Namani Ni Xin’wanani Xa Muyisrayele

A ku ni xin’wanani xa Muyisrayele, lexi a xi tshama ka tiko la Siriya leli a li kumeka kule ni Israyele. Xona a xi tekiwe hi masonchwa ya Siriya ma famba na xona, xi ya tshama kule ni ndjangu wa xona. Xin’wanani lexi xi game xi sungula ku tirha kaya ka Namani lweyi a a li xefi ya masonchwa ya Vasiriya. Lani a xi tshama kona a ku nga na munhu mun’wani lweyi a a gandzela Yehovha, a ko va xona ntsena.

Namani a a ni mavabyi ya ku bola xikhumba lawa a ma vava hintamu. Xin’wanani xa Muyisrayele a xi swi lava hintamu ku mu pfuna, xona xi vulavule ni nsati wa Namani xi ku:

— Ni tiva munhu lweyi a nga hanyisaka nuna wa wena, aIsrayele ku ni muprofeta wa Yehovha lweyi a vitaniwaka Elixa, yena a nga mu hanyisa nuna wa wena ka mavabyi lawa.

Nsati wa Namani a byele nuna wa yena swilo hinkwaswu leswi a nga byeliwa hi xin’wanani lexi. Namani a a swi lava hintamu ku hanya ka mavabyi ya yena. Hi mhaka leyo a fambe kaya ka Elixa aIsrayele. Leswi Namani a a tivona na a li wanuna wa lisima a a nyimele leswaku Elixa a huma a ta vulavula na yena, kambe Elixa a rhume mutirhi wa yena leswaku a ya vulavula na Namani a ku:

— Famba u ya hlamba ka 7 ka Nambu wa Yordani, u ta hanya ka mavabyi ya wena.

Phela Namani a nga tsakanga hi leswo, a te:

— A ni pimisa leswaku muprofeta lweyi a a ta ni hanyisa hi ku ni khongelela ka Xikwembu xa yena, a gama a fambafambisa voko la yena lani ni nga bola kona xikhumba, ku hambana ni leswo a ni rhumile ka Nambu wa kola Israyele kuve minambu ya Siriya ya yampsa swinene. Se hi mhaka muni a nga ni rhumanga ni ya kohala?

Namani a kwate hintamu a gama a suka a famba. Kambe vatirhi va Namani va vulavule na yena va ku:

— Hosi u te u ta yendla xin’wani ni xin’wani lexi lavekaka leswaku u dahiwa. Hi mhaka muni u nga yendli leswi muprofeta a nga swi vula? Phela swi tikomba swi nga karhati.

Namani a game a yingisa leswi vatirhi va yena va nga mu byela swona, a ye a ya hlamba ka 7 ka Nambu wa Yordani. Nkama lowu a nga huma ka mati ka wu 7 a vone leswaku se a a hanyile ka mavabyi ya yena. Phela Namani a tsake hintamu a gama a famba a ya khensa Elixa. A gama a ku:

— Swoswi na swi tiva leswaku Yehovha i Xikwembu xa ntiyiso.

U vona leswaku xin’wanani lexiya xa Muyisrayele xi titwise ku yini nkama lowu xi nga vona Namani a vuya na a hanyile ka mavabyi ya yena?