YONASI
1 Yehovha a vulavula na mina Yonasi*+ n’wana wa Amitayi, a ku: 2 “Suka u famba u ya ka doropa lalikulu la Ninivha,+ u ya huwelela ku yavanyisiwa ka lona hikusa ni vone wubihi la lona.”
3 Kambe ni baleka Yehovha ni ya aTarxixi; ni suke ni ya Yopa se ni ya kuma boti leli yaka aTarxixi. Kutani ni hakela, ni khwela boti ni van’wani lava a va ya aTarxixi ni baleka Yehovha.
4 Yehovha a rhumela moya wawukulu, se ku va ni xidzedze xaxikulu alwandle, boti li za li lava ni ku tshoveka. 5 Vatluti va chava ngopfu mun’wani ni mun’wani a za a sungula ku kombela ku pfuniwa ka xikwembu xa yena. Kutani va sungula ku txukumetela nhundzu ya vona alwandle swaku boti li nga tikeliwi.+ Kambe mina a ni li ndzenindzeni ka boti, a ni yo yetlela. 6 Murhangeli wa boti a ni tela a fika a ku: “U yetlelela yini? Pfuka u kombela ku pfuniwa ka xikwembu xa wena! Kumbexana Xikwembu xa ntiyiso xi nga hi twela wusiwana swaku hi nga fi.”+
7 Se va ku: “Tanani, a hi hoxeni swiribyani*+ swaku hi ta tiva lweyi a hi vangelaka khombo leli.” Va hoxa swiribyani, kutani swi kombeta mina Yonasi.+ 8 Kutani va ni vutisa va ku: “Hi kombela u hi byela, kasi i mani lweyi a hi vangelaka khombo leli? Hi wihi ntirho wa wena naswona u ta hi kwini? U ta hi ka tiko lini la kona naswona u wa lixaka lihi?”
9 Ni va hlamula ni ku: “Ni Muheberu naswona ni gandzela Yehovha Xikwembu xa le matilweni, Lweyi a nga yendla lwandle ni misava.”
10 Se vavanuna volavo va sungula ku chava swinene, va ku: “U yendle yini?” (Vavanuna lava va swi tivile swaku a ni baleka Yehovha, hikusa a ni va byelile.) 11 Kutani va ni vutisa va ku: “Hi fanele hi yendla yini hi wena swaku lwandle li miyela?” Hikusa lwandle a li ya li kwata hintamu. 12 Kutani ni va hlamula ni ku: “Ni tlakuleni mi ni txukumeta lwandle, lwandle li ta miyela; hikusa na swi tiva swaku xidzedze lexi xaxikulu xi za xi va kona hi mhaka ya mina.” 13 Kutani vavanuna lava va zama hi matimba ku koka boti swaku li ya ka misava, kambe a va tsandzeka, hikusa lwandle a li ya li kwata hintamu swinene.
14 Kutani va huwelela ka Yehovha va ku: “Yehovha, hi nga tshuki hi fa hi mhaka ya munhu lweyi! U nga hi nyiki nandzu wa ngati ya munhu wa ku a nga na nandzu, hikusa u yendle ku rhandza ka wena, Yehovha Xikwembu xa hina.” 15 Se va ni tlakula va ni txukumeta lwandle; kutani lwandle li miyela. 16 Vavanuna lava va sungula ku mu chava swinene Yehovha,+ va yendlela Yehovha magandzelo, va tlhela va funga swaku va ta mu tirhela.
17 Kutani Yehovha a rhumela hlampfi yayikulu swaku yi ta ni minta, kutani ni tshama ndzeni ka khwirhi la hlampfi leyi, masiku manharhu ni wusiku la kona.+
2 Kutani ni khongela ka Yehovha Xikwembu xa mina na ni li ka khwirhi la hlampfi,+ 2 ni ku:
“Nkama na ni karhatekile ni kombele ka wena Yehovha swaku u ni pfuna naswona u ni hlamulile.+
Ni kombele ku pfuniwa na ni li Sirheni.*+
Wena u ni twile.
3 Nkama u nga ni txukumeta amatini, aphakati ka lwandle,
Magandlati ma ni mbhonyile.+
Maboboma ni magandlati ya wena swi ni kokile.+
4 Se ni ku: ‘U ni hlongolile phambheni ka wena!
Indjhe na ha ta tlhela ni yi vona tempele ya wena ya ku kwetsima?’
5 Ni mbombomelile naswona a ni li kusuhi ni ku fa;+
Lwandle li ni mbhonyile.
Nhloko ya mina a yi phutseliwe hi swinsinyani swa le lwandle.
6 Ni mbombomelile ni ya fika ahansi ka lwandle.*
Tinyanghwa ta misava a ti ni pfalelile.
Kambe Yehovha Xikwembu xa mina, u ni humesile ka xikhele.+
7 Nkama na ni li kusuhi ni ku fa, ni ku khumbukile wena Yehovha.+
Kutani xikhongelo xa mina xi fikile ka wena, ka tempele ya wena ya ku kwetsima.+
8 Lava gandzelaka swifaniso, va tshika lweyi a va rhandzaka swinene.
9 Kambe mina, ni ta ku dzunisa ni tlhela ni ku yendlela gandzelo.
Ni ta yendla leswi ni nga ku tshembisa swona.+
Yehovha, hi wena u ponisaka.”+
10 Kutani Yehovha a byela hlampfi swaku yi ni hlanta handle ka lwandle.
3 Yehovha a vulavula na mina ka wumbirhi, a ku:+ 2 “Famba ka doropa lalikulu la Ninivha,+ u ya li byela leswi ni ku byelaka swona.”
