Kulisa Wunghanu La Wena Ni Vamakwerhu

1-2. I yini lexi nga xa lisima ka Yehovha, naswona i yini leswi a hi byelaka swaku hi swi yendla?

INDJHE se a wu swi vonile swaku Yehovha a yi nyika lisima hintamu ndlela leyi hi va khomaka hi yona vanhu van’wani? Yesu a djondzise leswaku hi fanele hi rhandza vanhu van’wani ku fana ni leswi hi tirhandzisaka xiswona. (Mat. 22:37-39) Leswi nge, hi fanele hi kombisa lirhandzu hambi hi ka vanhu lava kalaka va nga mu tirheli Yehovha. Loko hi yendla leswo hi va hi tekelela Xikwembu xa hina Yehovha, “lweyi a humesaka dlambu la yena ka vanhu va ku biha ni vavanene naswona a nisaka mpfula ka vanhu va ku lulama ni va ku kala va nga lulamanga.” — Mat. 5:45.

² Yehovha a rhandza vanhu hinkwavu, kambe a rhandza hintamu vanhu lava yendlaka swaswinene. (Yoh. 14:21) Phela a lava swaku na hina hi yendla swoleswo; hi yona mhaka a hi byelaka swaku hi fanele hi va ‘rhandza swinene vamakwerhu.’ (1 Pe. 4:8; Rom. 12:10) Loko Bibele li vula leswaku hi va rhandza swinene vamakwerhu, li lava ku kombisa swaku hi fanele hi va komba lirhandzu la ku fana ni leli hi kombaka vandjangu wa hina kumbe munghanu wa hina wamukulu.

3. I mpsini leswi hi faneleke hi swi khumbuka loko swi ta ka mhaka ya lirhandzu?

³ A lirhandzu li fana ni planta leli li lavaka ku hlayisiwa leswaku li kula kahle. Mupostolo Pawulo a vule leswi ka Vakreste: “Tamani mi rhandzana ku fana ni vamakwavu.” (Heb. 13:1) Phela Yehovha a lava swaku lirhandzu la hina hi vamakwerhu li ya li kula. Ka djondzo leyi, hi ta vona swaku hi mhaka muni hi fanele hi kulisa wunghanu la hina ni vamakwerhu ni swaku hi nga swi kotisa ku yini ku tama hi yendla leswo.

HI MHAKA MUNI HI FANELE HI KULISA WUNGHANU LA HINA NI VAMAKWERHU?

4. Hi nga yendla yini swaku hi tama hi ku nyika lisima ku twanana loku hi nga na kona ni vamakwerhu? (Tipisalema 133:1) (Vona mafoto.)

⁴ Lerha Tipisalema 133:1. Hinkwerhu ha pfumelelana ni mupisalema lweyi a nga vula swaku “a hi ku saseka ni ku tsakisa ka swona” ku va vanghanu va lava tirhelaka Yehovha. Kambe loko hi nga tivoneli, swi nga yendleka hi nga ha li nyiki lisima wunghanu lolelo. Hi xikombiso, pimisa hi munhu lweyi siku ni siku a hundzaka hi ka nsinya wawukulu lowu nga xonga hintamu. Leswi munhu yelweyo a hundzaka hi kolanu siku ni siku, loko a nga tivoneli swi nga yendleka a nga ha ku voni ku saseka ka nsinya wolowo. Leswo swi nga yendleka ni ka wunghanu leli hi nga na lona ni vamakwerhu. Leswi vhiki ni vhiki hi nga na vona amintlhanganwini kumbe ka tindhawu tin’wani, swi nga yendleka hi nga ha ku nyiki lisima ku twanana loku hi nga na kona. Se hi nga yendla yini leswaku leswo swi nga hi yendlekeli? Swi lava hi pimisa hi swaku hi mhaka muni makwerhu mun’wani ni mun’wani a li wa lisima ka hina ni le bandleni.

5. Ku nga yendlaka yini loko vanhu va vona lirhandzu leli hi kombanaka lona?

⁵ Van’wani lava yaka mintlhanganwini hi khambi la ku sungula, va hlamala hi ku vona lirhandzu leli vanhu va Yehovha va kombanaka lona; funtshi va vhela va swi vona swaku hi Vakreste va ntiyiso. Yesu a vule swaku ‘hinkwavu va ta tiva swaku hi vadjondzisiwa va yena loko hi rhandzana.’ (Yoh. 13:35) Pimisa hi xikombiso xa Chaithra, lweyi a a djondza Bibele ni Timboni ta Yehovha. Khambi lin’wani va mu rhambile swaku a ya kongresu naswona a pfumelile. Loko siku la ku sungula la kongresu li helile, a byele lweyi a a djondza na yena a ku: “Vapsali va mina a va se tshama va ni barasara, kambe ka kongresu leli ni barasariwe hi 52 wa vanhu hi siku lin’we. Lirhandzu leli vamakwerhu va nga ni komba lona li swi kombise kahle swaku Yehovha na yena wa ni rhandza funtshi na mina ni lava ku lumba ndjangu wa yena.” Chaithra a tame a djondza a tlhela a txintxa mahanyelo ya yena naswona a tsakamisiwe hi 2024. Xikombiso lexi xi hi djondzisa swaku loko hi ni mahanyelo yamanene hi tlhela hi kombana lirhandzu, swi nga yendla swaku van’wani na vona va lava ku tirhela Yehovha. — Mat. 5:16.

