Davhida Na Sawulo

Loko se Davhida a dlaye Goliyadi, yena a ve murhangeli wa masonchwa ya Sawulo. Davhida a hlule tinyimpi ta ku tala a tlhela a tiviwa hintamu. Loko a vuya hi le nyimpini vavasati a va yimbelela va ku:

— Davhida a dlaye vanhu va vanyingi ku tlula Sawulo.

Leswo swi yendle leswaku Sawulo a sungula ku va ni wukwele a tlhela a lava ku dlaya Davhida.

Davhida a a li muchayi wa kahle wa muzika. Se siku lin’wani na Davhida a chayela Sawulo muzika, Sawulo a khome tlharhi a li txukumetela leswaku li tlhava Davhida kambe yena a li vhikile. Indjhe wa swi tiva swaku i yini tlharhi? I nchumu lexi vanhu va khale a va xi tirhisa leswaku va lwa nyimpi hi xona. Loko se ku hundze leswo Sawulo a tame a lava ku dlaya Davhida makhambi ya manyingi. Hi mhaka leyo Davhida a vone swi yampsa leswaku a baleka.

Siku lin’wani Sawulo a hlengelete 3000 wa masonchwa leswaku va lavetela Davhida. Nkama lowu na va mu lavetela, Sawulo a nghene lani Davhida ni vavanuna lava a va li na Davhida a va tumbele kona. Vavanuna lava a va na Davhida va mu hlevetelile va ku:

— Lowu i nkama wa leswaku u dlaya Sawulo.

Se Davhida a tshinelile hi kutsongokutsongo lani Sawulo a a li kona a fika a tsema xitarapu xa mpahla ya Sawulo naswona Sawulo a nga swi tsumbulanga. Loko Davhida a game ku yendla leswo a titwe nandzu, hikusa ka yena a swi fana ni loko a nga yi hloniphi hosi leyi a yi langiwe hi Yehovha. Hi mhaka leyo Davhida a nga va tshikanga vavanuna lava a va li na yena va dlaya Sawulo. Nkama lowu Sawulo a nga huma hi lomu a a li kona Davhida a te:

— Mina a ni ta va ni ku dlayile wena hosi kambe a ni swi yendlanga leswo.

Ku nga va leswaku Sawulo a swi tshikile ku lava ku dlaya Davhida? Nada, Sawulo a tame a lava ku dlaya Davhida.

Siku lin’wani niwusiku Davhida ni sobrinyu wa yena Abixayi, va nghene hi ku tumbela lani Sawulo a a yetlele kona. Hambi hi Abineri lweyi a a fanele a vhikela hosi a a li ku yetleleni. Loko a vone leswo, Abixayi a lave ku dlaya Sawulo kambe Davhida a te:

— Mu tshiki Abixayi, Yehovha wa swi tiva leswaku a ta yendla yini hi Sawulo, hina a hi teki tlharhi la yena ni jaru la yena la mati hi huma lani.

Davhida na Abixayi va humile lani Sawulo a yetlele kona va fika va khwela ka ntshava leyi a yi li kona kolahayani kusuhi. Davhida a gama a ku:

— Abineri hi mhaka muni u nga yi vhikelanga hosi? Phela hina hi teke tlharhi ni jaru la yona la mati kambe wena a wu swi vonanga.

Sawulo a li tivile rito la Davhida se a ku:

— Phela wena a wu ta va u ni dlayile kambe a wu ni dlayanga; Impela u ta va hosi ya Israyele.

Loko se ku hundze leswo Sawulo a tlhelele kaya ka yena. Indjhe hinkwavu va le kaya ka Sawulo a va mu nyenya Davhida?