A Hi Hoxe

1-2. a) Hi mhaka muni hi tiyiseka swaku a hi hoxe loko hi kumana ni swikarhatu? b) Hi ta djondza hi yini ka nhlokomhaka leyi?

LOKO hi kumana ni swikarhatu swaswikulu hi nga ha titwa hi li hoxe ku fana ni loko hi li ka lwandle lalikulu, na hi li ndzeni ka xibotani xaxitsongo lexi biwaka hi magandlati hileswi ku nga ni xidzedze. Kambe lexi hi nga tiyisekaka hi xona hileswaku a hi hoxe, Yehovha wa swi vona swikarhatu leswi hi kumanaka na swona funtshi a hi tshembisa leswaku a ta hi pfuna leswaku hi lwisana na swona. Hi lirhandzu a tshembisa mun’wani ni mun’wani wa hina a ku: “Ni ta ku pfuna.” — Esa. 41:10.

² Ka nhlokomhaka leyi hi ta vona 4 wa tindlela leti Yehovha a hi hlayisaka hi tona. 1) Wa hi kongomisa, 2) a hi nyika leswi hi swi lavaka, 3) wa hi vhikela, se 4) wa hi tiyisa. Leswi nge, ku nga na mhaka swikarhatu leswi hi kumanaka na swona, Yehovha a tshembisa swaku a ta hi pfuna. Phela a hi hoxe, minkama hinkwayu Yehovha a ta va na hina.

YEHOVHA WA HI KONGOMISA

3-4. Yehovha a hi kongomisisa ku yini? (Tipisalema 48:14)

³ Lerha Tipisalema 48:14. Yehovha wa swi tiva swaku hi lava nkongomiso wa yena hikusa hi nge swi koti ku tikongomisa hi hoxe. Se xin’wani lexi a xi tirhisaka swaku a hi kongomisa i Bibele. (Ps. 119:105) A tirhisa Bibele swaku a hi djondzisa ku yendla swiboho swaswinene ni ku va ni wumunhu leli nga ta hi pfuna kuva hi tsaka swoswi hi tlhela hi kuma wutomi la ku kala li nga heli ka nkama lowu taka.a Hi xikombiso, a hi djondzisa ku kala hi nga veketeli xiviti, hi va vanhu va ku tshembeka hi tlhela hi rhandza van’wani na swi sukela mbilwini. (Ps. 37:8; Heb. 13:18; 1 Pe. 1:22) Se loko hi yendla hinkwaswu leswi a hi djondzisaka swona, hi ta va vapapayi vavanene, vanuna kumbe vasati vavanene hi tlhela hi va vanghanu vavanene.

⁴ Yehovha a tlhela a tirhisa swikombiso swa vanhu lava ku vulavuliwaka hi vona ka Bibele, lava nga kumana ni swikarhatu swa ku fana ni swa hina va tlhela va titwa hi ndlela leyi na hina hi titwaka hi yona. (1 Ko. 10:13; Yak. 5:17) Ku djondza hi vanhu volavo hi tlhela hi tirhisa leswi hi swi djondzaka ka vona, swi nga hi pfuna hi tindlela timbirhi. Ya ku sungula, swi hi pfuna ku kala hi nga titwi hoxe hikusa ku fana ni leswi Yehovha a nga va pfuna swaku va tiyisela swikarhatu swa vona, na hina a ta hi pfuna. (1 Pe. 5:9) Ya wumbirhi, hi djondza ku lwisana ni swikarhatu leswi hi kumanaka na swona. — Rom. 15:4.

5. I vamani lava Yehovha a va tirhisaka swaku a hi kongomisa?

⁵ Yehovha a tlhela a tirhisa vamakwerhu leswaku a hi kongomisa.b Hi xikombiso, a tirhisa vadjikelezi swaku va pfuxela mabandla va tlhela va ma tiyisa. A madixkursu ya vona ma pfuna vamakwerhu swaku va tiyisa lipfumelo ni ku tlhela va twanana. (Min. 15:40–16:5) Madoda na wona ma pfuna vachumayeli swaku va tiyisa lipfumelo la vona. (1 Pe. 5:2, 3) Vapsali va pfuna vana va vona swaku va rhandza Yehovha, va yendla swiboho swaswinene ni ku va ni mahanyelo yamanene. (Swiv. 22:6) Nakambe vamakwerhu va xisati lava nga ni xiperiyensiya va pfuna van’wani lava nga majovhem hi ku va nyika switsundzuxu swa kahle, va va tiyisa ni ku va vekela xikombiso xaxinene. — Tit. 2:3-5.

