Tilunghiseleli Swoswi Leswaku Uta Kota Kutiyisela loko U Xanisiwa

1. Hi mhaka muni swi lava hiti lunghiselela leswaku hi kota kulangutana ni kuxanisiwa?

KA WUSIKU la yena lawugamu na angasefa, Yesu Hosi ya hina a aswi tiva leswaku hinkwavu lava avata langa kuva valandzeli va yena avata nyenyiwa. (Yoh. 17:14) Kuta fikela nyamuntlha Vakreste votshembeka, va tshamela kukarhatiwa hi vanhu lava nyenyaka vagandzeli va Yehovha. (2 Tim. 3:12) Leswi magamu ma yaka ma fika, haswi tiva leswaku valala va hina va taya va yengeteleka. — Mat. 24:9.

2-3. a) Hayini kuchava swili ni khombo? b) Hita kambisisa yini ka djondzo leyi?

² Hingati lunghiselelisa kuyini swoswi leswaku hita kota kulangutana ni kuxanisiwa? Aswi lavi hi zama kupimisa hi swilo hinkwaswu swobiha leswingatahi humelela. Loko ho maha leswo hita tshamela kuchava ni kuvilela lakakuva hi tshika kutirhela Yehovha nahingase kumana ni swikarhatu swa kona. (Swi. 12:25; 17:22) Kuchava i tlhari la likulu swinene leli tirhisiwaka hi ‘nala wa hina anga Sathana’ leswaku ahi hlasela. (1 Pet. 5:8, 9) Hinga maha yini leswaku hiti lunghiselela kutiyiselela kuxanisiwa?

³ Ka djondzo leyi hita kambisisa leswaku hingali tiyisisa kuyini wuxaka la hina na Yehovha ni leswaku hayini swili swa lisima kumaha leswo swoswi. Hita tlhela hi vona leswaku hingaxi kumisa kuyini xivindzi. Hi wugamu, hita kambisisa leswaku hinga yendla yini loko hi nyenyiwa.

UNGALI TIYISISA KUYINI WUNGHANU LA WENA NA YEHOVHA?

4. Hikuya hi Vaheveru 13:5, 6, i mpsini leswi hi faneleke hi tiyiseka hi swona naswona hi mhaka muni?

⁴ Tiyiseka leswaku Yehovha wa kurhandza naswona ange pfuki a kutshikile. (Lerha Vaheveru 13:5, 6.) Melembe manyingi lamanga hundza Murindzi mun’wani ate: “Munhu lweyi axitivaka kahle Xikwembu waxitshemba minkama hinkwayu, ngopfungopfu loko a kumana ni kuxanisiwa.” Wolowo i ntiyiso! Leswaku hi kota kutiyisela kuxanisiwa, hi fanele hi rhandza Yehovha ni kumu tshemba hi kuhelela naswona hinga kanakani leswaku Yehovha wahi rhandza swinene. — Mat. 22:36-38; Yak. 5:11.

5. I mpsini swingaku pfunaka leswaku u titwa u rhandziwa hi Yehovha?

⁵ Lerha Bibele siku ni siku hi xikongomelo xa kuva kusuhi swinene na Yehovha. (Yak. 4:8) Loko uli karhi u lerha Bibele, yanakanyisisa hi wumunhu la Yehovha, swiyendlo swa yena ni leswi aswi vuleke. Zama kutwisisa leswaku aku rhandza kufikela kwihi. (Ekso. 34:6) Vanhu van’wana swava tikela kukholwa leswaku Yehovha wava rhandza hikusa avase tshama va kombiwa lirhandzu. Loko u titwisa xileswo, zama kuva siku ni siku u pimisa hi ndlela leyi Yehovha a kukombeke ntwelawusiwana ni wunene ha yona. (Pis. 78:38, 39; Rhom. 8:32) Loko u yanakanyisisa hi leswi swiku humeleleke awuton’wini ni leswi uswi lerhaka a Bibeleni ungaswi kota kulongoloxa swilo swinyingi leswi Yehovha aku maheleke swona. Loko u tama u kombisa kukhensa swilo hinkwaswu leswi Yehovha angaku mahela swona, wunghanu la wena na yena litaya li tiya swinene. — Pis. 116:1, 2.

