AMOSI
1 Lawa i marito ya mina Amosi,* mun’we wa valusi va tinyempfu va le Tekowa,+ lawa ni nga byeliwa wona* hi ta Vayisrayele, ka nkama lowu a ku fuma Uziya+ hosi ya le Yuda ni ka nkama wa Yerobuwamu+ n’wana wa Yowaxi,+ hosi ya le Israyele; leswo swi yendleke ka malembe mambirhi na ku nge se va ni ku tsekatseka ka misava.+ 2 Ni te:
“Yehovha a ta bonga ku fana ni nghonyama na a li aSiyoni,
A ta huwelela na a li aYerusalema.
Byanyi leli valusi va luselaka ka lona li ta woma,
Ni swinsinyani leswi nga henhla ka ntshava ya Karmeli swi ta woma.”+
3 “Yehovha a li:
‘“A ni nga ta tshika ku khatisa Damaxka hi mhaka ya minandzu* yinharhu ni hi mhaka ya 4 wa minandzu,
Hi mhaka ya leswi a nga xanisa Jiliyadi ni ku mu psanyetela hi swileyi* swa nsimbi.+
5 Ni ta tshova swa ku khiya hi swona tinyanghwa ta doropa la Damaxka;+
Ni ta helisa lava tshamaka Bikati-Avheni,
Ni lweyi a fumaka* aBeti-Edeni;
Se Vasiriya va ta va swikarawa aKiri,”+ ku vula Yehovha.’
6 Yehovha a li:
‘“A ni nga ta tshika ku khatisa Gaza+ hi mhaka ya minandzu yinharhu ni hi mhaka ya 4 wa yona,
Hikusa a teke vanhu lava nga swikarawa+ a va yisa aEdomu.
7 Ni ta rhumela ndzilu ka muru wa Gaza,+
Wu ta hisa maprediyu ya doropa lolelo.
8 Ni ta helisa lava tshamaka aAxidodi,+
Ni lweyi a fumaka* aAxikeloni;+
Ni ta lwa na Ekroni,+
Kutani Vafilista lava nga sala va ta fa,”+ ku vula Yehovha Hosi Leyikulu.’
9 Yehovha a li:
‘A ni nga ta tshika ku khatisa Tiru+ hi mhaka ya minandzu yinharhu ni hi mhaka ya 4 wa yona,
Hikusa a yise vanhu lava nga swikarawa aEdomu,
Naswona a khohlwe ntwananu wa vamakwavu.+
10 Ni ta rhumela ndzilu ka muru wa Tiru,
Wu ta hisa maprediyu ya yena.’+
11 Yehovha a li:
‘A ni nga ta tshika ku khatisa Edomu+ hi mhaka ya minandzu yinharhu ni hi mhaka ya 4 wa yona,
Hikusa a txatxe makwavu hi xipada,+
Naswona a nga va twelanga wusiwana;
A tshamela ku va phatlulela hi mhaka ya ku kwata ka yena,
A tshama na a va kwatelile.+
13 Yehovha a li:
‘“A ni nga ta tshika ku khatisa Vaamoni+ hi mhaka ya minandzu yinharhu ni hi mhaka ya 4 wa yona,
Hikusa va handzulele makhwirhi ya vavasati lava nga ni tinyimba va le Jiliyadi leswaku va yengesela tiko la vona.+
14 Ni ta hisa muru wa Raba+ hi ndzilu,
Wu ta hisa maprediyu ya yena,
Kutani ku ta va ni guwa* hi siku la nyimpi,
Ni moya wawukulu hi siku la xidzedze.
15 Hosi ya vona ni varhangeli va vona+ va ta yisiwa awukaraweni,” ku vula Yehovha.’
2 “Yehovha a li:
‘“A ni nga ta tshika ku khatisa Mowabu+ hi mhaka ya minandzu yinharhu ni hi mhaka ya 4 wa yona,
Hikusa a hise marhambu ya hosi ya Edomu swaku a ta kuma nkuma.
2 Ni ta rhumela ndzilu ka Mowabu,
Wu ta hisa maprediyu* ya ku tiya ya doropa la Keriyoti;+
Mowabu a ta fa hi nkama wa mpfilumpfilu,
3 Ni ta helisa lweyi a fumaka* xikarhi ka yena,
Ni dlaya ni varhangeli va yena hinkwavu,”+ ku vula Yehovha.’
4 Yehovha a li:
‘A ni nga ta tshika ku khatisa Yuda+ hi mhaka ya minandzu yinharhu ni hi mhaka ya 4 wa yona,
Hikusa va yale ku yingisa nawu wa Yehovha,
A va yi yingisanga minawu ya yena;+
Kambe va djikisiwile hi mavunhwa lawa ma nga djikisa vavhovho va vona.+
5 Ni ta rhumela ndzilu aYuda,
Wu ta hisa maprediyu ya ku tiya aYerusalema.’+
6 Yehovha a li:
‘A ni nga ta tshika ku khatisa Israyele+ hi mhaka ya minandzu yinharhu ni hi mhaka ya 4 wa yona,
Hikusa a xavise vanhu va ku lulama swaku a kuma prata,
Ni xisiwana swaku a kuma masandaliya.+
Djaha ni papayi wa lona va famba masangu ni ntombhi yoleyi ya yin’we,
Va chakisa vito la mina la ku kwetsima.