6. Ku va ni wunghanu la ku tiya ni vamakwerhu swi nga hi vhikelisa ku yini?

⁶ Ku va ni wunghanu la ku tiya ni vamakwerhu swi nga va xivhikelo ka hina. Pawulo a vule leswi ka Vakreste: “Tamani mi tiyisana siku ni siku, . . . leswaku ku nga vi ni munhu ka n’wina lweyi a nonon’hwisiwaka mbilu hi matimba lama kanganyisaka ya xidjoho.” (Heb. 3:13) Minkama yin’wani hi nga tshuka hi godola se hi huma ndleleni hi sungula ku yendla swa ku biha, kambe makwerhu mun’wani a nga ha swi vona leswo, se Yehovha a nga ha mu tirhisa makwerhu yelweyo swaku a hi pfuna. (Ps. 73:2, 17, 23) Phela leswo i swinene ka hina.

7. Lirhandzu li hi pfunisa ku yini swaku hi twanana? (Vakolosa 3:13, 14)

⁷ Hina vanhu va Yehovha amisaveni hinkwayu hi yendla hinkwaswu leswi hi nga swi kotaka swaku hi kombana lirhandzu, leswi yendlaka swaku Yehovha a hi katekisa. (1 Yo. 4:11) Hi xikombiso, lirhandzu li hi pfuna swaku hi ‘tama hi lehiselana mbilu’ funtshi leswo swi hi yendla hi twanana. (Lerha Vakolosa 3:13, 14; Efe. 4:2-6) Lirhandzu ni ku twanana loku hi nga na kona loko hi li mintlhanganwini a wu nge swi kumi ka ndhawu yin’wani. Phela o va vanhu va Yehovha ntsena lava va kombanaka lirhandzu la ku tshamisa xileswo.

HLONIPHA VAN’WANI NA SWI SUKELA MBILWINI

8. Yehovha a hi pfunisa ku yini swaku hi twanana?

⁸ Lirhandzu ni ku twanana loku ku nga kona xikarhi ka vamakwerhu, swo koteka ntsena hileswi Yehovha a hi pfunaka. Hi vula leswo hikusa leswi hi kalaka hi nga hetisekanga leswo a swi nga ta koteka. (1 Ko. 12:25) Bibele li vula swaku ‘Xikwembu xa hi djondzisa swaku hi rhandzana.’ (1 Tes. 4:9) Leswi nge, Yehovha a tirhisa Bibele leswaku a hi byela leswi hi nga swi yendlaka swaku hi kulisa wunghanu la hina ni vamakwerhu. Kambe leswaku hi djondzisiwa hi Yehovha swi lava hi li lerha kahle Rito la yena hi tlhela hi tirhisa leswi hi swi djondzaka. (Heb. 4:12; Yak. 1:25) Funtshi leswo hi swona leswi Timboni ta Yehovha ti tikarhatelaka ku swi yendla.

9. Swi vula yini ku va va ku sungula ku hlonipha van’wani? (Varoma 12:9-13)

⁹ Bibele li nga hi pfunisa ku yini swaku hi kulisa wunghanu la hina ni vanhu van’wani? Vona leswi Pawulo a nga swi vula ka Varoma 12:9-13. (Lerha.) A xa lisima lexi Pawulo a nga hi byela swaku hi fanele hi xi yendla, i ‘ku tinyimisela ku va va ku sungula ku hlonipha van’wani.’ Leswo swi patsa ku va va ku sungula ku komba van’wani swaku ha va rhandza naswona hi nga yendla leswo hi tindlela ta ku hambanahambana. Hi xikombiso, hi va va ku sungula ku rivalela van’wani, hi va rhamba makaya ka hina kumbe hi va pfuna hi leswi hi nga na swona. (Efe. 4:32) U nga nyimeli swaku makwerhu a za a ku tela leswaku u va munghanu wa yena, kambe vana wa ku sungula u yendla wunghanu na yena. Loko u yendla leswo, u ta kombisa swaku u ma twisisa kahle marito ya Yesu nkama a nge te: “Swi tsakisa hintamu ku nyika ku tlula ku yamukela.” — Min. 20:35.

