Yehovha A Lange Yoxuwa

Loko se ku hundze malembe ya manyingi, Moxe na a kongomisa tiko la Israyele funtshi na a li kusuhi ni ku fa, Yehovha a byele Moxe a ku:

— A ku nga ha ta va wena lweyi a nga ta nghenisa Vayisrayele aKanana, tiko leli ni nga va tshembisa lona. Kambe ni ta ku tshika u li vona hi le kule. Moxe a kombele Yehovha leswaku a langa wanuna mun’wani leswaku a ta kongomisa Vayisrayele, se Yehovha a lange Yoxuwa.

Moxe a game a byela Vayisrayele swaku a a li kusuhi ni ku fa a tlhela a va byela swaku Yehovha a a lange Yoxuwa leswaku a va kongomisa anze va ya nghena ka tiko la Kanana. A tlhele a byela Yoxuwa a ku:

— U nga chavi, Yehovha a ta ku pfuna.

Se Moxe a game a khwela ka Ntshava ya Nebo. Na a li ka Ntshava, Yehovha a mu tshike a vona tiko hinkwalu leli a nga tshembisa Abrahamu Izaki na Yakobe. Se a gama a fa na a ni 120 wa malembe. Yehovha a byele Yoxuwa a ku:

— Tlulela ka Nambu wa Yordani u nghena aKanana. Mina ni ta ku pfuna ku fana ni leswi ni nga pfuna Moxe. Lerha minawu leyi ni nga nyika Vayisrayele siku ni siku. U nga chavi. Tiya nhlana. Famba, funtshi yendla hinkwaswu leswi ni ku byelaka swona.

Se Yoxuwa a gama a rhuma vakambeli vambirhi va ya ka doropa la Yeriko. Ka xitoriya lexi landzelaka hi ta vona leswi nga humelela ko hala. Se nkama lowu vakambeli va nga vuya va vule leswaku a ku li nkama wawunene leswaku va nghena ka tiko la Kanana. Se Yoxuwa a game a byela Vayisrayele leswaku va tilunghiselela hikusa a va ta tlulela Nambu wa Yordani. A rhume vaprista lava a va tlakula a Areka ya ntwananu leswaku va rhanga phambheni, loko va fike ka Nambu wa Yordani va vone leswaku a nambu a wu tale hi mati funtshi a swi ni nghozi hintamu kuva va tlulela. Kambe vaprista va nghene ka mati, se nkama va nga nghena, mati ma sungule ku nyima ku tsutsuma ma tlhela ma psha, funtshi vaprista va nyime kolanu leswaku Vayisrayele hinkwavu va hundza. A hi kanakani swaku leswo swi nga va swi yendle va khumbuka leswi Yehovha a nga va yendlela swona ka Lwandle la Ku Pshuka.

Hi wugamu, Vayisrayele va fikile ka tiko leli Yehovha a a va tshembise lona hambileswi ku nga hundza malembe ya manyingi. Swoswi a swi ta koteka leswaku va tiyakela tiyindlo, va va ni madoropa ya ku saseka va tlhela va byala hinkwaswu leswi a va swi lava. Phela a va li ka tiko lalinene leli a li xongile swinene.