Yakobe Na Esawu Va Tlhela Va Twanana

Yakobe a fambile a ya tshama ka ndhawu leyi a yi vitaniwa Harani. Nkama na a famba, Yehovha a mu tshembise swaku a a ta mu hlayisa ku fana ni leswi a nga hlayisa vhovho wa yena Abrahamu ni papayi wa yena Izaki. Naswona a mu hlayisile hikakunene. Nkama na a li Harani, Yakobe a chadile a va ni vana va vanyingi a tlhela a va munhu wa ku ganya hintamu.

Loko se ku hundze malembe ya manyingi, Yehovha a vulavule na Yakobe a ku:

— Tlhela u ya ka tiko la vapapayi va wena.

Se Yakobe ni ndjangu wa yena va sungule ku famba va tlhelela kaya ka papayi wa yena, kambe na va nga se fika ndhawu, vanhu van’wani va byele Yakobe va ku:

— Esawu wa ta ni 400 wa vavanuna leswaku a ta tlhangana na wena!

Yakobe a sungule ku chava hintamu, yena a a tivutisa a ku:

— Ku ta yendleka yini hi mina ni ndjangu wa mina?

Se Yakobe a sungula ku khongela a ku:

— Yehovha na ku kombela, ni ponisi ka makwavu wa mina.

Hi mundzuku ka kona, Yakobe a rhumele swilo swa swinyingi ka makwavu wa yena Esawu ku nga tihomu, tinyempfu, timbongolo, makamela ni timbuti.

Se niwusiku Yakobe a kumane ni ntsumi va sungula ku lwisana. Va lwe wusiku hinkwalu, Yakobe a tivavisile kambe a nga godolanga. Yena a a lava swaku yi mu katekisa. Kambe ntsumi yi te:

— Ni tshiki ni famba.

Yena a ku:

— Ni to ku tshika loko u ni katekisa.

Se ntsumi yi mu katekisa. Leswo swi yendle swaku Yakobe a tiyiseka swaku Esawu a a nga ta mu yendla nchumu.

Nkama li nga xa, Yakobe a vone Esawu ni 400 wa vavanuna na va fika. Loko se va li kusuhi, Yakobe a khizame ka 7. Nkama lowu Esawu a nga mu vona, a tsutsuma a ya mu barasara. Va sungula ku barasarana na va rila. U swi vonisa ku yini? A titwise ku yini Yehovha nkama lowu a nga vona leswi Yakobe a nga swi yendla swaku a tlhela a twanana ni makwavu wa yena?

Nkama Yakobe na Esawu va nga gama ku vulavula, Esawu a tlhelele kaya ka yena. Kambe Yakobe a tame a famba a ya ka tiko la vapsali va yena. Yakobe a ve ni 12 wa vana vavanuna. Mavito ya vona a ku li Rubeni, Simiyoni, Levhi, Yuda, Isakara, Zebuloni, Dani, Naftali, Gadi, Aseri, Yosefa na Benjamini. Kambe mun’we ka vana lava a tirhisiwe hi Yehovha leswaku a ponisa ndjangu lowu wa lisima. Kasi i mani? Naswona a swi yendlise ku yini? Hi ta swi vona ka xitoriya lexi landzelaka.