Yeremiya
29 Lawa i marito ya karta* leli muprofeta Yeremiya a nga li rhumela na a li Yerusalema swaku li ya ka madoda hinkwawu lama nga xikarhi ka vanhu lava nga wukaraweni, vaprista, vaprofeta ni vanhu hinkwavu lava Nebukadinazara a nga va teka Yerusalema a va yisa awukaraweni aBabilona, 2 Yeremiya a rhumele karta lelo loko Hosi Yekoniya,+ mamani wa hosi,+ vatirhi va le ka yindlo ya wuhosi, varhangeli va le Yuda ni va le Yerusalema, lava tivaka ku yendla ntirho wa mavoko ni lava kotaka ku yendla swilo hi nsimbi na se va humile aYerusalema.+ 3 Karta leli li fambe na Elaza n’wana wa Xafani+ na Gemariya n’wana wa Hilikiya, lweyi Zedekiya+ hosi ya le Yuda a nga mu rhuma Babilona ka Nebukadinazara hosi ya le Babilona. Karta la kona a li ku:
4 “Yehovha murhangeli wa tintsumi, Xikwembu xa Israyele, a byela vanhu hinkwavu lava nga wukaraweni, lava a nga va susa aYerusalema a va yisa awukaraweni aBabilona a ku: 5 ‘Yakani tiyindlo mi tshama ka tona. Byalani minsinya leyi psalaka mihandzu mi dla mihandzu ya yona. 6 Tekani vavasati mi psala* vana va madjaha ni va tintombhi; tekelani vana va n’wina va madjaha vavasati mi chadisa vana va n’wina va tintombhi, swaku na vona va ta va ni vana va madjaha ni va tintombhi. Mi tala kolanu mi nga pumbeki. 7 Li laveleni ku rhula doropa leli ni nga mi yisa wukaraweni ka lona, mi li khongelela ka Yehovha, hikusa loko li va ni ku rhula na n’wina mi ta va ni ku rhula.+ 8 Hikusa Yehovha murhangeli wa tintsumi, Xikwembu xa Israyele a li: “Mi nga pfumeli ku kanganyisiwa hi vaprofeta va n’wina ni vanhu va n’wina lava hlahluvaka lava nga xikarhi ka n’wina+ funtshi mi nga yingiseli milorho ya vona leyi va yi lorhaka. 9 Hikusa ‘va mi profetela mavunhwa hi vito la mina. A va rhumiwanga hi mina,’+ ku vula Yehovha.”’”
10 “Hikusa Yehovha a li: ‘Loko ku ta hela 70 wa malembe na mi li Babilona ni ta ta ni ta mi pfuna+ naswona ni ta yendla leswi ni nga mi tshembisa swona hi ku mi tlhelisela ka ndhawu leyi.’+
11 “‘Hikusa ni swi tiva kahle leswi ni swi pimisaka hi n’wina,’ ku vula Yehovha, ‘ni lava swaku mi va ni ku rhula ku nga li khombo,+ swaku swi mi fambela kahle ka nkama lowu taka ni tlhela ni mi nyika ni ntshembo.+ 12 Mi ta ni vitana, mi ta mi tlhela mi khongela ka mina naswona ni ta mi yingisa.’+
13 “‘Mi ta ni lava mi ni kuma,+ hikusa mi ta ni lavetela hi mbilu ya n’wina hinkwayu.+ 14 Kutani ni ta yendla swaku mi ni kuma,’+ ku vula Yehovha. ‘Ni ta mi vuyisa hi wukaraweni, ni mi hlengeleta mi huma ka matiko hinkwawu ni ka tindhawu hinkwatu leti ni nga mi hangalasela ka tona,’+ ku vula Yehovha. ‘Ni ta mi tlhelisela ka ndhawu leyi a mi li ka yona nkama ni nga mi yisa awukaraweni.’+
15 “Kambe mi te: ‘Yehovha a hi vekele vaprofeta aBabilona.’
