Mahetelelo

1, 2. Hi mhaka muni swi li swa lisima ku va ni lipfumelo swoswi? Nyikela xikombiso.

LIPFUMELO i rito la ku saseka hintamu leli li nyimelaka wumunhu la ku tsakisa. Kambe loko hi vona rito leli kumbe hi li twa, hi fanele hi pimisa hi rito lin’wani leli nge: “Xihantla!” Phela loko hi nga na lipfumelo hi fanele hi va na lona hi xihantla. Se loko hi li na lona, hi fanele hi xihantla hi li vhikela hi tlhela hi li tiyisa. Hi mhaka muni?

² Tipimisi na wu li mananga, na wu twa torha funtshi na wu lava mati. Loko u ma kuma, swi lava u ma vhikela ka dlambu; funtshi swi lava u tatisa nchumu lexi u nga ma chela ka xona swaku ma ku pfuna anze u ya fika lomu u yaka kona. Phela namuntlha vanhu a va na mhaka ni ku gandzela Yehovha, funtshi lipfumelo la ntiyiso li kala ku fana ni mati lawayani naswona li nyamalala hi ku hantlisa loko li nga vhikeliwi kumbe loko li nga tami li tiyisiwa. Namuntlha i swa xihantla kuva hi tiyisa lipfumelo la hina hikusa ku fana ni leswi hi kalaka hi nga hanyi loko hi nga na mati, a wunghanu la hina na Yehovha na lona li nga fa loko hi nga na lipfumelo. — Rom. 1:17.

3. I mpsini leswi Yehovha a hi nyikaka swona swaku hi tiyisa lipfumelo la hina, naswona hi swini swilo swimbirhi leswi hi fanele hi swi khumbuka?

³ Yehovha wa swi tiva swaku ha li lava lipfumelo hi ku hantlisa, naswona wa swi tiva swaku swa karhata ku va na lona ni ku li hlayisa namuntlha. Ha tiyiseka swaku hi leswo swi nga yendla a hi nyika swikombiso swaku hi swi tekelela. Yehovha a kongomise mupostolo Pawulo swaku a tsala leswi: ‘Tekelelani lava dlaka tshomba la switshembiso hi mhaka ya lipfumelo ni ku lehisa mbilu.’ (Heb. 6:12) Hi mhaka leyo, a nhlengeletanu ya Yehovha ya hi kutxa swaku hi tikarhata kuva hi tekelela swikombiso swa vavanuna ni vavasati va lipfumelo va ku fana ni lava hi nga va kuma ka buku leli. Kambe hi fanele hi yendla yini swoswi? Hi fanele hi khumbuka swilo swimbirhi: 1) Hi fanele hi tama hi tiyisa lipfumelo la hina; 2) hi fanele hi tama hi pimisa hi ntshembo lowu hi nga na wona.

4. Sathana a swi kombisise ku yini swaku i nala wa lipfumelo, naswona hi mhaka muni hi nga fanelanga hi heleliwa hi ntshembo?

⁴ Tama u kulisa lipfumelo la wena. A lipfumelo li ni nala wamukulu ku nga Sathana. Leswi a fumaka misava a yendla hinkwaswu swaku swi karhata ku va ni lipfumelo la ku tiya funtshi a ni matimba ku hi tlula. Se ku nga va leswaku hi fanele hi heleliwa hi ntshembo wa leswaku a hi nga ta swi kota ku va ni lipfumelo la ku tiya? Nada! Yehovha i Munghanu Wamukulu wa mun’wani ni mun’wani lweyi a lavetelaka ku va ni lipfumelo la ntiyiso. Yena a tshembisa ku hi pfuna a tlhela a va na hina. A ta hi pfuna swaku hi kaneta Davulosi a tlhela a yendla swaku a hi baleka! (Yak. 4:7) Hi nga kaneta Davulosi loko siku ni siku hi tiyisa lipfumelo la hina. Ndjhani?