6. Hikuya hi Tipisalema 94:17-19, xikhongelo lexi humaka mbilwini xingaku pfunisa kuyini?

⁶ Yendla xikhongelo nkama ni nkama. Pimisa hi xifanyani lexi papayi wa xona axi barasaraka hi lirhandzu. Xi titwa xi nchusekile kuvulavula ni papayi wa xona hi swilo swa kubiha ni swa swinene leswixi humeleleke hi siku lolelo. Na hina hingava ni wuxaka leli fanaka na Yehovha B’ava wa hina loko himu chululela leti hingana tona mbilwini hi xikhongelo siku ni siku. (Lerha Tipisalema 94:17-19.) Loko uli karhi u khongela ka Yehovha “Chulula mbilu ya wena kufana ni mati” naswona byela B’ava wa wena swilo hinkwaswu leswiku yendlaka u chava ni kukuvilelisa. (Swiri. 2:19) Litava lihi vuyelo la kona? Uta kuma leswi Bibele liswi vulaka “kurhula ka Xikwembu lokutlulaka kutwisisa hinkwaku”. (Filp. 4:6, 7) Loko u khongela xileswi, utaya u titwa uli kusuhi swinene na Yehovha. — Rhom. 8:38, 39.

7. Hi mhaka muni hi kholwa leswaku switshembiso swa Xikwembu hi Mfumu wa xona swita hetiseka?

⁷ Tiyiseka leswaku minkateko leyingata tisiwa hi Mfumu wa Xikwembu yita hetiseka. (Tinhl. 23:19) Loko unga kholwiseki leswaku switshembiso swa Xikwembu swita hetiseka Sathana ni madimona ya yena vataku hlasela hi kuvevuka. (Swi. 24:10; Hev. 2:15) Ungaku tiyisa njhani kupfumela ka wena ka Mfumu wa Xikwembu swoswi? Tinyiki nkama wa kudjondza hi switshembiso swa Xikwembu ni Mfumu wa xona naswona u kambisisa leswiku yendlaka u kholwa leswaku swita hetiseka. Leswi swingaku pfunisa kuyini? Vona xikombiso xa Stanley Jones, lweyi apfaleliweke djele kuringana 7 wa malembe hi kolaho ka leswi a apfumela ka swona.b I mpsini swimu pfuneke kutiyisela hi kutshembeka? Yena a li: “kupfumela ka mina aku tiyisiwe hi wutivi leli ani li na lona hi Mfumu wa Xikwembu ni leswi awutaswi yendla naswona aninga kanakani ni katsongo. Hi mhaka leyo, akuna munhu lweyi a atani hambanisa na Yehovha.” Loko na wena u pfumela hi kuhelela ka switshembiso swa Yehovha, utava kusuhi swinene na yena naswona awunge pfumeleli kuchava kukutshikisa kumu tirhela. — Swi. 3:25, 26.

8. Hlamusela leswaku i mpsini leswi hingaswi tsumbulaka hi hina loko hi kambela langutelo la hina hi minhlanganu.

⁸ Yana minhlanganwini ya Wukreste nkama ni nkama. Minhlanganu yihi pfuna kuva kusuhi ngopfu na Yehovha. Langutelo la hina hi minhlanganu lita kombisa leswaku hitaswi kota kutiyisela kuxanisiwa nkameni lowutaka kumbe ahingataswi kota. (Hev. 10:24, 25) Ha yini hi vula leswo? Loko hi pfumelela swilo swaku aswi pheli swihi lovhisa minhlanganwini swoswi, switaku yini nkameni lowu taka loko se swi karhata kuhlangana ni vamakwerhu? Kambe loko hiti yimisela hi mbilu hinkwayu kuva kona minhlanganwini nkama ni nkama, hambi loko vakaneti vo zama kuhi tshikisa avangeswi koti. Hi fanele hi rhandza minhlanganu na kahali swoswi swi suka mbilwini. Loko hiswi rhandza kuya minhlanganwini, akuna mukaneti hambi kuli mfumu lowungatahi sivelaka kuyingisa Xikwembu. — Mint. 5:29.

