Estere A Ponise Vayuda

Estere a a li ntombhi ya Muyuda leyi a yi tshama aXuxani doropa la Persiya. Yena a a tshama seniyani hikusa ka malembe lawa ma nga hundza ndjangu wa yena a wu tekiwile aYerusalema hi Hosi Nebukadinazara leswaku wu ya koseniyani. Estere a a wundliwe hi primu wa yena Mordekayi. Se Mordekayi a a tirha kaya ka Asuwerusi lweyi a a li hosi ya Persiya.

Hosi Asuwerusi a a lava hosi ya nyuwani ya xisati. Se a rhume vatirhi va yena leswaku va ya langa vavasati va ku saseka hintamu ka mfumu wa yena ku patsa na Estere. Wa swi tiva leswaku hosi yi lange mani? Yi lange Estere. Kambe Mordekayi a mu byele a ku:

— U nga tshuki u byela munhu swaku u n’wana wa Vayuda.

Ka mfumu a ku ni wanuna wa ku tibyela hintamu. Vito la yena a ku li Hamani. Yena a a li xefe ya varhangeli hinkwavu naswona a a lava leswaku vanhu hinkwavu va mu khizamela. Kambe Mordekayi a a nga pfumeli. Leswo swi yendle leswaku Hamani a kwata hintamu a tlhela a lava ku dlaya Mordekayi. Nkama lowu a nga tsumbula swaku Mordekayi a a li Muyuda a a lava ku dlaya Vayuda hinkwavu. Hamani a byele hosi a ku:

— Vayuda va vangelana nghozi, swa yampsa hi va dlaya.

Loko Hosi Asuwerusi a twe leswo a tshike Hamani a veka nawu. Nawu lowu a wu ku: Vayuda hinkwavu va fanele va dlayiwa hi diya 13 ka wheti ya Adara. Phela Yehovha a a swi vona swilo leswo hinkwaswu.

Kambe Estere a a nga wu tivi nawu lowu wu nga vekiwa. Se Mordekayi a yendle kopiya la nawu leswaku li ya ka Estere. A tlhela a mu byela a ku:

— Swi lava u yendla xan’wanchumu leswaku u vulavula ni hosi.

Estere a hlamule a ku:

— Phela vanhu hinkwavu lava va yaka va ya vulavula ni hosi na yi nga va rhambanga va fanele va dlayiwa. Se ku hundza 30 wa masiku na yi nga ni vitani. Kambe hi swona ni ta famba ni ya vulavula na yona. Loko hosi yi tlakusa nhonga ya yona a ni nga ta dlayiwa. Kambe loko yi nga yi tlakusi va ta ni dlaya.

Se Estere a fambile a ya vulavula ni hosi. Nkama hosi yi nga mu vona, yi tlakuse nhonga ya yona ya wuhosi. Se Estere a nghena a ya lani Hosi Asuwerusi a a li kona. Hosi yi game yi mu vutisa yi ku:

— U lava ni ku yendlela yini nsati wa mina Estere?

Estere a hlamula a ku:

— Ni lava ku ku rhamba, wena na Hamani leswaku mi ta ka fexta.

Nkama va nga ya ka Fexta lelo, Estere a tlhele a rhamba hosi na Hamani swaku va ya ka fexta lin’wani. Se ka fexta lelo hosi yi tlhele yi vutisa Estere swaku a a lava yi mu yendlela yini.

Se Estere a hlamulile a ku:

— Ku ni munhu lweyi a lavaka ku dlaya vanhu hinkwavu va lixaka la mina ku patsa na mina. Se ni kombela leswaku u hi ponisa.

Se hosi yi vutisile yi ku:

— I mani munhu yelweyo a lavaka ku mi dlaya?

Se Estere a hlamula a ku:

— Wanuna lweyo i Hamani.

Asuwerusi a kwate hintamu, se a rhuma vanhu swaku va ya dlaya Hamani. Kambe a ku nga na munhu lweyi a a ta txintxa nawu wa Hamani hambi hi hosi. Se Asuwerusi a veke Mordekayi swaku a va xefe ya varhangeli a tlhela a mu byela swaku a humesa nawu wa nyuwani. Nawu wolowo a wu vula swaku Vayuda hinkwavu a va fanele va tivhikela loko va dumeliwa. Se hi siku la wu 13 la wheti ya Adara, Vayuda va hlulile vanhu hinkwavu lava a va lava ku va dlaya. Loko leswo swi hundzile va sungule ku tlangela ku hlula koloko lembe ni lembe.