10. Hi nga swi kombisisa ku yini swaku hi tirha hi matimba nkama lowu hi kombisaka swaku ha ‘va hlonipha van’wani’? (Vona mufoto.)

¹⁰ Loko Pawulo se a byele Vakreste swaku a va fanele va va va ku sungula ku hlonipha van’wani, a game a ku: “Tirhani hi matimba; mi nga lolowheni.” Munhu lweyi a tirhaka hi matimba a tinyimisele ku hetisisa hinkwaswu leswi a swi tshembisaka, wa yi nyika lisima mintirho leyi va nga mu nyika yona a tlhela a zama ku yi yendla hilani va nga mu kombela hi kona. Buku la Swivuriso 3:27, 28 li vula leswi: “U nga tshuki u yala ku va nyika minchumu yayinene lava u faneleke u va nyika loko swi li matimbeni ya wena ku va pfuna.” Leswo swi lava ku vula swaku loko hi vona munhu lweyi a lavaka ku pfuniwa hi fanele hi tekela ku mu pfuna. A hi fanelanga hi swi tshikela nkama wun’wani kumbe hi pimisa swaku ku ni van’wani lava nga ta mu pfuna. — 1 Yo. 3:17, 18.

11. Hi nga yendla yini swin’wani kuva hi kombisa swaku ha va hlonipha van’wani?

¹¹ Xin’wani hi nga xi yendlaka kuva hi kombisa swaku ha va hlonipha vamakwerhu, i ku va rivalela hi xihantla. Vaefeza 4:26 yi li: “Mi nga tshiki dlambu li pela na ma ha kwatile.” Kasi hi mhaka muni yi vula leswo? Hi mhaka ndzimana 27 yi kombisa swaku loko hi yendla leswo, hi ta va na hi ‘nyika nkama Davulosi.’ Naswona hilani hi swi tivaka hi kona, Yehovha a hi byela hi makhambi ya ku hambanahambana hi ku tirhisa Bibele leswaku hi rivalela van’wani. Funtshi ka Vakolosa 3:13 a vula swaku hi fanele hi ‘tama hi lehiselana mbilu ni ku rivalelana hi ku chunseka.’ Phela loko hi swi tshika swi hundza swihoxo leswi makwerhu a hi yendlelaka swona, swi ta yendla swaku hi tama hi kulisa wunghanu la hina na yena, naswona ku yendla leswo swi ta hi pfuna swaku hi tama hi hlayisa ku twanana loku hi nga na kona hi tlhela hi hanyisana hi ku rhula ni van’wani. (Efe. 4:3) Impela a ku rivalela i nchumu wa lisima hintamu lowu nga hi pfunaka leswaku hi tama hi twanana hi tlhela hi hanya hi ku rhula ni vamakwerhu.

12. Yehovha a hi pfunisa ku yini swaku hi rivalela van’wani?

¹² Minkama yin’wani a swi vevuki ku rivalela munhu lweyi a nga hi djohela. Kambe Yehovha a tirhisa moya wa ku kwetsima swaku a hi pfuna kuva hi kota ku rivalela vanhu van’wani. Hi vula leswo hikusa loko Bibele se li vule swaku hi fanele hi va rhandza hintamu vamakwerhu hi tlhela ‘hi tirha hi matimba,’ li game li vula leswi: “Pfumelelani moya wa ku kwetsima wu mi yendla mi hiseka.” (Rom. 12:11) Leswo swi lava ku vula swaku moya wa ku kwetsima wu nga hi pfuna leswaku hi kombisa lirhandzu ka van’wani hi tlhela hi rivalela vamakwerhu na swi sukela mbilwini. Kambe leswo hi ngo swi kota ntsena loko hi khongela hi kombela swaku Yehovha a hi nyika moya wa yena wa ku kwetsima. — Luk. 11:13.

“KU NGA TSHUKI KU VA NI KU YAVANA XIKARI KA N’WINA”

13. I mpsini swi nga yendlaka swaku ku va ni ku yavana abandleni?

¹³ Ka nhlengeletanu ya Yehovha hi kuma vanhu va tinxaka hinkwatu. (1 Tm. 2:3, 4) Hi mhaka muni hi vula leswo? Hi vula leswo hikusa vanhu lava nga ka nhlengeletanu ya Yehovha va kulisiwe hi tindlela ta ku hambana funtshi va ni mapimiselo ya ku hambana, naswona ku hambana koloko ku yendla swaku swiboho leswi va swi yendlaka swi nga fani. Hi xikombiso, va yendla swiboho swa ku hambana ka mayambalelo, ndlela leyi va tisasekisaka hi yona, leswi va hungataka hi swona kumbe ndlela leyi va langaka ku dahiwa hi yona. Se loko hi nga tivoneli, ku hambana koloko ku nga yendla swaku ku va ni ku yavana abandleni. (Rom. 14:4; 1 Ko. 1:10) Leswi Yehovha a hi djondzisaka ku rhandzana, a hi nga ta womelela ka mavonelo ya hina kumbe hi ma vona na ma yampsa ku tlula ya van’wani. — Filp. 2:3.