8 Va tshama tlhelweni ka altari+ yin’wani ni yin’wani ahenhla ka mubalu* lowu va nga wu tekela lava va va devhaka;+
Va teka male leyi va nga hakelisa* vanhu va xava vhinyu va li phuza ka yindlo* ya swikwembu swa vona.’
9 ‘Kambe hi mina ni nga helisa Vaamori phambheni ka vona,+
Lava a va lehe ku fana ni minsinya ya mikedari naswona a va ni matimba ku fana ni minsinya ya oku;
Ni helise mihandzu ni timintsu ta vona.+
10 Ni mi humese ka tiko la Gibita,+
Ni mi fambisa amananga ku ringana 40 wa malembe,+
Swaku mi ta teka tiko la Vaamori.
11 Vana va n’wina va xinuna van’wani ni va yendle vaprofeta,+
Kasi vana van’wani va n’wina va madjaha ni va yendle Vanaziri.+
A hi swona ke, n’wina Vayisrayele?’ Ku vula Yehovha.
12 ‘Kambe mi tame mi va nyika vhinyu Vanaziri swaku va phuza,+
Mi byele vaprofeta mi ku: “Mi nga ha profeti.”+
13 Ni ta mi psanyetela ka tiko la n’wina,
Ku fana ni leswi nyolo* leyi nga tala hi swichocho swa trigu* leswa ha ku tshoveliwaka yi swi psanyetelisaka swona leswi nga hansi ka yona.
14 Lweyi a tsutsumaka ngopfu a nga ta va ni ndhawu ya ku baleka a ya ka yona,+
Lweyi a nga ni matimba ma ta mu helela,
A yi kona nhenha leyi nga ta ponisa wutomi la yona.
15 Lweyi a lwaka hi ligubu a nga ta nyima,
Lweyi a kotaka ku tsutsuma a nga ta baleka,
Lweyi a fambaka hi kavhalu na yena a nge li ponisi wutomi la yena.
16 Hambi nhenha yayikulu ya kona xikarhi ka tinhenha,
Yi ta baleka na yi nga yambalanga nchumu hi siku lolelo,’+ ku vula Yehovha.”
3 “Twanani rito leli Yehovha a nga li vula hi n’wina Vayisrayele, hi ndjangu hinkwawu lowu a nga wu humesa ka tiko la Gibita:
2 ‘Hi n’wina ntsena lava ni nga mi langa xikarhi ka matiko hinkwawu lawa ma nga kona amisaveni.+
Hi leswo swi nga ta yendla swaku ni mi khatisa hi mhaka ya swidjoho swa n’wina hinkwaswu.+
3 Indjhe vanhu vambirhi va nga longoloka na va nga twanananga?
4 Indjhe nghonyama yi nga bonga akhwatini na ku nga na nchumu lexi yi lavaka ku xi khoma?
Indjhe xinghonyamani xi nga bonga lani xi tshamaka kona na xi nga khomanga nchumu?
5 Indjhe xinyanyani xi nga phaseka ka ntlhamu na xi nga rhiyiwanga?*
Indjhe ntlhamu wu nga tlomuka* na wu nga phasanga nchumu?
6 Loko ku chayiwa limhondzo ka doropa, vanhu a va chavi?
Loko ku va ni khombo ka doropa, a hi Yehovha lweyi a nga li vanga?
7 Hikusa Yehovha Hosi Leyikulu a nge yendli nchumu
A nge se va byela vatirheli va yena ku nga vaprofeta a xihundla xa yena.+
8 Nghonyama yi bongile!+ I mani lweyi a nga ta kala a nga chavi?
Yehovha Hosi Leyikulu a vulile! I mani lweyi a nga ta kala a nga profeti?’+
9 ‘Huwelelani ka maprediyu* ya ku tiya ya Axidodi
Ni le ka maprediyu ya ku tiya ya Gibita.
Mi ku: “Hlengeletanani ka tintshava ta Samariya;+
Mi vona mpfilumpfilu leyi nga xikarhi ka yena
Ni ku kanganyisa loku a nga na kona.+
10 A va swi koti ku yendla swaswinene,” ku vula Yehovha,
“Va tata maprediyu ya vona ya ku tiya hi tinyimpi ni ku wonhetela.”’
