Yoxuwa

17 Se a lixaka la Manasi+ li yaveliwa tiko hi ku tirhisa swiribyani*+ hikusa Manasi a a li matevula ya Yosefa.+ Leswi Makiri+ lweyi a a li matevula ya Manasi a tlhela a va papayi wa Jiliyadi a a li sonchwa la matimba, a nyikiwe doropa la Jiliyadi ni la Baxani.+ 2 Vana lavan’wani va Manasi va yaveliwe tiko hi ku tirhisa swiribyani hi ku ya hi mindjangu ya vona, ku nga vana va Abiyezeri,+ vana va Eleki, vana va Asiriyeli, vana va Xikemi, vana va Eferi ni vana va Xemida. Lava a ku li vana va madjaha va Manasi n’wana wa Yosefa, hi ku ya hi mindjangu ya vona.+ 3 Kutani Zelofeyadi+ n’wana wa Eferi, n’wana wa Jiliyadi, n’wana wa Makiri, n’wana wa Manasi, a a nga na vana va madjaha, a wo va ni vana va tintombhi ntsena, mavito ya vona hi lawa: Mala, Nowa, Ogla, Milka na Tiraza. 4 Se va yela muprista Eliyazari,+ Yoxuwa n’wana wa Nuni ni varhangeli va fika va ku: “Yehovha hi yena a nga byela Moxe swaku a hi nyika tshomba ku fana ni leswi a nga nyika maxaka ya hina.”+ Se va nyikiwa tshomba ku fana ni maxaka ya vona, hi ku ya hi leswi Yehovha a a swi hlayile.+

5 Manasi a a nyikiwe tiko la Jiliyadi ni la Baxani hi ku tirhisa swiribyani, a tlhela a nyikiwa 10 wa tindhawu leti a ti li ka tlhelo* lelin’wanyani la Yordani,+ 6 hikusa tintombhi ni madjaha ya lixaka la Manasi ma nyikiwe tshomba, se a tiko la Jiliyadi li nyikiwe hafu leyin’wani ya lixaka la Manasi.

7 A ndhawu ya Manasi a yi sukela aAseri anze Mikimetati,+ akusuhi ni Xikemi+ yi famba anze sul* ka tiko leli a ku tshama vanhu va Eni-Tapuwa. 8 Tiko la Tapuwa+ a li lumba Manasi kambe a doropa la Tapuwa leli a li li lani tiko la Manasi a li gamela kona a li lumba vana va Efrayimi. 9 Se a ndhawu ya Manasi a yi ngirimela yi ya fika ka Nkova wa Kana, hi tlhelo la sul. A ku ni madoropa ya Efrayimi a ndzeni ka madoropa ya Manasi,+ naswona ndhawu ya Manasi a yi famba hi tlhelo la norte* ka nkova yi ya gamela alwandle.+ 10 Tlhelo la sul a li lumba Efrayimi, a la norte a li lumba Manasi. Naswona tiko la Manasi a li gamela lwandle,+ se hi le norte a li famba li ya fika aAseri, kasi ka tlhelo la le wuxeni a li famba li ya fika aIsakara.

11 Ka tiko la Isakara ni Aseri, Manasi a nyikiwe Beti-Xoni ni madoropa lawa ma nga kusuhi, Ibileyami+ ni madoropa lawa ma nga kusuhi, tiko la Dori+ ni madoropa lawa ma nga kusuhi ni lava tshamaka ka wona, tiko la Eni-Dori+ ni madoropa lawa ma nga kusuhi ni lava tshamaka ka wona, tiko la Tanaki+ ni madoropa lawa ma nga kusuhi ni lava tshamaka ka wona, tiko la Mejido ni madoropa lawa ma nga kusuhi ni lava tshamaka ka wona, naswona ka tindhawu leti, tinharhu a ti kumekela henhla.

12 Kambe vana va Manasi va tsandzekile ku teka madoropa lawa; se Vakanana va tame va tshama hi nkanu ka tiko leli.+ 13 Nkama Vayisrayele va nga va ni matimba, va yendle swaku Vakanana va va swikarawa,+ kambe a va va hlongolanga hinkwavu.+

14 Se vatukulu va Yosefa va vutisa Yoxuwa va ku: “Hi mhaka muni u hi nyike*+ tiko lalitsongo? Phela hi vanyingi hintamu hikusa ku ta fika ni swoswi Yehovha wa hi katekisa.”+ 15 Yoxuwa a va hlamula a ku: “Loko mi li vanyingi hintamu, naswona ndhawu ya tintshava ya Vaefrayimi+ yi li yitsongo hintamu ka n’wina, fambani akhwatini mi ya titsemela ndhawu ka tiko la Vaperezi+ ni Varefayimi.”+ 16 Se vatukulu va Yosefa va ku: “Ndhawu ya tintshava i yitsongo, naswona Vakanana hinkwavu lava tshamaka ka tiko leli nga ka nkova ni vanhu lava tshamaka Beti-Xoni+ ni ka swidoropani swa le kusuhi ni lava tshamaka ka Nkova wa Yezreyeli+ va ni tinyolo* ta nyimpi+ leti nga ni minchumu ya nsimbi* ya ku tsemana.” 17 Se Yoxuwa a byela va lixaka la Yosefa ku nga va ka Efrayimi ni va ka Manasi a ku: “Mi vanyingi hintamu naswona mi ni matimba swinene. A mi nga ta nyikiwa ndhawu yayitsongo,*+ 18 hambi hi ndhawu ya tintshava yi ta va ya n’wina.+ Leswi ndhawu liyani yi nga khwati, mi ta yi basisa naswona hi lani tiko la n’wina li nga ta gamela kona. Hikusa mi ta hlongola Vakanana, hambileswi va nga ni matimba naswona va nga ni tinyolo ta nyimpi leti nga ni minchumu ya nsimbi ya ku tsemana.”*+