi yamukeleki.+
Ni va kwatele hintamu.+
Kasi va ta va ni nandzu anze siku muni ke?
6 Hikusa xihon’wani xolexo xi ta hi Israyele.
A xi yendliwanga hi Xikwembu, xi yendliwe hi lweyi a tivaka ku yendla ntirho wa mavoko;
Xihon’wani xa Samariya xi ta fayeteliwa xi va swikhemu.
7 Hikusa va yendla swa ku biha ku fana ni ku byala moya,
Kutani va ta tshovela swa ku biha leswi fanaka ni xidzedze.+
A va tshovelanga nchumu;+
Leswi milaka a swi humesi mpupu.
Loko ko tshuka ku va ni leswi nga ta huma swi ta dliwa hi vanhu va ku kala a nga va tivi.*+
8 Israyele a ta mintiwa hi valala va yena.+
Va ta va xikarhi ka matiko,+
Ku fana ni xibya xa ku kala xi nga laviwi.
9 Hikusa va ye aAsiriya,+ ku fana ni mbongolo ya khwati leyi tshamaka yoxe.
Efrayimi a ye a ya lava tinghwavani.+
10 Hambileswi va lavetelaka tinghwavani leti axikarhi ka matiko,
Ni ta va hlengeleta;
Va ta sungula ku hlupheka+ hi mhaka ya ndzhwalu lowu hosi ni varhangeli va nga ta va rhwexa wona.
11 Hikusa Efrayimi a yengetele maaltari leswaku a djoha.+
I maaltari ya yena ma mu djohisaka.+
12 Ni mu tsalele minawu ya yinyingi,
Kambe yi voniwe na yi nga li ya nchumu.+
13 Va ni yendlela magandzelo va gama va dla nyama ya kona,
Kambe mina Yehovha a ni ma tsakeli.+
Ni ta khumbuka xihoxo xa vona kutani ni va khatisa hi mhaka ya swidjoho swa vona.+
14 Israyele a khohlwe Muvumbi wa yena+ kutani a yaka titempele,+
Yuda a yengetele madoropa lawa ma nga ni mimuru ya ku tiya ya ku ma vhikela.+
Kambe ni ta rhumela ndzilu ka madoropa wolawo,
Se wu ta helisa tiyindlo hinkwatu leti nga ka wona.”+
9 “U nga tsaki wena Israyele,+
U nga tsaki ku fana ni vanhu van’wani.
Hikusa u tshike Xikwembu xa wena hi mhaka ya wunghwavani.+
U rhandze muholo wa wunghwavani la wena leli a wu li yendla hinkwaku lomu ku phepheriwaka kona trigu.*+
2 Kambe ndhawu ya ku phephera ka yona ni xikamelo xa vhinyu a swi nga ta mu wundla,
Vhinyu la nyuwani li ta mu helela.+
3 A va nge tami va tshama ka tiko la Yehovha;+
Kambe Efrayimi a ta tlhelela aGibita,
Loko se va li aAsiriya va ta dla swa ku kala swi nga basanga.+
Ma ta fana ni pawu leli dliwaka lani ku nga fiwa;
Hinkwavu lava li dlaka va ta tichakisa.
Hikusa pawu la vona i la vona ntsena;
A li nge ngheni ka yindlo ya Yehovha.
5 Mi ta yendla yini hi siku la ku tlhangana hi lona,
Hi siku la ku kulungela fexta* la Yehovha?
6 Va ta boheka ku baleka hi mhaka ya khombo.+
Gibita a ta va hlengeleta,+ kasi Memfisi a ta va txelela.+
Mfava wu ta teketela minchumu ya vona ya lisima leyi nga yendliwa hi prata,
Ku ta mila mimintwa* ka matende ya vona.
Muprofeta wa vona a ta va xiphunta, wanuna lweyi a vulaka swaku leswi a swi hlayaka swi ta hi ka Xikwembu a ta hlanya;
Leswi va nga ni swidjoho swa swinyingi, va ta va ni valala va vanyingi.”
8 Murindzi+ wa Efrayimi a a li ni Xikwembu xa mina.+
Kambe swoswi tindlela hinkwatu ta vaprofeta va yena+ ti fana ni ntlhamu wa muphasi wa swinyanyani;
Va nyenyana ka yindlo ya Xikwembu xa yena.
