Mfumu Wa Xikwembu Wu Sungule Siku Muni Ku Fuma? — Xiyenge 2

LESWI MILORHO YA NEBUKADINAZARA YI VULAKA SWONA

Carlos: Na tsaka ku tlhela ni ku vona João. Na swi rhandza ku djondza na wena Bibele vhiki ni vhiki.a Wo yini ku pfuka?

João: Ni kona, khanimambu.

Carlos: Ya! I swinene. Ka siku la wugamu hi nga bula, hi vone swaku hi mhaka muni Timboni ta Yehovha ti vula swaku Mfumu wa Xikwembu wu sungule ku fuma hi 1914.b Hi lani hi nga swi vona hi kona, hi vone wuprofeta leli nga ka buku la Daniyele ndzima 4 leli tiyisekisaka a mhaka leyi. Wa ha swi khumbuka swaku li vulavula hi yini?

João: Ina na khumbuka, yi vulavula hi nsinya wawukulu lowu nga lorhiwa hi Hosi Nebukadinazara.

Carlos: Ina a wu phazamanga, vhela Nebukadinazara a lorhe nsinya wawukulu hintamu lowu a wu fika tilweni. A twe ntsumi leyi nga rhumiwa hi Xikwembu, na yi vula swaku nsinya wolowo wu fanele wu tsemiwa, va gama va siya xigodonyana na xi ni timintsu amisaveni. Kambe loko se ku hundze “7 wa minkama,” nsinya wolowo a wu ta tlhela wu kula.c Hi tlhele hi bula swaku hi mhaka muni wuprofeta leli li hetiseka hi tindlela timbirhi. Wa ha khumbuka swaku li hetisekise ku yini hi khambi la ku sungula?

João: Loko ni nga phazami swi humelele Nebukadinazara. A sungule ku hlanya anze ku hela 7 wa malembe.

Carlos: I ntiyiso. Nebukadinazara a hete nkama na a hlanya, leswo swi yendle swaku mfumu wa yena wu tsemerhisiwa. Kambe wuprofeta leli li hetiseke hi ndlela yayikulu, nkama Mfumu wa Xikwembu wu nga nyimisiwa ku za ku hela 7 wa minkama. Hi lani hi nga swi vona hi kona, 7 wa minkama yi sungule nkama ku nga helisiwa doropa la Yerusalema hi 607 A.E.C. Ku sukela ka nkama wolowo, a ku nga tihosi lani misaveni leti a ti nyimela Mfumu wa Xikwembu ti tlhela ti fuma vanhu va xona. Kambe nkama ku nga hela 7 wa minkama, Xikwembu xi veke Hosi amatilweni leyi a yi ta fuma vanhu va xona. Leswo swi vula swaku ku hela ka 7 wa minkama, a swi ta vula ku sungula ka Mfumu wa Xikwembu amatilweni. Se hi swi vonile swaku a 7 wa minkama yi sungule lembe muni. Se loko hi tiva swaku a 7 wa minkama leyi yi hete malembe mangaki, hi ta kota ku tiva swaku Mfumu wa Xikwembu wu sungule lembe muni ku fuma. Swa twala?

João: Ina, swi ni pfunile ku khumbuka leswi hi nga swi djondza.

Carlos: Hi swona. Swoswi a hi vone swaku a 7 wa minkama yi hete malembe mangaki. Na ha ku lerha hi mhaka leyi swaku ni ta kota ku khumbuka tipontu la lisima. Ni ta zama hinkwaswu swaku ni ku tlhamusela.

João: Ok.

KU HELA 7 WA MINKAMA KU GAMA KU SUNGULA MASIKU YA WUGAMU

Carlos: A ka khambi la ku sungula nkama wuprofeta leli li nga hetiseka ka Nebukadinazara, a 7 wa minkama a ku li 7 wa malembe ya hikakunene. Kambe ka ku hetiseka ka wumbirhi ka wuprofeta leli loko ku vulavuliwa hi Mfumu wa Xikwembu, a 7 wa minkama yi lehile ku tlula 7 wa malembe ya hikakunene.

João: Hi mhaka muni u hlaya leswo?

Carlos: Khumbuka swaku a 7 wa minkama, yi sungule nkama doropa la Yerusalema li nga helisiwa 607 A.E.C. Se loko hi sungula ku konta 7 wa malembe ka lembe lolelo swi ta hi yisa ka lembe la 600 A.E.C. Kambe a ku na nchumu xa lisima xi nga yendleka lexi yelanaka ni Mfumu wa Xikwembu hi lembe lolelo. Naswona hi vone swaku nkama Yesu na a li lani misaveni, a vule swaku 7 wa minkama a yi nga se hela.

João: Ya, na swi khumbuka.

