Vavanuna Lava Tsaleke hi ta Wutomi la Yesu

Xana wava vona vavanuna lavanga ka foto? — Mavitu ya vona i Matewu, Marka, Luka, Yohane, Petro, Yakobo, Yuda na Pawulo. Hinkwavu ka vona va hanye ka nkama wa Yesu naswona va tsali hi ta wutomi la yena. Xana va tsali ka yini? Ka Bibele. Ahi djondze swin’wana hi vona.

Vanharhu avali vapostola lava chumayeleke na Yesu. Waswi tiva leswaku i vamani? — I Matewu, Yohane na Petro. Vapostola Matewu na Yohane avamu tiva ngopfu Yesu naswona ha wumbirhi ka vona va tsali mabuku lawa ama vulavula hi wutomi la yena. Mupostola Yohane a tsali buku leli tiviwaka leswaku i Nhlavutelo ni mapapila manharhu lawa ma vitaniwaka Yohane wa Kusungula, Yohane wa Wumbirhi ni Yohane wa Wunharhu. Kasi mupostola Petro atsali mapapila mambirhi lawa manga Bibeleni. Ma vitaniwa Petro wa Kusungula ni wa Wumbirhi. Ka Petro wa wumbirhi, Petro a tsali hi nkama lowu Yehovha a vulavuleke hi Yesu ali matilweni aku: ‘Lweyi i n’wananga, lweyi nimu rhandzaka naswona na tibuma hi yena.’

Vavanuna van’wana lavanga ka foto na vona va tsali mabuku lawa mahi djondzisaka swilo swotala hi Yesu. Mun’we wa vona i Marka. Ingi a ali kona loko Yesu a khomiwa naswona a voni hinkwaswu leswi humeleleke. Mun’wana i Luka lweyi a ali dokodela naswona ingi ave Mukreste endzhaku ka loko Yesu a file.

Vatsali van’wana vambirhi va Bibele avali vamakwavu lava tsongo va Yesu. Xana wa mativa mavitu ya vona? — Akuli Yakobo na Yuda. Phela kusunguleni avanga lavi kuyingisa Yesu, ava pimisa leswaku wa hlanya kambe endzhaku vamu yingisile se va hundzuka Vakreste.

Mutsali wa wugamu lweyi umu vonaka ka foto i Pawulo. Loko angase va Mukreste, vitu la yena akuli Sawulo. A avanyenya Vakreste naswona aali ni mona. Xana waswi tiva leswaku i yini lexi yendleke Pawulo a hundzuka Mukreste? — Siku lin’wana loko Pawulo ali ndleleni ya kuya Damaska a twe ritu na lita hi matilweni. Akuli Yesu na a vulavula! A vutise Pawulo aku: ‘Hayini u hlupha valandzeli vamina?’ Endzhaku ka leswo, Pawulo a hundzuke ava Mukreste. Pawulo a tsali 14 wa mabuku kusukela ka Varhoma kuya ka Vaheveru.

Hina ha lerha Bibele siku ni siku, ha swona? — Loko hi lerha Bibele hi djondza swotala hi Yesu. Waswi lava kudjondza swin’wana hi Yesu? —