9 Va nghene hi nhloko ka ku yendla swa ku biha ku fana ni ka masiku ya Jibiya.+
Xikwembu xi ta khumbuka swidjoho swa vona kutani xi va khatisa hi mhaka ya swona.+
10 “Nkama ni nga kuma Israyele a swi fana ni loko ni kume mawuvha amananga.+
Ni vone vavhovho va n’wina ku fana ni makuwa ya ku sungula ka nsinya wa nkuwa.
Kambe vona va ye ka Bali wa Peyori;+
Va tinyiketele ka nchumu xa ku danisa,*+
Kutani va nyenyentsa ku fana ni xikwembu lexi va xi gandzelaka.
11 Ku phatima ka Efrayimi ku hahile ku fana ni xinyanyani;
12 Hambiloko vo kulisa vana,
Ni ta va tekela ku za ku nga ha sali munhu;+
Va ta kumiwa hi khombo nkama ni nga ta va tshika!+
13 Efrayimi lweyi a a li ka ndhawu yayinene,* a a fana na Tiru ka mina;+
Swoswi Efrayimi a fanele a humesa vana va yena va madjaha swaku va ta dlayiwa.”
14 Yehovha, va nyiki leswi va fanelaka;
Tinyimba ta vona a ti hume ni mavele ya vona ma nga humi mafi.
15 “Wubihi la vona hinkwalu va li yendle aJiligali,+ na va nyenya hi mhaka ya leswo.
Ni ta va hlongola ka yindlo ya mina hi mhaka ya mintirho ya vona ya ku biha.+
A ni nga ha ta va rhandza;+
Varhangeli va vona hinkwavu va tiwomisa tinhloko.
16 Efrayimi a ta wisiwa ku fana ni nsinya.+
Timintsu ta vona ti ta woma, a va nge he psali mihandzu.
Hambiloko vo psala vana, ni ta va dlaya vana va vona lava va va rhandzaka.”
17 Xikwembu xa mina xi ta va tshika,
Hikusa a va xi yingisanga,+
Kutani va ta famba va pepetseka xikarhi ka matiko.+
10 “Israyele a fana ni nsinya wa ku bola* wa mawuvha lowu psalaka mihandzu.+
Loko mihandzu ya yena yi ya yi tala, a yengesela ni maaltari ya yena.+
Loko tiko la yena li tshovela swa swinyingi, a yendla mapilari ya ku saseka lawa a nga ma txintxa ma va swikwembu.+
2 Mbilu ya vona yi ni wukanganyisi;
Va ta nyikiwa nandzu.
Ku ni lweyi a nga ta tshova maaltari ya vona a tlhela a helisa timhandzi leti ku gandzeliwaka ka tona.
3 Va ta ku: ‘A hi na hosi+ hikusa a hi mu chavanga Yehovha.
Hambiloko a hi ni hosi, a yi ta hi yendlela yini?’
4 Va vulavula marito ya ku kala ma nga pfuni nchumu, va yendla switshembiso+ swa mavunhwa ni mintwananu;
Ku yavanyisa ka vona ku fana ni swinsinyani leswi nga ni vhenenu amasin’wini.+
5 Lava tshamaka aSamariya va ta twa ku vava hi mhaka ya xifaniso xa xihon’wani xa le Beti-Avheni.+
Vanhu va xona va ta xi rilela,
Ku patsa ni vaprista va xona lava a va xi tsakela, hi mhaka ya ku phatima ka xona,
Hikusa xi ta ya awukaraweni.
6 Xi ta yisiwa aAsiriya xi ya nyikiwa hosi leyikulu.+
Efrayimi a ta danisiwa,
Kutani Israyele a ta dana hi mhaka ya xona.+
8 Tindhawu ta ku tlakuka ta le Beti-Avheni+ leti yendlaka swaku Israyele a djoha+ ti ta helisiwa.+
Maaltari ya vona ma ta mila mimintwa.+
Vanhu va ta byela tintshava va ku: ‘Hi mbhonyeni!’
Va byela maganga va ku: ‘Hi weleni!’+
9 Wena Israyele u djohile+ ku sukela ka masiku ya* Jibiya.
Vanhu va kona a va txintxanga.
Nyimpi a yi va hetanga vana va ku kala va nga lulamanga aJibiya.
