Yeremiya
20 Kutani Paxahuri n’wana wa muprista Imiri, lweyi nakambe a a li muvoneleli wamukulu lweyi a a rhangela ka yindlo ya Yehovha, a mu yingiselile Yeremiya nkama a nga profeta swilo leswi. 2 Se Paxahuri a ba muprofeta Yeremiya a gama a mu manya ka swigodo*+ leswi a swi li ka Nyanghwa wa le Henhla wa Benjamini, lowu a wu li ka yindlo ya Yehovha. 3 Kambe hi mundzuku ka kona nkama Paxahuri a nga chunsa Yeremiya ka swigodo, Yeremiya a mu byele leswi:
“Yehovha a nga ku chulanga vito la Paxahuri, kambe a ku chule vito leli nge: Ku Chava Matlhelo Hinkwawu.+ 4 Hikusa Yehovha a li: ‘Ni ta yendla leswaku wena ni vanghanu va wena hinkwavu mi chava, va ta dlayiwa hi xipada xa valala va vona aphambheni ka wena;+ kutani tiko hinkwalu la Yuda ni ta li nyikela ka voko la hosi ya Babilona, yi ta va teka yi va yisa wukaraweni aBabilona yi fika yi va dlaya hi xipada.+ 5 Tshomba hinkwalu la doropa leli, xuma xa lona hinkwaxu, swilo swa lona hinkwaswu swa lisima ni xuma hinkwaxu xa tihosi ta Yuda ni ta swi nyika valala va tona.+ Va ta swi teka, va swi yisa aBabilona.+ 6 Kasi loko ku li wena Paxahuri ni vanhu hinkwavu lava tshamaka kaya ka wena, mi ta ya wukaraweni. U ta ya Babilona u ya fela kona naswona u ta lahliwa kona ni vanghanu va wena hinkwavu, hikusa u va profetele mavunhwa.’”+
7 Yehovha, u ni kholwisile naswona ni kholwile.
U tikombise na u ni matimba ku ni tlula funtshi u ni hlulile.+
Na hlekiwa siku hinkwalu;
Hinkwavu va ni poyila.+
8 Phela minkama hinkwayu loko ni vulavula, ni fanele ni huwelela ni ku:
“Tinyimpi ni ku helisiwa!”
Hikusa rito la Yehovha li yendle swaku ni rhuketeliwa ni ku soliwa siku hinkwalu.+
9 Se ni tibyele leswi: “A ni nga ha ta khuluma hi yena,
A ni nga ha ta tlhela ni vulavula hi vito la yena.”+
Kambe ambilwini ya mina rito la yena a li fana ni ndzilu lowu pfurhaka lowu nga pfaleliwa ka marhambu ya mina,
A ni karhalile ku tshama hi lona;
A ni nga ha swi koti ku miyela.+
10 Hikusa ni twe mavalivali ya manyingi ya ku biha;
A ni rhendzeliwe hi ku chava.+
“Mu soleni; a hi mu soleni!”
Munhu mun’wani ni mun’wani lweyi a a yendla ingaku wa ni rhandza a a lava ku ni yendla swa ku biha:+
“Kumbexana a ta yendla xihoxo xa wuphunta,
Kutani hi nga mu hlula hi mu hakelisa.”
11 Kambe Yehovha a a na mina ku fana ni nhenha leyi kalaka yi nga chavi nchumu.+
Hi leswo swi nga ta yendla swaku lava ni xanisaka va vaviseka naswona va nga ni hluli.+
Va ta danisiwa swinene, hikusa a va nga ta hlula.
Ku danisiwa ka vona ku ta tshama nkama hinkwawu a ku nga ta khohlwiwa.+
12 Kambe wena Yehovha murhangeli wa tintsumi, u kambela wa ku lulama;
Ni tshiki ni swi vona loko u hakelisa ka vona,+
Hikusa ni ku byele mhaka ya mina leyi lavaka ku thethiwa.+
13 Yimbelelelani Yehovha! Dzunisani Yehovha!
Hikusa a ponise xisiwana ka voko la lava yendlaka swa ku biha.
14 A li rhukiwe siku leli ni nga psaliwa* hi lona!
Li nga katekisiwi siku leli mamani a nga ni psala hi lona!+
15 A ku rhukiwe lweyi a nga tisa mahungu ya ku tsakisa ka papayi, a ku:
“Va ku psalele n’wana wa djaha!”
A mu yendla a tsaka ngopfu.
16 Munhu yelweyo a a fani ni madoropa lawa Yehovha a nga ma helisa a tlhela a nga tisoli hi swona.
A a twi guwa la ku rila nimixo kasi ninhlikanhi a a twe guwa la nyimpi.
17 Hi mhaka muni a nga ni dlayanga na na ha li ka khwirhi la mamani,
Leswaku khwirhi la yena li va sirha la mina
A tlhela a tshama na a ni nyimba nkama hinkwawu?+
18 Hi mhaka muni ni humile ka khwirhi la mamani
Swaku ni ta vona ku hlupheka ni ku vaviseka,
Ni leswaku masiku ya mina ma hela na ni ni tingana?+