Hosi Ya Nyuwani Ni Vavasati Vambirhi Lava A Va Nga Chavi Nchumu

Yoxuwa a kongomise Vayisrayele malembe ya manyingi a gama a fa na a ni 110 wa malembe. Nkama lowu Yoxuwa na a ha hanya, Vayisrayele a va mu gandzela Yehovha, kambe loko Yoxuwa se a file va sungule ku tipatsa ni Vakanana va tlhela va gandzela swikwembu swa vona swa mavunhwa. Hi mhaka leyo, Yehovha a tshike wanuna lweyi a vitaniwaka Yabini a hlupha Vayisrayele. Leswi Vayisrayele a va hluphiwa va kombele ku pfuniwa hi Yehovha. Se Yehovha a lange wanuna lweyi a vitaniwaka Baraki, leswaku a kongomisa Vayisrayele a tlhela a va pfuna leswaku va yendla swilo swaswinene.

Yehovha a pfune Baraki kuva a tiva leswi a a fanele a swi yendla. A rhume Debora muprofeta wa xisati leswaku a ya byela Baraki a ku:

— Langa 10.000 wa vavanuna u ya lwa na Yabini ka Nambu wa Kixoni, u ta hlula Sisera murhangeli wa masonchwa ya Yabini ka nambu lowu.

Se Baraki a byela Debora a ku:

— Ni to famba ntsena loko wena u famba na mina.

Debora a ku:

— Hi swona ni ta famba na wena, kambe Yehovha a vule leswaku a hi wena u nga ta dlaya Sisera, yena a ta dlayiwa hi wansati.

Debora a fambe na Baraki ni 10.000 wa vavanuna lava a nga va langa, va ya ka Ntshava ya Tabori swaku va ya tilunghiselela ku lwa. Nkama lowu Sisera a nga swi tiva leswo, a teke masonchwa ya yena ya matimba swinene ni tinyolo ta nyimpi leswaku a ya lwa ni Vayisrayele ka Nambu wa Kixoni. Loko va fikile, Debora a tiyisekise Baraki a ku:

— Namuntlha u ta hlula valala va wena, Yehovha a ta va na wena.

Se Baraki ni 10.000 wa vavanuna va xike hi ku tsutsuma ka ntshava va ya lwa na Sisera ni masonchwa ya yena. Se Yeovha a yendle leswaku a Nambu wa Kixoni wu tala hi mati wu tlhela wu dibekela se a tinyolo ta nyimpi ta Sisera ti fike ti chufela ka madaka. Se Baraki ni masonchwa ya yena va hlule Sisera ni masonchwa ya yena. Kambe Sisera a xike ka nyolo a baleka, yena a fike a tumbela ka tende la wansati lweyi a vitaniwaka Yayele. Yayele a fike a nyika Sisera a leite leswaku a phuza se a gama a mu mbonya hi mubalu. Phela yena a a karhalile hintamu lakakuza a sungula ku yetlela, kambe Yayele a sungule ku mu tshinelela hi kutsongokutsongo a fika a mu tlhava ka nhloko a gama a fa.

Baraki a sungula ku lavetela Sisera. Se Yayele a huma hi le ka tende la yena a ku:

— He Baraki, wanuna lweyi u mu lavetelaka hi lweyi.

Se Baraki a nghena ka tende la Yayele a fika a vona Sisera na a file. Phela Vayisrayele se a va hlulile valala va vona. Se Baraki na Debora va sungule ku yimbelela va khensa Yehovha hileswi a a nga va pfuna. Loko se ku hundze leswo Vayisrayele va hanye 40 wa malembe na va rhulile.