YUWELE
1 Leli i rito la Yehovha leli nga fika ka Yuwele n’wana wa Petuwele:
2 “Yingisani, n’wina madoda,
Yingisani kahle n’wina hinkwenu lava tshamaka atikweni.
Indjhe ku tshame ku yendleka minchumu ya ku fana ni leyi ka minkama ya n’wina
Kumbe ka minkama ya vavhovho va n’wina ke?+
3 Swi byeleni vana va n’wina,
Se vana va n’wina va ta swi byela vana va vona,
Kasi vana va vona va ta gama va swi byela vatukulu lava va landzelaka.
4 Leswi swi nga siyiwa hi mintete leyi wonhetelaka, swi dliwile hi mintete leyi hahaka;+
Leswi nga siyiwa hi mintete leyi hahaka swi dliwile hi mintete leyi kalaka yi nga na timpapa;
Leswi nga siyiwa hi mintete ya ku kala timpapa swi dliwile hi mintete ya magolo.*+
5 Pfukani mi rila n’wina swidakwa!+
Rilani n’wina hinkwenu lava va nwaka vhinyu,
Hikusa vhinyu la ku tsokotsa li susiwile ka minomo ya n’wina.+
6 Hikusa ku ni masonchwa lawa ma nga ta ka tiko la mina, i masonchwa ya matimba, ya ku kala ma nga konteki hi ku tala ka wona.+
Ma ni matinyu ya ku fana ni ya nghonyama,+ ni tinhlaya* ta ku fana ni ta nghonyama.
7 Wona ma wonhe nsimu ya mina ya mawuvha, nkuwa wa mina wu yo sala hi xigodo ntsena,
Ma kwamulele hinkwaswu ma swi txukumeta kule,
Phela a ku salanga nchumu ni ka tigadja ta wona tatitsongo.
9 Gandzelo la swakudla+ ni gandzelo la vhinyu+ a swa ha li kona ka yindlo ya Yehovha;
Vaprista lava tirhelaka Yehovha, va le ku rileni.
10 Nsimu yi womile, misava ya rila;+
Hikusa a trigu* li helile, vhinyu la nyuwani li helile, mafurha na wona ma helile.+
11 Varimi va tshoveke timbilu, varimi va mawuvha va rila,
Hi mhaka ya trigu ni maxalani;*
Hikusa a ku na ntshovelo.
12 Nsinya wa mawuvha wu womile,
Nsinya wa nkuwa wu womile.
Nsinya wa ma romã, wa mintxindzu ni wa maçã,
Minsinya hinkwayu leyi nga ka masimu yi womile;+
Vanhu va heleliwe hi ku tsaka.
Nghenani mi yetlela na mi yambale mpahla ya masaka, n’wina lava tirhelaka Xikwembu xanga;
Hikusa gandzelo la swakudla+ ni gandzelo la vhinyu+ a swa ha yisiwi ka yindlo ya Xikwembu xa n’wina.
14 Lunghekelani nkama wa ku titsona swakudla; vitanani vanhu swaku va ta ka ntlhanganu wa ku hlawuleka.+
Vitanani madoda ni hinkwavu lava tshamaka atikweni,
Swaku va ta ka yindlo ya Yehovha Xikwembu xa n’wina,+ swaku mi ta kombela ku pfuniwa hi Yehovha.
15 Khombo ka siku lolelo!
Hikusa siku la Yehovha li kusuhi,+
Ka siku lolelo Lweyi Wa Matimba Hinkwawu a ta helisa!
16 Kasi swakudla a swi tekiwanga na hi swi txuvukile,
Ni ku tsaka a ku helisiwanga ka yindlo ya Xikwembu xa hina ke?
17 Timbewu* ti vunile hansi ka mafoxolo ya vona.
Lomu ku vekiwaka kona swakudla a ku na nchumu.
Matshala* ma diliziwile hikusa a ku tshoveliwanga nchumu.
