Sexta-feira, 31 ka Outubro
Papayi wa mi rhandza hikusa na n’wina mi ni rhandzile mi tlhela mi kholwa swaku ni tile na ni rhumiwe hi yena. — Yoh. 16:27.
Yehovha a swi rhandza hintamu ku byela vanhu lava va mu tirhelaka swaku wa wu yamukela ntirho wa vona. Bibele li kombisa makhambi mambirhi lani Yehovha a nga byela Yesu hi rito la ku twala swaku a a mu rhandza funtshi a a mu tsakela. (Mat. 3:17; 17:5) Se wena ke, wa swi navela ku mu twa Yehovha na a ku byela swaku wa ku tsakela? Yehovha a hi byela swaku wa hi tsakela hi ku tirhisa Bibele. Se hi nga mu twa Yehovha na a hi byela swaku wa hi tsakela loko hi tinyika nkama wa ku lerha a mabuku lawa ma vulavulaka hi wutomi la Yesu nkama na a li lani misaveni. Phela Yesu a a tekelela wumunhu la Papayi wa yena hi ku helela. Loko hi lerha Bibele hi ta vona swaku Yesu a a va byela vadjondzisiwa va yena leswaku a a va tsakela hambileswi minkama yin’wani a va phazama. Leswo swi hi pfuna ku twisisa ndlela leyi Yehovha a titwaka hi yona hi hina namuntlha swi tlhela swi hi tiyisekisa swaku wa wu yamukela ntirho wa hina. (Yoh. 15:9, 15) Kambe ku va hi kumana ni swikarhatu kumbe mindzingo a swi lavi ku vula swaku yena a nga hi yamukeli, kambe swikarhatu leswi hi kumanaka na swona swi yendla leswaku hi kombisa leswaku ha mu rhandza ni ku va hi yengetela lirhandzu leli hi nga na lona hi Yehovha ni ku va hi mu tshemba. — Yak. 1:12. Murindzi 03/24 paj. 28 mapar. 10-11
Sábado, 1 ka Novembro
U yendle swaku vana ni swibebetani swi ku dzunisa. — Mat. 21:16.
Loko u li ni vana, va pfuni swaku va lunghiselela tinhlamulu leti fambisanaka ni ntanga ya vona. Minkama yin’wani ku nga ha va ni tinhlokomhaka leti vana swi nga ha va karhatelaka swaku va hlamula, ta ku fana ni muchadu kumbe mahanyelo yamanene. Kambe swi nga yendleka ku ni maparagrafu yamatsongo lawa vana va nga ha hlamulaka, se vapsali va nga va pfuna swaku va hlamula ka maparagrafu wolawo. Handle ka leswo, vapsali va nga pfuna vana va vona swaku va swi tiva swaku a hi minkama hinkwayu va nga ta kombetiwa swaku va hlamula mintlhanganwini. Loko va yendla leswo, a vana a va nga ta kwata hintamu loko makwerhu lweyi a fambisaka xiyenge a nga va kombeti swaku va hlamula. (1 Tm. 6:18) Hinkwerhu hi nga swi kota ku nyikela tinhlamulu leti dzunisaka Yehovha ti tlhela ti tiyisa vamakwerhu. (Swiv. 25:11) Minkama yin’wani nkama hi nyikelaka nhlamulu hi nga ha patsa ni xiperiyensiya kambe hi fanele hi tivonela swaku hi nga vulavuli hintamu hi hina vinyi. (Swiv. 27:2; 2 Ko. 10:18) Nkama hi nyikelaka tinhlamulu, tinhlamulu ta hina ti fanele ti vulavula hintamu hi Yehovha, hi Rito la yena ku nga Bibele ni vanhu va yena. — Nhl. 4:11. Murindzi 04/23 mapaj. 24-25 mapar. 17-18
Domingo, 2 ka Novembro
Hi nga yetleleni ku fana ni lavan’wani hinkwavu va yetlelaka, kambe a hi tshameni na hi pfule matihlo, hi tirhisa mimpimiso ya hina. — 1 Tes. 5:6.
A lirhandzu i la lisima swinene swaku hi tshama na hi rindzile hi tlhela hi pfula ni matihlo. (Mat. 22:37-39) Ku rhandza Yehovha swi nga hi pfuna ku tiyisela loko hi chumayela hambiloko swoleswo swi yendla swaku hi kumana ni swikarhatu. (2 Tm. 1:7, 8) Hi nga tlhela hi kombisa swaku ha va rhandza lava kalaka va nga mu tirheli Yehovha hi ku tama hi va chumayela makaya ka vona, hi ku tirhisa telefoni kumbe makarta. Ha tshemba swaku siku lin’wani va nga ha txintxa va tlhela va yendla swaswinene. (Eze. 18:27, 28) Vanhu van’wani lava hi faneleke hi va rhandza i vamakwerhu va hina, naswona hi nga yendla leswo hi ku va ‘tiyisa ni ku va yaka’. (1 Tes. 5:11) Ku fana ni masonchwa lawa ma lwaka xikan’we anyimpini, na hina swi lava hi tiyisana. A hi swi lavi ku vavisa vamakwerhu va hina hi maxivomu kumbe ku tlhelisa wubihi hi wubihi. (1 Tes. 5:13, 15) Hi nga tlhela hi kombisa lirhandzu hi ku hlonipha vamakwerhu lava rhangelaka bandleni. — 1 Tes. 5:12. Murindzi 06/23 paj. 10 par. 6; paj. 11 mapar. 10-11