Yohani A Vona Swilo Swa Ku Hlamalisa

Nkama lowu mupostolo Yohani a a li djele ka ilha la Patmosi. Yesu a mu kombe 16 wa swilo leswi nga ta yendleka ka nkama lowu taka. Ka swilo swoleswo, a mu kombe leswi vito la Yehovha a li ta kwetsimisiwa xiswona, leswi Mfumu wa Xikwembu a wu ta tisa xiswona lani misaveni ni leswi ku rhandza ka Yehovha a ku ta yendlekisa xiswona lani misaveni ni le matilweni.

Yohani a vone nchumu wa ku hlamalisa, ku nga xitshamu xa Yehovha xa wuhosi le matilweni. Ka xitshamu lexo a ku hatima, ku tlhela ku dzindza. Matlhelweni ka xitshamu a ku ni 24 wa madoda lawa a ma yambale mpahla ya ku basa, na ma ni tiharhi ta woru ka tinhloko ta wona, na ma khizama ma gandzela Yehovha. Yohani a tlhele a vona vanhu va vanyingi va tindhawu hinkwatu na va gandzela Yehovha, na xinyempfani xi teka vanhu volavo xi va yisa ka mati ya wutomi. Xinyempfani lexo i Yesu. Yohani tlhele a vona Yesu na a fuma ni 24 wa madoda. Naswona a vone Yesu na a lwa ni Dragona ni madimoni ya yona. Dragona leyi i Sathana. Yesu a hlongole Dragona leyi ni madimoni ya yona atilweni, va ta tshama lani misaveni.

Yohani a game a kombiwa nchumu wa ku saseka hintamu. A vone xinyempfani ni lava va 144.000 na va nyimile ka Ntshava ya Siyoni. A tlhele a vona ntsumi na yi haha atilweni, na yi byela vanhu yi ku:

— Gandzelani Xikwembu, mi tlhela mi xi dzunisa.

Nchumu wun’wani lowu Yohani a nga wu vona ku ve nyimpi ya Armajedoni. Ka nyimpi leyo yayikulu, Yesu ni masonchwa ya yena va hlule Sathana ni vanhu lava va nyimaka na yena. Hi wugamu a vone matilweni ni lani misaveni na ku ni ku rhula ni ku twanana. Se Sathana ni vanhu lava va nyimaka na yena va helisiwa. Vanhu hinkwavu lani misaveni ni tilweni va hlonipha vito la Yehovha va tlhela va gandzela yena ntsena.