Tiyiseka Swaku Yehovha Wa Ku Rhandza

1. Hi mhaka muni u tinyiketelile ka Yehovha? (Vona mufoto.)

WA KHUMBUKA nkama u nga tinyiketela ka Yehovha? Phela u yendle xiboho lexo hileswi se a wu mu tiva ku yampsa Yehovha u tlhela u mu rhandza. U mu tshembise leswaku a wu ta rhangisa ku rhandza ka yena ka wutomi la wena, funtshi minkama hinkwayu a wu ta mu rhandza hi mbilu ya wena hinkwayu, wutomi la wena, mimpimiso ni matimba ya wena hinkwawu. (Mar. 12:30) Ku sukela kolanu u ye u mu rhandza hintamu Yehovha, se loko munhu o ku vutisa a ku: “Indjhe wa mu rhandza hikakunene Yehovha?” Ha tiyiseka swaku a wu ta hlamula na u nga pimisanga kambirhi u ku: “Ina na mu rhandza Yehovha ku tlula swilo hinkwaswu funtshi na mu rhandza ku tlula munhu mun’wani ni mun’wani!”

2-3. a) Yehovha a lava leswaku hi tiyiseka hi yini? (Yeremiya 31:3) b) Hi ta djondza hi yini ka nhlokomhaka leyi?

² Kambe a wu ta hlamulisa ku yini loko munhu o ku vutisa a ku: “Wa tiyiseka swaku Yehovha wa ku rhandza?” Indjhe a wu ta nyimanyana, hi ku pimisa swaku a swi ku faneli ku rhandziwa hi Yehovha? Makwerhu mun’wani wa xisati lweyi a nga va ni wutomi la ku karhata na a ha li mutsongo a vule leswi: “Mina na mu rhandza Yehovha naswona a ni kanakani hi leswo. Kambe minkama ya yinyingi ni tolovela ku tivutisa ni ku, ‘indjhe Yehovha wa ni rhandza?’” Se wena ke, u nga swi tivisa ku yini swaku Yehovha wa ku rhandza kumbe nada?

³ Yehovha a lava leswaku u tiyiseka hi ku helela leswaku wa ku rhandza. (Lerha Yeremiya 31:3.) Ku vula ntiyiso hi yena a nga ku koka leswaku u va kusuhi na yena. Nkama lowu u nga tinyiketela u tlhela u tsakamisiwa, a ku nyike prezenti la lisima hintamu, ku nga lirhandzu la yena lalikulu. Leswo swi vula leswaku wa ku rhandza swinene funtshi a nge tshuki a ku tshikile. Yehovha a vona vanhu va yena, ku patsa na wena tanihi “tshomba la lisima.” (Mal. 3:17, ntlhamuselo) Yehovha a lava leswaku u titwa ku fana na mupostolo Pawulo lweyi a a tiyiseka leswaku Yehovha wa mu rhandza lakaku a za a tsala a ku: “Hikusa na kholwa swaku hambi lifu kumbe wutomi kumbe tintsumi kumbe mimfumu kumbe swilo leswi nga kona swoswi kumbe swilo leswi taka kumbe matimba kumbe ku tlakuka kumbe ku yenta kumbe yini na yini lexi nga yendliwa, a swi nge swi koti ku hi hambanisa ni lirhandzu leli Xikwembu xi nga na lona hi hina.” (Rom. 8:38, 39) Ka nhlokomhaka leyi, hi ta vona leswaku hi mhaka muni swi li swa lisima kuva hi tiyiseka swaku Yehovha wa hi rhandza ni leswaku hi nga yendla yini swaku hi tama hi swi tshemba leswo.