18 Hambi swifuyu swa konya!
Mintlhambi ya tihomu ya rhendzelekela na yi dungekile tinhloko, hikusa a yi na ka ku dla kona!
Funtshi mintlhambi ya tinyempfu ya xaniseka hi mhaka ya nandzu wa vona.
19 Ni ta ku vitana, wena Yehovha;+
Hikusa ndzilu wu helise ndhawu ya ku lusela ka yona ya le mananga,
Ndzilu wu hise minsinya hinkwayu ya nhova.
20 Hambi swiharhi swa nhova swa ku rilela,
Hikusa minambu yi pshile,*
Ndzilu wu helise ndhawu ya ku lusela ka yona ya le mananga.”
2 “Chayani a limhondzo aSiyoni!+
Vangani guwa* la nyimpi ka ntshava ya mina ya ku kwetsima.
Hinkwavu lava tshamaka la amisaveni* a va rhurhumele,
Hikusa siku la Yehovha la ta!+ Phela li kusuhi!
2 I siku la munyama ni ku mphuma,+
Siku la marhefu ni ku mphuma kakukulu,+
Ku fana ni ku vonakala loku nga kona atintshaveni loko li xa
Ku ni vanhu va vanyingi va matimba;+
A ku se tshama ku va ni va ku fana na vona,
Funtshi a va nge he tlheli va va kona va ku fana na vona
Ka tinxaka hinkwatu leti nga ta landzela.
3 Phambheni ka vona ku ni ndzilu lowu helisaka,
Loko se va hundzile, ndzilu wu sala wu hetisela.+
Tiko leli nga phambheni ka vona li fana ni jardim la Edeni,+
Kambe loko se va hundzile ku sala mananga ntsena,
A ku na nchumu ni xin’we lexi nga ta pona.
4 Va tshame ku fana ni makavhalu,
Va tsutsuma ku fana ni makavhalu ya nyimpi.+
5 Guwa la vona li ta twala ku fana ni tinyolo* ta nyimpi loko ti tsutsuma henhla ka tintshava,+
Ku fana ni guwa la ndzilu lowu hisaka mabyanyi ya ku woma.
Vona va fana ni masonchwa lawa ma nga lunghekela ku lwa nyimpi.+
6 Vanhu va ta karhateka hi mhaka ya vona.
Tinghohe* hinkwatu ti ta nkwalala.
7 Va hlasela ku fana ni masonchwa ya matimba,
Va khwela ka muru ku fana ni masonchwa,
A va tlheli ndzhaku,
Funtshi a va djiki.
8 A va chovhani;
Mun’wani ni mun’wani a famba ka ndlela ya yena.
Nkama van’wani va dlayiwaka hi matlharhi,*
Lavan’wani a va nyimi.
9 Va hlasela doropa, va tsutsuma henhla ka muru wa lona.
Va khwela henhla ka tiyindlo, va nghena hi majanela ku fana ni muyivi.
10 Loko va humelela, misava ya tsekatseka ni matilo ma tsekatseka.
Dlambu ni n’weti swa mphuma,+
Tinyeleti a ta ha phatimi.
11 Yehovha a ta huwelela ka masonchwa ya yena+ hikusa i manyingi hintamu.+
Lweyi a yendlaka leswi nga hlayiwa hi Yena a ni matimba;
Hikusa siku la Yehovha i likulu funtshi li chavisa hintamu.+
I mani lweyi a nga ta li tiyisela ke?”+
12 “Hambi hi swoswi,” ku vula Yehovha, “tlhelelani ka mina hi timbilu ta n’wina hinkwatu,+
Mi titsona swakudla,+ mi rila mi tlhela mi ba nkosi.
13 Handzulani timbilu ta n’wina,+ mi nga handzuli mpahla ya n’wina,+
Tlhelelani ka Yehovha Xikwembu xa n’wina,
Hikusa a ni ntwelawusiwana ni timpsalu, a hlwela ku kwata+ naswona a ni lirhandzu lalikulu,+
A ta tshika ku mi tisela khombo leli.