16 “Se Yehovha a byele hosi leyi nga tshama ka xitshamu xa wuhosi xa Davhida+ ni vanhu hinkwavu lava tshamaka ka doropa leli, vamakwenu va n’wina lava kalaka va nga fambanga na n’wina awukaraweni, a ku: 17 ‘Mina Yehovha murhangeli wa tintsumi ni li: “Ni va rhumela xipada, ndlala ni ntungu,*+ funtshi ni ta va yendla va fana ni makuwa ya ku bola* lama kalaka ma nga dleki hi mhaka ya ku kala ma nga nandzihi.”’+
18 “‘Ni ta va txatxa hi xipada,+ hi ndlala ni hi ntungu, ni ta yendla swaku mimfumu hinkwayu ya misava yi chava hi mhaka ya leswi nga ta va humelela,+ va ta rhukiwa, va hlamaliwa, va va nchumu lexi beliwaka noti+ ni ku poyiliwa xikarhi ka matiko hinkwawu lawa ni nga ta va hangalasela ka wona,+ 19 hikusa a va ma yingisanga marito ya mina lawa ni nga va rhumela wona hi ku tirhisa vatirheli va mina ku nga vaprofeta,’ ku vula Yehovha, ‘ni va rhume hi ku phindhaphindha.’*+
“‘Kambe a mi yingisanga,’+ ku vula Yehovha.
20 “Kutani yingisani rito la Yehovha n’wina hinkwenu lava nga wukaraweni, n’wina ni nga mi susa Yerusalema ni mi yisa Babilona. 21 Yehovha murhangeli wa tintsumi, Xikwembu xa Israyele a vula leswi hi Akabu n’wana wa Kolaya na Zedekiya n’wana wa Mazeya, lava mi profetelaka mavunhwa hi vito la mina,+ a li: ‘Ni ta va nyiketa ka voko la Nebukadinazara* hosi ya le Babilona, a ta va dlaya na mi swi vona. 22 Leswi nga ta yendleka ka vona, swi ta tirhisiwa hi swikarawa hinkwaswu swa le Yuda leswi nga le Babilona loko swi rhuka van’wani, swi ku: “Yehovha a a mi yendle swa ku fana ni leswi a nga swi yendla Zedekiya na Akabu, lava hosi ya le Babilona yi nga va hisa hi ndzilu!” 23 Hikusa va yendle swa ku danisa aIsrayele,+ va mbuyetile ni vasati va vavanuna van’wani funtshi va vulavula mavunhwa hi vito la mina, ku nga nchumu xa ku kala va nga rhumiwanga hi mina.+
“‘“Hi mina Lweyi a swi tivaka naswona ni mboni ya swona,”+ ku vula Yehovha.’”
24 “Se u ta byela Xemaya+ wa le Nehelami u ku: 25 ‘Yehovha murhangeli wa tintsumi, Xikwembu xa Israyele a li: “Leswi u nga rhumela makarta hi vito la wena ma ya ka vanhu hinkwavu lava nga Yerusalema, ka Sofaniya+ n’wana wa muprista Mazeya ni ka vaprista hinkwavu u ku: 26 ‘Yehovha a ku yendle muprista u pfaleta muprista Yoyada swaku u vonelela yindlo ya Yehovha, u vonelela munhu mun’wani ni mun’wani wa ku hlanya lweyi a tiyendlaka muprofeta u mu manya mavoko, nhamu ni nhloko hi swigodo* u tlhela u mu boha hi machini;+ 27 se hi mhaka muni u nga mu layanga Yeremiya wa le Anatoti,+ lweyi a tiyendlaka muprofeta ka n’wina?+ 28 Hikusa a hi rhumele karta na hi li Babilona, a ku: “Ma ha ta tshama nkama wa ku leha! Yakani tiyindlo mi tshama ka tona. Byalani minsinya leyi psalaka mihandzu mi dla mihandzu ya yona,+ . . . ”’”’”
29 Nkama muprista Sofaniya+ a nga lerha karta leli phambheni ka muprofeta Yeremiya, 30 Yehovha a vulavule na Yeremiya, a ku: 31 “Rhumela rungula ka vanhu hinkwavu lava nga wukaraweni u ku: ‘Yehovha a hlaya leswi hi Xemaya wa le Nehelami: “Leswi Xemaya a nga mi profetela, hambileswi a kalaka a nga rhumiwanga hi mina naswona a nga zama ku yendla swaku mi tshemba mavunhwa,+ 32 Yehovha a li: ‘Ni ta mu khatisa Xemaya wa le Nehelami ni vana va yena. A ku nga ta pona munhu ni mun’we wa ndjangu wa yena xikarhi ka vanhu lava naswona a nga ta swi vona swilo swaswinene leswi ni nga ta swi yendlela vanhu va mina,’ ku vula Yehovha, ‘hikusa a xengetele vanhu swaku va lwa na Yehovha.’”’”