Nkama Yosiya a a ni 26 wa malembe a sungule ku lunghisa tempele. Se nkama na va yendla mintirho ya ku fambelana ni ku lunghisa tempele, va kume “buku la Nawu wa Yehovha leli nga tsaliwa hi Moxe.” Se nkama hosi yi nga lerheliwa leswi a swi tsaliwe ka buku, yi yo vhela yi yendla hinkwaswu swaku yi yingisa leswi a swi tsaliwile. (2 Tik. 34:14, 19-21) Se ku nga va swaku wena u sungulile ku djondza Bibele siku ni siku? Loko u sungulile, wa swi kota ku li lerha siku ni siku? Ku nga va swaku u tolovela ku tsala tindzimana leti ti nga ku pfunaka? Nkama Yosiya a a ni 39 wa malembe, a yendle xiboho lexi a ku sale kutsongo swaku xi mu yendla a luzekeliwa hi wutomi la yena. A tshike ku kombela Yehovha swaku a mu pfuna, kambe a yendla swilo leswi a swi pimisiwa hi yena. (2 Tik. 35:20-25) Se hina hi nga djondza yini ka pontu leyo? Hi djondza swaku hambiloko se hi ni malembe ya manyingi na hi tirhela Yehovha, hambiloko hi li vakulu, hi fanele hi yendla hinkwaswu leswi hi nga swi kotaka swaku hi tama hi kulisa wunghanu la hina na Yehovha. Se leswaku hi swi kota ku yendla leswo, swi lava hi khongela ka Yehovha hi mu kombela swaku a hi kongomisa ka leswi hi lavaka ku swi yendla, swi lava swaku hi djondza Bibele hi tlhela hi va yingisela kahle vamakwerhu va ku wupfa loko va hi pfuna. Loko hi yendla swilo hinkwaswu leswi, a hi nga ta yendla swihoxo swa swinyingi, funtshi hi ta tsaka hintamu. — Yak. 1:25. Murindzi 09/23 mapaj. 12-13 mapar. 15-16

A Bibele li vulavula hi vavasati va vanyingi lava a va rhandza Yehovha va tlhela va mu tirhela. Naswona vavasati lava, a “va pimela ka minchumu hinkwayu” va tlhela “va tshembeka ka swilo hinkwaswu.” (1 Tm. 3:11) Kambe a hi vona ntsena, ninamuntlha amabandleni ku ni vavasati va vanyingi va ku wupfa lava tintombhi ti nga va tekelelaka. Wena ntombhi, u swi vonisa ku yini ku va u lavetela makwerhu wa xisati lweyi a nga ni wunghanu lalinene na Yehovha leswaku u djondza ka yena? Loko se u mu kumile, zama ku tiva wumunhu lalinene leli a nga na lona. Se loko u li tiva wumunhu lolelo zama ku li tekelela. Vakreste hinkwavu va fanele va tiveka hansi. Loko wansati a tiveka hansi, a ta va ni wunghanu la ku tiya na Yehovha naswona a ta va ni wunghanu lalinene ni vanhu van’wani. Hi xikombiso, loko wansati a rhandza Yehovha a tlhela a tiveka hansi, a ta hlonipha nawu wa leswaku a yingisa lava Xikwembu xi nga va langa leswaku va rhangela. (1 Ko. 11:3) Nawu wolowo wu tlhamusela swaku Yehovha a lange vanhu swaku va hlayisa mabandla va tlhela va hlayisa ndjangu. Murindzi 12/23 mapaj. 18-19 mapar. 3-5

Yehovha a lava leswaku vavanuna lava va nga chada va rhandza vasati va vona, va va hlayisa, va va twisisa va tlhela va va pfuna swaku va va ni wunghanu lalinene na Yehovha. Ku kota ku pimisa kahle, ku hlonipha vavasati, ku va munhu wa ku tshembeka, swi ta ku pfuna leswaku u va wanuna wa kahle ka nsati wa wena. Loko se u chadile u nga ha swi lava ku va papayi. I swinyingi leswi u nga swi djondzaka ka Yehovha hi ku va papayi wamunene. (Efe. 6:4) Yehovha a a nga dani ku byela N’wana wa yena Yesu Kreste swaku a a mu rhandza a tlhela a mu yamukela. (Mat. 3:17) Se, loko u ta va papayi khumbuka ku va minkama hinkwayu u tiyisekisa n’wana wa wena swaku wa mu rhandza. Naswona loko n’wana wa wena a yendla swilo kahle, mu khensi hi leswi a nga swi yendla. Ku tekelela xikombiso xa Yehovha swi ta ku pfuna leswaku u va papayi wa kahle u tlhela u pfuna vana va wena swaku va va Vakreste va ku wupfa. U nga ha tilunghiselela ka ha li swoswi swaku u va papayi wa kahle hi ku va u va khoma kahle va ndjangu wa wena, vamakwerhu abandleni ni ku va byela swaku wa va rhandza ni leswaku wa tibuma hi vona. — Yoh. 15:9. Murindzi 12/23 paj. 29 mapar. 17-18