Samuwele Wa Ku Sungula
28 Ka masiku wolawo, Vafilista va hlengeleta masonchwa ya vona swaku va ya lwa ni Vayisrayele.+ Se Akixi a byela Davhida a ku: “Na tshemba swaku wena ni vanhu va wena mi ta famba na mina anyimpini.”+ 2 Davhida a hlamula Akixi a ku: “U swi tiva kahle leswi mina ni nga ta swi yendla.” Akixi a ku: “Hi leswo swi nga ni yendla swaku ni ku langa swaku u ta va gwardu wa mina masiku hinkwawu.”*+
3 Samuwele se a a file ni tiko hinkwalu la Israyele li mu rilile li tlhela li mu lahla aRama, ka doropa leli a a tshama ka lona.+ Naswona Sawulo a a hlongole tinyanga ni lava nga ni swikwembu ka tiko hinkwalu.+
4 Vafilista va hlengeletanile kutani va ya gwimba matende aXunemi.+ Sawulo a gama a hlengeleta masonchwa hinkwawu ya Israyele, va ya gwimba matende aJilbowa.+ 5 Nkama Sawulo a nga vona matende ya Vafilista, a sungula ku chava, a tlhela a rhurhumela hintamu.+ 6 Hambiloko Sawulo a vutisa Yehovha+ swaku a ta yendla yini, Yehovha a a nga mu hlamuli, hambi hi ku tirhisa milorho kumbe hi Urimi*+ kumbe hi vaprofeta. 7 Sawulo a byela vatirhi va yena a ku: “Ni laveleni wansati lweyi a nga nyanga+ swaku a ta ni hlahluvela.” Vatirhi va yena va ku: “Ku ni wansati lweyi a nga nyanga aEni-Dori.”+
8 Kutani Sawulo a yambala mpahla yin’wani swaku va nga mu tivi, a ya ka wansati yelweyo niwusiku na a ni vavanuna vambirhi. A fika a mu byela a ku: “Ni kombela u hlahluva+ u vitana lweyi ni nga ta ku byela yena.” 9 Se wansati lweyi a mu hlamula a ku: “Wena wa swi tiva leswi Sawulo a nga swi yendla, ni leswi a nga ti hlongolisa swona tinyanga ni lava nga ni swikwembu ka tiko leli.+ Se hi mhaka muni u lava ku ni phasa swaku ni ta dlayiwa?”+ 10 Kutani Sawulo a funga hi vito la Yehovha a ku: “Na funga hi vito la Yehovha Xikwembu lexi hanyaka swaku a wu nga ta kuma nandzu ka mhaka leyi!” 11 Se wansati lweyi a ku: “U lava ni ku humesela mani?” A mu hlamula a ku: “Ni humeseli Samuwele.” 12 A nkama lweyi wansati a nga vona “Samuwele,”*+ a vulavula hi rito lalikulu a ku: “Hi mhaka muni u ni kanganyisile? Kasi hi wena Sawulo!” 13 Hosi yi mu hlamula yi ku: “U nga chavi, kambe ni byeli swaku u vona yini?” Wansati lweyi a hlamula Sawulo a ku: “Ni vona munhu wa ku fana ni xikwembu na a huma ka misava.” 14 Sawulo a gama a mu vutisa a ku: “A tshamise ku yini?” Wansati lweyi a ku: “I munhu wa ku guga, a nga yambala nkhantxu wa ku pfumala mavoko.”+ Se Sawulo a swi vona swaku a ku li “Samuwele,” a gama a khizama a khumba hansi hi ximombo.
15 Kutani “Samuwele” a byela Sawulo a ku: “Hi mhaka muni u ni karhata hi ku yendla swaku ni vitaniwa?” Sawulo a mu hlamula a ku: “Ni le ka swikarhatu swaswikulu. Vafilista va lwa na mina naswona Xikwembu xi ni tshikile, a xa ha ni hlamuli, hambi hi ku tirhisa vaprofeta kumbe milorho;+ hi leswo swi nga ni yendla ni ku vitana swaku u ta ni byela leswi ni faneleke ni swi yendla.”+
16 “Samuwele” a ku: “Hi mhaka muni u ni vutisa swoswi leswi se Yehovha a nga ku tshika+ naswona a nga nala wa wena? 17 Yehovha a ta yendla leswi a nga swi hlaya hi ku tirhisa mina: Yehovha a ta ku tekela mfumu a nyika munhu mun’wanyani ku nga Davhida.+ 18 Namuntlha Yehovha a ku yendla leswi, hi mhaka ya leswi u kalaka u nga mu yingisanga ni leswi u kalaka u nga va dlayanga Vaamaleki,+ lava nga kwatisa Yehovha. 19 Yehovha a ta ku nyikela wena ni Vayisrayele ka mavoko ya Vafilista.+ Kutani mundzuku wena+ ni vana va wena+ mi ta va mi file ku fana na mina. Yehovha a ta tlhela a nyikela masonchwa ya Israyele ka mavoko ya Vafilista.”+
20 Se Sawulo a wa hansi, a sungula ku chava hintamu hi mhaka ya leswi “Samuwele” a nga mu byela swona. A a nga na ntamu hikusa a a nga dlanga nchumu siku hinkwalu ni wusiku la kona. 21 A nkama wansati a nga ta ka Sawulo, kutani a vona swaku a a karhatekile hintamu, a mu byela a ku: “Mina mutirhi wa wena ni yendle leswi u nga ni byela, naswona ni veke wutomi la mina anghozini+ ni yendla leswi u nga ni kombela. 22 Swoswi na kombela swaku u ni yingisa. Ni tshiki ni ku nyika swakudla u dla swaku u ta kuma ntamu wa ku muka.” 23 Kambe a yala, a ku: “A ni nga ta dla.” Se vatirhi va yena ni lweyi wansati va mu sindzisa. Hi wugamu a pfumela, a pfuka a tshama ka mubedu. 24 Wansati lweyi a a ni xihon’wani xa ku nona kaya ka yena, kutani a xi dlaya hi ku kahlula, a gama a teka trigu a hamba pawu la ku kala li nga na fermentu. 25 A gama a nyika Sawulo ni vatirhi va yena swaku va dla. Loko va gamile va suka va famba hi wusiku lolelo.+