Yesu A Djondzise Ndlela Yayinene Ya Ku Khongela

Vafarisi a va yendla swilo swaswinene leswaku va ta voniwa hi vanhu. Vona a va rhandza ku khongela ka tindhawu leti a ti ni vanhu va vanyingi swaku va ta voniwa. A va vekisa swikhongelo swa ku leha ka nhloko. Se a va ya ka tindhawu leti a va gandzela ka tona, ni tindleleni na va phindhaphindha swikhongelo hi rito la ku tlakuka, leswaku va twiwa hi vanhu hinkwavu. Kambe Yesu a kombe vadjondzisiwa va yena ndlela ya ku hambana ya ku khongela. Yena a te:

— Mi nga khongeleni ku fana ni Vafarisi. Vona va pimisa leswaku Xikwembu xi rhandza swikhongelo swa vona swa ku leha. Kambe Xikwembu a xi swi rhandzi. Phela xikhongelo i xa wena na Yehovha. Mi nga tameni ku phindhaphindha swilo swa ku fana ka xikhongelo. Yehovha a lava leswaku u mu byela leswi u titwisaka swona.

Yesu a va byele a ku:

— N’wina mi fanele mi khongelisa xileswi: ‘Papayi wa hina lweyi a nga matilweni, vito la wena a li kwetsimisiwe. Mfumu wa wena a wu te. Ku rhandza ka wena a ku yendleke amisaveni ku fana ni leswi ku yendlekisaka xiswona tilweni’.

Yesu a tlhele a byela vadjondzisiwa va yena swaku va khongela leswaku va va ni swakudla swa siku ni leswaku Xikwembu xi rivalela swihoxo swa vona, va tlhela va kombela xin’wani ni xin’wani lexi xi nga xa lisima ka vona.

Yesu a tlhele a ku:

— Mi nga tshikeni ku khongela. Tamani mi kombela swilo swaswinene ka Yehovha, yena i Papayi wa hina. Papayi mun’wani ni mun’wani, a lava swilo swaswinene ka vana va yena. Se loko n’wana a kombela pawu ka papayi, indjhe papayi wa yena a nga mu nyika ribye ke? Kumbe loko n’wana a kombela hlampfi, indjhe papayi wa yena a nga mu nyika nyoka ke?

Loko vapsali va tiva ku nyika swilo swaswinene vana va vona, Yehovha a yendla swa ku tlula leswo. Yena a lava ku mi nyika moya wa ku kwetsima loko mi mu kombela. Wena ke, u khongela hi ndlela leyi Yesu a nga yi djondzisa? Hi swihi swilo leswi u khongelaka hi swona?