TINHLAMULU TA SWIVUTISO SWA BIBELE

Indjhe Swa Koteka Swaku Hi Rivaleliwa Swidjoho Swa Hina?

Bibele li vula swaku vanhu hinkwavu i vadjohi. Hi kume xidjoho ka wanuna wa ku sungula ku nga Adamu. Hi mhaka leyo, ha djoha naswona minkama yin’wani hi yendla minchumu ya ku biha leyi hi gamaka hi tisola hi yona. Kambe swidjoho swa hina swi nga rivaleliwa. Yesu ku nga N’wana wa Xikwembu a file leswaku a ta hi ponisa. Phela leswo ku ve nyiko ya lisima swinene ya Xikwembu. — Lerha Varoma 3:23, 24.

Vanhu van’wani lava va nga yendla swidjoho swaswikulu va tivutisa leswaku indjhe Xikwembu xi nga va rivalela. Lexi tsakisa hi leswaku Bibele li li: “Ngati ya N’wana wa xona Yesu ya hi basisa ka swidjoho hinkwaswu.” (1 Yohani 1:7) Yehovha a lava ku hi rivalela swidjoho swa hina hambiloko swi li swikulu loko hi tisola. — Lerha Esaya 1:18.

Hi fanele hi yendla yini leswaku hi rivaleliwa?

Loko hi lava leswaku Yehovha Xikwembu a hi rivalela swidjoho swa hina, hi fanele hi djondza hi yena leswaku hi tiva leswi a swi yendlisaka xiswona swilo, leswi a swi lavaka ka hina ni minawu ya yena. (Yohani 17:3) Yehovha a va rivalela hi mbilu hinkwayu lava va tisolaka ka swidjoho swa vona, va tlhela va yendla hinkwaswu swaku va txintxa. — Lerha Mintirho 3:19.

Phela ku rhandziwa hi Yehovha a swi karhati hi ku ya hi leswi van’wani va swi pimisaka. Yehovha wa swi twisisa leswi hi tsandzekaka ku swi yendla. Yena a ni timpsalu naswona i munene. Indjhe ku tiva leswo, a swi ku yendli u navela ku djondza leswaku u nga yendla yini swaku u tsakisa Xikwembu? — Lerha Tipisalema 103:13, 14.