14. I mpsini leswi hi faneleke hi lwela ku swi yendla naswona hi mhaka muni?

¹⁴ Xin’wani hi nga xi yendlaka swaku minkama hinkwayu hi twanana bandleni, i ku tiyisa van’wani hi tlhela hi va pfuna swaku va tsaka. (1 Tes. 5:11) Masikwana lawa ku ni vanhu va vanyingi lava a va susiwe bandleni ni lava a va nyime ku ya nsin’wini ni mintlhanganwini, lava va nga tlhelela ka bandla la Wukreste. Se swi kahle kuva hi va yamukela hi lirhandzu vanhu lava! (2 Ko. 2:8) Hi nga vona leswi nga vuliwa hi makwerhu mun’wani lweyi a nga heta 10 wa malembe na a nga yi mintlhanganwini ni nsin’wini. Yena a li: “Nkama ni nga tlhelela, vamakwerhu hinkwavu va ni hlekelile va tlhela va ni yamukela hi lirhandzu.” (Min. 3:19) Loko a vulavula hi leswi a nga titwisa xiswona a li: “A swi fana ni loko Yehovha a ni pfuna swaku ni tlhela ni tsaka.” Phela loko hi yendla hinkwaswu hi nga swi kotaka swaku hi tiyisa van’wani, hi ta va hi pfumelela swaku Kreste a hi tirhisa swaku hi pfuna “lava nga karhala ni lava tikeliwaka.” — Mat. 11:28, 29.

15. I yini xin’wani hi nga xi yendlaka swaku ku va ni ku twanana abandleni? (Vona mufoto.)

¹⁵ Leswi hi swi vulaka swi nga pfunisa leswaku hi va ni ku twanana ni vamakwerhu. Buku la Yobo 12:11 li li: “Indjhe ndleve a yi ringi marito ku fana ni leswi lirimi li ringaka swakudla?” Phela munhu lweyi a swi kotaka kahle ku sweka, a rhanga hi ku ringa swakudla na a nge se va phamela van’wani. Swa fana ni leswi hi swi vulaka. Hi fanele hi rhanga hi ku pimisa kahle na hi nge se vulavula. (Ps. 141:3) Minkama hinkwayu hi lava ku tiyiseka swaku leswi hi nga ta swi vula swi ta va tiyisa van’wani funtshi swi ta va yendla va tsaka. — Efe. 4:29.

16. I vamani lava va faneleke va tivonela ka leswi va swi vulaka?

¹⁶ Hinkwerhu hi fanele hi tivonela ka leswi hi swi vulaka, ngopfungopfu vavanuna lava nga chada, vapapayi ni vamamani. Vona va fanele va vulavula hi ndlela leyi nga ta tiyisa ndjangu wa vona. (Kol. 3:19, 21; Tit. 2:4) Leswi madoda ma nga nyikiwa ntirho wa ku va varisi, na wona ma fanele ma tiyisa ma tlhela ma yendla leswaku tinyempfu ta Yehovha ti tsaka. (Esa. 32:1, 2; Gal. 6:1) Minkama hinkwayu hi lava ku khumbuka marito lawa ma nga ka Swivuriso 15:23 lama nge: “Rito leli vuliwaka hi nkama wa kona li tsakisa ndjhani!”

RHANDZA VAN’WANI “HI MINTIRHO NI NTIYISO”

17. Hi nga yendla yini swaku hi rhandza vamakwerhu hi mbilu hinkwayu?

¹⁷ Mupostolo Yohani a hi kutxa leswaku ‘hi nga rhandzani hi marito ni ku vulavula hi nomo ntsena, kambe hi mintirho ni ntiyiso.’ (1 Yo. 3:18) Ha swi lava ku komba vamakwerhu swaku ha va rhandza hi mbilu hinkwayu, naswona loko hi heta nkama na vona hi ta ya hi va vanghanu va vona vavakulu. Hi nga yendla leswo hi ku bula na vona amintlhanganwini, hi tirha na vona nsin’wini ni ku va pfuxela. Loko hi yendla leswo, hi ta swi kombisa swaku ‘hi djondzisiwa hi Xikwembu leswaku hi rhandzana.’ (1 Tes. 4:9) Naswona hi ta swi vona swaku “a hi ku saseka ni ku tsakisa ka swona loko vamakwavu va tshama xikan’we hi ku twanana!” — Ps. 133:1.