HI MHAKA MUNI SWI LI SWA LISIMA KU TIYISEKA SWAKU YEHOVHA WA HI RHANDZA

4. Hi nga yendla yini swaku hi lwisana ni mintlhamu ya Sathana?

⁴ Loko hi tiyiseka swaku Yehovha wa hi rhandza, hi ta swi kota ku lwisana ni “mintlhamu” ya Sathana. (Efe. 6:11, ntlhamuselo) Sathana a ta yendla hinkwaswu swaku a zama ku hi tshikisa ku tirhela Yehovha. Ntlhamu wun’wani wawukulu a wu tirhisaka, i ku hi yendla hi pimisa swaku Yehovha a nga hi rhandzi; kambe leswo a hi ntiyiso. Bibele li vula swaku Sathana a fana ni nghonyama. (1 Pe. 5:8, 9) Tinghonyama ti rhandza ku hlasela swiharhi swin’wani loko swi hele ntamu ni loko swi nga koti ku tivhikela. Swi hi ku fana na Sathana, minkama ya yinyingi a hi hlasela loko hi hele ntamu, hi karhalile kumbe hi godolisiwa hi swilo swa ku biha leswi nga hi yendlekela ka nkama lowu nga hundza, swikarhatu leswi hi kumanaka na swona swoswi ni loko hi vilelisiwa hi leswi wutomi la hina li nga ta tshamisa xiswona ka nkama lowu taka. (Swiv. 24:10) Phela Sathana wa tiyiseka swaku a nga hi yendla hi hela ntamu lakakuva hi tshika ku tirhela Yehovha. Kambe loko hi yendla hinkwaswu leswi hi nga swi kotaka swaku hi tama hi tiyiseka swaku Yehovha wa hi rhandza, hi ta swi kota ku “lwisana” na Sathana ni mintlhamu hinkwayu leyi a yi tirhisaka. — Yak. 4:7.

5. Hi mhaka muni swi li swa lisima ku tiva swaku Yehovha wa hi rhandza funtshi hi va lisima ka yena?

⁵ Loko hi tiyiseka leswaku Yehovha wa hi rhandza, wunghanu la hina na yena li ya li tiya. Hi mhaka muni hi vula leswo? Phela Yehovha a hi yendle na hi ni xilaveko xa ku rhandza ni ku rhandziwa hi van’wani. Se loko munhu a hi rhandza na hina hi gama hi mu rhandza. Nkama lowu hi vonaka leswaku Yehovha wa hi rhandza funtshi hi va lisima ka yena, hi ta lava ku mu rhandza hi mbilu hinkwayu. (1 Yo. 4:19) Naswona loko hi ya hi mu rhandza, na yena a ta yendla swa ku fana. Bibele loko yi vulavula hi mhaka leyi yi li: “Tshinelani ka Xikwembu kutani na xona xi ta tshinela ka n’wina.” (Yak. 4:8) Se hi nga yendla yini leswaku hi tiyiseka hi ku helela leswaku Yehovha wa hi rhandza?

LESWI NGA KU PFUNAKA KU TIYISEKA SWAKU YEHOVHA WA KU RHANDZA

6. I yini leswi hi nga swi kombelaka ka xikhongelo kuva hi tiyiseka swaku Yehovha wa hi rhandza?

⁶ Khongela ka Yehovha u kombela swaku a ku pfuna ku twisisa swaku wa ku rhandza. (Luk. 18:1; Rom. 12:12) Kombela swaku Yehovha a ku pfuna ku vona leswi a ku vonisaka xiswona. Swi yendli minkama ya yinyingi hi siku loko swi laveka. I ntiyiso swaku a swi vevuki ku txintxa leswi hi titwisaka xiswona hikusa minkama yin’wani mbilu ya hina yi nga hi yavanyisa. Kambe khumbuka swaku Yehovha i mukulu ku tlula timbilu ta hina. (1 Yo. 3:19, 20) Yehovha a ku tiva ku yampsa ku tlula leswi wena u titivisaka xiswona, funtshi a vona wumunhu lalinene la ku hambi hi wena minkama yin’wani a wu li voni. (1 Sa. 16:7; 2 Tik. 6:30) Se u nga tshiki ku mu ‘chululela’ mbilu ya wena Yehovha u tlhela u mu kombela akuva a ku pfuna ku vona swaku wa ku rhandza. (Ps. 62:8) Kambe loko se u khongelile, hi swini swilo swin’wani swa lisima leswi u faneleke u swi yendla? A hi swi voneni.

7-8. Buku la Tipisalema li swi kombisisa ku yini swaku Yehovha wa hi rhandza?