10 Ni ta va khatisa loko ni swi lava.
Vanhu va ta hlengeletana swaku va lwa na vona,
Va ta khatisiwa hi ku rhwala minandzu ya vona ya yimbirhi.*
11 Efrayimi a a li homu* leyi nga djondzisiwa kahle leyi a yi rhandza ku hula,
Kutani a ni zanga ni mu tlhateka kange.*
Kambe swoswi ni ta yendla swaku ku va ni lweyi a tirhisaka Efrayimi yi nga chayi.*+
Yuda a ta rima; Yakobe a ta fayetela mabuvu.*
12 Byalani ku lulama mi tshovela lirhandzu la ntiyiso.
Rimani masimu lama rimekaka+
Na ka ha ni nkama wa ku lavetela Yehovha,+
Anze a fika swaku a ta mi djondzisa hi ku lulama.+
13 Kambe mi rime swa ku biha,
Mi tshovele swa ku kala swi nga lulamanga,+
Mi tshovele mihandzu ya ku kanganyisa ka n’wina;
Hikusa mi titshembe hintamu,
Mi tshemba ni masonchwa ya n’wina.
14 Vanhu va n’wina va ta hlaseliwa,
Madoropa ya n’wina lawa ma nga ni mimuru ya ku tiya ma ta helisiwa,+
Ku fana ni ku helisiwa ka yindlo ya Aribeli hi Xalmani
Hi siku la nyimpi, nkama vamamani va nga dlayeteliwa ni vana va vona.
15 Leswi hi leswi u nga ta yendliwa swona wena Betele,+ hi mhaka ya wubihi la wena lalikulu.
Hosi ya Israyele yi ta helisiwa* hi nkama lowu li yaka ku xeni.”+
11 “Nkama Israyele a ha li mufana a ni mu rhandza,+
Ni vitane n’wana wa mina a huma ka tiko la Gibita.+
3 Kambe hi mina ni nga dedisa Efrayimi,+ ni mu tlakula;+
Kambe a va swi khumbukanga swaku ni va hanyisile.
4 Ni tirhise lirhandzu ni timpsalu ku fana ni magoda swaku ni va koka va ta ka mina;+
A ni fana ni lweyi a susaka kange ka tinhamu ta vona,
Naswona hi lirhandzu ni va tisele swakudla.
5 A va nge tlheleli ka tiko la Gibita kambe Asiriya a ta va hosi ya vona,+
Hikusa va yalile ku tlhelela ka mina.+
6 Xipada xi ta rhendzeleka ka doropa la yena+
Xi ta mu helisa xi tlhela xi helisa ni swa ku khiya hi swona tinyanghwa ta doropa hi mhaka ya maplanu* ya vona ya ku biha.+
7 Vanhu va mina va tolovele ku kala va nga tshembeki ka mina.+
Hambiloko va vitaniwa swaku va tlhelela ka lweyi wa ku tlakuka,* a nga kona ni mun’we lweyi a yingisaka.
8 Ni nga ku tshikisa ku yini, wena Efrayimi?+
Ni nga ku nyikelisa ku yini ka valala va wena, wena Israyele?
Ni nga ku khomisa ku yini ku fana na Adima?
Ni nga ku yendlisa ku yini u fana na Zeboyimi?+
Mbilu ya mina se yi txintxile;
Ni ni ntwelawusiwana.+
9 Ni ta tikhoma ka ku kwata ka mina kakukulu.
A ni nga ha ta mu helisa Efrayimi,+
Hikusa mina ni Xikwembu a ni munhu,
Ni Mukwetsimi xikarhi ka wena;
A ni nge lwi na wena na ni kwatile.
10 Va ta landzela Yehovha, kutani a ta bonga ku fana ni nghonyama;+
Loko a bonga, vana va yena va ta ta hi wupeladlambu na va rhurhumela.+
11 Nkama va nga ta huma aGibita va ta rhurhumela ku fana ni xinyanyani,
Va ta fana ni tuva nkama va nga ta huma ka tiko la Asiriya;+
Kutani ni ta va tshamisa ka tiyindlo ta vona,” ku vula Yehovha.+
12 “Efrayimi a tshamela ku ni kanganyisa,
Hinkwaku lomu ni yaka kona ni vona wukanganyisi la vanhu va Israyele.+
Kambe Yuda wa ha famba ni Xikwembu,
Naswona wa tshembeka ka Lweyi A Kwetsimaka Hintamu.”+
12 “Efrayimi a tshemba swa ku kala swi nga pfuni nchumu.*
A txatxa moya wa le wuxeni siku hinkwalu.