11 Kutani Yehovha Hosi Leyikulu a li:
‘Nala a ta rhendzela tiko,+
A ta ku heta ntamu,
Maprediyu ya wena ya ku tiya ma ta teketeliwa.’+
12 Yehovha a li:
‘Ku fana ni mulusi lweyi a wutlaka minenge yimbirhi kumbe ndleve ya xiharhi ka nomo wa nghonyama,
Vanhu va Israyele lava tshamaka aSamariya ka mibedu ni ka switulu swa ku saseka,*+
Va ta wutlisiwa swoleswo.’
13 ‘Yingisani, mi basopisa ndjangu wa Yakobe,’ ku vula Yehovha Hosi Leyikulu, Xikwembu lexi nga murhangeli wa tintsumi.
14 ‘Hikusa siku leli ni nga ta khatisa Israyele hi mhaka ya leswi a nga ni djikela,*+
Ni ta tlhela ni dilizela ni maaltari lama nga Betele;+
Timhondzo ta altari ti ta tsemiwa ti wa hansi.+
15 Ni ta dilizela tiyindlo ta wuxika ni tiyindlo ta malanga.’
‘Tiyindlo leti nga yendliwa hi matinyu ya tindlopfu ti ta helisiwa,+
4 “Yingisani mhaka leyi, n’wina tihomu ta Baxani,
Leti nga ka ntshava ya Samariya,+
N’wina vavasati lava kanganyisaka lava pfumalaka+ ni ku karhata swisiwana,
Lava byelaka vanuna* va vona va ku: ‘Hi teleni ni swa ku phuza!’
2 Leswi Yehovha Hosi Leyikulu a kwetsimaka a fungile a ku:
‘“Masiku ma ta, lawa mi nga ta tlakuliwa hi swiyove
Se lava nga ta sala va ta kokiwa hi tindzovo.*
3 Mun’wani ni mun’wani wa n’wina a ta huma hi ka mbhovo lowu a nga txuvukana na wona ka khumbi la ku boxeka;
Mi ta hlongoliwa mi ya Harimoni,” ku vula Yehovha.’
5 Hisani gandzelo la pawu leli nga ni fermentu+ swaku mi khensa Xikwembu;
Twalisani magandzelo ya n’wina ya ku tirhandzela!
Hikusa mi rhandza ku yendla swoleswo, n’wina vanhu va Israyele,’ ku vula Yehovha Hosi Leyikulu.
6 ‘Kambe mina a ni mi nyikanga swakudla ka madoropa ya n’wina hinkwawu
Ni yendle swaku pawu li nga ha kumeki ka tiyindlo ta n’wina hinkwatu;+
Kambe a mi tlhelelanga ka mina,’+ ku vula Yehovha.
7 ‘Ni tlhele ni mi tsona mpfula na ku chota tiwheti tinharhu swaku ku tshoveliwa;+
Ni yendle swaku yi na ka doropa lin’we kambe yi nga ni ka doropa lin’wanyani.
Mpfula yi ta na ka tlhelo lelin’wani la nsimu,
Kambe ka tlhelo lelin’wani lani yi nga ta kala yi nga ni ku ta woma.
8 Vanhu lava taka hi ka madoropa mambirhi kumbe manharhu va dederekele va ya ka doropa lin’we swaku va ya phuza mati,+
Kambe a va kolwanga;
A mi tlhelelanga ka mina,’+ ku vula Yehovha.
9 ‘Ni hlasele swinsinyani swa n’wina hi djandza ni mavabyi lama dlayaka swinsinyani.+
Mi yengetele majardim ya n’wina ni masimu ya mawuvha,
Kambe mintete yi ta dla minsinya ya n’wina ya makuwa ni minsinya ya n’wina ya mawolivhera;+
Hambileswo, a mi tlhelelanga ka mina,’+ ku vula Yehovha.
10 ‘Ni rhumele ntungu wa ku fana ni wa Gibita+ xikarhi ka n’wina.
Madjaha ya n’wina+ ni ma dlaye hi xipada, ni teka makavhalu ya n’wina.+
Lani mi tshamaka kona a ko nun’hwa mintsumbu ntsena;+
Kambe a mi tlhelelanga ka mina,’ ku vula Yehovha.
11 ‘Ni yendle swaku mi helisiwa,
Ku fana ni ku helisiwa ka Sodoma na Gomora.+
A mi fana ni lihunyi leli nga susiwa ka ndzilu;
Kambe a mi tlhelelanga ka mina,’+ ku vula Yehovha.
12 Hi leswo ni nga ta ku yendla swona, wena Israyele.
Lunghekela ku tlhangana ni Xikwembu xa wena, wena Israyele,
Hikusa leswo hi leswi xi nga ta ku yendla swona.
13 Hikusa hi xona xi nga tumbuluxa tintshava+ ni moya;+
Xi byela munhu leswi xi swi pimisaka,
Xi txintxa ku vonakala ka nimixo ku va munyama,+
Xi kandzihela tindhawu ta ku tlakuka ta misava;+
Vito la xona i Yehovha Xikwembu lexi rhangelaka tintsumi.”
