Ntombhi na yi kombela ka vapsali va yona swaku yi famba yi tlanga ni vanghanu va yona

MAJOVHEM MA VUTISA

Ni Nga Yendla Yini Leswaku Vapsali Va Mina Va Ni Tshemba?

Leswi u faneleke u swi tiva

Loko u tshembeka, vapsali va wena va ta ku tshemba hintamu. Ku yingisa vapsali swi nga fana ni ku hakela xikweneti. Loko u hakela swikweneti swa wena hinkwaswu va nga ha tlhela va ku txeneka male yin’wani. Se a xikweneti hi nga ku i ku yingisa vapsali. Loko u ya u yingisa vapsali va wena, va ta tlhela va ku txeneka “male”, ku nga ku ku nyika a chunseko lowu u wu lavaka. Kambe loko u nga tshembeki swi nga ku hlamalisi loko va ku tsona ku chunseka.

Swi teka nkama swaku vapsali va wena va ku tshemba: Na vapsali va wena va nge se ku nyika chunseko, swi lava u va komba swaku swa ku fanela ku nyikiwa wona hi leswi u swi yendlaka.

LESWI NGA TSHAMA SWI YENDLEKA: Craig a li: “Nkama a ni li jovhem a ni swi tiva leswi vapsali va mina a va lava swaku ni swi yendla. Se, a ni yendla ingi na va yingisa kuve a ni yendla leswi mina a ni swi lava na vona va nga swi tivi. Hi mhaka leyo, swi karhate hintamu swaku vapsali va mina va ni tshemba. Ndzhaku ka nkamanyana ni vone leswaku a ku na ndlela yin’wani, loko ni lava leswaku vanhu va ni nyika chunseko a ni fanelanga ni hemba, ni fanele ni yendla hinkwaswu leswi ni nga swi kotaka leswaku va ni tshemba.”

Leswi u nga swi yendlaka

Vulavula ntiyiso hambiloko ku yendla leswo swi karhata. Phela vanhu hinkwavu va phazama, kambe ku zama ku fihla swihoxo swa wena hi ku hemba kumbe hi ku kala u nga vuli swilo swin’wani a swi nge ku fambeli kahle. Leswo swi nga yendla swaku loko vapsali va wena va swi tsumbula va nga ha ku tshembi. Kambe loko minkama hinkwayu u vulavula ntiyiso, vapsali va wena va ta swi vona swaku u munhu lweyi a nga wupfa lweyi a pfumelaka swihoxo swa yena loko a phazamile. Naswona swi vevuka hintamu ku tshemba munhu wa ku tshamisa xileswo.

Anna a li: “A hi minkama hinkwayu leyi vanhu va nga ta tshikaka ku ku tshemba hileswi u yendlaka swihoxo, kambe va ta tshika ku ku tshemba loko u zama ku fihla swihoxo leswi u nga swi yendla.”

Bibele li li: “Hi navela ku tshembeka ka swilo hinkwaswu.” — Vaheberu 13:18.

Pimisa hi leswi: Loko vapsali va wena va ku vutisa swaku u ya kwini ni leswaku u ta yendla yini, wa va byela ntiyiso? Kumbe loko va ku vutisa swaku a wu li kwini ni leswaku u yendle yini, u zama ku djikadjika kumbe u va byela swilo swaswitsongo, u nga va byeli swilo leswi a va ta tsakela ku swi tiva?

Yendla swiboho swaswinene. Yingisa minawu hinkwayu ya le kaya. Yendla mintirho hinkwayu ya le kaya. U nga xweli ka maprograma lawa u nga ma yendla ni vanhu van’wani. Hamba ma TPC naswona fika hi nkama lowu va nga ku vekela wona akaya.

Ryan a li: “Loko vapsali va wena va ku tshika u famba ni vanghanu va wena, se va ku byela swaku u fanele u va kaya hi 21 wora, u nga pimisi leswaku va ta tlhela va ku tshika u famba u tlanga loko u fika kaya hi ma 22:30.”

Bibele li li: “Mun’wani ni mun’wani a ta rhwala ndzhwalu wa yena.” — Vagalatiya 6:5.

