Ku Fa Ka Yesu

Vaprista vavakulu va teke Yesu va mu yisa ka govhernadori Pilatu. Loko Pilatu a vutise vaprista swaku hi swihi swilo swa ku biha leswi Yesu a nga swi yendla, vaprista va vulavule mavunhwa hi Yesu va tlhela va vula leswaku yena a a lava ku va hosi. Se Pilatu a vutise Yesu a ku:

— Wena u Hosi ya Vayuda?

Kambe Yesu a mu hlamule a ku:

— Mfumu wa mina a hi wa misava leyi.

Pilatu a vone leswaku Yesu a a nga yendlanga nchumu xa ku biha, a gama a mu rhumela ka Heroda govhernadori wa Galileya. Na yena Heroda a vone leswaku Yesu a a nga li xigevenga, se a mu tlhelisa ka Pilatu. Se Pilatu a vule leswaku a a lava ku chunsa Yesu. Kambe vanhu a va nga swi lavi, va vule leswaku a a faneliwa hi ku fa. Se masonchwa ma be Yesu hi nhonga ma tlhela ma mu pshitela ni ku mu ba hi tinyindhi. Masonchwa ma mu veke harhi leyi a yi ni mi mintwa ka nhloko ma sungula ku mu hleka. Pilatu a tlhele a phindha swaku vanhu a va fanele va tshika Yesu, hikusa a a nga wonhanga nchumu. Kambe vanhu va sindzise leswaku Yesu a hayekiwa mhandzini. Se Pilatu a pfumelele leswaku Yesu a dlayiwa.

Yesu a tekiwile a yisiwa ka ndhawu leyi a yi vitaniwa Golgota. Va fike va mu gongondzela minenge ni mavoko ka mhandzi. Yesu a game a khongela a ku:

— Papayi rivalela vanhu lava hikusa a va swi tivi leswi va swi yendlaka.

A vanhu a va tama va hleka Yesu va ku:

— Kasi a wu N’wana wa Xikwembu ke? Loko u li yena, xika ka mhandzi u tiponisa.

A tlhelweni ka Yesu a ku ni xigevenga lexi a xi gongondzeliwe a mhandzini. Xona xi kombele Yesu xi ku:

— Ni kombela u ni khumbuka loko u nghena ka Mfumu wa wena.

Yesu a tshembise xigevenga lexiyani a ku:

— U ta va na mina aParadesini.

Na va nga swi nyimelanga, siku leliyani li mphumile li fana ni wusiku. Ku mphuma koloko ku hete 3 wa mawora. Mariya mamani wa Yesu ni vadjondzisiwa van’wani a va li kusuhi ni lani Yesu a a gongondzeliwe kona. Yesu a kombele Yohani leswaku a hlayisa Mariya ingi hi loko a li mamani wa yena.

Hi wugamu Yesu a te:

— Swi hetisekile.

Yesu a korhamise nhloko a gama fa. Hi nkama wolowo ku ve ni ku tsekatseka ka kukulu ka misava. Atempeleni a ku ni kortina leli a li hambanisa ndhawu ya ku kwetsima, ni ndhawu ya ku kwetsima hintamu, leli nga handzuka hi le xikarhi hi nkama wolowo. Se musonchwa mun’wani a ku:

— Hikakunene a a li N’wana wa Xikwembu.