Yeremiya
8 Yehovha a li: “Hi nkama wolowo, marhambu ya tihosi ta Yuda, marhambu ya varhangeli va kona, marhambu ya vaprista, marhambu ya vaprofeta ni marhambu ya lava va tshamaka Yerusalema ma ta humesiwa masirheni. 2 Ma ta hangalasiwa hansi ka dlambu ni hansi ka n’weti ni hansi ka tinyeleti hinkwatu ta le matilweni ku nga minchumu leyi a va yi rhandza, va yi tirhela, va yi landzelela, va yi lavetela va tlhela va yi khizamela.+ A ma nge hlengeletiwi kumbe ku lahliwa. Ma ta fana ni xitrumi ahenhla ka misava.”+
3 “Vanhu lava nga ta pona vandjangu lowu wu yendlaka swa ku biha va ta langa ku fa ku nga li wutomi ka tindhawu hinkwatu leti ni nga ta va hangalasa va ya ka tona,” ku vula Yehovha murhangeli wa tintsumi.
4 “U fanele u va byela u ku: ‘Yehovha a li:
“Indjhe va ta wa va nga ha pfuki?
Loko mun’we a txintxa, indjhe lweyi mun’wanyani na yena a ta txintxa?
5 Hi mhaka muni vanhu va mina, ku nga vanhu va Yerusalema, va tshamela ku kala va nga tshembeki ka mina?
Va rhandza ku kanganyisa;
Naswona va yala ku txintxa.+
6 Ni pfule ndleve ya mina, ni tama ni va yingisela kambe mavulavulelo ya vona a hi manene.
A ku na munhu lweyi a nga tshika swa ku biha leswi a swi yendlaka kumbe lweyi a nga tivutisa a ku: ‘Ni yendle yini?’+
Hinkwavu va tshamela ku tlhelela ka swilo leswi yendliwaka hi vanhu va vanyingi, ku fana ni kavhalu leli tsutsumaka li ya nyimpini.
7 Hambi ntavila* la wu tiva nkama lowu li faneleke li rhurha hi wona li ya ka ndhawu yin’wani;
A tuva ni nkondjani* ni bokodwa* swa wu tiva nkama wa ku vuya hi wona.
Kambe vanhu va mina a va ku twisisi ku yavanyisa ka mina Yehovha.”’+
8 ‘Mi nga vulisa ku yini mi ku: “Hi tlharihile naswona hi ni nawu wa Yehovha”?
Hikusa vasekretariyu* va tirhise lisiva*+ swaku va tsala mavunhwa.
9 Lava ku tlhariha va danisiwile.+
Va chavile naswona va ta phasiwa.
A va swi yingisanga leswi Yehovha a nga swi vula,
Se ku kwini ku tlhariha ka vona?
10 Se ni ta teka vasati va vona ni va nyikela ka vavanuna van’wani,
A masimu ya vona ni ta ma nyika vanhu van’wani;+
Hikusa hinkwavu, vavatsongo ni vavakulu, va kuma minchumu hi ku kanganyisa van’wani;+
Ku sukela ka muprofeta ku ya ka muprista, hinkwavu va hanya hi ku kanganyisa van’wani.+
11 Va zama ku holisa swilondza swa vanhu* va mina hi ku va byela ntsena va ku:
“Ku rhulile! Ku rhulile!”
Kuve a ku na ku rhula.+
12 Indjhe va dana hi mhaka ya minchumu ya ku nyenyentsa leyi va nga yi yendla?
Ihim, ni ku dana a va dani!
A va swi tivi swaku ku dana i yini!+
Kutani va ta wa ku fana ni lava va nga wa.+
Va ta vaviseka loko ni va khatisa,’ ku vula Yehovha.
13 ‘Nkama ni nga ta va hlengeleta, ni ta va helisa,’ ku vula Yehovha.
‘A ku nga ta sala mawuvha ka nsinya wa mawuvha, a ku nga ta sala makuwa ka nsinya wa nkuwa funtshi matluka ma ta vuna.
Leswi ni nga va nyika swona va ta swi luza.’”
14 “Se hi tshamela yini lani?
A hi hlengeletananeni hi nghena ka madoropa lama nga ni mimuru ya ku tiya+ hi ta ya fela kona.
Hikusa Yehovha Xikwembu xa hina a ta hi helisa,
Naswona a hi nyika mati lama nga ni vhenenu swaku hi phuza,+
Hikusa hi mu djohelile Yehovha.
15 A ku nyimeliwe swaku ku va ni ku rhula kambe a ku tanga nchumu xaxinene,
A ku nyimeliwe nkama wa ku hanyisiwa kambe ku ni ku chava!+
16 Ku twakale guwa la ku hefemuteka ka makavhalu ya yena aDani.
Loko makavhalu ya yena ma rila,
Tiko hinkwalu la tsekatseka.
Nala wa ta a fika a helisa tiko hinkwalu ni leswi nga ka lona,
A helisa doropa ni lava tshamaka ka lona.”
17 Yehovha a li: “Hikusa ni ta mi rhumela tinyoka,
Tinyoka leti ti nga ni vhenenu, leti nga ta kala ti nga lawuliwi,
Naswona ti ta mi luma.”
18 Ku karhateka ka mina a ku daheki;
Ni mbilu ya mina ya vabya.
19 Vanhu va mina
Va huwelela na va li ka tiko la le kule va kombela ku pfuniwa va ku:
“Kasi Yehovha a nga le Siyoni?
Kumbe a hosi ya hina a yi le Siyoni?”
“Hi mhaka muni va ni kwatisile hi swifaniso swa vona leswi va nga swi yendla,
Ni hi swikwembu swa vona swa matiko man’wani leswi kalaka swi nga pfuni nchumu?”
20 “Nkama wa ku tshovela wu hundzile, ni malanga ma helile,
Kambe a hi ponisiwanga!”
Naswona na chava.
22 A ku na mafurha ya balsamu aJiliyadi?+
Kumbe a ku na munhu lweyi a tivaka ku daha koseniya?+
Se hi mhaka muni vanhu va mina va nga dahiwanga?+