A tshamela ku hemba ni ku vanga tinyimpi.
Va yendla ntwananu na Asiriya+ va gama va teka mafurha va ma yisa aGibita.+
2 Yehovha a ni mhaka leyi a lavaka ku yi thetha na Yuda;+
A lava swaku Yakobe a tihlamulela hi mhaka ya mintirho ya yena,
A ta yendla swaku a hakeliwa hi ku ya hi mintirho ya yena.+
3 A khome makwavu hi xirhendze na wa ha li khwirhini,+
A lwe ni Xikwembu hi matimba ya yena hinkwawu.+
4 A nga tshikanga ku lwa ni ntsumi anze a yi hlula.
A rilile a kombela ku katekisiwa.”+
Xikwembu xi mu kume aBetele naswona xi vulavule na hina koseniyani,+
5 Yehovha Xikwembu lexi rhangelaka tintsumi,+
6 “Tlhelela ka Xikwembu xa wena,+
Kombisa lirhandzu la ntiyiso ni wululami,+
U tshemba Xikwembu xa wena minkama hinkwayu.
A va nge kumi xihoxo kumbe xidjoho ka hinkwaswu leswi ni swi yendlaka.’
9 Kambe hi mina Yehovha Xikwembu xa wena ku sukela nkama wa ha li ka tiko la Gibita.+
Ni ta tlhela ni yendla swaku u tshama ka matende
Ku fana ni ka masiku ya fexta.
10 Ni khulume ni vaprofeta,+
Ni yengetele minchumu leyi a ni va komba yona hi ndlela ya singita,*
Ni tirhise vaprofeta swaku ni vulavula na vona* hi ku tirhisa swifananiso.
11 Vanhu va le Jiliyadi va kanganyisana*+ naswona a va na ntiyiso.
AJiligali va yendle magandzelo hi tihomu.+
Maaltari ya vona ma fana ni swidulu swa maribye anhoveni.+
12 Yakobe a balekile a ya ka tiko la Aramu;*+
Israyele+ a tirhe koseniyani swaku a ta kuma nsati,+
A luse tinyempfu swaku a ta kuma nsati.+
14 Efrayimi a xi kwatise hintamu Xikwembu;+
A ha ni nandzu wa ngati;
Hosi ya yena yi ta mu khatisa hi mhaka ya leswi a nga yi tisela xirhuku.”+
13 “Loko Efrayimi a vulavula, vanhu a va rhurhumela hi ku chava;
A a hloniphiwa aIsrayele.+
Kambe a ve ni nandzu hi mhaka ya ku gandzela Bali+ kutani a fa.
2 Swoswi va yendla xidjoho xin’wani,
Va yendla swikwembu hi prata;+
Va yendla swifaniso swa ku saseka, ku nga mintirho ya mavoko ya vona.
Va swi byela va ku: ‘Vanhu lava yendlaka magandzelo a va bejari* swihon’wani swa kona.’+
3 Kutani va ta fana ni marhefu ya nimixo,
Va ta fana ni mberha* leyi nyamalalaka na ka ha li mixo,
Va ta fana ni muhungu lowu biwaka hi xidzedze ka ndhawu leyi ku phepheriwaka ka yona,
Ni ximusi lexi humaka hi ka mbhovo lowu nga henhla ka yindlo.
4 Kambe hi mina Yehovha Xikwembu xa wena ku sukela nkama na wa ha li ka tiko la Gibita;+
A wu nga tivi Xikwembu xin’wani loko ku nga li mina,
Naswona a ku na muponisi mun’wani loko ku nga li mina.+
5 Ni ku hlayisile amananga,+ ka tiko la djandza.
6 Va dle va xurha lani a va risiwa kona,+
Loko se va xurhile va game va sungula ku tibyela.
Se va ni khohlwa.+
8 Ni ta va hlasela ku fana ni ursu* leli nga lahlekeliwa hi vana va lona,
Ni ta va handzulela swifuva* swa vona.
Ni ta va helisa ku fana ni nghonyama;
Xiharhi xa nhova xi ta va phatlulela.
9 Xi ta ku helisa, wena Israyele,
Hikusa u ni tshikile, mina mupfuni wa wena.
10 Yi kwini hosi ya wena swaku yi ku ponisa ka madoropa ya wena hinkwawu,+
Ni tihosi* ta wena, leti u nga hlaya u ku:
‘Ni nyiki hosi ni varhangeli’?+
12 Nandzu wa Efrayimi wu phutseliwile;*
Xidjoho xa yena xi hlayisiwile.