6. Hi nga yendla yini swaku hi khensa Yehovha hileswi a hi kongomisaka?

⁶ Yehovha a yendla hinkwaswu swaku a hi kongomisa. Se hi nga yendla yini leswaku hi mu khensa hi mhaka ya leswo? Nhlamulu ya xivutiso lexi yi ka Swivuriso 3:5, 6, leyi nge: “Tshemba Yehovha hi mbilu ya wena hinkwayu, u nga tshembi ku twisisa ka wena n’winyi.” Loko hi yendla leswo, Yehovha ‘a ta lulamisa tindlela ta hina.’ Leswo swi vula leswaku Yehovha a ta hi pfuna swaku hi va ni wutomi la ku tsakisa hi tlhela hi tivhikela ka swikarhatu leswi nga kona ka misava leyi. Phela hi mu khensa hintamu Yehovha hileswi a tivaka mun’wani ni mun’wani wa hina a tlhela a hi nyika switsundzuxu leswi hi pfunaka! — Ps. 32:8.

YEHOVHA A HI NYIKA LESWI HI SWI LAVAKA

7. Yehovha a hi nyikisa ku yini leswi hi swi lavaka? (Vafilipiya 4:19)

⁷ Lerha Vafilipiya 4:19. Yehovha a ngo hi kongomisa ntsena, kambe a hi nyika hinkwaswu leswi hi swi lavaka. A yendla leswo hi ku katekisa minzamu hi yi yendlaka swaku hi kuma swakudla, mpahla ni ndhawu ya ku tshama ka yona. (Mat. 6:33; 2 Tes. 3:12) Kambe minkama yin’wani hi nga pfana hi karhateka hi swilo leswi. Hambileswo, Yehovha a vula swaku a hi fanelanga hi karhateka hintamu hikusa yena a nge te tshuka a va tshika vanhu va yena loko va lava ku pfuniwa. (Mat. 6:25; 6:8; Heb.13:5) Se hi nga tiyiseka swaku Yehovha minkama hinkwayu a ta hi hlayisa hilani a hi tshembisaka hi kona.

8. Yehovha a mu pfunise ku yini Davhida?

⁸ Vona xikombiso xa ndlela leyi Yehovha a nga pfuna Davhida hi yona. Davhida a hanye malembe ya ku tala na a baleka hosi Sawulo. Ka minkama yoleyo ya ku karhata, Yehovha a nga mu tshikanga Davhida ni vavanuna lava a a li na vona. Loko Davhida a pimisa hi ndlela leyi Yehovha a nga mu pfuna hi yona a vule leswi: “A ni li djaha naswona swoswi se ni gugile, kambe a ni se tshama ni vona munhu wa ku lulama a tshikiwa, kumbe vana va yena va kombela pawu.” (Ps. 37:25) Swi nga yendleka na wena u li vonile lirhandzu la Yehovha ka ndlela leyi a nga ku pfuna hi yona ni leswi a nga va pfunisa xiswona vamakwerhu van’wani ka minkama ya swikarhatu.

9. Yehovha a hi nyikisa ku yini leswi hi swi lavaka loko hi kumana ni swidzedze? (Vona mafoto.)

⁹ Yehovha a tlhela a hi pfuna hi leswi hi swi lavaka loko ku humelela swidzedze lomu hi tshamaka kona. Hi xikombiso, nkama ku nga va ni ndlala yayikulu aYerusalema ka nkama wa vapostolo, Vakreste va tindhawu ta ku hambanahambana va rhumele swakudla ni swilo swin’wani swaku va pfuna vamakwerhu lava a va li Yerusalema. (Min. 11:27-30; Rom. 15:25, 26) Ninamuntlha vanhu va Yehovha va tama va yendla swoleswo. Loko ku tshuka ku humelela swidzedze kumbe swilo swin’wani swa ku fana ni leswo, Yehovha a tirhisa vamakwerhu leswaku a pfuna lava va nga weliwa hi swidzedze swoleswo hi ku va nyika swakudla, mati, mpahla ni mimirhi. Vamakwerhu lava tirhaka ka ku yaka va pfunisa ka ku lunghisa Tiyindlo ta Wugandzeli ni tiyindlo ta vamakwerhu leti nga wonheteliwa. Yehovha a tlhela a tirhisa vanhu va yena leswaku hi xihantla va tiyisa lava va nga wonhekeliwa hi tiyindlo ta vona va tlhela va feliwa hi vanhu lava va va rhandzaka.c

10-11. Hi djondza yini ka leswi swi nga yendlekela Borys?