⁷ Tshemba leswi Yehovha a swi vulaka. Yehovha a kongomise vavanuna lava nga tsala Bibele leswaku va tlhamusela leswi a nga tshamisa xiswona. Hi xikombiso, Davhida a vule leswaku Yehovha a ni mhaka na hina, yena a te: “Yehovha a kusuhi ni lava nga tshoveka timbilu; a ponisa lava nga hetiwa matimba.” (Ps. 34:18) Loko u titwa wexe, u xukuvalile funtshi u pimisa leswaku a ku na munhu lweyi a ku twisisaka, Yehovha a tshembisa leswaku a ta va na wena hikusa wa swi tiva leswi u kumanaka na swona. Davhida a tlhele a vula leswi: “Chela mihloti ya mina ka bolhela la wena.” (Ps. 56:8) Yehovha wa swi vona loko u karhatekile kumbe loko u hlupheka, naswona a ni mhaka ni ndlela leyi u titwaka hi yona. Ku fana ni leswi donakati lin’wani ni lin’wani la mati li nga la lisima ka lweyi a yendzaka amananga, mihloti ya wena i ya lisima ka Yehovha. Tipisalema 139:3, yi li: “[Wena Yehovha] u tiva tindlela ta mina hinkwatu.” Phela Yehovha a vona swilo hinkwaswu leswi u swi yendlaka, kambe a swi nyika lisima swilo swaswinene leswi u swi yendlaka. (Heb. 6:10) Phela swilo hinkwaswu leswi u swi yendlaka leswaku u mu tsakisa i swa lisima hintamu.a

⁸ Tindzimana leti hi nga ti vona ta tiyisa naswona swo fana ni loko Yehovha a ti tirhisa leswaku a ku byela leswi: “Ni lava u swi tiva swaku na ku rhandza funtshi ni ni mhaka na wena.” Kambe hilani se hi nga swi vona hi kona, Sathana a lava hi pimisa swaku Yehovha a nga hi rhandzi. Se loko minkama yin’wani u tshuka u kanakana swaku Yehovha wa ku rhandza, tivutisi leswi: ‘Ni ta kholwa ka mani, ka “papayi wa mavunhwa” kumbe ka “Xikwembu xa ntiyiso”?’ — Yoh. 8:44; Ps. 31:5.

9. I yini leswi Yehovha a swi tshembisaka hinkwavu lava mu rhandzaka? (Eksoda 20:5, 6)

⁹ Pimisa hi leswi Yehovha a va vonisaka xiswona lava va mu rhandzaka. Pimisa hi leswi Yehovha a nga swi byela Moxe ni Vayisrayele. (Lerha Eksoda 20:5, 6.) Ka ndzimana leyi, Yehovha a tshembisa swaku a ta tama a komba vanhu va yena lirhandzu la ku kala li nga heli loko va mu rhandza. Marito lawa ma hi tiyisekisa swaku Yehovha a nge tshiki ku rhandza lava va mu rhandzaka. (Neh. 1:5) Se loko u sungula ku kanakana swaku Yehovha wa ku rhandza pimisa hi leswi: Leswi u mu rhandzaka Yehovha naswona u yendlaka hinkwaswu swaku u mu tsakisa, yena wa ku tiyisekisa leswaku a ta tama a ku rhandza. (Dan. 9:4; 1 Ko. 8:3) Hi marito man’wani, loko u nga kanakani leswaku wa mu rhandza Yehovha, tiyiseka leswaku na yena wa ku rhandza naswona a nga ta tshuka a ku tshika.

10-11. Yehovha a lava leswaku u titwisa ku yini hi nkutsulu? (Vagalatiya 2:20)

¹⁰ Pimisa hi nkutsulu. Nkutsulu wa Yesu Kreste i prezenti la ku hlawuleka leli Yehovha a nga li nyika vanhu. (Yoh. 3:16) Phela Yehovha a rhumele N’wana wa yena leswaku a ta ku fela na wena. Pimisa hi xikombiso xa mupostolo Pawulo. Yena a a yendle swilo swa swinyingi swa ku biha na a nge se va Mukreste, hambi hi nkama lowu a nga djondza ntiyiso a wa ha tama a lwisana ni ku tsana ka yena. (Rom. 7:24, 25; 1 Tm. 1:12-14) Kambe a a vona nkutsulu na ku li prezenti leli Yehovha a nga mu nyika lona yena hi ku kongoma. (Lerha Vagalatiya 2:20.) Khumbuka swaku i Yehovha lweyi a nga yendla swaku Pawulo a tsala hi mhaka leyi naswona swilo swoleswo swi tsaleliwe ku pfuna hina. (Rom. 15:4) Leswi Pawulo a nga swi tsala swi kombisa leswaku Yehovha a lava swaku u vona nkutsulu na ku li prezenti leli a nga ku nyika lona wena hi ku kongoma. Se ku vona nkutsulu hi ndlela leyi, swi ta ku pfuna leswaku u ya u tiyiseka swaku Yehovha wa ku rhandza.