3 Se ni ya Ninivha+ hi ku landza leswi Yehovha a nga ni byela swona.+ Ninivha a ku li doropa lalikulu* naswona a wu heta masiku manharhu hi minenge swaku u ya fika magamu ka lona. 4 Kutani ni nghena adoropeni, ni famba siku hinkwalu na ni huwelela ni ku: “Ku yo sala 40 wa masiku ntsena swaku Ninivha a helisiwa.”
5 Se vanhu va le Ninivha va pfumela ka Xikwembu,+ kutani va byela vanhu swaku va titsona swakudla ni ku yambala masaka, ku sukela ka wamukulu ku ya ka wamutsongo. 6 Nkama hosi ya Ninivha yi nga swi twa, yi suke ka xitshamu xa yona xa wuhosi yi hlivila mpahla ya yona ya wuhosi, yi yambala masaka kutani yi tshama ka nkuma. 7 Yi tlhela yi rhuma vanhu swaku va tivisa doropa hinkwalu la Ninivha va ku:
“Lowu i nawu wa hosi ni varhangeli va yona: A ku na munhu kumbe xiharhi, kumbe ntlhambi wa tihomu kumbe wa tinyempfu, leswi faneleke swi dla xanchumu. A ku fanelanga ku dliwa kumbe ku phuziwa mati. 8 Vanhu ni swiharhi va fanele va yambala masaka, va huwelela ka Xikwembu hi timbilu ta vona hinkwatu, va tshika tindlela ta vona ta ku biha ni tinyimpi. 9 Kumbexana Xikwembu xa ntiyiso xi nga tshika ku yendla leswi xi lavaka ku swi yendla, xi hi tsetselela swaku hi nga dlayiwi!”
10 Nkama Xikwembu xa ntiyiso xi nga vona leswi va nga swi yendla, ni leswi va nga ti tshikisa xiswona tindlela ta vona ta ku biha,+ xi game xi nga ha li tisi khombo leli xi nga te xi ta va tisela lona.+
4 Kambe leswo a swi ni tsakisanga, se ni kwata hintamu. 2 Kutani ni khongela ka Yehovha ni ku: “Yehovha a hi swona leswi ni nga swi vula na na ha li ka tiko la mina? Hi leswo swi nga yendla swaku ni zama ku baleka ni ya aTarxixi;+ hikusa a ni swi tiva swaku wena u Xikwembu lexi nga ni ntwelawusiwana ni timpsalu, lexi hlwelaka ku kwata funtshi xi nga ni lirhandzu lalikulu,+ lexi kalaka xi nga rhandzi ku helisa. 3 Yehovha Xikwembu xa mina, ni kombela u ni dlaya, hikusa swa yampsa ni fa ku tlula ku hanya.”+
4 Yehovha a ni vutisa a ku: “U ni xivangelo xa ku twala xa ku kwata?”
5 Se ni huma adoropeni ni ya tshama ka tlhelo la le wuxeni la doropa. Ni tiyendlela ndzhuti ni tshama hansi ka wona, leswaku ni vona leswi nga ta yendleka ka doropa.+ 6 Yehovha Xikwembu a milisa xinsinyani xa mindzheko,* xi ni yendlela ndzhuti, leswaku ni rhula ka mahlomulu ya mina. Kutani ni tsaka hintamu hi mhaka ya xinsinyani lexi.
7 Kambe Xikwembu xa ntiyiso xi rhumela xivungwani hi mundzuku ka kona nimpundzu swaku xi dla xinsinyani xa mindzheko, kutani xinsinyani xi vuna. 8 Nkama dlambu li nga huma, Xikwembu xi rhumela moya wa ku hisa wa le wuxeni, kutani dlambu li hisa nhloko ya mina, ni za ni lava ni ku titivala. Ni tshamela ku vula swaku swa yampsa ni fa, ni tshamela ku phindhaphindha ni ku: “Swa yampsa ni fa ku tlula ku hanya.”+
9 Xikwembu xi ni vutisa xi ku: “U ni xivangelo xa ku twala xa ku kwata hi mhaka ya xinsinyani lexi?”+
Se ni hlamula ni ku: “Ni ni xivangelo xa ku kwata ni za ni lava ni ku fa.” 10 Kambe Yehovha a ku: “U xi twele wusiwana xinsinyani lexi, lexi u kalaka u nga xi tirhelanga kumbe ku xi byala; xi kule hi wusiku lin’we xi tlhela xi fa hi wusiku lolelo. 11 Se mina ke? A ni fanelanga ni li twela wusiwana doropa leli lalikulu la Ninivha,+ leli nga ni vanhu va ku tlula 120.000, lava kalaka va nga swi tivi ku hambanisa swaswinene ni swa ku biha, ku patsa ni swifuyu swa vona swa swinyingi?”+
Leswi vulaka “Tuva”.
Vona Ntlhamuselo.
Kumbe: “aSheol.” Vona Ntlhamuselo.
Hi Xiheberu: “tintshava.”
Hi Xiheberu: “doropa lalikulu ka Xikwembu”.
Kumbexana: “xinsinyani xa hlampfurha”.