¹⁰ Yehovha a va yendlela swaswinene vanhu hinkwavu, ku patsa ni lava va kalaka va nga mu tirheli. Hi ku fana, na hina hi va yendlela swaswinene vanhu hinkwavu, ku patsa ni lava va kalaka va nga mu tirheli Yehovha. (Gal. 6:10) Minkama ya ku tala leswo swi yendla swaku vito la Yehovha li dzunisiwa. Hi nga pimisa hi leswi swi nga yendlekela Borys, diretori wa xikola xin’wani aUcrânia. Hambileswi a kalaka a nga li Mboni ya Yehovha, minkama hinkwayu a a va komba wunene va alunu va yena lava nga Timboni ta Yehovha, funtshi a a swi hlonipha leswi va kholwaka ka swona. Se khambi lin’wani swi lave Borys a baleka lani a a tshama kona a ya tshama ka ndhawu yin’wani ya ku vhikeleleka, hikusa lani a a tshama kona a ku ni nyimpi. Phela ka nkama wolowo wa ku karhata vamakwerhu va mu pfunile hintamu. Hi ku famba ka nkama, Borys a ve kona ka Xitsundzuxu xa lifu la Kreste, yena a li: “Timboni ta Yehovha ti ni kombe lirhandzu, ti ni hlayisile ti tlhela ti ni pfuna hi leswi a ni swi lava. Phela a ku na xin’wani ni nga xi vulaka ku tlula ku ti khensa hi hinkwaswu leswi ti nga ni yendlela swona.”

¹¹ Na hina hi tekelela ntwelawusiwana wa Yehovha hi ku kombisa lirhandzu ka vanhu hinkwavu lava va lavaka ku pfuniwa, ku patsa ni lava va kalaka va nga mu tirheli Yehovha. (Luk. 6:31, 36) Hi swi lava hintamu leswaku lirhandzu leli hi li kombaka vanhu li va pfuna kuva va tshinela ka Xikwembu. (1 Pe. 2:12) Hambiloko leswo swi nga yendleki, hi ta tsaka hintamu hi ku pfuna van’wani hikusa swa tsakisa hintamu ku nyika. — Min. 20:35.

YEHOVHA WA HI VHIKELA

12. Yehovha a ta va vhikelisa ku yini vanhu va yena? (Tipisalema 91:1, 2, 14)

¹² Lerha Tipisalema 91:1, 2, 14. Yehovha a tshembisa vanhu va yena swaku a ta va vhikela ka swilo leswi nga wonhaka wunghanu la vona na Yena, a tlhela a va pfuna leswaku lipfumelo la vona li tama li tiya. Leswo swi lava ku vula swaku Yehovha a nga ta mu pfumelela Sathana kuva a helisa wugandzeli la ntiyiso. (Yoh. 17:15) Se hina ha tiyiseka swaku hambi hi ka nhlomulu wawukulu, Yehovha a ta tama a hi pfuna leswaku hi tama hi va vanghanu va yena a tlhela a hi ponisa. — Nhl. 7:9, 14.

13. Yehovha a mu vhikelisa ku yini mun’wani ni mun’wani wa hina?

¹³ Yehovha a ngo hi vhikela hi ntlawa ntsena, kambe a tlhela a vhikela mun’wani ni mun’wani wa hina. Hi ku tirhisa Bibele wa hi pfuna ku tiva ku hambanisa swaswinene ka swa ku biha. (Heb. 5:14) Se loko hi hanya hi leswi Bibele li swi vulaka, hi vhikela wunghanu la hina na Yehovha swi tlhela swi hi pfuna ku yendla swiboho leswi nga ta hi yendla hi tsaka ni ku tlhela hi tivhikela ka mavabyi. (Ps. 91:4) Yehovha a tlhela a hi vhikela hi ku tirhisa vamakwerhu abandleni. (Esa. 32:1, 2) Leswi vamakwerhu va mu rhandzaka Yehovha naswona va tikarhatelaka ku hanya hi minawu ya yena, loko hi heta nkama na vona na hi li mintlhanganwini ni nsin’wini hi tlhela hi hungata na vona, swa hi tiyisa swi tlhela swi hi pfuna swaku hi fambela kule ni swilo swa ku biha. — Swiv. 13:20.

