Pimisa Ku Fana Na Yehovha Na Yesu

1-2. Swi patsa yini ku rhandza Yehovha, naswona Yesu a swi kombisise ku yini swaku wa mu rhandza Yehovha?

LOKO Yesu a vulavula hi nawu wa lisima hintamu ka Nawu wa Moxe a te: “U fanele u rhandza Yehovha Xikwembu xa wena hi mbilu ya wena hinkwayu, hi wutomi la wena hinkwalu, hi matimba ya wena hinkwawu ni hi mimpimiso ya wena hinkwayu.” (Luk. 10:27) Hi fanele hi rhandza Yehovha hi mbilu ya hina hinkwayu, leswi patsaka leswi hi swi navelaka ni ndlela leyi hi titwaka hi yona. Kambe hi fanele hi tlhela hi tinyiketela ka yena hi wutomi la hina hinkwalu ni hi matimba ya hina hinkwawu. A xa lisima hintamu lexi hi faneleke hi xi yendla i ku rhandza Yehovha ni hi mimpimiso ya hina, ku nga ndlela leyi hi pimisaka hi yona. I ntiyiso leswaku a hi nge swi koti ku twisisa hi ku helela mimpimiso ya Yehovha, kambe hi nga yi tiva ku yampsa hi ku djondza ndlela leyi Yesu a a pimisa hi yona hikusa Yesu a yi tekelele hi ku helela ndlela leyi Papayi wa yena a a pimisa hi yona. — 1 Ko. 2:16

² Yesu a a rhandza Yehovha hi mimpimiso ya yena hinkwayu. Yena a a swi tiva leswi Yehovha a a swi lava naswona a a tinyimiselile ku yendla ku rhandza ka Yena hambiloko swi lava a hlupheka. Yesu a a swi lava hintamu ku yendla ku rhandza ka Yehovha lakakuva a nga pfumelelanga nchumu xin’wani xi va xa lisima ka wutomi la yena.

3. Hi wini nkateko lowu Pedru a nga va na wona, naswona a kutxe Vakreste leswaku va yendla yini? (1 Pedru 4:1)

³ Pedru ni vapostolo van’wani va ve ni nkateko wawukulu wa ku va na Yesu va tlhela va vona ndlela leyi a a pimisa hi yona. Nkama Pedru a nga tsala karta la yena la ku sungula, a kutxe Vakreste leswaku va tilunghiselela ku pimisa ku fana na Kreste. (Lerha 1 Pedru 4:1.) Rito leli Pedru a nga li tirhisa nkama a nga te “tilunghiseleleni” li kombetela ka masonchwa lawa ma tilunghiselelaka swaku ma ya nyimpini. Leswi swi kombisa leswaku ku pimisa ku fana na Yesu i tlharhi lalikulu leli nga hi pfunaka leswaku hi lwisana ni ku navela ka hina ka ku yendla xidjoho ni ku tlhela hi lwa ni misava leyi ya Sathana. — 2 Ko. 10:3-5; Efe. 6:12.

4. Hi ta djondza yini ka nhlokomhaka leyi?

⁴ Ka djondzo leyi, hi ta vona leswi hi nga swi yendlaka leswaku 1) hi pimisa ku fana na Yehovha, leswi nga ta hi yendla hi va ni mimpimiso ya ku fana; 2) hi tiveka hansi, kasi xa wu 3) hi va ni mapimiselo yamanene hi tlhela hi mu tshemba Yehovha ni ku khongela ka yena. Leswaku hi yendla leswo a hi kambeleni mapimiselo ya Yesu ni ku vona leswi hi nga swi djondzaka.

PIMISA KU FANA NA YEHOVHA

5. I ka xiyimu xini lani Pedru a kalaka a nga pimisanga ku fana na Yehovha?

⁵ Siku lin’wani Pedru a kombise leswaku a a nga pimisi ku fana na Yehovha. Yesu a byele vapostolo va yena leswaku a a ta ya Yerusalema lani varhangeli va wukhongeli a va ta mu khoma, va mu hlupha va gama va mu dlaya. (Mat. 16:21) Phela Pedru a a swi tiva leswaku Yesu a a li Mesiya lweyi Yehovha a a mu rhumelile leswaku a ta ponisa vanhu va yena. Se a swi mu karhatela Pedru ku kholwa leswaku Yehovha a a ta pfumelela leswaku N’wana wa yena a hluphiwa hi ndlela leyo. (Mat. 16:16) Kutani a vitane Yesu tlhelweni a mu byela a ku: “Titsetseleli we Hosi; swilo leswo swi nga ta tshuka swi ku humelela.” (Mat. 16:22) Kambe Yesu a nga nyimanga na yena Pedru hikusa a a swi tiva leswaku a a nga pimisi ku fana na Yehovha.