14 I mani lweyi a swi tivaka swaku kumbe a ta tshika ku mi tisela khombo,+
A gama a mi tisela minkateko,
Swaku mi ta nyikela gandzelo la swakudla ni la vhinyu ka Yehovha Xikwembu xa n’wina ke?
15 Chayani limhondzo aSiyoni!
Lunghiselelani nkama wa ku titsona swakudla; vitanani vanhu va ta ka ntlhanganu wa ku hlawuleka.+
16 Tlhanganisani vanhu; mi va kwetsimisa.+
Tlhanganisani madoda, vana ni swibebetani.+
Wanuna lweyi a lavaka ku chada a a hume ka kwartu la yena ni wansati lweyi a lavaka ku chada a a hume.
17 Vaprista lava tirhelaka Yehovha,
a va rile na va li xikarhi ka vharanda ni altari va ku:+
‘Yehovha Xikwembu xa hina, va twele wusiwana vanhu va wena;
U nga yendli swaku vanhu* va wena va va xihlekiso,
Hi ku va tshika va fumiwa hi matiko man’wani.
Hi mhaka muni vanhu va fanele va ku: “Kasi xi kwini Xikwembu xa vona ke?”’+
18 Yehovha a ta vhikela tiko la yena
A ta va twela wusiwana vanhu va yena.+
19 Yehovha a ta hlamula vanhu va yena a ku:
‘Ni ta mi rhumela trigu,* vhinyu la nyuwani ni mafurha,
Mi ta xurha hi swona;+
A ni nge he yendli swaku mi hlekiwa hi vanhu va matiko.+
20 Ni ta hlongola munhu wa le norte* a ya kule na n’wina;
Ni ta mu yisa amananga lani ku kalaka ku nga na munhu,
Lava nga rhanga phambheni ka yena va ta ya ka lwandle la le wuxeni,*
Lava nga ndzhaku ka yena va ta ya ka lwandle la wupeladlambu.*
Ku nun’hwa ka yena ku ta twala ka tiko hinkwalu,
A ta tama a nun’hwa hintamu ka tiko hinkwalu;+
Hikusa Xikwembu xi ta yendla minchumu yayikulu.’
21 Mi nga chavi, n’wina vanhu va tiko.
Tsakani hintamu hikusa Yehovha a ta yendla minchumu yayikulu.
22 Mi nga chavi n’wina swiharhi,
Hikusa tindhawu ta ku lusela ka tona ta le mananga ti ta txintxa ti va ta vherdi,+
Ni minsinya yi ta psala mihandzu;+
Nsinya wa nkuwa ni nsinya wa mawuvha yi ta psala mihandzu ya yinyingi.+
23 N’wina vana va Siyoni, tsakani hintamu hi mhaka ya Yehovha Xikwembu xa n’wina;+
Hikusa a ta mi nyika mpfula ya nkama wa ku titimela hi mpimu wawunene,
A ta mi nisela mpfula,
Hi nkama wa ku titimela ni wa ku hisa, ku fana ni leswi a a swi yendla.+
24 Ndhawu leyi ku phepheriwaka ka yona yi ta tala hi trigu,*
Ndhawu ya ku kamela mawuvha yi ta tala hi vhinyu la nyuwani ni mafurha.+
25 Ni ta mi hakela malembe lawa mi nga hlaseliwa
Hi mintete leyi hahaka, mintete leyi kalaka yi nga na timpapa, mintete leyi nga ni magolo* ni leyi wonhetelaka,
Ku nga masonchwa ya mina ya manyingi lawa ni nga ma rhumela ka n’wina.+
26 Phela mi ta dla mi xurha,+
Mi ta dzunisa vito la Yehovha Xikwembu xa n’wina,+
Lweyi a nga mi yendlela minchumu ya ku hlamalisa;
Vanhu va mina a va nge he tshuki va danisiwa.+
27 Mi ta swi tiva swaku ni le xikarhi ka n’wina*+
Ni swaku hi mina Yehovha Xikwembu xa n’wina,+ a ku na mun’wani.
