Esaya
21 Ku yavanyisiwa ka mananga lama fanaka ni lwandle:*+
2 Ni kombiwe minchumu ya ku chavisa hi ndlela ya singita:*
Lava va xengaka va tama va xenga,
Kasi lava wonhaka na vona va tama va wonha.
Hlasela, wena Elamu! Rhendzela, wena Meda!+
Ni ta helisa swikarhatu hinkwaswu leswi a nga swi vanga.+
3 Hi leswo swi ni yendlaka ni hela ntamu.+
Ni twa ku vava,
Ku fana ni wansati lweyi a psalaka.*
Ni karhatekile lakuva a na ha swi koti ni ku twa;
Swa ni karhatela ku vona.
4 Ni hele matimba; na rhurhumela hi ku chava.
Ku pela ka dlambu loku a ni ku navela ka ni chavisa.
5 Lunghisani meza mi veka ni switshamu!
Dlanani mi tlhela mi nwa!+
Tilunghiseni n’wina varhangeli, chelani mafurha ka xivhikelo!
6 Hikusa Yehovha a ni byele leswi:
“Famba u ya veka gwardu u mu byela a hlaya leswi a swi vonaka.”
7 A vone nyolo* ya nyimpi na yi li ni makavhalu mambirhi,
Nyolo ya nyimpi na yi ni timbongolo,
Nyolo ya nyimpi na yi ni makamela.
Se a swi txuvukisisa kahle.
8 Kutani a huwelela ku fana ni nghonyama a ku:
“Yehovha Xikwembu xa mina, ni nyime henhla ka prediyu* la ku vonelela ka lona ninhlikanhi,
A ni sukanga lani ni nga vekiwa kona wusiku lin’wani ni lin’wani.+
9 Vona lexi taka:
Ku ta nyolo ya nyimpi leyi kokiwaka hi makhavalu na yi ni vavanuna!”+
Se a huwelela a ku:
“A wile! Babilona a wile!+
Swifaniso swa swikwembu swa yena leswi nga yendliwa hi nsimbi a swi pfotloselile!”+
10 N’wina vanhu va mina lava nga huliwa ku fana ni trigu,
N’wina mi taka hi ka ndhawu ya ku hulela ka yona,+
Ni mi byelile leswi ni nga swi twa ka Yehovha murhangeli wa tintsumi, Xikwembu xa Israyele.
11 Ku yavanyisiwa ka Duma:*
Ku ni lweyi a ni huwelelaka na a li Seyiri+ a vulavula na mina a ku:
“Gwardu, kasi li ta xa nkama muni?
Gwardu, kasi li ta xa nkama muni?”
12 Se gwardu a ku:
“Li ta xa kambe li ta tlhela li pela.
A ku vutisa a swi bihanga.
U nga tlhela u vutisa!”
13 Ku yavanyisiwa ka ndhawu leyi nga mananga:
N’wina vanhu va Dedani,+
Mi ta yetlela ka khwati ka ndhawu leyi nga mananga.
14 Tlhangavetani lweyi a twaka torha mi mu nyika mati
N’wina lava tshamaka aTema,+
Nyikani pawu lweyi a balekaka.
15 Hikusa va baleke swipada, swipada leswi nga tlomuliwa,
Va baleke ligubu leli lavaka ku txopa, ni nyimpi leyi kalaka yi nga tiyiseleki.
16 Yehovha a ni byele a ku: “Ndzeni ka lembe, ku fana ni malembe ya mutirhi lweyi a nga tholiwa, ndhuma ya Kedari+ yi ta va na yi helile. 17 Masonchwa ya ntamu lawa ma khomaka ligubu ma ta sala na ma li matsongo aKedari, hikusa Yehovha Xikwembu xa Israyele a hlayile.”