I Mani Yesu?

Yesu i mun’we wa vanhu lava nga ni ndhuma amisaveni, hambileswo vanhu a va tivi minchumu ya yinyingi hi yena, naswona van’wana va ni mavonelo ya ku hambana hi yena. Bibele li vula yini hi Yesu?

1. I mani Yesu?

Yesu i ntsumi ya matimba hintamu leyi yi tshamaka matilweni. Yehovha a rhange hi ku yentxa Yesu na a nge se yentxa minchumu yin’wana, hi mhaka leyo a vitaniwaka “mativula ya minchumu hinkwayu leyi nga yentxiwa.” (Vakolosa 1:15) Bibele loko li vulavula hi Yesu li li i “N’wana” wa Xikwembu hikusa Yesu hi yena ntsena lweyi a nga yentxiwa hi Yehovha hi ku kongoma. (Yohani 3:16) Yesu a tirhe ni Papayi wa yena Yehovha na a mu pfuna ku yentxa minchumu hinkwayu leyi yi nga kona. (Lerha Swivuriso 8:30.) Ni swoswi Yesu wa ha tsaka hi ku va munghanu wa mukulu wa Yehovha. Yesu a tirha hi ku tshembeka tani hi muvulavuleli wa Xikwembu. Xi tirhisa yena swaku xi hi byela leswi xi swi lavaka, hi mhaka leyo a vitaniwaka “Rito”. — Yohani 1:14.

2. Hi mhaka muni Yesu a tile misaveni?

Kolomuyani ka 2.000 wa malembe lawa ma nga hundza, Yehovha a tirhise moya wa yena wa ku kwetsima swaku Yesu a psaliwa hi wansati wa ku kala a nge se famba masangu lweyi a a vitaniwa Mariya. (Lerha Luka 1:34, 35.) Yesu a te misaveni swaku a ta va Mesiya lweyi a a tshembisiwile kumbe Kreste ni swaku a ta ponisa vanhu hinkwavu.a Wuprofeta hinkwalu leli li vulavulaka hi Mesiya li hetisekile ka Yesu, leswo swi pfune vanhu ku vona swaku Yesu i “Kreste, N’wana wa Xikwembu lexi hanyaka.” — Matewu 16:16.

3. A kwini Yesu swoswi?

Nkama Yesu a nga fa, a game a pfuxiwa a va ntsumi a tlhela a ya hanya tilweni lani ‘Xikwembu xi nga mu tlakusa hintamu.’ (Vafilipiya 2:9) Swoswi Yesu i ntsumi ya matimba hintamu, o va Yehovha ntsena lweyi a mu tlulaka hi matimba.

4. Yesu a hi Xikwembu xa Matimba Hinkwawu

Bibele li djondzisa swaku Yesu i ntsumi ya matimba hintamu amatilweni, hambileswo wa tiveka hansi ka Papayi wa yena Yehovha. Hi mhaka muni hi vula leswo? Sixtirani VHIDIYO swaku u vona leswi Bibele li swi djondzisaka hi ku hambana loku nga kona ka Yesu ni Xikwembu xa matimba hinkwawu.

VHIDIYO: Yesu Kreste I Xikwembu? (3:22)

A tindzimana ti landzelaka ti hi pfuna ku twisisa ku hambana ka Yehovha na Yesu. Lerhani tindzimana mi tlhela mi bula hi swivutiso leswi yelanaka na tona:

Lerhani Luka 1:30-32.

• Ntsumi yi ku tlhamuselise ku yini ku hambana loku nga kona ka Yesu na Yehovha Xikwembu xa ku “Tlakuka Hintamu”?

Lerhani Matewu 3:16, 17.

• Nkama Yesu a nga tsakamisiwa i yini leswi swi nga vuliwa hi rito leli a li ta hi tilweni?

• U pimisa swaku a ku li rito la mani?

Lerhani Yohani 14:28.

• Ka papayi ni n’wana hi mani wa mukulu, naswona hi mani a nga ni matimba hintamu?

• Yesu a a lava ku vula yini loko a vitana Yehovha a ku i Papayi?

Lerhani Yohani 12:49.

• Ku nga va swaku Yesu a pimisa swaku yena ni Papayi wa yena i munhu yelweyi wa mun’we? Wena u swi vonisa ku yini?

5. Yesu a kombise swaku hi yena Mesiya

VHIDIYO: Wuprofeta Le Li Nga Hetiseka Ka Yesu (3:03)

Lerhani wuprofeta leli la Bibele mi gama mi bula hi swivutiso leswi landzelaka:

Lerhani Mikiya 5:2 swaku mi vona lomu Mesiya a a ta psaliwa kona.b

• Wuprofeta leli li hetisekile ka Yesu? — Matewu 2:1.

Lerhani Tipisalema 34:20 na Zakariya 12:10 swaku mi vona swin’wana hi ku fa ka Mesiya.

• Wuprofeta leli li hetisekile?— Yohani 19:33-37.

• U pimisa swaku Yesu a yentxe swaku wuprofeta leli li za li hetiseka ka yena?

• Leswi swi kombisa yini hi Yesu?

LESWI HI NGA SWI DJONDZA

Yesu i ntsumi ya matimba. Yena i N’wana wa Xikwembu naswona i Mesiya.

Ku kambela leswi hi nga swi djondza

• Hi mhaka muni Yesu a vitaniwa “mativula ya minchumu hinkwayu leyi nga yentxiwa”?

• I yini leswi Yesu a nga swi yentxa na a nge se ta misaveni?

• Hi swi tivisa ku yini swaku Yesu i Mesiya?

LOKO U LAVA KU TIVA SWIN’WANA

Djondza swin’wana leswi kombisaka swaku Yesu i Mesiya.

“Xana Vuprofeta Lebyi Vulavulaka Hi Mesiya Byi Ni Vumbhoni Bya Leswaku Yesu A Ri Mesiya?” (Nhlokomhaka leyi nga ka site la jw.org hi Xitsonga)

Vona swaku hi mhaka muni Bibele li vula swaku Xikwembu i Papayi wa Yesu.

“Hikwalaho Ka Yini Yesu A Vitaniwa N’wana Wa Xikwembu?” (Nhlokomhaka leyi nga ka site la jw.org hi Xitsonga)

Vona swaku hi mhaka muni djondzo ya wunharhu wun’we yi nga ti hi ka Bibele.

“Xana Yesu I Xikwembu?” (Murindzi wa 1 ka Abril wa 2009 hi Xitsonga)

Vona swaku wutomi la wansati mun’wana li txintxise ku yini nkama a nga djondza hi Yesu.

“Wansati Wa Muyuda A Tlhela A Kambisisa Ripfumelo Rakwe” (Khindlimuka! wa Maio wa 2013 hi Xitsonga)