9. Hi mhaka muni kuvekisa tindzimana kuli ndlela ya kahle ya kutilunghiselela kuxanisiwa?

⁹ Vekisa tindzimana leti uti rhandzaka, uti tiva hi nhloko. (Mat. 13:52) Miyehleketo ya hina ayi hetisekanga, kambe Yehovha anga tirhisa moya wa yena wokwetsima leswaku aku pfuna kukhumbuka tindzimana. (Yoh. 14:26) Vona xikombiso xa makwerhu wokarhi lweyi a apfaleliwe djele awuxeni ka Jharimana. Ka ndhawu ya kona a apfaleliwe ali yexe. Yena a li: “Ani tsake swinene hi leswi ani vekise tindzimana tinyingi anhlokweni! Hambi leswi anili noxe, ani tshamela kupimisa hi swilo swinyingi swinga ka Bibele.” Matsalwa lawo ma pfune makwerhu lweyi leswaku a tshama kusuhi na Yehovha ni kutiyisela hi kutshembeka.

10. Hi mhaka muni swi laveka kuva hi tiva tinsimu hi nhloko?

¹⁰ Vekisa utlhela u yimbelela tinsimu ta kudzunisa Yehovha. A nkama Pawulo na Silasi ava pfaleliwe djele a Filipiya, ava yimbelela tinsimu ta kudzunisa Yehovha leti avati tiva hi nhloko. (Mint. 16:25) Hilaha kufanaka, i yini leswi vamakwerhu va khale ka União Soviética vaswi yendleke leswaku vati tiyisa loko va khomiwile leswaku va yisiwa ka ndhawu ya nxanisu a Sibéria? Makwerhu Mariya Fedun a te: “Ahi yimbelela tinsimu leti ahiti tiva, leti atili ka buku la hina la tinsimu.” Makwerhu lweyi a tlhele a vula leswaku hinkwavu ava khutazeka naswona swiva pfunile kutitwa vali kusuhi na Yehova. Kungava leswaku na wena u titwa hi ndlela leyi fanaka loko u yimbelela tinsimu leti uti rhandzaka? Kutani tivekise amiyanakanwini ya wena swoswi. — Vona kwadru lelinge: “Ni Nyiki Xivindzi”.

UNGA YENDLA YINI LESWAKU UVA NI XIVINDZI?

11-12. a) Hikuya hi 1 Samuwele 17:37, 45-47, Davhida a axi kuma kwini xivindzi? b) I djondzo muni ya lisima leyi hiyi kumaka ka Xikombiso xa Davhida?

¹¹ Leswaku u tiyisela loko u xanisiwa kulaveka uva ni xivindzi. Unga yendla yini loko u titwa uli munhu lweyi a pfumalaka xivindzi? Khumbuka leswaku kuva ni xivindzi aswiyi hi leswaku u lehile kumbe u gomile. Naswona aswiyi hi ntamu kumbe wuswikoti la wena. Vona xikombiso xa Davhida a nkama ahali mutsongo. Alwe na Goliyati. Vona leswaku Davhida a anga lehanga, a angana ntamu nakambe a anga hlomanga kufana na Goliyati. Hambi hi tlhari linene a angali na lona. Kambe a ani xivindzi lexikulu. Xivindzi xolexo ximu yendle anga chavi kuyalwa ni wanuna lweyo wa kuzimuka lweyi a atibyela swinene.