5 “N’wina vanhu va Israyele, yingisani rito leli fanaka ni lisimu la xirilo leli ni nga ta mi byela lona:
2 ‘Israyele* a wile;
A nge he tlheli a pfuka.
A siyiwe na a li yexe ka tiko la yena;
A nga kona lweyi a nga ta mu pfuxa.’
3 “Hikusa Yehovha Hosi Leyikulu a li:
‘Doropa leli humaka li ya nyimpini na li ni 1.000 wa masonchwa li ta vuya ni 100;
Leli humaka na li ni 100 li ta vuya ni 10, ka tiko la Israyele.’+
4 “Yehovha a byela vanhu va Israyele a ku:
‘Ni laveni swaku mi ta hanya.+
5 Mi nga yi aBetele,+
Mi nga yi aJiligali+ kumbe mi tlulela mi ya aBerxeba,+
Hikusa doropa la Jiligali li ta ya awukaraweni,+
Kasi doropa la Betele li ta helisiwa.*
6 Lavani Yehovha swaku mi ta hanya,+
N’wina va ndjangu wa Yosefa, leswaku a nga mi kwateli ku fana ni ndzilu
Lowu nga ta hisa Betele, lowu nga ta kala wu nga timiwi hi munhu.
8 Lweyi a yendlaka ntlawa wa tinyeleti lowu vitaniwaka Kima* ni lowu vitaniwaka Kesili,*+
Lweyi a txintxaka munyama wawukulu wu va ku vonakala ka nimixo,
Lweyi a txintxaka nhlikanhi wu va munyama ku fana ni wusiku,+
Lweyi a byelaka mati ya lwandle
Swaku ma mbhonya misava,+
Vito la yena i Yehovha.
9 A ta yendla swaku lweyi a nga ni matimba a helisiwa,
A helisa ni madoropa lama nga vhikeleleka.
10 Va nyenya vayavanyisi lava layaka vanhu ka nyanghwa wa doropa,
Va nyenya lava vulavulaka ntiyiso.+
11 Kutani leswi mi hakelisaka swisiwana rhesa* la masimu
Mi swi hakelisa hi trigu*+ leli swi nga li rima,
A mi nga ha ta tshama ka tiyindlo ta maribye leti mi nga ti yaka,+
Ni ku phuza vhinyu leli taka hi ka masimu ya n’wina yamanene ya mawuvha.+
12 Na yi tiva mintirho ya n’wina ya ku biha
Ni ku tala ka swidjoho swa n’wina,
Mi xanisa vanhu va ku lulama,
Mi pfumela ku xaviwa,
Mi karhata swisiwana loko mi yavanyisa ka nyanghwa wa doropa.+
13 Kutani hi nkama wolowo lava ku tlhariha va ta miyela,
Hikusa wu ta va nkama wa khombo.+
Kutani Yehovha Xikwembu lexi rhangelaka tintsumi a ta va na n’wina,
Ku fana ni leswi na n’wina mi vulaka swaku a na n’wina.+
15 Nyenyani swa ku biha, mi rhandza swaswinene,+
Vayavanyisi lava nga kona ka doropa a va yendli swilo hi ndlela ya ku lulama.+
Kumbexana Yehovha Xikwembu lexi rhangelaka tintsumi
A ta va ni timpsalu ka lava nga sala va ndjangu wa Yosefa.’+
16 “Se Yehovha Xikwembu lexi rhangelaka tintsumi, yena Yehovha, a li:
‘Vanhu va ta rila axikarhi ka doropa,
Va ta rila aswitaratwini va ku: “Yowee! Yowee!”
Va ta vitana ni varimi swaku va ta rila,
Ni lava hakeliwaka swaku va ta rila lani ku nga fiwa.’
17 ‘Ku ta va ni swirilo+ ka masimu ya n’wina hinkwawu ya mawuvha;
Hikusa ni ta hundza xikarhi ka n’wina ni mi khatisa,’ ku vula Yehovha.
18 ‘Khombo ka lava navelaka siku la Yehovha!+
Kasi siku la Yehovha li ta va li tshamise ku yini ka n’wina?+
Li ta va munyama, ku nga li ku vonakala.+
19 Li ta fana ni loko munhu a baleka nghonyama, a gama a tlhangana ni ursu,*
Loko a nghena ka yindlo ya yena a khigetela ka khumbi a lumiwa hi nyoka.
20 Siku la Yehovha li ta va munyama, ku nga li ku vonakala;
Li ta va munyama a li nga ta phatima.
21 Na ma nyenya mafexta ya n’wina,+ ma ni nyenyentsa,
A ni ku tsakeli ku nun’hwela ka magandzelo lawa mi ma yendlaka ka masembleya ya n’wina ya ku hlawuleka.
