Yesu A Khomiwa

Yesu ni vapostolo va yena va fambile va ya ka Ntshava ya Mawolivhera. Nkama lowu va nga fika seniyani se a a li ma zero wora funtshi a ku ni n’weti. Nkama lowu va nga fika ka jardim la Getsemani, Yesu a byele vapostolo va yena leswaku va nga yetleli. Leswi a a karhatekile hintamu, a sukile lani a va li kona a ya kulenyana, a fika a khizama a khongela ka Yehovha a ku:

— Papayi, a ku yendleki leswi wena u swi lavaka.

Yehovha a game a rhuma ntsumi leswaku yi ya tiyisa Yesu. Loko se ku hundze leswo, Yesu a game a tlhela lani a ku ni vapostolo, a va kuma na va yetlelile a fika a ku:

— Pfukani, a hi nkama wa ku yetlela lowu, lava va ni nyenyaka va ta va ta ni khoma.

Loko se ku hundze nkama, Yudasi Skariyota a fikile ajardim ni vanhu va vanyingi lava a va ni tinhonga ni swipada. Leswi Yesu a a tolovela ku ya ka jardim leliyani ni vapostolo va yena, Yudasi a a swi tiva leswaku Yesu a a li kohala. Hi mhaka leyo, a tshembise masonchwa leswaku a a ta ya ma komba Yesu. Loko Yudasi Skariyota a fikile kusuhi ni lani Yesu a a li kona a fike a mu bejara. Se Yesu a ku:

— Yudasi, u kanganyisa N’wana wa Xikwembu hi ku mu bejara?

Yesu a game a vutisa vanhu lavayani leswaku a va lavetela mani. Vona va vule swaku a va lavetela Yesu. Se Yesu a ku:

— Hi mina.

Nkama lowu va nga vona leswaku Yesu a a nga chavi nchumu, vona va chave hintamu va tlhela va hlehla va wa hansi. Se Yesu a tlhela a va vutisa swaku a va lavetela mani, nkama lowu va nga tlhela va vula swaku a va lavetela Yesu, yena a te:

— Se ni mi byelile swaku hi mina lweyi, tshikani vadjondzisiwa va mina va famba.

Loko Pedru a vone leswi a swi yendleka lahayani, a teke xipada a fika a tsema ndleve ya wanuna lweyi a vitaniwaka Malku. Kambe Yesu a khome ndleve ya Malku a mu hanyisa. Yesu a game a byela Pedru a ku:

— Veka xipada lexo, lweyi a tirhisaka xipada a ta dlayiwa hi xona.

Masonchwa ma bohe Yesu, se vapostolo va baleka. Va teke Yesu va famba na yena ka Anasi. Anasi a mu yendle swivutiso swa swinyingi Yesu, a gama a mu yisa kaya ka Kayafasi Muprista Wamukulu. Se vapostolo ke, ku humelele yini hi vona?