14. a) Hi mhaka muni Yehovha a pfumelela leswaku vanhu va yena va hlupheka? b) Tipisalema 9:10 yi hi tiyisekisa hi yini? (Vona ntlhamuselo.)

¹⁴ Ka nkama lowu nga hundza Yehovha a vhikele vanhu va yena a tlhela a va ponisa, kambe van’wani va vona va hluphekile va tlhela va dlayiwa hi mhaka swiyimu swa ku hambanahambana. Ninamuntlha na hina hi nga ha hlupheka hi mhaka minchumu leyi yi yendlekaka kola na kola ‘na hi nga yi nyimelanga’. (Ekl. 9:11) Vanhu van’wani va Yehovha va khale va xanisiwile va tlhela va dlayiwa. Leswo swi nga hi yendlekela na hina namuntlha. Yehovha a pfumelela leswaku swilo leswi swi yendleka hikusa a lava ku kombisa leswaku Sathana i muhembi. (Yob. 2:4-6; Mat. 23:34) Swi nga yendleka Yehovha a nga hi suseli swikarhatu swa hina hinkwaswu, kambe Bibele li hi tshembisa leswaku Yehovha a nge te va tshika lava va mu rhandzaka.d — Ps. 9:10.

YEHOVHA WA HI TIYISA

15. Yehovha a hi tiyisisa ku yini hi ku tirhisa xikhongelo, Bibele ni mintlhanganu? (2 Vakorinto 1:3, 4)

¹⁵ Lerha 2 Vakorinto 1:3, 4. Minkama yin’wani loko hi twa ku vava hileswi hi nga feliwa hi munhu lweyi hi mu rhandzaka kumbe hi kumana ni swikarhatu swin’wani swaswikulu, hi nga ha vilela hi tlhela hi karhateka hintamu. Swi nga yendleka na wena u li ka xiyimu xa ku fana ni lexi u tlhela u titwa na u li wexe. Loko ku li leswo, tiyiseka swaku Yehovha wa swi twisisa leswi u titwisaka xiswona. Phela yena a ngo twa ku vava loku hi ku twaka ntsena, kambe wa hi tiyisa ka mahlomulu ya hina hinkwayu. Se hi nga yendla yini swaku Yehovha a hi tiyisa? Hi fanele hi khongela. Loko hi khongela hi kombela swaku Yehovha a hi pfuna, yena a ta hi nyika ‘ku rhula ka yena loku tlulaka ku twisisa hinkwaku’. (Filp. 4:6, 7) Yehovha a tlhela a hi tiyisa hi ku tirhisa Bibele. Phela Bibele li kombisa leswaku Yehovha wa hi rhandza, li hi djondzisa ku yendla swiboho swaswinene li tlhela li hi nyika ntshembo wa ku tsakisa. Xin’wani lexi xi hi tiyisaka i mintlhanganu. Ka yona hi kuma vamakwerhu lava va hi rhandzaka hi tlhela hi djondzisiwa swilo leswi nga ka Bibele leswi swi hi tiyisaka hintamu.

16. U djondze yini ka leswi nga yendlekela Nathan na Priscilla?

¹⁶ Leswi swi nga yendlekela Nathan na Priscilla, lava va tshamaka aEstados Unidos swi hi pfuna ku vona swaku Yehovha wa hi tiyisa a tlhela a hi pfuna hi ku tirhisa Bibele. Ka malembe lawa ma nga hundza, Nathan na Priscilla va yendle xiboho xa ku ya pfunisa ka ndhawu leyi nga ni vachumayeli vavatsongo. Nathan a li: “Hina a hi tiyiseka hi ku helela swaku Yehovha a ta yi katekisa minzamu ya hina.” Hambileswo, na va ha li ku fika ka ndhawu liyani va kumane ni swikarhatu swa mavabyi va tlhela va pfumala male hileswi a swi va karhatela ku kuma ntirho, se leswo swi yendle swaku va tlhela va ya kaya. Kambe hambileswi va nga tlhela va ya kaya a va ha tama va pfumala male. Loko Nathan a vulavula hi leswi swi nga va humelela a li: “Yehovha a nga hi katekisanga hi ndlela leyi a hi yi lava. Leswo swi ni yendle ni tivutisa swaku hi mhaka muni; ku nga va swaku ku ni nchumu wa ku biha lowu ni nga wu yendla?” Kambe hi ku famba ka nkama, Nathan na Priscilla va swi vonile swaku Yehovha a a nga va tsukulanga. Nathan a tlhele a ku: “Phela ka nkama lowuyani, Bibele a li hi tiyisa swinene hikusa a li hi nyika switsundzuxu li tlhela li hi pfuna swaku hi nga tshameli ku pimisa hi swikarhatu leswi a hi kumana na swona, kambe hi pimisa hi ndlela leyi Yehovha a a hi pfuna hi yona. Se leswo swi hi yendle hi tiyiseka leswaku minkama hinkwayu Yehovha a ta hi pfuna ni ka swikarhatu leswi hi nga ha tshukaka hi kumana na swona ka nkama lowu taka.”