¹¹ Hi mu khensa swinene Yehovha hileswi a nga rhumela Yesu leswaku a ta lani misaveni kuva a ta hi fela. Hambileswo, Yesu a a nga teli ku ta hi fela ntsena kambe a a tela ni ku ta hi djondzisa ntiyiso hi Xikwembu. (Yoh. 18:37) Yin’we ya mintiyiso yoleyo i leswaku Yehovha a va rhandza swinene vana va yena.

LESWI YESU A NGA HI DJONDZISA SWA HI TIYISEKISA SWAKU YEHOVHA WA HI RHANDZA

12. I yini swi hi yendlaka hi tshemba leswi Yesu a nga swi vula hi Yehovha?

¹² Nkama lowu na a li lani misaveni, Yesu a a swi rhandza ku djondzisa van’wani swaku Yehovha i Xikwembu xa ku tshamisa ku yini. (Luk. 10:22) Phela hi nga swi tshemba leswi Yesu a nga swi vula hi Yehovha, hikusa na a nge se ta lani misaveni a hanye malembe ya manyingi na yena atilweni. (Kol. 1:15) Yesu a a tiyiseka swaku Yehovha wa mu rhandza naswona a a yi vonile ndlela leyi Yehovha a nga swi kombisa hi yona swaku wa va rhandza vana va yena va ku tshembeka va lani misaveni ni va le tilweni. Kambe Yesu a hi pfunisa ku yini ku va hi tiyiseka swaku Yehovha wa hi rhandza?

13. Yesu a lava leswaku hi vona Yehovha na a li munhu wa ku tshamisa ku yini?

¹³ Yesu a lava leswaku hi vona Yehovha ku fana ni leswi yena a mu vonisaka xiswona. Ka Tievhangeli, Yesu a vule swaku Yehovha i “Papayi” ku tlula 160 wa makhambi. Nkama Yesu a a vulavula ni vadjondzisiwa va yena a a tolovela ku vula a ku “Papayi wa n’wina” ni swaku “Papayi wa wena.” (Mat. 5:16; 6:26) Na Yesu a nge se ta lani misaveni vanhu va Yehovha a va tolovela ku tirhisa marito ya ku fana ni ‘Wa Matimba Hinkwawu’ ‘Lweyi A Nga Tlakuka’ ni ‘Muvumbi Wamukulu.’ Kambe Yesu a a tolovela ku tirhisa rito leli nge: ‘Papayi.’ Rito leli a li tolovelekile funtshi a li vevuka. Phela Yesu a a lava ku kombisa swaku Yehovha a lava leswaku vanhu va yena va va kusuhi na yena. Swa tikomba swaku Yesu a lava swaku hi vona Yehovha ku fana ni leswi yena a mu vonisaka xiswona, ku nga Papayi lweyi a nga ni wunene lweyi a rhandzaka vana va yena. Swoswi a hi voneni swikombiso swimbirhi swa ndlela leyi Yesu a nga tirhisa rito leli nge “Papayi” loko a vulavula hi Yehovha.

14. Yesu a swi kombisise ku yini swaku mun’wani ni mun’wani wa hina i wa lisima ka Yehovha? (Matewu 10:29-31) (Vona mufoto.)

¹⁴ Xa ku sungula, vona leswi Yesu a nga swi vula ka Matewu 10:29-31. (Lerha.) Ka tindzimana leti, a vulavule hi swinyanyani swaswitsongo leswi kalaka swi nga swi koti ku mu tirhela Yehovha, hambileswo Yehovha a swi nyika lisima lakaku ni xin’we a xi wi hansi na a nga swi vonanga. Leswo swi kombisa swaku Papayi wa hina a hi nyika lisima hintamu hina hi kotaka ku mu tirhela hileswi hi mu rhandzaka. Yesu a tlhele a vula swaku ‘misisi ya tinhloko ta hina yi kontiwile hinkwayu’; phela Papayi wa hina a hi tiva kahle funtshi hi nga tiyiseka swaku a ni mhaka na hina! Hinkwaswu leswo swi kombisa swaku Yesu a lava leswaku mun’wani ni mun’wani wa hina a tiyiseka swaku i wa lisima ka Yehovha Papayi wa hina wa le tilweni.