¹² Davhida a axi kuma kwini xivindzi lexo? Yena a akholwa leswaku Yehovha a amu seketela. (Lerha 1 Samuwele 17:37, 45-47.) Davhida a angana mhaka ni leswi Goliyati a alehe kumu tlula. Kambe yena a atiyiseka leswaku Goliyati ahiwa nchumu ka Yehovha. Hi djondza yini ka mhaka leyi? Hingava ni xivindzi loko hi kholwa leswaku Yehovha ana hina naswona vakaneti va hina ahiva nchumu ka Xikwembu. (2 Tikro. 20:15; Pis. 16:8) Hingaxi hlakulelisa kuyini xivindzi swoswi na nxaniso wungase sungula?

13. Hlamusela leswaku hingaxi hlakulelisa kuyini xivindzi.

¹³ Hinga hlakulela xivindzi hi kuchumayela van’wana hi mahungu yotsakisa ya Mfumu wa Xikwembu. Hi mhaka muni kuchumayela kuhi nyika xivindzi? Hikusa loko hi chumayela hi djondza kutshemba Yehova ni kuva hinga chavi vanhu. (Swi. 29:25) Kufana ni minsiha leyi tiyaka loko hi tshamela kutiwolola, xivindzi xa hina naxona xita tiya loko hi chumayela hi munti ni munti, ka tindhawu leti taleke hi vanhu hambi mabazara ni kun’wana ni kun’wana loko hi pfulekeliwa hi mukhandlu. Loko hi ni xivindzi xa kuchumayela swoswi, hitaswi kota kutama hi chumayela ni loko ntirho wa hina wu tsimbisiwa hi kuhelela. — 1 Tes. 2:1, 2.

14-15. Hi djondza yini ka xikombiso xa Nancy Yuen na Valentina Garnovskaya?

¹⁴ Hinga djondza swotala ka xikombiso xa vamakwerhu vambirhi vaxisati lava kombiseke xivindzi lexikulu. Nancy Yuen a agomile, a ani 1.5 wa ma metro, kambe a anga tsekatsekisiwe hi nchumu.c Anga pfumelanga kutshika kuchumayela mahungu ya kutsakisa ya Mfumu wa Xikwembu. Hi mhaka leswo a pfaleliwe djele kuringana nkama lowu tlulaka 20 wa malembe atikweni la China. Maphoyisa lawa amamu thethisa ma vule leswaku a ali munhu wa nkanu kutlula vanhu hinkwavu atikweni.

¹⁵ Hilaha kufanaka, Valentina Garnovskaya a khomiwile makhambi manharhu a Russia, naswona a tshame kolomuya ka 21 wa malembe a djeled. Hi mhaka muni? Leswi a ati yimisele kutama a chumayela, maphoyisa vule leswaku a ali “xigevenga lexingani khombo”. I mpsini leswinga pfuna vavasati lavambirhi votshembeka leswaku va tama vava ni xivindzi? Hi leswi ava kholwa leswaku Yehovha a ali na vona.

16. Kulaveka yini leswaku hiva ni xivindzi xa ntiyiso?

¹⁶ Hilaha se hiswi voneke ha kona, leswaku hiva ni xivindzi ahi fanelanga hi tshemba ntamu kumbe wuswikoti la hina. Handle ka leswo, hi fanele hi tshemba leswaku Yehovha ana hina naswona wahi lwela. (Det. 1:29, 30; Zak. 4:6) Leswo hi swona leswi hi faneleke hiswi yendla leswaku hiva ni xivindzi xa ntiyiso.

HINGA YENDLA YINI LOKO VANHU VAHI NYENYA?

17-18. Hilaha swi tsaliweke ha kona ka Yohane 15:18-21, hlamusela leswaku Yesu ahi basopise ka mhaka yini.