6. Yesu a swi kombisise ku yini swaku a a pimisa ku fana na Yehovha?

⁶ Leswi Yesu a a pimisa hi ku helela ku fana na Yehovha, a mu hlamule leswi Pedru: “Suka la ka mina Sathana! U ni sivela ku yendla ku rhandza ka Xikwembu, hikusa a wu pimisi ku fana ni Xikwembu, kambe u pimisa ku fana ni vanhu.” (Mat. 16:23) Hambileswi Pedru a wo lava ku mu pfuna Yesu, yena a nga mu yingisanga. Phela Yesu a a swi twisisa swaku Yehovha a a nga swi lavi swaku a pimisa hi yena ntsena. Ka khambi leliyani, Pedru a djondze swaku i swa lisima ku pimisa ku fana na Yehovha. Djondzo leyo i ya lisima ni le ka hina namuntlha.

7. Pedru a yendle yini swaku a pimisa ku fana na Yehovha? (Vona mufoto wa pagina la ku sungula.)

⁷ Hi ku famba ka nkama, Pedru a swi kombisile leswaku a a swi lava hintamu ku pimisa ku fana na Yehovha. Leswo swi tikombile nkama lowu Yehovha a nga kombisa leswaku se a wu fikile nkama wa leswaku vanhu vamatiko va lumba ndjangu wa yena. Yehovha a rhume Pedru swaku a ya chumayela Korneliyo, wanuna lweyi a a nga li Muyuda, a tlhela a mu pfuna swaku a va Mukreste. Phela Vayuda ni vanhu vamatiko a va nga twanani, a va li mati ni gezi. Se swi lave swaku Pedru a txintxa mapimiselo ya yena. Loko Yehovha se a mu pfunile Pedru kuva a twisisa leswaku se a a swi lava swaku vanhu vamatiko va sungula ku lumba ndjangu wa yena, Pedru a nga djikadjikanga a yo vhela a ya ka Korneliyo ‘na a nga kanakani.’ (Min. 10:28, 29) Leswo swi pfunile hikusa Korneliyo ni ndjangu wa yena hinkwawu va game va tsakamisiwa. — Min. 10:21-23, 34, 35, 44-48.

8. Hi nga swi kombisisa ku yini swaku hi pimisa ku fana na Yehovha? (1 Pedru 3:8)

⁸ Ndzhaku ka malembenyana, Pedru a kutxe Vakreste leswaku va va ni “mimpimiso ya ku fana”. (Lerha 1 Pedru 3:8) Se lexi xi nga ta hi pfuna swaku hi va ni mimpimiso ya ku fana i ku djondza Bibele, hi tiva ndlela leyi Yehovha a pimisaka hi yona hi tlhela hi zama ku mu tekelela. Hi xikombiso, Yesu a hi kutxe swaku hi rhangisa Mfumu wa Xikwembu ka wutomi la hina. (Mat. 6:33) Se a hi nge makwerhu mun’wani wa bandla la hina a pimisa hi ku va mupfuli wa ndlela kumbe a yendla mintirho yin’wani ya nkama hinkwawu. Hi nga kombisa swaku hi ni mimpimiso ya ku fana hi ku kala hi nga vuli swilo leswi nga ta mu yendla a pimisa hintamu hi yena, kambe hi vulavula kahle hi mintirho leyi a lavaka ku yi fikelela, hi tlhela hi mu pfuna hilani hi nga kotaka hi kona.

TIVEKI HANSI

9-10. Yesu a swi kombisise ku yini leswaku a a tiveka hansi?

⁹ Ka wusiku la wugamu la yena lani misaveni, Yesu a djondzise Pedru ni vapostolo lavan’wani mhaka ya lisima ya ku tiveka hansi. Yesu a a rhume Pedru na Yohani leswaku va lulamisela ndhawu leyi a a ta dla na vona ka wugamu na a nge se fa. Ka leswi va nga swi lulamisa swi nga ha yendleka a ku ni baziya la mati ni mathawula leswaku va hlamba minenge na va nga se dla. Kambe i mani lweyi hi ku tiveka hansi a a ta va hlambisa minenge?

