U nga wu tiyisisa ku yini ntshembo wa wena? Loko u ni ntshembo wa ku hanya lani misaveni, lerha tindzimana ta Bibele leti vulavulaka hi Paradesi u tlhela u pimisa hi tona. (Esa. 25:8; 32:16-18) Pimisa hi leswi wutomi li nga ta tshamisa xiswona ka misava ya nyuwani naswona tipimisi na u li kohala. Loko hi tinyika nkama wa ku pimisa hi leswi wutomi li nga ta tshamisa xiswona ka nkama lowu taka, hi ta swi kota ku tiyisela swikarhatu swa hina, funtshi swi ta tikomba na swi li swa ‘nkamanyana naswona swi nga tiki hintamu’. (2 Ko. 4:17) Ntshembo lowu Yehovha a hi nyikaka wona wu ta hi tiyisa. Yena a hi nyike hinkwaswu leswi hi swi lavaka leswaku hi va ni matimba. Hi mhaka leyo, loko u nyikiwa ntirho lowu wu tikombaka na wu karhata, loko u kumana ni xikarhatu kumbe loko u vona swaku wa heleliwa hi ku tsaka, pfula mbilu ya wena hi xikhongelo u mu byela Yehovha leswi u titwisaka xiswona naswona hamba djondzo ya wena ya Bibele leswaku u ta tiyisiwa. Pfumela loko vamakwerhu va lava ku ku pfuna kumbe va ku tiyisa naswona tinyiki nkama wa ku pimisa hi leswi wutomi li nga ta tshamisa xiswona ka misava ya nyuwani. Loko u yendla leswo, hilani Vakolosa 1:11 yi vulaka hi kona ‘u ta va ni matimba yamakulu, naswona u ta kota ku tiyisela hi ku helela, u nga heli mbilu funtshi na u tsakile.’ Murindzi 10/23 paj. 17 mapar. 19-20

Hi ni swivangelo swinyingi swa ku khensa Yehovha ka swikhongelo swa hina. Hi nga khensa Yehovha hi swilo hinkwaswu leswi hi nga na swona hikusa swilo hinkwaswu swaswinene leswi hi nga na swona swi ta hi ka yena. (Yak. 1:17) Hi xikombiso, hi nga ha khensa hi swilo hinkwaswu swa ku saseka leswi Yehovha a nga hi yendlela swona. Hi nga ha mu byela swaku hi khensa wutomi, hi khensa ndjangu, vanghanu ni ntshembo lowu a nga hi nyika wona wa nkama lowu taka. Na hi nga khohlwi ku khensa lunghelo leli a nga hi nyika lona la ku va vanghanu va yena. Swi nga yendleka swi lava minzamu yayikulu swaku hi kota ku pimisa hi swilo leswi hi yendlaka hi khensa Yehovha, hikusa vanhu va ku tala namuntlha a va ha swi koti ku khensa. Va heta nkama wa wunyingi na va zametela ku kuma swilo leswi va swi lavaka, kambe a va tinyiki nkama wa ku nyima va khensa hi leswi se va nga na swona. Se loko na hina ho sungula ku ngheniwa hi moya wolowo, hi nga ha tikuma se swikhongelo swa hina swi yo tala hi lixta la swikombelo ntsena. Hi mhaka leyo, i swa lisima kuva hi nyima hi pimisa hi swilo hinkwaswu leswi Yehovha a nga hi yendlela swona hi tlhela hi mu khensa nkama hi khongelaka. — Luk. 6:45. Murindzi 05/23 paj. 4 mapar. 8-9

Leswi a hi rhandzaka, Yehovha a nga swi lavi ku hi vona na hi hlupheka. (Esa. 63:9) Hambileswo, wa swi pfumelela kuva hi kumana ni swikarhatu, leswi Bibele yi swi fanisaka ni minambu ni ndzilu, hileswi swi karhatisaka xiswona. (Esa. 43:2) Kambe, a hi tshembisa swaku hi nga swi kota ku swi hlula. Phela hambiloko ho kumana ni swikarhatu swaswikulu hintamu, Yehovha minkama hinkwayu a ta hi pfuna kuva hi tiyisela swikarhatu swoleswo hi tlhela hi tama hi va vanghanu va yena. A tlhela a tirhisa moya wa yena wa ku kwetsima leswaku a hi pfuna ku tiyisela swikarhatu swoleswo. (Luk. 11:13; Filp. 4:13) Phela hi nga tiyiseka swaku minkama hinkwayu Yehovha a ta hi nyika leswi hi swi lavaka leswaku hi tama hi tiyisela hi tlhela hi tshembeka ka yena. Yehovha a lava swaku hi mu tshemba. (Heb. 11:6) Minkama yin’wani swikarhatu swa hina swi nga ha hi peza hintamu lakakuva hi nga ha gwenti. Phela hi nga ha sungula ku pimisa swaku Yehovha a nga hi pfuni. Kambe Bibele la hi tiyisekisa swaku hi ntamu wa Xikwembu hi nga swi kota ku khwela “ka muru wawukulu.” (Ps. 18:29) Se, ku hambana ni ku kanakana swaku Yehovha wa hi pfuna, hi fanele hi khongela na hi ni lipfumelo lalikulu hi tlhela hi tshemba swaku Yehovha a ta swi hlamula swikhongelo swa hina. — Yak. 1:6, 7. Murindzi 11/23 paj. 22 mapar. 8-9