22 Hambiloko mi ni yendlela magandzelo ya ku hisiwa,
A ma nga ta ni tsakisa magandzelo wolawo;+
A ni nge ma tsakeli magandzelo ya n’wina ya ku kombela ku rhula lawa mi ma yendlaka hi swifuyu swa ku nona.+
23 Mi nga ni vangeli guwa hi tinsimu ta n’wina;
A ni swi lavi hambi ku twa mamuzika ya leswi mi chayaka hi swona.+
24 Wululami a li tale ku fana ni mati,+
Ku fana ni mati ya xinambyani lama fambaka nkama hinkwawu.
25 N’wina vanhu va Israyele, indjhe mi tshama mi ni nyika tinyiko ta magandzelo
Hi nkama lowu a mi li mananga ku ringana 40 wa malembe ke?+
26 Mi ta boheka ku rhwala hosi ya n’wina Sakuti na Kayiwani,*
Swifaniso leswi mi nga tiyendlela swona swa nyeleti ya xikwembu xa n’wina,
27 Ni ta mi yisa awukaraweni akule ni le Damaxka,’+ ku vula lweyi vito la yena ku nga Yehovha Xikwembu lexi rhangelaka tintsumi.”+
6 “Khombo ka lava titshembaka aSiyoni,
Lava titwaka na va hlayisekile ka tintshava ta Samariya,+
Vavanuna lava tiviwaka xikarhi ka matiko,
Lava vanhu va Israyele va yaka ka vona.
2 Fambani Kaleni, mi ya ku vona.
Loko mi suka kona fambani ka Doropa Lalikulu la Amati,+
Mi gama mi yehla mi ya aGati ka doropa la Vafilista.
Indjhe mimfumu yoleyo ya yampsa ku tlula mimfumu leyi,*
Kumbe, Indjhe tiko la vona i likulu ku tlula tiko la n’wina?
4 Va yetlela ka mibedu leyi nga yendliwa hi matinyu ya tindlopfu,+ va tlhela va b’arhama ka switulu,+
Va dla tinyempfu ni swihon’wani swa ku nona;+
5 Va khanda tinsimu hi ku tirhisa haripa,*+
Va tiyendlela swa ku chaya hi swona ku fana na Davhida;+
6 Va phuza vhinyu hi matijela+
Va tola mafurha ya ku hlawuleka.
Kambe a va na mhaka ni khombo leli Yosefa a nga kumana na lona.+
7 Va ta va va ku sungula ku ya awukaraweni,+
Minkama ya mafexta ya ku kala ma nga lawuleki yi ta va helela.
8 ‘Yehovha Hosi Leyikulu a fungile hi vito la yena,’+ ku vula Yehovha Xikwembu lexi rhangelaka tintsumi,
‘“Na ku nyenya ku tibyela ka Yakobe,+
Na ma nyenya maprediyu* ya yena ya ku tiya,+
Ni ta nyikela doropa ni hinkwaswu leswi nga ka lona ka valala.+
9 “‘“Loko ku sale 10 wa vavanuna ka yindlo yin’we, na vona va ta fa. 10 Xaka* li ta ta li ta va tlakula li ya va hisa hi mun’we hi mun’we. Li ta humesa marhambu ya vona andlwini, li gama li vutisa lweyi a nga lomu ndlwini li ku: ‘Ku ni lava nga sala?’ Se yena a ta ku: ‘A ku salanga munhu!’ Kutani xaka li ta ku: ‘Miyela! Hikusa a swa ha pfuni nchumu ku vitana vito la Yehovha.’”
11 Hikusa i Yehovha lweyi a rhumisaka,+
Naswona a ta wisa tiyindlo tatikulu,
Kasi tiyindlo tatitsongo ti ta va swikhemukhemu.+
12 Indjhe makavhalu ma nga tsutsuma ka ribye,
Kumbe munhu a nga rima hi tihomu ahenhla ka lona?
Mi yavanyisa hi ndlela ya ku biha, mi karhata vanhu.+
13 Mi tsakisiwa hi swilo swa ku kala swi nga pfuni nchumu,
Mi li: “Matimba lawa hi nga na wona hi yo ma kuma hi hoxe.”*+
14 Kutani ni ta mi tisela tiko leli nga ta lwa na n’wina, n’wina vanhu va Israyele,’+ ku vula Yehovha Xikwembu lexi rhangelaka tintsumi,
‘Li ta mi xanisa ku sukela aLebo-Amati+ ku ya fika ka Nkova wa Araba.’”