5. Vavanuna ni vavasati va ku tshembeka lava Bibele li vulavulaka hi vona va li kumise ku yini lipfumelo? Tlhamusela.

⁵ Hi lani se hi nga swi vona hi kona, vavanuna ni vavasati va ku tshembeka lava Bibele li vulavulaka hi vona, a va psaliwanga na va ni lipfumelo. Vona i xikombiso xa kahle swinene xa leswaku munhu a nga va ni lipfumelo hi ku pfuniwa hi moya wa ku kwetsima wa Yehovha. (Gal. 5:22, 23) Vona va khongelile va kombela Yehovha swaku a va pfuna kuva va tama va tiyisa lipfumelo la vona. Na hina hi fanele hi yendla swa ku fana. Naswona hi fanele hi khumbuka leswaku Yehovha a va nyika hi ku swi rhandza moya wa yena wa ku kwetsima lava va mu kombelaka, va tlhela va hanya hi leswi va swi kombela ka swikhongelo swa vona. (Luk. 11:13) Hi nga yendla yini swin’wani swaku hi va ni lipfumelo?

6. Hi nga pfunekisa ku yini loko hi djondza hi timhaka ta le Bibeleni?

⁶ Ka buku leli, hi yo vona ntsena swikombiso swa switsongo swa vanhu lava nga kombisa lipfumelo. Kambe ka ha ni swin’wani swa swinyingi hintamu! (Lerha Vaheberu 11:32.) Xikombiso xin’wani ni xin’wani xi ni mhaka ya lisima leyi hi nga djondzaka hi yona hi tlhela hi pimisa hi yona. Loko ho lerha hi ku kahlula timhaka leti vulavulaka hi vanhu va lipfumelo lava kombisiwa ka Bibele, a hi nga ta va ni lipfumelo la ku tiya. Kambe leswaku hi pfuneka hi leswi hi swi djondzaka swi lava hi heta nkama wa wunyingi na hi pexkizara kahle hi zama ku twisisa mongo ni swaku mhaka yoleyo yi vula yini. Se loko minkama hinkwayu hi khumbuka swaku vavanuna ni vavasati lava va ku kala va nga hetisekanga a va li ‘vanhu va ku fana na hina’ a xikombiso xa vona xi ta va xa lisima hintamu ka hina. (Yak. 5:17) Phela hi nga swi kota ku va twisisa hi ku va hi zama ku pimisa hi swaku a va titwisa ku yini nkama va nga kumana ni swikarhatu swa ku fana ni swa hina.

7-9. a) Vavanuna ni vavasati va lipfumelo va minkama ya Bibele a va ta titwisa ku yini loko a vo gandzela Yehovha ku fana ni leswi hi swi yendlisaka xiswona namuntlha? b) Hi mhaka muni hi fanele hi tiyisa lipfumelo la hina hi leswi hi swi yendlaka?

⁷ Hi tlhela hi tiyisa lipfumelo la hina hi mintirho. Phela “lipfumelo la ku kala li nga na mintirho li file.” (Yak. 2:26) Pimisa hi ndlela leyi vavanuna ni vavasati lava se hi nga djondza hi vona a va ta tsakisa xiswona loko a vo rhumiwa ku yendla mintirho leyi Yehovha a nga hi nyika swaku hi yi yendla namuntlha!

⁸ Hi xikombiso, Abrahamu a a ta va a titwise ku yini loko a a yo byeliwa swaku a a ta gandzela Yehovha ku nga li ka maaltari lawa a ma yendliwe hi maribye amananga, kambe a mu gandzela ka Tiyindlo ta Wugandzeli ni ka makongresu ni vanhu lava tirhelaka Yehovha, na va djondza hi switshembiso leswi yena a nga swi vona “na swa ha li kule” kambe swoswi na va swi kambisisa kahle? (Lerha Vaheberu 11:13.) Se Eliya a a ta tiva swaku ntirho wa yena a wu nga ha ta patsa ku dlaya vaprofeta lavayani va ku biha va Bali nkama lowu a zamaka ku tirhela Yehovha ka nkama lowu a ku fuma hosi ya ku biha leyi a yi nga mu gandzeli Yehovha, kambe a a ta famba a pfuxela vanhu hi ndlela ya ku rhula a tlhela a va chumayela mahungu lawa ma tiyisaka ni lawa ma nyikaka ntshembo. Vavanuna ni vavasati lava a va ni lipfumelo la ku tiya lava Bibele li vulavulaka hi vona, a va ta yendla hinkwaswu leswi va nga swi kotaka swaku va tirhela Yehovha ku fana ni leswi hina hi swi yendlaka namuntlha.