¹⁷ Haswi lava kuhloniphiwa hi vanhu van’wana, kambe ahi fanelanga hi pimisa swaku ahiva nchumu loko vanhu vangahi rhandzi. Yesu a te: “Mikatekile loko vanhu vamivenga, loko vamihlongola ni kumirhuketela, ni loko vasola vito ra n’wina onge hi loko ribihile, hikolaho ka N’wana-wa-Munhu.” (Luk. 6:22) Yesu a alava kuvula yini?

¹⁸ Yesu a anga lavi kuvula leswaku Vakreste avataswi tsakela kunyenyiwa. Matshan’wini ya leswo, Yesu a alava kuhi ba ndleve hi kolaho ka leswi aswitahi humelela. Hina ahiva misava kambe hi hanya hi kulandza leswi Yesu ahi djondziseke swona naswona hi chumayela rungula leli Yesu ali chumayeleke. A vuyelo la kona hi leswaku misava yahi nyenya. (Lerha Yohane 15:18-21.) Hilava kutsakisa Yehovha. Hi mhaka leyo, ahi vaviseki loko vanhu vahi nyenya hi leswi hi yendlaka kurhandza ka yena.

19. Hingava tekelelisa kuyini vapostola?

¹⁹ Unga dani kutiviwa tani hi Mboni ya Yehovha, hi kuchava leswi vanhu vangaswi vulaka kumbe kuswi yendla. (Miki. 4:5) Hinga djondza kuhlula kuchava vanhu hi kupimisa hi leswi vapostola va Yesu vaswi yendleke a Yerusalema loko se a dlayiwile. Avaswi tiva leswaku varhangeli va wukhongeli va vaYuda avava nyenya swinene. (Mint. 5:17, 18, 27, 28) Hambi leswo, siku ni siku ava tama vaya atempeleni, ni kutlhela va chumayela. Leswo aswi kombisa leswaku avali vadjondzisiwa va Yesu. (Mint. 5:42) Ava pfumelelanga kuchava kuva tshikisa kuchumayela. Na hina hingaswi kota kuhlula kuchava vanhu loko hiva byela leswaku hi Timboni ta Yehovha kun’wana ni kun’wana lomu hinga kona kungava antirhweni, a xikolweni kumbe lomu hi tshamaka kona. — Mint. 4:29; Rhom. 1:16.

20. Hayini vapostola ava tshama va tsakile hambileswi ava nyenyiwa?

²⁰ Hayini vapostola ava tshama va tsakile? Avaswi tiva leswaku hayini va nyenyiwa naswona avaswi teka kuli nkateko kuhluphiwa hi leswi ava yendla kurhandza ka Yehovha. (Luk. 6:23; Mint. 5:41) Hi kufamba ka nkama mupostola Petro a tsale leswi: ‘Kambe ni loko mixanisiwa hikolaho ka leswolulama, mikatekile’ (1 Pet. 2:19-21; 3:14) Loko hiswi twisisa leswaku hi nyenyiwa hi mhaka kuyendla swilo swa swinene, ahinge tshuki hi tshika kutirhela Yehovha hi kolaho ka swona.

VUYELO LA KUTILUNGHISELELA

21-22. a) Uti yimisele kuyendla yini leswaku uti lunghiselela kuxanisiwa? b) Hita bula hi yini ka djondzo leyi taka?

²¹ Ahiswi tivi leswaku vakaneti kumbe minfumu yita sungula siku muni kuhi hlupha kumbe kutsimbisa ntirho wa hina. Hambi leswo, haswi tiva leswaku hingati lunghiselela swoswi akuva hi tiyisa wunghanu la hina na Yehovha hi kuhlakulela kuva ni xivindzi ni kudjondza kunga chavi vanhu. Kuti lunghiselela kutahi pfuna kutama hi tirhela Yehovha swoswi ni le nkameni lowu taka.

²² Kambe hitaku yini loko wugandzeli la hina li tsimbisiwa hi kuhelela? Ka djondzo leyi landzelaka hita bula hi matshinya ya minawu ya Bibele lamangatahi pfuna kusimama hi tirhela Yehovha.