U Lunghekile Swaku U Tsakamisiwa?

Ka djondzo ya wena ya Bibele se u djondze minchumu ya yinyingi hi Yehovha. Swi nga yentxeka ku ni minchumu leyi u nga yi txintxa ka wutomi la wena swaku u tirhisa leswi u nga swi djondza. Kambe swi nga yentxeka ka ha ni lexi ku sivelaka swaku u tinyiketela ka Yehovha u tlhela u tsakamisiwa. Ka djondzo leyi, hi ta vona minchumu leyi talaka ku sivela vanhu swaku va nga tsakamisiwi ni swaku wena u nga yi hlulisa ku yini.

1. I mpsini leswi u faneleke u swi tiva hi Bibele?

Swaku u tsakamisiwa u fanele u “wu tiva kahle ntiyiso.” (1 Timotiyu 2:4) Leswo a swi vuli swona swaku na u nge se tsakamisiwa swi lava u tiva tinhlamulu ta swivutiso hinkwaswu leswi va ku yentxaka swona hi Bibele. Hambi Vakreste lava nga tsakamisiwa khale va ha tama va djondza Bibele. (Vakolosa 1:9, 10) Kambe u fanele u twisisa tidjondzo ta masungulu ta Bibele. Madoda ya bandla ma ta ku pfuna ku tiva swaku wutivi leli u nga na lona hi Bibele la ringana kuva u tsakamisiwa kumbe a li ringani.

2. I mpsini leswi u faneleke u swi yentxa na u nge se tsakamisiwa?

Na u nge se tsakamisiwa swi lava u ‘tisola . . . u txintxa’. (Lerha Mintirho 3:19.) Leswo swi vula swaku u fanele u tisola hi ku helela ka swidjoho hinkwaswu leswi u nga tshama u swi yentxa u tlhela u kombela Yehovha swaku a ku rivalela. Naswona u fanele u tinyimisela ku yentxa ku rhandza ka Yehovha ka wutomi la wena u tlhela u nga yentxi minchumu leyi yena a vulaka swaku yi bihile. Nchumu xin’wana lexi u faneleke u xi yentxa i ku ya mintlhanganwini u tlhela u chumayela ni bandla.

3. Hi mhaka muni u nga fanelanga u chava ku tsakamisiwa?

Van’wana va chava ku tsakamisiwa hi ku pimisa swaku a va nga ta swi kota ku yentxa leswi va nga mu tshembisa Yehovha. I ntiyiso swaku minkama yin’wana u ta yentxa minchumu ya ku kala yi nga li yinene, hambi vavanuna ni vavasati va ku tshembeka lava ku vulavuliwaka hi vona ka Bibele a va yentxa swihoxo. Kambe Yehovha a nga nyimeli swaku vanhu lava mu tirhelaka va va vanhu lava va kalaka va nga yentxi swihoxo. (Lerha Tipisalema 103:13, 14.) Yena wa tsaka loko u yentxa leswi u nga swi kotaka, naswona a ta ku pfuna. Yehovha a tshembisa swaku a ku na nchumu lexi xi nga ta hi ‘hambanisa ni lirhandzu leli [yena] a nga na lona hi hina.’ — Lerha Varoma 8:38, 39.

DJONDZA SWIN’WANA

4. Mu tivi ku yampsa Yehovha

Swi lava u tiva Yehovha ku fikela kwini na u nge se tsakamisiwa? Swi lava u mu tiva kahle lakakuva u mu rhandza u tlhela u lava ku mu tsakisa. Sixtirani VHIDIYO swaku u vona leswi lava va djondzaka Bibele amisaveni hinkwayu va nga swi yentxa swaku va mu tiva ku yampsa Yehovha. Mi gama mi bula hi xivutiso lexi landzelaka.

VHIDIYO: Ndlela ya Kuya Kutsakamisiweni (3:56)

• Ka vhidiyo, i mpsini leswi nga pfuna vanhu van’wana kuva va tilunghiselela swaku va tsakamisiwa?

Lerhani Varoma 12:2, mi gama mi bula hi swivutiso leswi landzelaka:

• Ka leswi se u nga swi djondza ka Bibele, ku ni leswi u kalaka u nga swi twisisi? Kumbe wa kanakana swaku Timboni ta Yehovha ti djondzisa ntiyiso hi Bibele?

• Loko u kanakana, u nga yentxa yini?