⁹ Se hi fanele hi tama hi tiyisa lipfumelo la hina hi leswi hi swi yendlaka. Loko hi yendla leswo, hi ta va na hi tirhisa leswi hi nga swi djondza ka vavanuna ni vavasati va lipfumelo lava ku vulavuliwaka hi vona ka Rito la Xikwembu. Hilani swi nga kombisiwa hi kona ka Xingheniso, hi ta titwa hi li kusuhi na vona tanihi vanghanu va hina. Se ku nga li khale a wunghanu lolelo li ta va la hikakunene.

10. Hi wini ntsaku lowu hi nga ta va na wona ka misava ya nyuwani?

¹⁰ Tama u pimisa hi ntshembo lowu u nga na wona. Vavanuna ni vavasati va lipfumelo va kume matimba hi ku tama va pimisa hi switshembiso leswi Xikwembu xi nga va yendlela swona. Wena ke? Hi xikombiso, pimisa hi ntsaku lowu u nga ta va na wona loko u tlhangana ni vatirheli va ku tshembeka va Xikwembu loko va pfuxiwa ka nkama lowu “lava ku lulama . . . va [nga] ta pfuxiwa.” (Lerha Mintirho 24:15.) Hi swini swivutiso leswi a wu ta tsakela ku va yendla swona?

11, 12. Ka misava ya nyuwani, hi swini swivutiso leswi a wu ta navela ku swi yendla a) Abele? b) Nowa? c) Abrahamu d) Ruti? e) Abigayili? na f) Estere?

¹¹ Loko u kumana na Abele, a wu ta mu vutisa u ku: “Vapsali va wena a va tshamise ku yini?” Kumbe a wu ta mu vutisa u ku: “Nkama u nga vona Makerubu na ma vonelela jardim la Edeni, u vulavule na wona ke? Wona ma vule nchumu?” Loko u kuma Nowa, a wu ta mu vutisa u ku: “Indjhe a wu ma chava Manefilimi? Nkama swiharhi a swi li ndzeni ka ngalava, u swi hlayisise ku yini?” Se loko u kuma Abrahamu, a wu ta mu vutisa u ku: “Indjhe u tshamile na Xemi? I mani a nga ku djondzisa hi Yehovha? Swi karhatile ku suka aUra?”

¹² Hi ku fana, vona swivutiso leswi a wu ta tsakela ku swi yendlela vavasati va lipfumelo lava nga ta pfuxiwa. “Ruti, i mpsini leswi nga ku yendla u navela ku tirhela Yehovha?” “Abigayili, indjhe a wu chava ku byela Nabali swaku u pfune Davhida?” “Estere, i mpsini leswi nga yendleka hi wena na Mordekayi handle ka leswi hi swi djondzaka ka Bibele?”

13. a) Hi swini swivutiso leswi lava nga ta pfuxiwa va nga ta lava ku ku yendla swona? b) U titwisa ku yini hi ntshembo wa ku tshama ni vavanuna ni vavasati lava Bibele li vulavulaka hi vona ka nkama lowu taka?

¹³ Phela swi nga yendleka vavanuna ni vavasati lavayani va lipfumelo va ta va ni swivutiso swa ku tala swa ku hi yendla. Swi ta tsakisa hintamu ku va byela hi leswi nga yendleka ka masiku ya wugamu ni ndlela leyi Yehovha a nga katekisa vanhu va yena ka minkama ya ku karhata! Ha tiyiseka swaku va ta tsaka hi ku tiva swaku Yehovha a hetisise switshembiso hinkwaswu a nga swi yendla. Ka nkama lowu taka, a swi nga ha ta za swi lava hi pimisa hi vatirheli va ku tshembeka va Yehovha lava ku vulavuliwaka hi vona aBibeleni, hikusa va ta va na hina aParadesi! Se yendla hinkwaswu leswi u nga swi kotaka swoswi swaku u vona vanhu lava na va nga li switoriya ntsena leswi ku vulavuliwaka hi swona aBibeleni, kambe va voni na va li vanhu va hikakunene lava va nga hanya lani misaveni funtshi tekelela lipfumelo la vona. Hi navela swaku u nga tsaka hi ku tirhela Yehovha na vona, mu tlhela mu va vanghanu hi masiku ni masiku!