Daniyele A Petiwa Ka Xikhele Xa Tinghonyama

Ka tiko la Babilona ku ve ni hosi yin’wani leyi vito la yona a ku li Dariyosi. Dariyosi a a swi tiva swaku Daniyele a a li munhu wa lisima. Hi mhaka leyo a yendle Daniyele a va xefi ya vavanuna hinkwavu va lisima ka tiko la Babilona. Kambe vavanuna volavo a va mu nyenya Daniyele naswona a va lava ku mu dlaya. Vona a va swi tiva swaku Daniyele a a khongela kanharhu hi siku ka Yehovha. Hi mhaka leyo va fambe va ya vulavula ni hosi va ku:

— Hosi Dariyosi hi mhaka muni u nga veki nawu wa leswaku vanhu hinkwavu va khongela ka wena ntsena. Lweyi a khongelaka ka Xikwembu xin’wani a fanele a petiwa ka xikhele xa tinghonyama.

Dariyosi a swi tsakelile leswo a gama a veka nawu a tlhela a wu sinara. Loko Daniyele a swi tivile leswo a sukile a muka kaya ka yena, a fike a khizama phambheni ka janela leli a li pfulekile a sungula ku khongela. Se lava a va mu nyenya va fikile va nghena kaya ka Daniyele nkama lowu a a li ku khongeleni. Se va gama va suka hi ku tsutsuma va ya byela hosi va ku:

— Daniyele a nga ku yingisi wena hosi, yena a khongela ka Xikwembu xa yena kanharhu hi siku.

Dariyosi a a mu rhandza hintamu Daniyele, hi mhaka leyo a a nga swi lavi swaku a dlayiwa. Phela a hete siku hinkwalu na a pimisa hi leswi a a ta swi yendla swaku a ponisa Daniyele. Kambe a ku nga ha na nchumu lexi a a ta xi yendla hikusa se a a wu sinarile nawu. Naswona a swi nga koteki swaku nawu wolowo wu txintxiwa. Se a swi lava a rhuma vavanuna lavayani leswaku va ya teka Daniyele va mu peta ka xikhele xa tinghonyama.

Ka wusiku lolelo Dariyosi a a karhatekile swinene hi Daniyele naswona a a nga li kumi hambi wurhongo. Loko se li xile a yile ka xikhele xa tinghonyama a fika a ku:

— Daniyele indjhe Xikwembu xa wena xi ku vhikelile?

Leswi a a nga swi tivi hi leswaku Daniyele a a ta hlamula a ku:

— Ina ni kahle, ntsumi ya Yehovha yi pfale minomo ya tinghonyama.

Dariyosi a tsake hintamu a tlhela a rhuma vavanuna leswaku va ya humesa Daniyele. Daniyele a nga zanga hi ku vavisiwa. Se a hosi yi rhume vavanuna swaku va ya peta vavanuna lava a va nyenya Daniyele ka xikhele xa tinghonyama. Vavanuna lava, nkama lowu va nga petiwa ka xikhele xa tinghonyama, na va nga se fika hansi tinghonyama ti yo vhela ti va phatlulela.

Loko se ku hundze swilo hinkwaswu leswo, Dariyosi a nyikele nawu lowu a wu ku:

— Vanhu hinkwavu va fanele va gandzela Xikwembu xa Daniyele, hikusa xona xi mu ponisile ka tinghonyama.

Swi ngo yini u tekelela xikombiso xa Daniyele hi ku khongela ka Yehovha siku ni siku?