13 A ta twa ku vava ka ku fana ni loku wansati a ku twaka loko a lava ku psala.*
Kambe i n’wana wa ku kala a nga tlharihanga;
Hikusa loko ku fika nkama wa leswaku a psaliwa a nga lavi ku huma.
14 Ni ta va ponisa ka matimba ya Sirha;
Ni ta va ponisa ka lifu.+
Wena Lifu,+ vhenenu la wena li kwini ke?
Wena Sirha,*+ ma kwini matimba ya wena ya ku helisa?
A ni nga ta va ni ntwelawusiwana.
15 Hambiloko o tala ku fana ni tinhlanga,
Moya wa le wuxeni wu ta ta, moya wa Yehovha,
Wu ta ta na wu huma hi mananga, wu ta womisa xihlovo ni xinambyani xa yena.
Ku ni lweyi a nga ta teketela minchumu ya yena hinkwayu.+
16 Samariya a ta voniwa na a ni nandzu+ hikusa a djikele Xikwembu xa yena.+
Va ta dlayiwa hi xipada,+
Vana va vona va ta tsemeleliwa,
Vasati va vona lava nga ni tinyimba va ta handzuleliwa makhwirhi.”
14 “Tlhelela ka Yehovha Xikwembu xa wena, wena Israyele,+
Hikusa u wile hi mhaka ya xidjoho xa wena.
2 Tlhelela ka Yehovha,
U fika u ku: ‘Hi rivaleli xidjoho xa hina,+ u yamukela swaswinene leswi hi ku telaka na swona,
Hi ta ku dzunisa hi minomo ya hina+ ku fana ni leswi ku yendliwaka magandzelo hi swihon’wani.*
3 Asiriya a nge hi ponisi.+
A hi nge fambi hi makavhalu,+
A hi nga ta vula ka xikwembu lexi hi nga tiyendlela xona hi ku: “U Xikwembu xa hina,”
Hikusa hi wena u mu kombaka timpsalu n’wana lweyi a kalaka a nga na vapsali.’*+
4 Ni ta daha* ku kala ku tshembeka ka vona.+
5 Ni ta fana ni mberha* ka Israyele;
A ta saseka ku fana ni xiluva,
A ta dzima timintsu ta yena ku fana ni timintsu ta minsinya ya le Lebanoni.
6 Tigadja ta yena tatitsongo ti ta hluka,
A ta saseka ku fana ni nsinya wa wolivhera,
Ku nun’hwela ka yena ku ta fana ni ka nsinya wa le Lebanoni.
7 Va ta tlhela va tshama hansi ka ndzhuti wa yena.
Va ta byala trigu, va hluka ku fana ni nsinya wa mawuvha.+
A ta tiviwa* ngopfu ku fana ni vhinyu la le Lebanoni.
8 Efrayimi a ta ku: ‘A na ha lavi ku twa nchumu hi ku gandzela swifaniso.’+
Ni ta mu hlamula, ni mu hlayisa.+
Ni ta fana ni nsinya wawukulu wa yunipa.
A ta kuma mihandzu ya yena ka mina.”
9 Lweyi a nga tlhariha a a twisisi minchumu leyi.
Lweyi a twisisaka a a tivi swilo leswi.
Hikusa tindlela ta Yehovha i tinene,+
Naswona lava va ku lulama va ta famba ka tona;
Kambe vadjohi va ta tiphariheta va wa ka tona.
I magomiselo ya vito leli nge Hoxaya, leli vulaka “Ku Ponisiwa Hi Yehovha; Yehovha A Ponisile”.
Leswi vulaka “Xikwembu Xi Ta Byala Mbewu”.
Leswi vulaka “A Va Kombiwanga Timpsalu”.
Leswi vulaka “A Hi Vanhu Va Mina”.
Vona ntlhamuselo ya le hansi ya Hosiya 1:9.
Vona ntlhamuselo ya le hansi ya Hosiya 1:6.
Hi Xiheberu: “ni ku mbuyeta ka yena xikarhi ka mavele ya yena”.
Kumbe: “panu ya linyu”.
Hi Xiheberu: “swakunwa swa mina.”
Hi Xiheberu: “nuna wa mina wa ku sungula”.
Kumbe ku nga va ku vulavuliwa ni hi maxalani.