¹⁰ Ku ve Yesu lweyi a nga va hlambisa minenge naswona a nga pimisanga kambirhi leswaku a yendla leswo. Phela hi ntolovelo ntirho lowu a wu yendliwa hi xitirhi, se swi va hlamalisile hintamu vapostolo nkama Yesu a nga wu yendla. Bibele li vula leswaku Yesu a suse nguvu ya yena, a tiboha masenge hi thawula a chela mati ka baziya a gama a hlambisa minenge vapostolo va yena. (Yoh. 13:4, 5) Yesu a hlambise minenge ya 12 wa vapostolo va yena ku patsa na Yudasi lweyi a a ta mu djikela a tlhela a mu xavisa. Swi nga yendleka Yesu a teke nkama wa ku leha na wa ha hlambhisa minenge vapostolo va yena, kambe hi ku tiveka hansi a wu yendlile ntirho lowu. Hi ku lehisa mbilu a game a byela vapostolo va yena a ku: “Indjhe ma swi tiva swaku hi mhaka muni ni mi hlambise minenge? Mi ni vitana ‘Mudjondzisi’ ni ‘Hosi’ naswona mi tiyisile hikusa ni yena. Se leswi mina hambileswi ni nga Hosi ni Mudjondzisi ni nga mi hlambisa minenge, na n’wina mi fanele mi hlambisana minenge.” — Yoh. 13:12-14.

11. Pedru a swi kombisise ku yini swaku a a djondze ku tiveka hansi? (1 Pedru 5:5) (Vona mufoto.)

¹¹ Ku tiveka hansi ka Yesu ku djondzise Pedru mhaka ya lisima. Hi xikombiso, loko Yesu se a file Pedru a game a yendla masingita. Lin’we la masingita wolawo ku ve ku hanyisa wanuna lweyi a nga psaliwa na a limalile. (Min. 1:8, 9; 3:2, 6-8) Loko se a mu hanyisile, vanhu va vanyingi va yile lani Pedru a a li kona. (Min. 3:11) Ku nga va swaku Pedru a a ta londzola nkama wolowo leswaku a tibuma phambheni ka vanhu, ngopfungopfu leswi hi nkama wolowo ku va ni ndhuma a swi li swa lisima? Nada, a nga swi yendlanga leswo. Hi ku tiveka hansi a pfune vanhu swaku va khensa Yehovha na Yesu hileswi nga yendleka. A va byele leswi: “Wanuna lweyi mi mu vonaka a hanyisiwile hi vito la Yesu ni hi mhaka ya lipfumelo la hina ka vito la Yesu.” (Min 3:12-16) Hi ku famba ka nkama, ka lin’we la makarta lawa Pedru a nga ma tsalela Vakreste a va pfunile leswaku va tiveka hansi. Pedru a tirhise Rito la Xigriki leli nga ha vulaka ku yambala ku tiveka hansi ku fana ni loko hi yambala mpahla. Leswo swi hi khumbukisa nkama lowu Yesu a nga tiboha thawula, a hlambisa minenge vapostolo va yena. — Lerha 1 Pedru 5:5.

12. I mpsini swi nga hi pfunaka swaku hi tiveka hansi ku fana na Pedru?

¹² Na hina hi nga swi kota ku tiveka hansi ku fana na Pedru. Kambe ku tiveka hansi a hi ku vulavula hi ndlela leyi nga ta yendla swaku van’wani va pimisa swaku ha tiveka hansi. Kambe rito leli nge “ku tiveka hansi” leli Pedru a nga li tirhisa, li patsa leswi hi swi pimisaka hi hina ni hi vanhu van’wani. Hi yendla swilo swaswinene hileswi hi rhandzaka Yehovha ni vanhu van’wani, ku nga li hileswi hi lavaka swaku vanhu van’wani va hi khuza. Hi kombisa swaku hi tiveka hansi hikakunene hi ku tirhela Yehovha ni vamakwerhu na hi tsakile hambiloko van’wani va nga hi voni. — Mat. 6:1-4.

‘VANA NI MIMPIMISO YAYINENE’

13. Ku va ni ‘mimpimiso yayinene’ swi patsa yini?

¹³ Ku va ni ‘mimpimiso yayinene’ swi patsa yini? (1 Pe. 4:7) Swi patsa ku va hi yendla swiboho hi ku ya hi leswi Yehovha a swi vonisaka xiswona swilo. Handle ka leswo, swi patsa ku va hi tiva swaku a ku na xa lisima ka wutomi la hina ku tlula ku va ni wunghanu la ku tiya na Yehovha. Swi tlhela swi patsa ku va hi nga tivoni na hi li va lisima ku tlula mpimu kumbe hi tibyela swaku hi tiva swilo hinkwaswu. Munhu lweyi a nga ni ‘mimpimiso yayinene’ a kombisa swaku a tshemba Yehovha hi ku khongela ka yena a mu kombela swaku a mu kongomisa ka xin’wani ni xin’wani lexi a xi yendlaka.a

