Adamu Na Evha Va Tshike Ku Yingisa Xikwembu

Siku lin’wani na Evha a li yexe, nyoka yi sungule ku vulavula na yena. Yi mu vutise yi ku:

— I ntiyiso swaku Xikwembu xi mi tsimbise ku dla mafruta hinkwawu ma nga ka jardim?

Evha a hlamula a ku:

— Nada! A hi swona leswi u swi hlayaka. Xikwembu a xi hi tsimbisanga ku dla mafruta hinkwawu ya jardim. Xi yo hi tsimbisa ku dla fruta la nsinya wun’we ntsena. Hikusa loko ho dla hi ta fa. Se nyoka yi ku:

— A hi ntiyiso leswo, vo mi hembela n’wina. Phela loko mi dla fruta leliyani a mi nga ta fa kambe mi ta fana ni Xikwembu.

Indjhe leswo a a li ntiyiso? Ihim, a a nga li ntiyiso. Kambe Evha a ma kholwile mavunhwa wolawo. A sungule ku txuvukisela fruta leliyani a za a li navela hintamu. Se a li dla. Evha a game a teka fruta a nyika Adamu, na yena a dla. Adamu a a swi tiva swaku loko va nga swi yingisi leswi Yehovha a nga va byela swona, a va ta fa. Hambileswo a dlile.

Yehovha a game a vutisa Adamu na Evha swaku hi mhaka muni va dlile fruta leliyani. Evha a byele Yehovha a ku:

— A nandzu a hi wa mina, i wa nyoka.

Na yena Adamu a byele Yehovha a ku:

— A nandzu a hi wa mina, i wa Evha.

Phela Adamu na Evha a va xi yingisanga Xikwembu. Hi mhaka leyo, Yehovha a va hlongolile ka jardim la Edeni. Yehovha a game a veka tintsumi timbirhi ni xipada lexi a xi pfurha ndzilu leswaku va nga ha ngheni ajardim.

Ha swi tiva swaku tinyoka a ti vulavuli, se lweyi a nga yendla swaku nyoka liyani yi vulavula i Sathana. Wa swi tiva swaku Sathana i mani? I ntsumi ya ku biha hintamu. Vito lin’wani la Sathana i Davulosi. Yehovha a ta khatisa Sathana hi ku mu helisa ka nkama lowu taka. Se Sathana a nge he tshuki a xenga vanhu swaku va yendla swilo swa ku biha.