Pimisa hi leswi: U tolovela ku fika hi nkama? Wa yi yendla mintirho hinkwayu ya le kaya? Wa yi yingisa minawu hinkwayu, hambi leyi u kalaka u nga yi rhandzi?

Lehisa mbilu. Loko swi ku u tshame u yendla nchumu lexi xi nga yendla swaku vapsali va wena va nga ha ku tshembi, swi ta teka nkamanyana swaku va tlhela va ku tshemba. Swo lava u nyimanyana.

Rachel a li: “Nkama ni nga kula, ni kwate hintamu hikusa vapsali va mina a va nga ni tshiki ni yendla leswi mina a ni pimisa swaku ni nga swi kota ku swi yendla. A ni nge se swi twisisa swaku ku kula swa hambana ni ku va munhu wa ku wupfa. Ni kombele vapsali va mina swaku va ni nyika nkama leswaku ni va komba swaku va nga ni tshemba. Swi tekenyana nkama kambe swi fambe kahle. Naswona ni djondze leswaku lexi yendlaka leswaku vanhu va ku tshemba a hi malembe ya wena kambe hi leswi u swi yendlaka.”

Bibele li li: “[Kombisani] swaku mi vanhu va ku tshamisa ku yini.” — 2 Vakorinto 13:5.

Pimisa hi leswi: U nga yendla yini leswaku u ‘kombisa’ swaku vapsali va wena va nga ku tshemba, kumbe va tlhela va ku tshemba?

LESWI U NGA SWI YENDLAKA: Hi leswi swin’wani leswi u nga zamaka ku swi yendla: Zama ku fika hi nkama, naswona yendla mintirho hinkwayu leyi u nga nyikiwa yona akaya. Zama ku fika kaya hi nkama lowu u nga vekeliwa wona kumbe mintirho yin’wani leyi u nga yi yendlaka. Byela vapsali va wena hi leswi u lavaka ku swi yendla, naswona va vutisi swaku u nga yendla yini leswaku va ku tshemba. Gama u yendla leswi Bibele li swi vulaka loko li ku: “[Mi fanele mi] hlivila wumunhu la khale leli fambisanaka ni leswi a mi hanyisa xiswona khale.”(Vaefeza 4:22) Hi ku famba ka nkama vapsali va wena va ta swi vona swaku phe u yampsisile.

Leswi majovhem man’wani ma swi vulaka

Phoebe a li: “Loko vapsali va wena va ku tshemba, u nga va ngheni phakidini. Va byeli hinkwaswu leswi yendlekaka ka wutomi la wena u tlhela u va vutisa swaku va yi vona ndjhani minzamu leyi u yi yendlaka. Loko va swi vona leswaku u yendla swiboho swaswinene va ta ya va ku tshemba.”

Kyle a li: “Swi kona leswi u faneleke u swi yendla leswaku vanhu va ku tshemba. Se, loko vapsali va wena va nga ku tshembi hintamu swi lava ku vula swaku swi kona leswi u kalaka u nga swi yendli. Kambe loko va ku tshemba, a va ku tshembi hileswi va lavaka ku ku tsakisa kambe hileswi va tiyisekaka swaku u nga swi kota ku yendla swiboho swaswinene.”

Cortlan a li: “Minkama hinkwayu byela vapsali va wena ntiyiso, va byeli swilo hinkwaswu, u nga va fihleli nchumu. U nga nyimeli leswaku va ku vutisela kambe vhela u va byela hinkwaswu. Phela va ta ku tshemba loko minkama hinkwayu u nga va fihleli nchumu.”

Rachel a li: “Rhanga u swi yendla wena na va nga zanga va ku landzelela. Yendla mintirho leyi va nga ku nyika yona kaya na vapsali va wena va nga zanga va ku kombelile. Funtshi yendla leswi va kalaka va nga ku kombelanga swaku u swi yendla. Fika kaya na wu nge se fika nkama lowu va nga wu veka leswaku u fika hi wona. Phela a ndlela yayinene ya ku va va ku tshemba i ku va komba leswaku phe va nga ku tshemba.”