14. I ka xiyimu xini lani Pedru a kalaka a nga mu tshembanga Yehovha?

¹⁴ Ka wusiku leli Yesu a nga fa hi lona, a basopise vadjondzisiwa va yena a ku: “N’wina hinkwenu mi ta ni baleka wusiku leli”. Kambe hi mhaka ya leswi Pedru a a titshemba ku tlula mpimu a mu hlamulile a ku: “Hambiloko hinkwavu vo ku baleka, mina a ni nge tshuki ni ku balekile!” Ka wusiku lolelo Yesu a a byele vadjondzisiwa va yena leswaku a va nga ‘fanelanga va yetlela, kambe va tama va khongela.’ (Mat. 26:31, 33, 41) Loko Pedru a a yendle leswi Yesu a nga swi vula, swi nga yendleka a a ta va a tiye nhlana a nga chavi ku pfumela leswaku yena a a li mudjondzisiwa wa Yesu. Kambe a nga swi yendlanga leswo, a mu yalile Yesu, leswi nga yendla leswaku hi wugamu a titwa nandzu a tlhela a vaviseka hintamu. — Mat. 26:69-75.

15. I mpsini leswi nga pfuna Yesu ka wusiku la yena la wugamu?

¹⁵ Yesu a a mu tshemba hi ku helela Yehovha. Hambileswi a a hetisekile, Yesu a khongele makhambi ya manyingi hi siku leli a nga fa hi lona. Leswo swi mu pfunile leswaku a tiya, a yendla ku rhandza ka Yehovha. (Mat. 26:39, 42, 44; Yoh. 18:4, 5) Pedru a swi vonile swaku Yesu a khongelile makhambi ya manyingi hi siku leliyani la ku karhata, leswo swi mu pfunile wutomi la yena hinkwalu.

16. Hi swi tivisa ku yini swaku Pedru a swi kotile ku va ni mimpimiso yayinene? (1 Pedru 4:7)

¹⁶ Hi ku famba ka nkama, Pedru a ye a mu tshemba hintamu Yehovha a tlhela a khongela ka yena a kombela swaku a mu kongomisa. Loko Yesu se a pfuxiwile a tiyisekise Pedru ni vapostolo lavan’wani leswaku a va ta yamukela moya wa ku kwetsima lowu a wu ta va pfuna swaku va chumayela mahungu ya ku tsakisa. Kambe Yesu a va kombele swaku va wu nyimela na va li Yerusalema. (Luk. 24:49; Min. 1:4, 5) I mpsini leswi Pedru a nga swi yendla na a nyimela ku yamukela moya wa ku kwetsima? Yena ni vadjondzisiwa lavan’wani va tame va “phikelela xikhongelweni”. (Min. 1:13, 14) Hi ku famba ka nkama, ka karta la yena la ku sungula Pedru a kutxe Vakreste swaku va va ni mimpimiso yayinene va tlhela va khongela minkama hinkwayu va kombela leswaku Yehovha a va kongomisa. (Lerha 1 Pedru 4:7.) Phela Pedru a djondze ku tshemba Yehovha a tlhela a pfuna bandla ni ku li tiyisa. — Gal. 2:9.

17. I yini lexi hi faneleke ku tama hi xi yendla hambiloko hi kota ku yendla swilo swa swinyingi? (Vona mufoto.)

¹⁷ Leswaku hi va ni mapimiselo yamanene hi fanele hi tama hi khongela ka Yehovha hambiloko hi kota ku yendla minchumu ya yinyingi. Loko hi lava ku yendla swiboho swa lisima ka wutomi la hina, ha khongela ka Yehovha hi mu kombela swaku a hi kongomisa na hi tshemba swaku wa swi tiva leswi nga ta hi pfuna.

18. I mpsini leswi nga ta hi pfuna ku tekelela Yehovha?

¹⁸ Hi mu khensa hintamu Yehovha hileswi a nga hi yendla na hi swi kota ku tekelela wumunhu la yena. (Gen. 1:26) I ntiyiso leswaku a hi nge swi koti ku mu tekelela hi ku helela Yehovha. (Esa. 55:9) Kambe ku fana na Pedru hi lava ku tama hi pimisa ku fana na Yehovha, hi tiveka hansi hi tlhela hi va ni mimpimiso yayinene.