Pawulo A Yisiwa aRoma

Ka liyendzo la yena la wunharhu, Pawulo a chumayele tindhawu ta ku hambanahambana, hi wugamu a ye aYerusalema. Kohala yena a petiwe adjele, siku lin’wani Yesu a humelele ka Pawulo hi singita, a fika a ku:

— Wena u ta famba aRoma, u ya chumayela kona.

Pawulo a susiwe aYerusalema a yisiwa aKhezariya, a fika a tshama malembe mambirhi djele. Loko a li ku thethisiweni hi govhernadori Fexto, Pawulo a kombele a ku:

— Mina ni lava ku ya thethisiwa hi Khezari aRoma.

Fexto a pfumelile naswona Pawulo a nghenisiwe ka boti la ku ya aRoma. Vanghanu vambirhi va Pawulo, ku nga Luka na Arixtaku va fambe na yena. Nkama lowu na va li ku yendzeni ku sungule moya wawukulu, lowu nga teka masiku ya manyingi. Hinkwavu lava a va li ka boti a va chava ku fa. Kambe Pawulo a te:

— Vavanuna tiyani nhlana, mi nga chavi, a hi nga ta fa.

Ntsumi yi ni byele yi ku:

— U nga chavi Pawulo, wena u ta fika aRoma, ni hinkwavu lava nga ka boti.

Ku hundze 14 wa masiku moya lowuyani na wu nga se nyima. Se vavanuna lava a va li ka boti va vone a ilha, se va sungule ku famba va ya ka ilha lolelo, leli a li vitaniwa Malta. Kambe nkama lowu na va li kusuhi ni ku fika ka misava, a boti li be xidulu xa misava a matini li gama li tshoveka. Kambe ka vanhu hinkwavu lava a va li ka boti va 276 a ku fanga munhu. Vanhu van’wani va sungule ku hlambela anze va ya fika ka misava. Se van’wani va khome mapulangu lawa ma nga tshoveka ka boti, va hlambela hi wona anze va ya fika ka ndhawu ya ku woma. Nkama lowu va nga fika, a vanhu va ilha la Malta va fike va va pfuna ni ku va tshivela ndzilu leswaku va worha.

Loko se ku hundze tiwheti tinharhu, Pawulo a yisiwe aRoma hi boti lin’wani. Nkama lowu a nga fika aRoma, vamakwerhu va mu tlhangavetile. Loko Pawulo a vone vamakwerhu a khense Yehovha a tlhela a va ni ntamu. Hambileswi a a li xib’ochwa, Pawulo a a ta tshama ka yindlo ya ku lugara, kambe na a voneleliwa hi musonchwa mun’we. A tshame koseniyani ku ringana malembe mambirhi. Loko vanhu va ya mu pfuxela, Pawulo a a vulavula hi Mfumu wa Xikwembu na Yesu Kreste, funtshi a tlhele a tsala makarta ka mabandla lawa a ma li a Aziya Menor ni Yudiya. Xitoriya lexi xa Pawulo, xi hi djondzisa swaku Yehovha a mu tirhisile swaku a chumayela mahungu ya ku tsakisa ka tindhawu ta tinyingi.