17. Yehovha a mu tiyisise ku yini Helga? (Vona mufoto.)

¹⁷ Vamakwerhu va hina va hi tiyisa. Vona xikombiso xa Helga lweyi a tshamaka Hungria. Ku ringana malembe ya manyingi a kumane ni swikarhatu leswi a swi mu heta ntamu swi tlhela swi mu yendla a titwa na a nga pfuni nchumu. Loko a pimisa hi leswi nga mu yendlekela hi nkama wolowo, a swi vonile swaku Yehovha a a mu tiyisa hi ku tirhisa vamakwerhu. Yena a li: “A ni fanele ni tirha, ni hlayisa n’wana wa mina lweyi a a vabya ni tlhela ni lwisana ni swikarhatu swa ku hambanahambana; kambe loko Yehovha a vona leswaku ni hele ntamu a a ni pfuna. Ka 30 wa malembe lawa ma nga hundza, a ku na siku ni lin’we leli Yehovha a kalaka a nga ni tiyisanga. Minkama ya yinyingi a a ni tiyisa hi ku tirhisa marito ya vamakwerhu lawa a ma tsakisa ma tlhela ma nandzika. Loko ni karhatekile, vamakwerhu a va ni rhumela mamensajem, va ni tsalela makarta va tlhela va ni khensa.”

18. Hi nga va tiyisisa ku yini van’wani?

¹⁸ Ku tiyisa van’wani i nkateko wawukulu ka hina hikusa i ndlela ya ku tekelela Papayi wa hina Yehovha. Kambe hi nga swi yendlisa ku yini leswo? Hi nga tekelela Yehovha hi ku va lehisela mbilu vanhu loko va hi byela swikarhatu swa vona, hi vula swilo leswi nga ta va tiyisa hi tlhela hi va pfuna hi leswi va swi lavaka. (Swiv. 3:27) Minkama hinkwayu hi tikarhatela ku tiyisa vanhu lava va kumanaka ni swikarhatu, ku patsa ni lava va kalaka va nga mu tirheli Yehovha. Hi leswo swi yendlaka swaku loko vavhizinyu va hina va feliwa, va vabya kumbe va karhateka hi famba hi ya va pfuxela kuva hi twa leswi va titwisaka xiswona hi tlhela hi va lerhela tindzimana ta Bibele leti nga va tiyisaka. Phela ku tekelela Yehovha Xikwembu lexi xi tiyisaka vanhu ka swiyimu hinkwaswu, swi tisa minkateko ya yinyingi. Hi xikombiso, swi yendla swaku vamakwerhu va tiyisela swikarhatu leswi va kumanaka na swona, swi tlhela swi khumba timbilu ta lava va kalaka va nga mu tirheli Yehovha, lakaku va navela ku djondza ntiyiso. — Mat. 5:16.

MINKAMA HINKWAYU YEHOVHA A NA HINA

19. Yehovha a hi hlayisisa ku yini, naswona hi nga mu tekelelisa ku yini?

¹⁹ Yehovha wa va hlayisa vanhu va yena funtshi a ni mhaka na vona. A nge te tshuka a hi tshika loko hi kumana ni swikarhatu. Wa hi hlayisa hi ndlela ya ku hlamalisa ku fana ni leswi papayi a mu hlayisisaka xiswona n’wana wa yena. Wa hi kongomisa, a hi nyika leswi hi swi lavaka, a hi vhikela a tlhela a hi tiyisa. Se na hina hi nga tekelela lirhandzu la Papayi wa hina Yehovha hi ku pfuna van’wani hi tlhela hi va tiyisa loko va kumana ni swikarhatu. I ntiyiso swaku ka misava leyi a swikarhatu a hi nge swi baleki, kambe hi nga tiyiseka swaku minkama hinkwayu Yehovha a ta va na hina, hikusa a hi tshembisa leswi: “U nga chavi, hikusa ni na wena.” (Esa. 41:10) Se a hi tiyisekeni swaku Yehovha a nge te tshuka a hi tshika hoxe.