Yobo A Tame A Tshembeka

KU NGA VA swaku munhu a nga tama a tshembeka ka Xikwembu loko a yo ringiwa hi ku helela ni loko ku tshembeka ka yena swi tikomba swi nga ta mu pfuna hi nchumu? Xivutiso lexi xi yendliwile xi tlhela xi hlamuliwa ka mhaka ya wanuna lweyi vito la yena ku nga Yobo.

Nkama Vayisrayele a va tshama Gibita, Yobo lweyi a a li xaka la Abrahamu a a tshama lani namuntlha ku vitaniwaka Arabiya. Siku lin’wani, tintsumi amatilweni a ti ni ntlhanganu ni Xikwembu naswona Sathana na yena a a li kona. Ka ntlhanganu wolowo Yehovha a vule leswaku a a mu tshemba hintamu Yobo hikusa a a mu tirhela hi ku tshembeka. Yehovha a vule leswaku a ku na munhu mun’wani wa ku tshembeka ku fana na Yobo. Kambe Sathana a vule leswaku Yobo a a tirhela Xikwembu hikusa a xi mu katekisa xi tlhela xi mu vhikela. A tlhela a vula swaku loko Xikwembu xo mu tekela hinkwaswu leswi a nga na swona Yobo a a ta xi rhuketela.

Xikwembu xi pfumelele swaku Sathana, ku sungula a yendla swaku Yobo a luzekeliwa hi swilo hinkwaswu leswi a a li na swona, a dlaya vana va Yobo a gama a yendla swaku a va ni mavabyi. Yobo a a nga swi tivi swaku i Sathana lweyi a a yendla leswi naswona a a nga swi twisisi swaku hi mhaka muni Xikwembu xi pfumelela swaku a humeleliwa hi mindzingo leyi. Hambileswo minkama hinkwayu a tame a tshembeka ka Xikwembu.

Yobo a yendzeliwe hi vanghanu va yena vanharhu lava a va nga li vanene. Vanghanu volavo va vule swilo swa swinyingi leswi nga tsaliwa ka buku la Yobo, naswona a va zama ku kholwisa Yobo swaku Xikwembu hi xona lexi a xi mu khatisa hi mhaka ya swidjoho swa yena. Va vule swaku Xikwembu a xi va rhandzi vanhu lava va xi tirhelaka naswona a xi va tshembi. Yobo a nga swi kholwanga leswo. Naswona a vule leswaku a ta tama a tshembeka ka Xikwembu a za a ya fa!

Kambe Yobo a yendle xihoxo xa ku tivona a lulamile hintamu. Jovhem lin’wani leli vito la lona ku nga Elihu, leli li nga twa hinkwaswu leswi a swi vulavuliwa, na lona li game li sungula ku vulavula. Elihu a byele Yobo swaku xa lisima hintamu i ku lwela wuhosi la Yehovha Xikwembu ku tlula ku tinyimelela. Naswona Elihu a va sole hintamu vanghanu va Yobo hi mhaka ya mavunhwa lawa va nga ma vula.

Se Yehovha a game a vulavula na Yobo a mu pfuna ku vona swaku mapimiselo ya yena a ma hoxile. A pfune Yobo ku va a twisisa leswaku munhu i mutsongo hintamu loko a pimanisiwa ni Xikwembu hi ku mu komba swilo swa ku hlamalisa leswi a nga swi yendla. Yobo a tiveke hansi a pfumela ku pfuniwa hi Yehovha. Yehovha a ve ni “ntwelawusiwana ni timpsalu,” hi ku hanyisa Yobo a tlhela a mu nyika swilo hinkwaswu leswi a nga swi luza na se swi phindhiwe kambirhi ni ku mu katekisa hi mu nyika 10 wa vana. (Yakobe 5:11) Leswi Yobo a nga tama a tshembeka ka Yehovha hambiloko a kumana ni mindzingo ya ku tala a kombise swaku leswi nga vuliwa hi Sathana a ku li mavunhwa leswaku vanhu a va nga ta tshembeka ka Xikwembu loko va ringiwa.

 — Mhaka leyi yi susiwe ka buku la Yobo.