7 Leswi hi leswi Yehovha Hosi Leyikulu a nga ni komba swona: A rhumele mintete ya yinyingi nkama ku nga sungula ku mila leswi nga gamesa ku byaliwa.* Leswo swi yendleke na byanyi la swifuyu se li tsemiwile ka masimu ya hosi. 2 Nkama mintete yi nga heta ku dla swinsinyani swa tiko, ni te: “Yehovha Hosi Leyikulu, ni kombela u va rivalela vanhu va wena.+ Kasi Yakobe a ta hanyisa* ku yini? Hikusa a nga na matimba!”+
3 Se Yehovha a tshika ku tisa khombo.+ Yehovha a ku: “A li nga ha ta ta.”
4 Yehovha Hosi Leyikulu a ni kombe leswi: Yehovha Hosi Leyikulu a yendle swaku vanhu va yena va khatisiwa hi ndzilu. Wu hise mati ya ku yenta hintamu ni tlhelo lin’we la tiko. 5 Kutani ni ku: “Yehovha Hosi Leyikulu, ni kombela u nyimanyana.+ Kasi Yakobe a ta hanyisa* ku yini? Hikusa a nga na matimba!”+
6 Se Yehovha a tshika ku tisa khombo.+ Yehovha Hosi Leyikulu a ku: “Khombo leli na lona a li nga ha ta ta.”
7 A tlhele a ni komba leswi: Yehovha a a nyime ka muru lowu nga pimiwa hi goda la ku pima hi lona naswona a a khome goda la ku pima. 8 Se Yehovha a ni byela a ku: “Amosi, u vona yini?” Kutani ni ku: “Ni vona goda la ku pima hi lona.” Yehovha a ku: “Ni ta pima vanhu va mina va Israyele hi lona. A ni nga ha ta va rivalela.+ 9 Tindhawu ta ku gandzela ka tona ta Izaki+ ti ta sala na ti hohlokelile ni titempele ta Israyele ti ta dilizeliwa,+ ni ta lwa ni ndjangu wa Yerobuwamu hi xipada.”+
10 Amaziya muprista wa le Betele+ a rhume vanhu va ya ka Yerobuwamu+ hosi ya le Israyele, va fika va ku: “Amosi a ku yendlele maplanu* lani ka tiko la Israyele.+ Tiko a la ha swi koti ku tiyiselela marito ya yena hinkwawu.+ 11 Amosi a te: ‘Yerobuwamu a ta dlayiwa hi xipada, naswona vanhu va Israyele va ta ya awukaraweni va siya tiko la vona.’”+
12 Se Amaziya a ni byela a ku: “Wena lweyi u vonaka minchumu leyi u kombiwaka hi Xikwembu,* famba, baleka u ya ka tiko la Yuda, u ya kuma pawu* koseniyani, u tlhela u profeta na u li koseniyani.+ 13 Kambe u nga ha profeti aBetele,+ hikusa i tempele ya hosi+ ni yindlo ya wuhosi.”
14 Ni hlamula Amaziya ni ku: “A ni nga li muprofeta naswona a ni nga li n’wana wa muprofeta; kambe a ni li mulusi,+ funtshi a ni hlayisa makuwa.* 15 Se Yehovha a ni tshikisa ku lusa ntlhambi, kutani Yehovha a ni byela a ku: ‘Famba u ya profetela vanhu va mina, ku nga Israyele.’+ 16 Yingisa rito la Yehovha: ‘Wena u li: “U nga tshuki u profeta swa ku biha hi Israyele+ naswona u nga tshuki u vula rito la ku biha+ hi ndjangu wa Izaki.” 17 Kutani Yehovha a li: “Nsati wa wena a ta va nghwavani adoropeni, vana va wena va madjaha ni va tintombhi va ta dlayiwa hi xipada. Tiko la wena li ta yaviwa hi goda la ku pima hi lona, kasi wena, u ta fela ka tiko lin’wani; se Israyele, a ta ya awukaraweni a siya tiko la yena.”’”+
8 Yehovha Hosi Leyikulu a ni kombe leswi: A ku ni ndzhava lowu a wu ni mihandzu ya malanga. 2 Se a ni vutisa a ku: “U vona yini Amosi?” Kutani ni ku: “Ni vona ndzhava lowu nga ni mihandzu ya malanga.” Yehovha a ni byela a ku: “Magamu ma va fikelile vanhu va mina va Israyele. A ni nga ha ta va rivalela.+ 3 ‘Tinsimu ta le tempeleni ti ta txintxiwa ti va tinsimu ta xirilo hi siku lolelo,’+ ku vula Yehovha Hosi Leyikulu. ‘Mintsumbu yi ta va yi yo mbaa,+ ku ku tititi!’
4 Yingisani n’wina lava karhataka swisiwana
Ni lava dlayaka lava ku rhula atikweni,+
5 Mi li: ‘Kasi fexta la ku huma ka n’weti li ta hela siku muni+ swaku hi ta xavisa trigu* la hina,
Ni Savata+ yi ta hela siku muni swaku hi ta xavisa trigu?
Leswaku hi ta pumba xa ku pima hi xona*
Hi yengesela presu,*
Ni ku yendla mabalansa* ya ku kanganyisa;+
6 Leswaku hi ta xava lava pfumalaka hi prata
Hi tlhela hi xava xisiwana hi masandaliya mambirhi,+
Ni ku xavisa muhungu.’
