“A Va Lava Swaku Ni Tiva Ntiyiso Hi Noxe”

LESWI NI NGA KULISIWA XISWONA:

Ni psaliwe aSão Domingos, aRepública Dominicana, a ni ni vamakwavu vanharhu naswona mina a ni li xigumandzeni. Vapsali va mina a va djondzile hintamu naswona a va lava swaku hi va ni mahanyelo yamanene hi tlhela hi tshembeka. Na ka ha sale 4 wa malembe swaku ni psaliwa, vapsali va mina va tive vamisiyonariyu va wukhongeli la Mórmon. Vapsali va mina a va tsakisiwa hileswi a va yambala va tlhela va tilunghisa kahle. Hi mhaka leyo, vapsali va mina va bohe swaku ndjangu wa hina a wu ta va wa ku sungula atikweni wu nghena ka Wukhongeli leli la Vamórmon ku nga Igreja de Jesus Cristo dos Santos dos Últimos Dias.

Nkama na ni kula a ni yi tsakela hintamu mintirho leyi a yi yendliwa ka wukhongeli leli ni tlhela ni hlonipha leswi Vamórmon a va swi djondzisa hi ku va ni ndjangu wa ku tsaka ni mahanyelo yamanene. A ni swi rhandza ku lumba wukhongeli leli naswona a ni lava ku va misiyonariyu.

Nkama ni nga tlhanganisa 18 wa malembe, ndjangu wa mina wu rhurhile wu ya aEstados Unidos leswaku ni ta ya a univhersidadi. Loko se ku hundze kolomuyani ka lembe, tiyu na titiya wa mina lava va nga Timboni ta Yehovha va tile va ta hi pfuxela aFlórida. Va hi rhambile swaku hi ya kongresu na vona. Swi ni hlamalisile ku vona swaku hinkwavu lava a va li kona, a va pfula Mabibele ya vona va landzelela leswi a swi vuliwa va tlhela va tsala tipontu ta lisima leti a va ti tsakela. Se ni kombele kaneta ni papela swaku na mina ni ta tsala.

Loko kongresu li helile, tiyu na titiya va ni byele swaku leswi a ni lava ku va misiyonariyu a va ta ni pfuna hi ku djondza na mina Bibele. Swi ni tsakisile hikusa hi nkama wolowo a ni lerha hintamu Buku la Vamórmon ku tlula Bibele.

BIBELE LI LI TXINTXISE KU YINI WUTOMI LA MINA:

Nkama na hi djondza Bibele hi telefoni, tiyu na titiya va ni byele swaku a ni fanele ni vona swaku leswi a ni swi djondza ka Bibele a swi fana ni leswi a swi djondzisiwa ka wukhongeli la mina. Phela a va lava swaku ni tiva ntiyiso hi noxe.

A ni kholwa minchumu ya yinyingi leyi a yi djondzisiwa ka wukhongeli la Vamórmon kambe a ni nga swi tivi swaku leswi a va swi djondzisa a swi yelana ni leswi Bibele li swi djondzisaka. Titiya wa mina a ni nyike revhixta la Khindlimuka! wa 8 ka Novembro wa 1995, leli nga yendliwa hi Timboni ta Yehovha leli a li ni tinhlokomhaka leti a ti vulavula hi wukhongeli la Vamórmon. Swi ni hlamalisile ku vona swaku swilo swa swinyingi leswi a swi djondzisiwa ka wukhongeli leli a ni nga swi tivi. Se ni kambe ka site la Vamórmon ni ta vona swaku leswi swi nga vuliwa ka Khindlimuka! a ku li ntiyiso. Kambe ni tlhele ni tiva swin’wani nkama ni nga ya ka mamuzewu ya Vamórmon ka doropa la Utah aEstados Unidos.

