Zakariya
11 “Pfula swipfalu swa wena, wena Lebanoni,
Leswaku ndzilu wu ta hisa minsinya ya wena ya mikedari.
2 Rila wena nsinya wa yunipa, hikusa nsinya wa mukedari wu wile;
Minsinya yayikulu yi helisiwile!
Rilani n’wina minsinya ya oku ya le Baxani,
Hikusa khwati la ku tlhuma li helisiwile!
3 Yingisani! Varisi va le ku rileni,
Hikusa tindhawu ta vona ta ku nona ta ku risela ka tona ti helisiwile.
Yingisani! Swinghonyamani swa bonga,
Hikusa swikhwatani swa ku tlhuma leswi nga kusuhi ni Nambu wa Yordani swi helisiwile.
4 “Yehovha Xikwembu xa mina a li: ‘Risani tinyempfu leti nga ta dlayiwa,+ 5 leti vaxavi va tona va ti dlayaka+ kambe va nga nyikiwi nandzu. Lava va ti xavisaka+ va li: “Yehovha a a dzunisiwi, hikusa hi ta ganya.” Varisi va tona a va na mhaka na tona.’*+
6 “‘Hikusa a ni nga ha ta va twela wusiwana vanhu lava tshamaka ka tiko leli,’ ku vula Yehovha. ‘Ni ta yendla leswaku vanhu va hluphana hi xivona ni hosi yi va xanisa; va ta hahlulela tiko, a ni nge va ponisi ka voko la vona.’”
7 N’wina mi nga ka ntlhambi kambe mi xanisekaka, ni sungule ku mi risela tinyempfu leti nga ta dlayiwa.+ Hi mhaka leyo ni teke tinhonga timbirhi, yin’we ni yi chule swaku i Timpsalu, leyin’wani ni yi chule swaku i Ku Twanana,+ kutani ni sungula ku risa tinyempfu. 8 Ka wheti yin’we ni hlongole varisi vanharhu, hikusa a ni karhalile hi vona naswona hambi vona a va ni nyenya. 9 Se ni ku: “A ni nge tshameli ku mi risa. Leti ti faka a ti fe, leti ti dlayiwaka a ti dlayiwe. Leti salaka a ti dlanane.” 10 Kutani ni teka nhonga ya mina leyi ni nga yi chula swaku i Timpsalu,+ ni yi tshovelela, swaku xi va xikombiso xa ku helisa ntwananu lowu ni nga wu yendla ni vanhu hinkwavu. 11 Se ntwananu wu helisiwile hi siku lolelo, lava va nga ni vona ka lava a va li ka ntlhambi kambe va xanisekaka va swi vonile swaku a ku li rito la Yehovha.
12 Ni va byele ni ku: “Loko mi swi vona swi fanela, ni hakeleni; kambe loko ku nga li leswo, tshikani.” Se va ni hakela* 30 wa swikhemu swa prata.+
13 Kutani Yehovha a ni byela a ku: “Swi peti lani ku hlayisiwaka kona xuma, lowu i mpimu lowu va nga ni pima hi wona.”+ Se ni teka 30 wa swikhemu swa prata, ni swi peta lani ku hlayisiwaka kona xuma ka yindlo ya Yehovha.+
14 Kutani ni tsemelela nhonga ya mina ya wumbirhi, ku nga Ku Twanana,+ swaku ni helisa wunghanu leli Yuda na Israyele va nga na lona.+
15 Se Yehovha a ni byela a ku: “Teka swilo leswi tirhisiwaka hi murisi lweyi a kalaka a nga pfuni nchumu.+ 16 Hikusa ni yendla leswaku ku va ni murisi atikweni. A nga ta ti hlayisa tinyempfu leti faka;+ leti tatitsongo a nga ta famba a ti lava, a nga ta hanyisa leti nga vavisiwa+ kumbe ku nyika swakudla leti nga hanya kahle. Kambe a ta dla nyama ya leta ku nona,+ a kwamula maxondzo* ya tona.+
17 Khombo ka murisi wa mina lweyi a kalaka a nga pfuni nchumu,+ lweyi a siyaka ntlhambi!+
Xipada xi ta mu tsema voko xi tlhela xi mu tlhava tihlo la xinene.
Voko la yena li ta woma,
Tihlo la yena la xinene a li nga ha ta vona.”