7 Yehovha, ku kwetsima ka Yakobe,+ a funge hi vito la yena a ku:
‘A ni nge tshuki ni yi khohlwa mintirho ya vona.+
8 Leswo swi ta yendla swaku tiko li tsekatseka,
Hinkwavu lava tshamaka atikweni va ta rila.+
Tiko hinkwalu li ta suka li nyima ku fana ni Nambu wa Nilu loko wu talile
Li ta ya henhla ni le hansi ku fana ni Nambu wa Nilu wa le Gibita.’+
9 ‘Hi siku lolelo,’ ku vula Yehovha Hosi Leyikulu,
‘Ni ta yendla swaku dlambu li pela ninhlikanhi,
Ku ta va munyama, dlambu na li yo baa!+
10 Ni ta txintxa mafexta ya n’wina ma va ndhawu leyi ku nga fiwa,+
Tinsimu ta n’wina ti ta va tinsimu ta swirilo.
Masenge ya n’wina ni ta ma yambexa masaka* kasi tinhloko ta n’wina ti ta tsemetiwa;
Mi ta rila ku fana ni munhu lweyi a rilelaka n’wana lweyi a nga yexe,
Siku lolelo li ta hela hi swikarhatu.’
11 ‘Vonani! Masiku ma ta,’ ku vula Yehovha Hosi Leyikulu,
‘Lawa ni nga ta rhumela ndlala atikweni,
Ku nga li ndlala ya pawu kumbe torha la mati,
Kambe ndlala ni torha la ku lava ku twa marito ya Yehovha.+
12 Va ta dederekela ku sukela ka lwandle lin’wani ku ya fika ka lin’wani
Ni ku sukela anorte* ku ya fika awuxeni.
Va ta ya hala ni hala va lavetela rito la Yehovha, kambe a va nga ta li kuma.
13 Hi siku lolelo tintombhi* ta ku saseka ni madjaha va ta titivala
Hi mhaka ya torha;
14 Lava fungaka hi swikwembu swa mavunhwa swa Samariya+ va ku:
“Loko ntsena xikwembu xa wena xa ha hanya, wena Dani!”+
“Loko ntsena ndlela ya Berxeba+ ya ha hanya!”
Va ta wa, a va nga ha ta pfuka.”+
9 Ni vone Yehovha+ na a nyime henhla ka altari, kutani a ku: “Bana pilari hi le henhla leswaku li tsekatseka. Li tsemi hi le henhla kutani vanhu lava nga sala ni ta va dlaya hi xipada. A nga kona lweyi a nga ta baleka naswona lweyi a nga ta zama ku baleka a nga ta fika ndhawu.+
2 Hambiloko vo txela va tumbela aSirheni,*
Voko la mina li ta va humesa;
Hambiloko vo khwela va ya matilweni,
Ni ta va hawula.
3 Hambiloko vo tumbela ahenhla ka ntshava ya Karmeli,
Ni ta va hlota ni va kuma ni va humesa.+
Hambiloko vo ni tumbelela aphakati ka lwandle,
Ni ta rhuma nyoka yi ya va luma.
4 Hambiloko valala va vona vo va teka va va yisa awukaraweni,
Ni ta rhumela xipada swaku xi ya va dlaya koseniyani;+
Ni ta va tisela khombo ku nga li minkateko.+
5 Hikusa Yehovha murhangeli wa tintsumi, Hosi Leyikulu, hi yena Lweyi a nga ta khumba tiko,*
Li za li deretera,+ kutani hinkwavu lava tshamaka atikweni va ta rila;+
Tiko hinkwalu li ta suka li nyima ku fana ni Nambu wa Nilu loko wu talile,
Li ta ya henhla ni hansi ku fana ni Nambu wa Nilu wa le Gibita.+
6 ‘Lweyi a yakaka ndlela leyi yaka atilweni
Ni yindlo ahenhla ka marhefu;
Lweyi a rhumaka mati ya lwandle,
Swaku ma nbhonya misava+
Vito la yena i Yehovha.’+
7 ‘N’wina Vayisrayele kasi a mi fani na vona vana va Kuxi ka mina?’ ku vula Yehovha.
‘Kasi Israyele a ni mu humesanga ka tiko la Gibita,+
Ni Vafilista ni va humesa aKreta+ na Siriya ni mu humesa aKiri?’+
8 ‘Vonani! Matihlo ya Yehovha Hosi Leyikulu ma txuvuke mfumu lowu nga ni xidjoho,
A ta wu helisa amisaveni.+
Kambe vatukulu va Yakobe a nga ta va helisa va ku jii,’+ ku vula Yehovha.
9 ‘Vonani, ni humesa nawu,
Ni ta sefa Vayisrayele xikarhi ka matiko hinkwawu,+
Ku fana ni munhu loko a sefa hi xisefo,
Ku nga wi ni xiribyani ni xin’we ahansi.