Vanhu va mina a va nge he tshuki va danisiwa.
28 Ni ta gama ni nyika vanhu hinkwavu moya wa mina wa ku kwetsima,+
Vana va n’wina va madjaha ni va tintombhi va ta profeta,
Madjaha ya n’wina ma ta vona minchumu ya ku hlamalisa hi ndlela ya singita,*
Naswona vavanuna lava nga guga va ta lorha swa ku hlamalisa.+
29 Naswona ka masiku wolawo vatirhi va mina va xinuna ni va xisati ni ta va nyika moya wa mina wa ku kwetsima.
30 Ni ta yendla minchumu ya ku hlamalisa atilweni ni masingita amisaveni,
Ngati ni ndzilu ni marhefu ya ximusi.+
31 Dlambu li ta txintxiwa li va munyama, n’weti wu ta pshuka ku fana ni ngati,+
Na ku nga se fika siku lalikulu ni leli chavisaka la Yehovha.+
32 Kutani lweyi a vitanaka vito la Yehovha a ta ponisiwa;+
Hikusa ka Ntshava ya Siyoni ni Yerusalema ku ta va ni lava nga ta pona,+ hi ku ya hi leswi Yehovha a nga swi hlaya,
Lava ponaka hi lava vitaniwaka hi Yehovha.”
3 “Phela ka masiku wolawo, ka nkama wolowo,
Nkama ni nga ta yendla swaku swikarawa swa Yuda ni swa Yerusalema swi vuya,+
2 Ni ta tlhela ni hlengeleta matiko hinkwawu,
Ni ma tisa ka Nkova wa Yehoxafati.*
Ni ta ma yavanyisa kolanu+
Hi mhaka ya Vayisrayele lava va nga vanhu va mina ni tshomba la mina,
Hikusa va va hangalasile axikarhi ka matiko,
Va tlhela va phakelana tiko la mina.+
3 Vanhu va matiko va phakelane vanhu va mina,+
Va xavise xifanyatani swaku va ta kuma nghwavani
Va xavise xintombhani swaku va ta kuma vhinyu.
4 Wena Tiru, Sidoni ni tindhawu hinkwatu ta Filista
Hi mhaka muni mi ni yendla leswi?
Indjhe ku ni leswi mi ni hakelisaka swona?
Loko swi tshamise swoleswo,
Na mina ni ta mi hakelisa ku fana ni leswi mi nga swi yendla ka mina.+
5 Hikusa mi teke prata ni woru la mina,+
Mi teke tshomba la mina la lisima mi li yisa ka titempele ta n’wina;
6 Mi xavise vanhu va Yuda ni va Yerusalema ka Vagriki,+
Hi ku lava ku va susa swaku va ya tshama kule ni tiko la vona;
7 Ni ta ya va teka lani mi nga va xavisa kona,+
Naswona ni ta mi hakelisa leswi mi nga ni yendla swona.
8 Ni ta xavisa vana va n’wina va madjaha ni va tintombhi ka Vayuda,+
Se vona va ta va xavisela vanhu va le Xeba, ku nga tiko leli nga kule hintamu
Ku vula Yehovha.
9 Byelani matiko mhaka leyi:+
‘Tilunghiseleleni nyimpi! Pfuxani vavanuna va matimba!
Masonchwa hinkwawu a ma tshinele, a ma te!+
10 Yendlani swikomu swa n’wina swi va swipada ni masikelo* ma va matlharhi.
Lweyi a nga hela ntamu a a hlaye a ku: “Ni ni matimba.”
11 Tanani mi ta pfunisa n’wina hinkwenu matiko lawa ma nga kusuhi, tlhanganani!’”+
Yehovha Xikwembu xanga, rhumela masonchwa ya wena ka ndhawu yoleyo.