A ni pimisa swaku a Buku la Vamórmon ni Bibele swa fambisana. Kambe nkama ni nga sungula ku li djondza kahle Bibele, ni vone swaku leswi Vamórmon a va djondzisa swona ni leswi Bibele li swi djondzisaka swi hambanile. Hi xikombiso, ka buku la Ezekiyele 18:4, Bibele li vula swaku loko munhu a fa a ku na moya lowu salaka wu hanya. Kambe ka Buku la Vamórmon ka Alma 42:9 li li: “Moya wa munhu a wu nge fi”.

A ni karhatiwa hi ku hambana ka tidjondzo ta vona ni leswi Bibele li swi djondzisaka ni tlhela ni karhatiwa hileswi a va nyimelela ngopfu tiko la vona. Hi xikombiso, a va djondzisa swaku a jardim la Edeni a li kumeka Jackson, aMissouri, aEstados Unidos. Naswona vafundhisi a va djondzisa swaku “Mfumu wa Xikwembu wu ta fuma misaveni hi ku tirhisa mfumu wa Estados Unidos”.

Se a ni tivutisa swaku a ku ta yendleka yini hi lomu ni nga psaliwa kona ni ka matiko man’wani. Siku lin’wani ni foneliwe hi djaha leli a li djondza swaku li va misiyonariyu wa wukhongeli la Vamórmon, ni gama ni bula na lona hi mhaka leyi. Ni mu vutisile swaku a a ta pfumela ku lwa ni vanhu va wukhongeli la yena loko tiko la vona li lwa ni tiko la yena. Ni hlamalile nkama a nga pfumela swaku a a ta lwa na vona! Ni tame ni kambisisa leswi a swi djondzisiwa ka wukhongeli la mina ni tlhela ni vutisa vafundhisi. Va ni byele swaku swivutiso swa mina a swi na tinhlamulu kambe siku lin’wani swi ta hlamuliwa.

Nhlamulu ya vona yi ni godolisile, se ni sungule ku tikambela swaku hi mhaka muni a ni lava ku va misiyonariyu wa wukhongeli la Vamórmon. Ni vone swaku lexi a xi yendla ni lava ku va misiyonariyu hileswi a ni lava ku pfuna vanhu ntsena. Naswona a ni lava ku va misiyonariyu wa wukhongeli la Vamórmon leswaku vanhu van’wani va ta ni hlonipha. Kambe a ni nga tivi nchumu hi Xikwembu. Hambileswi ni nga tshama ni lerha Bibele makhambi ya ku tala a ni nga swi nyiki lisima leswi ni nga swi djondza. A ni nga swi tivi leswi Xikwembu a xi lava ku swi yendla hi misava ni vanhu.

NI PFUNEKISE KU YINI:

Nkama na ni djondza Bibele ni Timboni ta Yehovha, ni djondze swilo swa swinyingi swa ku fana ni vito la Xikwembu, leswi yendlekaka loko munhu a fa ni leswi Xikwembu xi nga ta mu tirhisisa xiswona Yesu swaku xi yendla ku rhandza ka xona. A ni ya ni li rhandza Bibele, naswona a swi ni tsakisa ku djondzisa van’wani leswi a ni swi djondza. A ni swi tiva swaku Xikwembu xi kona kambe swoswi ni kota ku vulavula na xona hi xikhongelo ku fana ni munghanu wa mina. Ni tsakamisiwe hi diya 12 ka Julho wa 2004, naswona loko se ku hundze 6 wa tiwheti ni nghene ka ntirho wa nkama hinkwawu.

Ni hete 5 wa malembe na ni tirha aSedi la Timboni ta Yehovha aBrooklyn, Nova Iorque, aEstados Unidos. A swi ni tsakisa hintamu ku tirha ka ku yendla Mabibele ni mabuku man’wani lawa ma vulavulaka hi Bibele lawa ma pfunaka vanhu va vanyingi amisaveni hinkwayu. Naswona ni tama ni tsaka hi ku pfuna van’wani swaku va djondza hi Xikwembu.