“Ntiyiso Wu Ta Mi Chunsa”

Khambi lin’wani na a li Yerusalema, Yesu a vulavule hi Papayi wa yena Yehovha a tlhela a vula swaku varhangeli van’wani va wukhongeli a va djondzisa mavunhwa. (Yohani 8:12-30) Leswi a nga swi vula swi hi djondzisa swaku i swa lisima kuva hi kambela swaku leswi vanhu va kholwaka ka swona hi Xikwembu i ntiyiso kumbe nada. Yena a te: “Loko mi yingisa leswi ni swi vulaka mi vadjondzisiwa va mina hikakunene, mi ta tiva ntiyiso kutani ntiyiso wu ta mi chunsa.” — Yohani 8:31, 32.

Yesu a byele vadjondzisiwa va yena a ku: “Loko mi yingisa leswi ni swi vulaka.” Hi ku vula marito lawa, Yesu a a hi byela leswi hi nga swi yendlaka kuva hi kambela swaku leswi tikereke ti swi djondzisaka i “ntiyiso” kumbe nada. Se loko hi twa leswi vanhu va swi djondzisaka hi Xikwembu, hi fanele hi tivutisa leswi: ‘Indjhe leswi swa fambisana ni leswi Yesu a nga swi djondzisa, ni mintiyiso yin’wani leyi nga ka Bibele?’ Phela hi fanele hi tekelela lava Pawulo a nga vulavula hi vona lava a “va kambisisa kahle Matsalwa siku ni siku ku vona swaku leswi va nga swi twa a ku li ntiyiso.” — Mintirho 17:11.

Marco, Rosa, na Roberta, lava hi nga vulavula hi vona ka nhlokomhaka ya ku sungula va kambisise leswi a va kholwa ka swona hi ku djondza Bibele ni Timboni ta Yehovha. I mpsini leswi va nga swi djondza?

Marco: “Swivutiso hinkwaswu leswi mina ni nsati wa mina a hi li na swona swi hlamuliwile hi ku tirhisa Bibele. Se ku sukela kolanu, hi sungule ku rhandza Yehovha, hi twanana hi tlhela hi ya hi rhandzana!”

Rosa: “A ni pimisa swaku Bibele i buku la filozofiya leli a li tlhamusela swaku Xikwembu xi tshamise ku yini hi ku tirhisa leswi vanhu va swi pimisaka. Kambe hi ku famba ka nkama li ni pfunile swaku ni kuma tinhlamulu ta swivutiso swa mina. Swoswi na swi vona swaku Yehovha i Munhu wa hikakunene funtshi ni nga mu tshemba.”

Roberta: “Ni khongele ka Yehovha ni kombela swaku a ni pfuna kuva ni mu tiva. Loko se ku hundze nkama, mina ni nuna wa mina hi sungule ku djondza Bibele. Leswo swi hi pfunile ku tiva ntiyiso hi Yehovha naswona hi tsakile hi ku tiva swaku Yehovha i Xikwembu xa ku tshamisa ku yini.”

A Bibele li hi byela ntiyiso hi Xikwembu li tlhela li hi byela hi wumunhu la xona la ku saseka. Phela Bibele i Rito la Xikwembu funtshi li nga hi pfuna ku “tiva swilo leswi Xikwembu xi nga hi nyika swona hi timpsalu.” (1 Vakorinto 2:12) A wu swi naveli ku djondza hi wexe leswi Bibele li swi vulaka hi Xikwembu? Phela a wu ta tiva leswi xi lavaka ku swi yendla ni leswi swi nga ta yendleka ka nkama lowu taka. Loko u swi navela nghena ka site la hina la jw.org, u deketa lani va nge “Tidjondzo Ta Bibele > Swivutiso Leswi Hlamuliwaka Hi Bibele.” Naswona u nga ha kombela djondzo ya Bibele hi ku tirhisa site kumbe u vulavula ni mun’we wa Timboni ta Yehovha. Loko u yendla leswo, ha tiyiseka swaku u ta swi vona leswaku a swi karhati ku rhandza Xikwembu, swa vevuka hintamu.