Ndhawu Ya Ku Gandzela Ka Yona Yehovha

Nkama lowu Moxe na a li ka Ntshava ya Sinayi, Yehovha a mu byele swaku a yaka ndhawu ya lisima leyi a yi ta vitaniwa tabernakela leyi Vayisrayele a va ta mu gandzela ka yona Yehovha. A swi lava leswaku Moxe a yaka tabernakela leyi a swi ta koteka swaku va yi susa ni ku yi tlakula loko va suka va famba.

Leswaku va kota ku pfunisa ka ku yaka, Yehovha a kombele Vayisrayele swaku va nyikela hi leswi a va li na swona. Se Vayisrayele va nyikele hi woru, prata kobre, maribye ya lisima, switlan’wani, linya la azuli, swikhumba swa swiharhi ni swin’wani. Vona va nyikele minchumu ya yinyingi hintamu lakakuza Moxe a ku:

— Swa yenela leswi se mi nga swi nyikela mi nga ha tisi swin’wani.

Vavanuna ni vavasati va vanyingi lava a va kota ku yendla mintirho ya ku hambanahambana va pfunisile ka ku yaka tabernakela. Van’wani a va tirha hi matesidu, van’wani a va tirha hi maribye ya lisima, van’wani a va tirha hi woru, se van’wani a va tirha hi mapulangu.

Vayisrayele va yake tabernakela li tshamisa xileswi Yehovha a nga va byelisa xiswona. Ndzeni ka tabernakela a ku ni kortina la ku xonga la ku leha leli a li hambanisa Ndhawu Ya Ku Kwetsima ni Ndhawu Ya Ku Kwetsima Hintamu. Ka Ndhawu Ya Ku Kwetsima a ku ni xa ku tlhoma swa ku voninga hi swona xa ku yendliwa hi woru naswona a ku ni meza ni altari. Se ka Ndhawu Ya Ku Kwetsima Hintamu a ku ni kaxa leli nga yendliwa hi mapulangu ni woru leli a li vitaniwa swaku i areka ya ntwananu. Wa swi tiva swaku i yini ntwananu? I xitshembiso xa lisima hintamu. Phela areka ya ntwananu a yi khumbukisa Vayisrayele xitshembiso lexi va nga xi yendla xa ku gandzela Yehovha ni ku yingisa yena ntsena. Se a handle ka tabernakela a ku ni kintari naswona a ku ni baziya leli a li yendliwe hi kobre ni altari lalikulu. Yehovha a pfunile Vayisrayele leswaku va djondza ku yendla mintirho leyi a yi laveka leswaku va pfunisa ka ku yaka tabernakela.

Yehovha a lange Aroni ni vana va yena swaku va va vaprista. Vona a va fanele va hlayisa tabernakela ni swilo hinkwaswu leswi vanhu a va swi tisa ka Yehovha. Yehovha a tlhele a langa Aroni swaku a va Muprista Wamukulu. Phela a a li yena ntsena lweyi a a ni mfanelo ya ku nghena ka Ndhawu Ya Ku Kwetsima Hintamu funtshi a a fanele a nghena kan’we hi lembe. Wa swi tiva swaku a a nghena a yendla yini? A a nghena a kombela ku rivaleliwa swidjoho swa yena, swa vana va yena ni swa Vayisrayele hinkwavu.

A tabernakela yi helile loko se ku hundze lembe lin’we na Vayisrayele se va humile aGibita. Phela vona se a va ni ndhawu ya ku mu gandzela ka yona Yehovha, lahayani a va titwa na va li na Yehovha.

Yehovha a yendle swaku ku humelela rhefu ahenhla ka tabernakela. Loko rhefu li nyima ni Vayisrayele na vona a va tshama kolanu, se loko rhefu li famba a va swi vona swaku i nkama wa leswaku na vona va famba. Se a va hahlula tabernakela va landzela rhefu.