5. Hlula minchumu leyi nga ku yentxaka u nga tsakamisiwi

Hinkwerhu ku ni leswi swi hi sivelaka loko hi lava ku nyiketela wutomi la hina ka Yehovha hi tlhela hi tsakamisiwa. Swaku u vona xikombiso, sixtirani VHIDIYO, mi gama mi bula hi xivutiso lexi landzelaka.

VHIDIYO: Ku Rhandza Yehovha Swi Hi Pfuna Ku Hlula Swikarhatu (5:22)

• Ka vhidiyo, hi swini swikarhatu leswi Narangerel a nga swi hlula swaku a kota ku tirhela Yehovha?

• Ndlela leyi a a mu rhandza hi yona Yehovha, yi mu pfunise ku yini swaku a swi hlula?

Lerhani Swivuriso 29:25 na 2 Timotiyu 1:7, mi gama mi bula hi xivutiso lexi landzelaka:

• I mpsini leswi hi nyikaka ntamu wa ku hlula swikarhatu?

6. Tiyiseka swaku Yehovha a ta ku pfuna

Yehovha a ta ku pfuna swaku u mu tsakisa. Sixtirani VHIDIYO, mi gama bi bula hi swivutiso leswi landzelaka.

VHIDIYO: Yehovha Xikwembu Ataku Pfuna (2:50)

• Ka vhidiyo, i mpsini leswi a swi sivela lweyi a a djondza Bibele swaku a tsakamisiwa?

• I mpsini leswi a nga swi djondza leswi nga mu pfuna ku tshemba Yehovha?

Lerhani Esaya 41:10, 13, mi gama mi bula hi xivutiso lexi landzelaka:

• I mpsini leswi nga ku tiyisekisaka swaku u ta swi kota ku hetisisa xitshembiso lexi u nga xi yentxa loko u tinyiketela?

7. Tama u khensa lirhandzu la Yehovha

Loko u ya u pimisa hi leswi Yehovha a ku rhandzisaka xiswona u ta ya u mu khensa hintamu naswona u ta lava ku tama u mu tirhela wutomi la wena hinkwalu. Lerhani Tipisalema 40:5, mi gama mi bula hi xivutiso lexi landzelaka:

• Ka minkateko leyi Yehovha a nga ku nyika, hi yihi leyi nga ya lisima hintamu ka wena?

Muprofeta Yeremiya a a mu rhandza hintamu Yehovha ni rito la yena naswona a a swi vona swi li swa lisima hintamu ku tirhela Yehovha. Yena a te: “Rito la wena li yentxe mbilu ya mina yi tsaka yi tlhela yi tsakisisa, hikusa ni vitaniwa hi vito la wena, oho Yehovha.” (Yeremiya 15:16) Hlamula swivutiso leswi landzelaka:

• Hi mhaka muni ku li nkateko wa wukulu ku va Mboni ya Yehovha?

• Wa swi lava ku tsakamisiwa u va Mboni ya Yehovha?

• Ku ni lexi ku sivelaka ku tsakamisiwa?

• U pimisa swaku i mpsini leswi u faneleke u swi yentxa kuva u tsakamisiwa?

LESWI HI NGA SWI DJONDZA

Hi ku pfuniwa hi Yehovha u nga swi kota ku hlula hinkwaswu leswi ku sivelaka ku tsakamisiwa.

Ku kambela leswi hi nga swi djondza

• U fanele u li tiva ku fikela kwini Bibele swaku u tsakamisiwa?

• I mpsini leswi u faneleke u swi txintxa ka wutomi la wena na u nge se tsakamisiwa?

• Hi mhaka muni u nga fanelanga u pfumelela ku chava ku ku sivela ku tsakamisiwa?

LOKO U LAVA KU TIVA SWIN’WANA

Vona leswi faneleke swi ku yentxa u lava ku tsakamisiwa.

“Se U Lunghekile Akuva U Tsakamisiwa?” (Murindzi wa Março wa 2020)

Vona leswi nga ku pfunaka ku hlula leswi ku sivelaka ku tsakamisiwa.

“I Yini Leswini Sivelaka Kukhuvuliwa?” (Murindzi wa Março wa 2019)

Vona swaku wanuna mun’wana a swi hlulise ku yini swikarhatu leswi a a li na swona swaku a kota ku tsakamisiwa.

‘Kasi i Yini Xiku sivelaka Kutsakamisiwa?’ (1:10)

A kusunguleni wanuna lweyi a vitaniwaka Ataa a a kanakana ku tsakamisiwa. Vona leswi nga mu pfuna ku yentxa xiboho lexi xa lisima.

I Ntiyiso Swaku Swa Ni Fanela Leswi? (7:21)