15. I mpsini swin’wani leswi hi swi djondzaka ka leswi Yesu a nga swi vula hi Papayi wa hina wa le tilweni? (Yohani 6:44)

¹⁵ Xikombiso xa wumbirhi xa ndlela leyi Yesu a nga tirhisa rito leli nge “Papayi” xi kumeka ka Yohani 6:44 (Lerha.) Phela hi lirhandzu, Papayi wa hina Yehovha a ku kokile ka yena hikusa a vone mbilu ya wena a tlhela a vona wumunhu la wena la ku saseka. (Min. 13:48) Swi nga yendleka nkama lowu Yesu a nga vula marito lawa ma nga ka Yohani 6:44 a a pimisa hi marito lawa ma kumekaka ka Yeremiya 31:3, lani Yehovha a nga byela vanhu va yena a ku: “Ni ku koka ka mina hi lirhandzu.” (Vona ni Hosiya 11:4.) Phela marito lawa ma lava ku hi komba leswaku Papayi wa hina wa le tilweni a txuvuka wumunhu la hina lalinene hambiloko hina hi nga li voni.

16. a) Yesu a hi djondzisa yini hi Yehovha naswona hi mhaka muni hi fanele hi swi kholwa? b) Hi nga yendla yini kuva hi tiyiseka swaku Yehovha i Papayi wamunene ku tlula hinkwavu? (Vona kwadru leli nge “Papayi Wamunene Ku Tlula Hinkwavu.”)

¹⁶ Ku va Yesu a vula leswaku Yehovha i Papayi wa hina, a lava ku vula leswaku “Yehovha a ngo va Papayi wa yena ntsena, kambe i Papayi wa wena. Naswona a lava leswaku u tiyiseka swaku Yehovha wa ku rhandza funtshi a ni mhaka na wena.” Se loko minkama yin’wani u pimisa leswaku Yehovha a nga ku rhandzi, khumbuka marito ya Yesu naswona ma kholwi hikusa Yesu hi yena ntsena a mu tivaka ku yampsa Papayi wa hina Yehovha naswona a nga hembi. — 1 Pe. 2:22.

YENDLA HINKWASWU KUVA U TIYISEKA SWAKU YEHOVHA WA KU RHANDZA

17. Hi mhaka muni hi fanele hi yendla hinkwaswu kuva hi tiyiseka swaku Yehovha wa hi rhandza?

¹⁷ Hi fanele hi yendla hinkwaswu leswi hi nga swi kotaka kuva hi tiyisa leswaku Yehovha wa hi rhandza. Hilani hi nga swi vona hi kona ka nhlokomhaka leyi, Sathana a swi lava hintamu ku hi godolisa a tlhela a hi tshikisa ku tirhela Yehovha. Phela minkama hinkwayu a lwa hi matimba leswaku a hi yendla hi pimisa swaku Yehovha a nga hi rhandzi, kambe hina a hi nga ta tshuka hi kholwa ka mavunhwa wolawo! — Yob. 27:5.

18. I mpsini leswi nga ku pfunaka ku tiyiseka swaku Yehovha wa ku rhandza?

¹⁸ Kuva u tama u tshemba leswaku Yehovha wa ku rhandza, khongela ka yena swaku a ku pfuna kuva u tivona ku fana ni leswi yena a ku vonisaka xiswona. Tinyiki nkama wa ku pimisa hi tindzimana ta Bibele leti kombisaka swaku Yehovha wa ku rhandza naswona a ni mhaka na wena. Khumbuka leswaku Yehovha wa va rhandza vanhu lava va mu rhandzaka; u nga khohlwi swaku nkutsulu i prezenti la Yehovha leli a nga ku nyika lona wena hi ku kongoma. Naswona ma tshembi marito ya Yesu ya leswaku Yehovha i Papayi wa wena wa le tilweni. Se loko munhu a ku vutisa a ku: “Indjhe wa tiyiseka swaku Yehovha wa ku rhandza?” A wu nga ta tilumaluma, u ta tekela ku mu hlamula u ku: “Ina na tiyiseka swaku Yehovha wa ni rhandza! Phela siku ni siku ni yendla hinkwaswu leswaku ni mu komba swaku na mina na mu rhandza!”