Carlos: Se a 7 wa minkama a hi 7 wa malembe, i malembe ya manyingi ku tlula lawa.

João: I malembe mangaki?

Carlos: A buku la Nhlawutelo leli fambisana ni buku la Daniyele, li hi pfuna ku tiva swaku a 7 wa minkama yi nyimela malembe mangaki. Li vula swaku a 3 wa minkama ni hafu i 1.260 wa masiku.d Se a 7 wa minkama i 2.520 wa masiku. Swo yini, wa swi twisisa?

João: Ina, na swi twisisa. Kambe a ni se swi vona swaku hi mhaka muni hi ku a Mfumu wa Xikwembu wu sungule ku fuma hi 1914.

Carlos: Hiswona a hi zame ku swi twisisa kahle. Minkama yin’wani ka Bibele, a siku lin’we li nyimela lembe.e Se loko hi vula swaku a siku lin’we li nyimela lembe, a 7 wa minkama a yi ta va 2.520 wa malembe. Se loko hi sungula ku konta 2.520 wa malembe na hi sukela ka lembe la 607 A.E.C., swi hi yisa ka lembe la 1914.f Hi mhaka leyo hi twisisa swaku a 7 wa minkama yi hele hi 1914 ku nga lembe leli Yesu a nga sungula ku fuma ka Mfumu wa Xikwembu. Se ku sukela hi 1914, ku yendleke swilo swa swinyingi amisaveni leswi Bibele li nga vula swaku a swi ta yendleka ka masiku ya wugamu.

João: Hi yini minchumu leyi nga yendleka?

Carlos: Pimisa hi leswi Yesu a nga swi vula swi nga lani ka Matewu 24:7. Na a vulavula hi nkama lowu Yesu a a ta sungula ku fuma amatilweni a te: “Matiko ma ta lwa hi xiwona, ni mimfumu yi ta lwa hi xiyona, ku ta pfumaleka swakudla ni misava yi ta tsekatseka ka tindhawu ta ku hambanahambana.” Vona swaku ka nkama lowu, Yesu a vule swaku a ku ta pfumaleka swakudla ku tlhela ku va ni ku tsekatseka ka misava. Hi leswo swi yendlekaka swoswi a hi swona ke?

João: Ina hi swoleswo.

Carlos: Ka ndzimana leyi Yesu a vule swaku nkama lowu a a ta sungula ku fuma ka Mfumu wa Xikwembu a ku ta va ni tinyimpi. Kambe buku la Nhlawutelo a li vulanga swaku a ku ta va ni tinyimpi ntsena kambe li vule swaku a ku ta va ni tinyimpi amisaveni hinkwayu ka nkama wa magamu.g Wa khumbuka swaku a nyimpi ya ku sungula ya misava yi ve hi lembe muni?

João: Ku ve hi lembe la 1914, ku nga lembe leli u vulaka swaku Yesu a sungule ku fuma hi lona! A ni nga se tshama ni pimisa hi mhaka leyi.

Carlos: Loko hi yi djondza kahle mhaka leyi, wuprofeta leli vulavulaka hi 7 wa minkama ni wuprofeta lin’wani la Bibele leli vulavulaka hi nkama wa wugamu, hinkwaswu swa twisiseka. Timboni ta Yehovha ti kholwa swaku Yesu a sungule ku fuma ka Mfumu wa Xikwembu hi 1914 ni swaku masiku ya wugamu ma sungule hi lembe lolelo.h

João: Phela na ha zama ku swi twisisa hinkwaswu leswi.

Carlos: Swa twala. Hi lani ni nga vula hi kona, na mina ku sunguleni swi ni karhatelile ku yi twisisa mhaka leyi. Kambe ni tshemba swaku mabulu ya hina ma ku pfunile ku twisisa swaku hambileswi Bibele li kalaka li nga vulavuli hi 1914, leswi Timboni ti swi kholwaka hi lembe leli ti swi susa ka Bibele.

João: Ina swa ni hlamalisa leswi Timboni ti swi djondzisaka, hinkwaswu ti swi susa ka Bibele. A hi mavonelo ya tona. Kambe na ha tivutisa swaku hi mhaka muni mhaka leyi yi karhata ku yi twisisa. Hi mhaka muni Xikwembu xi nga tekelanga ku hlaya ka Bibele swaku Yesu a a ta sungula ku fuma hi 1914 amatilweni?

Carlos: I xivutiso xa khale lexo João. Ku vula ntiyiso ku ni minchumu ya yinyingi ya ku a yi tsaliwanga hi ku kongoma ka Bibele. Se hi mhaka muni Xikwembu xi tsale minchumu ka Bibele leyi lavaka swaku vanhu va tikarhata swaku va yi twisisa? Hi nga bula hi mhaka leyi ka khambi leli taka.

João: Hi swona.