Xikwembu Xa Swi Twa Swikhongelo Swa Hina?

XIKWEMBU I MUTWI WA SWIKHONGELO.

“Oh Mutwi wa xikhongelo, vanhu va minxaka hinkwayu va ta ta ka wena.” — Tipisalema 65:2.

Vanhu van’wana va hamba xikhongelo hikusa va li xi va yentxa va titwa kahle hambileswi va pimisaka swaku a nga kona lweyi a xi twaka. A ntiyiso hi leswaku a xikhongelo a xi tirheli ku hi yentxa hi titwa kahle ntsena loko hi ni swikarhatu. Bibele li li: “Yehovhaa a kusuhi ni hinkwavo lavamuvitanaka, ni ka hinkwavo lavamuvitanaka hi ntiyiso. . . . Wavatwa loko varila vakombela kupfuniwa”. — Tipisalema 145:18, 19.

Hi nga tiyiseka swaku Yehovha wa swi twa swikhongelo swa vanhu va yena. Hi lirhandzu a li: “Naswona mitanivitana, mita, mikhongela ka mina, kutani mina nitamiyingisa.” — Yeremiya 29:12.

XIKWEMBU XI LAVA SWAKU HI KHONGELA KA XONA.

“Mi nga tshikeni ku khongela.” — Varoma 12:12.

Bibele li li: “Tamani mi khongela” naswona “minkama hinkwayu khongelani”. Leswo swi hi yentxa hi vona swaku Xikwembu xi lava hi khongela ka xona. — Matewu 26:41; Vaefeza 6:18.

Hi mhaka muni Xikwembu xi lava hi khongela ka xona? Hi xikombiso, vapapayi va tsaka loko vana va vona va kombela swaku va va pfuna. Hambileswi minkama yin’wana papayi wa kona a nga ha swi tivaka leswi n’wana a swi lavaka, wa tsaka loko n’wana a mu kombela hikusa swi kombisa swaku wa mu tshemba funtshi i munghanu wa yena. Hi ku fanana, loko hi khongela ka Yehovha hi kombisa swaku ha mu tshemba naswona hi lava ku va vanghanu va yena. — Swivuriso 15:8; Yakobo 4:8.

XIKWEMBU XI NI MHAKA NA WENA.

“Na mi rhula ku vilela ka n’wina hinkwaku ka xona, hikusa xa mi hlayisa.” — 1 Pedru 5:7.

Xikwembu xi lava hi khongela ka xona hikusa xa hi rhandza naswona xi ni mhaka na hina. Xi swi tiva kahle leswi hi karhataka naswona xi lava ku hi pfuna.

Makhambi manyingi Hosi Davhida a khongele ka Yehovha a kombela swaku a mu pfuna a tlhela a mu byela leswi a swi mu karhata ni leswi a a swi pimisa. (Tipisalema 23:1-6) Xikwembu xi mu vonise ku yini Davhida? Xi mu rhandzile xi tlhela xi yingisa swikhongelo swa yena. (Mintirho 13:22) Ni swoswi, Xikwembu xa swi twa swikhongelo swa hina hikusa xa hi rhandza.

“YEHOVHA NAMU RHANDZA HIKUSA WANI YINGISELA LOKO NI KHONGELA”

Marito lawa i ya mun’we wa lava nga tsala buku la Tipisalema leli nga ka Bibele. Yena a a kholwa swaku Xikwembu xa swi twa swikhongelo swa yena naswona leswo swi mu pfune hintamu. Wunghanu la yena ni Xikwembu li kulile naswona leswo swi mu pfunile leswaku a va ni ntamu wa ku tiyisela swikarhatu leswi a a li na swona ni ku vava loku a a ku twa. — Tipisalema 116:1-9.

Loko hi kholwa swaku Xikwembu xa swi twa swikhongelo swa hina, a hi nga ta tshika ku khongela. Vona leswi swi nga humelela Pedro, lweyi a tshamaka aEspanha. N’wana wa yena wa 19 wa malembe a fe hi nghozi ya movha. Leswi a a vavisekile a byeli Xikwembu leswi a a titwisa xiswona naswona nkama ni nkama a a khongela ka Xikwembu a kombela leswaku xi mu tiyisa xi tlhela xi mu pfuna. Ku game ku yentxeka yini? Pedro a li: “Yehovha a swi hlamulile swikhongelo swa mina a tlhela a ni tiyisa mina ni nsati wa mina hi ku tirhisa vamakwerhu abandleni.”

I ntiyiso swaku a n’wana wa vona a nga tlhelanga a hanya, kambe xikhongelo xi mu pfune hintamu Pedro ni ndjangu wa yena. A nsati wa yena María Carmen a li: “Xikhongelo xi ni pfune ku tiyisela. A ni swi tiva swaku Yehovha wa ni twisisa hikusa loko ni khongela ka yena a ni va ni ku rhula.”

Bibele ni leswi nga humelela vanhu van’wana swi kombisa swaku hikakunene Xikwembu xa swi twa swikhongelo swa hina. Kambe hi lani hi tivaka ha kona, Xikwembu a xi hlamuli swikhongelo hinkwaswu. Hi mhaka muni?