Kumbe: “gwavula”.
Kumbe: “swigolwani”.
Kumbe: “Bali wa mina.”
Kumbe ku nga va ku vulavuliwa ni hi maxalani.
Leswi vulaka “Xikwembu Xi Ta Byala Mbewu”.
Vona ntlhamuselo ya le hansi ya Hosiya 1:6.
Vona ntlhamuselo ya le hansi ya Hosiya 1:9.
Ku nga lawa a ma tirhisiwa loko va gandzela swikwembu swa mavunhwa.
Hi Xiheberu: “homere ni hafu”. Vona Xiyengetelo B14.
Kumbe: “sevhada.”
Hi Xiheberu: “masiku ya manyingi”.
Vona Ntlhamuselo.
Kumbexana: “Ku dzuneka ka mina va ku txintxe ku va tingana.”
Kumbe: “nhonga ya nyanga”.
Kumbe: “vamawokazana”. Ku nga nsati wa n’wana.
Hi Xiheberu: “ka ndhawu leyi nga pfuleka.”
Kumbe: “byala la trigu”.
Hi Xiheberu: “Swivhikelo”.
Kumbe: “kukula”.
Kumbe: “Lava ni djikelaka”.
Kumbe: “na va laya”.
Hi Xiheberu: “va ve ni vana va matiko man’wani.”
Kumbe: “masimu ya”.
Hi Xiheberu: “wheti yi ta va helisa.”
Ku nga nchumu xa ku hambiwa hi limhondzo kumbe nsimbi, xi chaya ku fananyana ni vhuvhuzela.
Ku nga xitiviso xa nyimpi.
Ku nga xa ku markara hi xona lani ndhawu yi tsemaka hi kona.
I swiharhi swaswitsongo swa ku fana ni tisokoti kambe swi nga ni timpapa.
Kumbe: “mub’etho”.
Kumbexana: “Timbilu ta vona ti fana ni xitiko nkama va taka ni maplanu ya vona.”
Hi Xiheberu: “vayavanyisi”.
Hi Xiheberu: “la ku kala li nga na mbilu.”
Kumbe ku nga va ku vulavuliwa ni hi maxalani.
Kumbe: “makungu”.
Ku nga muxaka wa xinyanyani.
Kumbe: “hi vanhu va matiko man’wani.”
Kumbexana: “Va ta tlhelela”.
Kumbe ku nga va ku vulavuliwa ni hi maxalani.
Kumbe: “nkhuvu wa”.
Kumbe: “swihlahla swa mimintwa”.
Kumbe: “xikwembu lexi danisaka”.
Kumbe: “velekaka”.
Kumbe: “ka ndhawu yayinene ya ku lusela ka yona”.
Kumbexana: “nava”.
Hi Xiheberu: “miyetiwa”.
Kumbe: “lexi d’elukelaka matini.”
Kumbe: “ka masiku ya leswi nga humelela a”.
Ku nga ku rhwala ku khatisiwa ka vona ku fana ni kange.
Kumbe: “homu ya xisati”.
Kumbe: “djoko; jugo.”
Kumbe: “gadaka Efrayimi.”
Kumbe: “magadi.”
Hi Xiheberu: “miyetiwa”.
Ku nga vaprofeta ni van’wani lava nga rhumiwa swaku va djondzisa Vayisrayele.
Kumbe: “makungu”.
Ku nga wugandzeli la ntiyiso.
Hi Xiheberu: “Efrayimi a dla moya.”
Kumbe: “khumbukiwaka hi lona.”
Kumbe: “swikalu swa”.
Hi Xiheberu: “swivono”.
Ku nga Vayisrayele.
Kumbe: “va yendla masalamusi”.
Kumbe: “Siriya.”
Kumbe: “n’quti”.
Kumbe: “mub’etho lowu”.
Kumbe: “liyopardu”.
Kumbe: “bere”.
Hi Xiheberu: “xivhikelo xa mbilu ya vona”.
Hi Xiheberu: “vayavanyisi”.
Kumbe: “hlayisiwile.”
Kumbe: “veleka.”
Kumbe: “Sheol”. Vona Ntlhamuselo.
Hi Xiheberu: “hi nyikela hi swihon’wani swa minomu ya hina.”
Kumbe: “papayi.”
Kumbe: “helisa”.
Kumbe: “mub’etho”.
Hi Xiheberu: “khumbukiwa”.