Yeremiya
39 Hi lembe la wu 9 la ku fuma ka Zedekiya hosi ya le Yuda, hi wheti ya wu 10, Nebukadinazara* hosi ya le Babilona a te ni masonchwa ya yena hinkwawu a fika a rhendzela doropa la Yerusalema.+
2 Hi siku la wu 9 ka wheti ya wu 4 hi lembe la wu 11 la ku fuma ka Zedekiya, va boxe muru wa Yerusalema.+ 3 Kutani varhangeli hinkwavu va hosi ya le Babilona, ku nga Nerigali-Xarezeri Samigari, Nebo-Sarezekimi Rabisarisi,* Nerigali-Xarezeri Rabimagi ni varhangeli lavan’wani hinkwavu va hosi ya le Babilona va fika va nghena va tshama ka Nyanghwa wa le Xikarhi.+
4 Nkama Zedekiya hosi ya le Yuda ni masonchwa hinkwawu va nga va vona, va baleka+ doropeni niwusiku hi ndlela leyi hundzaka hi ka jardim la hosi, va huma hi nyanghwa lowu nga xikarhi ka mimuru yimbirhi, va famba hi ndlela leyi yaka aAraba.+ 5 Kambe masonchwa ya Vakalidiya ma va txatxa, ma gama ma kuma Zedekiya amananga ya le Yeriko.+ Ma mu khoma ma mu tisa ka Nebukadinazara* hosi ya le Babilona aRibala+ ka tiko la Amati+ lomu a nga fika a mu yavanyisa. 6 Hosi ya le Babilona yi teke vana va Zedekiya yi va dlaya aRibala na a swi vona, yi tlhela yi dlaya ni varhangeli hinkwavu va le Yuda.+ 7 Se yi mu dlaya matihlo Zedekiya, yi gama yi mu boha hi machini ya kobre yi mu yisa aBabilona.+
8 Se Vakalidiya va hisa yindlo ya wuhosi ni tiyindlo ta vanhu,+ va dilizela ni mimuru ya Yerusalema.+ 9 Nebuzaradani+ lweyi a a li murhangeli wa vagwardu a gama a teka vanhu hinkwavu lava a va salile ka doropa, lava nga tinyikela ka yena ni lava nga pona a va yisa awukaraweni aBabilona.
10 Kambe Nebuzaradani lweyi a a li murhangeli wa vagwardu a siya swisiwana, leswi a swi nga na nchumu ka tiko la Yuda. Hi siku lolelo a swi nyike ntirho wa ku rima masimu ya mawuvha ni masimu man’wani.+
11 Nebukadinazara* hosi ya le Babilona a nyike Nebuzaradani murhangeli wa vagwardu, minawu leyi khumbaka Yeremiya a ku: 12 “Mu teki u mu hlayisa; u nga mu vavisi, mu nyiki xin’wani ni xin’wani lexi a xi kombelaka.”+
13 Se Nebuzaradani murhangeli wa vagwardu, Nebuxazibani Rabisarisi,* Nerigali-Xarezeri Rabimagi* ni madoda hinkwawu ya hosi ya le Babilona va rhuma vanhu 14 leswaku va ya teka Yeremiya ka Kintari* wa Murindzi+ kutani a nyikeliwa ka Gedaliya+ n’wana wa Ayikami+ n’wana wa Xafani,+ swaku a tisiwa ka yindlo ya yena. Se a tshama ni vanhu lavan’wani.
15 Na Yeremiya a ha pfaleliwile ka Kintari wa Murindzi,+ Yehovha a vulavula na yena a ku: 16 “Famba u ya byela Ebedimeleki+ wa Muetiyopiya u ku: ‘Yehovha murhangeli wa tintsumi, Xikwembu xa Israyele a li: “Ni yendla leswi ni nga swi vula hi doropa leli loko ni ku ni tisa khombo ku nga li swaswinene funtshi u ta swi vona loko swi yendleka hi siku lolelo.”’
17 “‘Kambe ni ta ku ponisa hi siku lolelo, a wu nga ta nyikeliwa ka vanhu lava u va chavaka,’ ku vula Yehovha.
18 “‘Hikusa ni ta ku vhikela naswona a wu nga ta dlayiwa hi xipada. A wu nge dlayiwi+ hi mhaka ya leswi u nga ni tshemba,’+ ku vula Yehovha.”