Khumbuka Nsati Wa Lota

Lota a a tshama ni tiyu wa yena Abrahamu aKanana. Hi ku famba ka nkama Abrahamu na Lota va game va va ni swifuyu swa swinyingi. Phela a swi li swinyingi hintamu lakaku a swi nga ha yeneli lani a va tshama kona. Se Abrahamu a byele Lota a ku:

— Ni vona swaku lani se i kutsongo swaku hi tshama xikan’we hina ni swifuyu swa hina, swi lava hi hambana. U lava ku ya kwini? U nga langa, loko u ya ka tlhelo leli mina ni ta ya ka tlhelo leliyani.

Abrahamu a tshike Lota a langa lomu a a lava ku ya kona, a nga lavanga ku rhanga a langa leswaku a tilangela ndhawu yayinene. Leswi Abrahamu a nga swi yendla a swi li swinene a hi swona?

Se Lota a txuvuke a vona doropa la Sodoma, kolahayani ka tiko la Kanana. Doropa leli a li sasekile hintamu, a li ni mati ya manyingi ni byanyi la linyingi. Se Lota a teka a ndjangu wa yena va ya tshama koseniyani.

Kambe vanhu va Sodoma a va yendla minchumu ya ku biha hintamu. Naswona kusuhi ni Sodoma a ku ni doropa lin’wani leli a li vitaniwa Gomora, na lona vanhu va kona a va yendla minchumu ya ku biha hintamu. Hi mhaka leyo Yehovha a a lava ku va helisa hinkwavu. Kambe a a lava ku ponisa Lota ni ndjangu wa yena, se Yehovha a rhume tintsumi timbirhi ti ya byela Lota ti ku:

— Kahlulani mi suka lani! Hikusa Yehovha a lava ku helisa doropa leli.

Kambe Lota ni ndjangu wa yena va hlwelile a va tekelanga ku huma ka doropa leliyani. Se tintsumi ti khoma voko la Lota, nsati wa yena ni vana va yena vavambirhi ti huma na vona handle ka doropa, se ti ku:

— Tsutsumani! Balekani funtshi mi nga txuvuki ndzhaku, loko mo txuvuka ndzhaku mi ta fa!

Nkama Lota ni ndjangu wa yena va nga fika ka doropa la Sowari, Yehovha a game a helisa madoropa ya Sodoma ni Gomora. A ma hisa hi ndzilu wawukulu lowu a wu ta hi le tilweni. Kambe nsati wa Lota a nga yingisanga leswi Yehovha a nga va byela swona, yena a txuvuke ndzhaku. Indjhe wa swi tiva swaku ku game ku yendleka yini? A game a txintxa a va xidulu xa munyu. Phela leswo swi va vave hintamu vana va yena. Se wa swi vona swaku hi mhaka muni swi li swa lisima ku yingisa Yehovha?