Nsinya Wa Ku Leha Hintamu

Siku lin’wani niwusiku, Hosi Nebukadinazara a lorhe swilo leswi nga mu yendla a chava hintamu. Se a kombele vavanuna lava va nga ni wutlharhi leswaku va mu byela swaku leswi a nga swi lorha a swi lava ku vula yini. Kambe a nga kona lweyi a nga swi kota ku mu tlhamusela.

Se Hosi Nebukadinazara a ye a ya vulavula na Daniyele a ku:

— Ni lorhe nsinya, wona a wu lehe hintamu lakakuza wu ya fika atilweni. Funtshi a swi koteka kuva u wu vona hambiloko u li ka ndhawu yin’wani ni yin’wani ya misava. Wona a wu li ni matluka ya ku xonga ni mafruta ya manyingi. A swiharhi a swi rhandza ku ya humula ka wona. Swinyanyani a swi yendla swisaka ka tigadja ta wona.

Se ku humelele ntsumi na yi ta hi le tilweni yi fika yi ku:

— Tsemani nsinya ni tigadja ta wona, kambe tshikani xigodo ni timintsu ta xona, xi boheni hi nsimbi ni kobri. Mbilu ya xona a yi txintxiwi yi nga ha vi ya munhu, a xi nyikiwe mbilu ya xiharhi anze ku hela 7 wa minkama. Leswaku vanhu va ta swi tiva swaku Xikwembu i Hosi ka mfumu wa vanhu, ni swaku a wu nyika mun’wani ni mun’wani lweyi a mu rhandzaka.

Yehovha a yendle swaku Daniyele a twisisa leswi hosi yi nga swi lorha ni leswi a swi vula swona. Loko a swi twisisile a sungule ku chava. A gama a byela hosi a ku:

— Hosi ya mina, a ni navela leswaku leswi u nga swi lorha swi humelela lava va ku nyenyaka, kambe swi ta humelela wena. A nsinya wawukulu lowu nga tsemiwa, hi wena hosi. U ta tekeliwa mfumu, u ta ya dla byanyi ku fana ni swiharhi. Kambe hi lani ntsumi yi nga vula hi kona swaku ku siyiwa xigodo, u ta gama u tlheliseliwa wuhosi.

Siku lin’wani na se ku hundze lembe, Nebukadinazara a a fambafamba ka yindlo ya yena ya wuhosi a hlamalisiwa hi doropa la Babilona a ku:

— Vonani ku saseka ka doropa leli mina ni nga li yaka. Hi mina hosi yayikulu ku tlula tihosi hinkwatu.

Na wa ha vula leswo Nebukadinazara a twe rito li ku:

— Nebukadinazara a mfumu wa wena wu tekiwile.

Se hi nkama wolowo Nebukadinazara a sungule ku hlanya a tlhela a txintxa a sungula ku hanya ingi o va xiharhi. Hi mhaka leyo swi lave a suka ka yindlo ya wuhosi a ya tshama khwatini ni swiharhi. Misisi ya Nebukadinazara yi kule hintamu yi za yi fana ni mavoya ya xinyanyani lexi xi vitaniwaka gama. Tinwala ta yena na tona ti txintxile ti fana ni tinwala ta gama.

Loko se ku hundze 7 wa malembe, Nebukadinazara a tshike ku hlanya a tlhela a va kahle. Yehovha a tshike Nebukadinazara a tlhela a va hosi ya Babilona. Nebukadinazara a game a ku:

— Yehovha i Hosi ya matilo, a faneliwa hi ku gandzeliwa. Swoswi na swi tiva leswaku Yehovha i Hosi, yena a djondzisa vanhu lava va tibyelaka leswaku va tiveka hansi funtshi a nyika mfumu mun’wani ni mun’wani lweyi a mu lavaka.