10 Hinkwavu lava nga djoha ka vanhu va mina va ta dlayiwa hi xipada,
Vona lava nge: “A hi nge kumiwi hi khombo.”’
11 ‘Hi siku lolelo ni ta pfuxa yindlo ya Davhida+ leyi nga wa,
Ni ta lunghisa lomu yi nga wonheka kona,
Ni lulamisa makhumbi ya yona;
Ni ta tlhela ni yi yaka yi fana ni masiku ya khale,+
12 Leswaku vanhu va mina va teka leswi nga sala swa Edomu,+
Ni swa matiko hinkwawu lawa vito la mina li nga vitaniwa ka wona,’ ku vula Yehovha lweyi a yendlaka swilo leswi.
13 ‘Vonani! Masiku ma ta,’ ku vula Yehovha,
‘Lawa murimi a nga ta rhangela mutshoveli,
Lweyi a psanyaka mawuvha a ta rhangela lweyi a rhwalaka mbewu;+
Tintshava ti ta thona vhinyu la ku tsokombela,+
Li ta ngirimela ka maganga hinkwawu.+
14 Ni ta vuyisa vanhu va mina va Israyele lava nga wukaraweni,+
Va ta tlhela va yaka madoropa lama nga helisiwa va tshama ka wona;+
Va ta rima masimu ya mawuvha, va phuza vhinyu la kona,+
Va ta rima masimu, va dla mihandzu ya kona.’+
15 ‘Ni ta va byala ka tiko la vona,
A va nge he tsuvuliwi
Ka tiko leli ni nga va nyika lona,’+ ku vula Yehovha Xikwembu xa wena.”
Leswi vulaka “Ku Va Ndzhwalu” kumbe “Ku Rhwala Ndzhwalu”.
Kumbe: “lawa ni nga ma twa ka xivono”.
Kumbe: “ku ni djikela”.
Ku nga minchumu ya ku yendliwa hi xigodo leyi va pakelaka ka yona minchumu, leyi kokiwaka hi swiharhi.
Kumbe: “swihondzo; switezi”.
Hi Xiheberu: “lweyi a khomaka nhonga ya wuhosi”.
Hi Xiheberu: “lweyi a khomaka nhonga ya wuhosi”.
Ku nga xitiviso xa nyimpi.
Kumbe: “swihondzo; switezi”.
Ku nga xitiviso xa nyimpi.
Hi Xiheberu: “muyavanyisi”.
Kumbe: “gumana”.
Kumbe: “multara”.
Kumbe: “atempeleni”.
Kumbe: “n’qolo; kalichi”.
Kumbe ku nga va ku vulavuliwa ni hi maxalani.
Kumbexana: “na ku nga na nchumu lowu nga xi xenga.”
Kumbe: “wachuka”.
Kumbe: “swihondzo; switezi”.
Kumbe: “ka switulu swa le Damaxka”.
Kumbe: “minandzu ya yena”.
Kumbexana: “ta tinyingi”.
Kumbe: “vinyi”.
Kumbe: “ma anzoli.”
Kumbe: “dízimo”.
Kumbe: “Ntombhi leyi ku nga Israyele”.
Kumbexana: “li ta va ndhawu ya wubihi.”
Kumbe: “hi ndlela ya ku bava”.
Swi nga yendleka ku li tinyeleti leti vitaniwaka Plêiades, leti nga ka ntlawa wa tinyeleti leti vitaniwaka Touro.
Swi nga yendleka ku li ntlawa wa tinyeleti lowu vitaniwaka Órion.
Kumbe: “impoxtu; tinemba”.
Kumbe ku nga va ku vulavuliwa ni hi maxalani.
Kumbe: “bere”.
Swikwembu leswi swi nga yendleka swi vula planeta la Saturno leli a li gandzeliwa tanihi xikwembu.
Swi tikomba na ku vulavuliwa hi mfumu wa Yuda ni wa Israyele.
Kumbe: “xitende”.
Kumbe: “swihondzo; switezi”.
Hi Xiheberu: “Makwavu wa papayi wa yena”.
Hi Xiheberu: “Hi teke timhondzo hi matimba ya hina.”
Ku nga hi Janeiro ni Fevereiro.
Hi Xiheberu: “nyimisa”.
Hi Xiheberu: “nyimisa”.
Kumbe: “makungu”.
Hi Xiheberu: “swivono”.
Hi Xiheberu: “dla pawu”.
Kumbe: “a ni boxa makuwa.”
Kumbe ku nga va ku vulavuliwa ni hi maxalani.
Hi Xiheberu: “efa”. Vona Xiyengetelo B14.
Hi Xiheberu: “xikele”.
Kumbe: “swikalu”.
Kumbe: “nguvu”.
Kumbe: “n’walungu”.
Ku nga tintombhi leti kalaka ti nga se famba masangu.
Kumbe: “aSheol”. Vona Ntlhamuselo.
Kumbe: “misava”.