12 “Matiko a ma tlhangane ma ta ka Nkova wa Yehoxafati;
Ni ta va kolanu swaku ni yavanyisa matiko hinkwawu lawa ma nga kusuhi.+
13 Sungulani ku tshovela hi sikelo hikusa nkama wa ku tshovela wu fikile.
Tanani mi ta kama mawuvha hikusa ndhawu ya ku kamela ka yona yi talile.+
Makhuwani ma dibekela hi ku tala hikusa wubihi la matiko i linyingi.
14 Xitshungu xi le ka nkova lani ku yendliwaka swiboho swa ku yavanyisa,
Hikusa siku la Yehovha li kusuhi li le ka nkova lani ku yendliwaka swiboho swa ku yavanyisa.+
15 Dlambu ni n’weti swi ta mphuma,
Tinyeleti a ti nga ha ta phatima.
16 Yehovha a ta bonga na a li Siyoni ku fana ni nghonyama,
A ta twala na a li Yerusalema.
Matilo ni misava swi ta tsekatseka;
Kambe Yehovha a ta va ndhawu ya ku tumbela ya vanhu va yena,+
A ta va xivhikelo xa vanhu va Israyele.
17 Mi ta swi tiva swaku hi mina Yehovha Xikwembu xa n’wina lexi nga aSiyoni, ka ntshava ya mina ya ku kwetsima.+
Doropa la Yerusalema li ta va ndhawu ya ku kwetsima,+
Lava va hundzaka hi ndlela* a va nge he tshuki va tsemakanye hi kona.+
18 Hi siku lolelo tintshava ti ta thona vhinyu la ku tsokotsa,+
Ku ta ngirimela leiti ka maganga,
Minambu hinkwayu ya Yuda yi ta va ni mati.
Ku ta va ni xihlovo ka yindlo ya Yehovha,+
Xi ta regara Nkova wa Minsinya ya Akasiya.
19 Tiko la Gibita li ta sala na li hohlokile,+
Edomu ku ta va mananga lawa ku kalaka ku nga tshami munhu,+
Hi mhaka ya leswi va nga hlupha Vayuda ka tiko la vona,+
Lani va nga dlaya vanhu va ku kala va nga na nandzu.+
20 Kambe aYuda ku ta tshama na ku ni vanhu,
Ni Yerusalema ku ta tshama na ku ni vanhu hi masiku ni masiku.+
Kumbe: “makolo.”
Ku nga marhambu lawa ma khomaka matinyu.
Ku nga ntombhi leyi kalaka yi nge se famba masangu.
Kumbe: “nuna wa”.
Kumbe ku nga ha va ku vulavuliwa ni hi maxalani.
Kumbe: “sevhada.”
Kumbe: “mi tiba swifuva.”
Kumbexana: “Makuwa lawa ma nga womisiwa”.
Ku nga ndhawu leyi ku hlayisiwaka ka yona swakudla.
Kumbe: “khwile”.
Ku nga xitiviso xa nyimpi.
Kumbe: “ka tiko”.
Kumbe: “tin’qolo; makalichi”.
Kumbe: “Makara”.
Kumbe: “maflexa”.
Kumbe: “tshomba la”.
Kumbe ku nga ha va ku vulavuliwa ni hi maxalani.
Kumbe: “n’walungwini”.
Ku nga Lwandle la Ku Fa.
Ku nga Lwandle la Mediteraniyu.
Kumbe ku nga ha va ku vulavuliwa ni hi maxalani.
Kumbe: “makolo”.
Ku nga Israyele.
Hi Xiheberu: “swivono”.
Leswi vulaka “Yehovha I Muyavanyisi.”
Ku nga minchumu leyi tirhiseliwaka ku tsema byanyi kumbe ku tshovela hi swona.
Kumbe: “Vanhu lava taka hi ka matiko man’wani”.