Yoyada A A Nga Chavi Nchumu

Jezabele a ve ni n’wana lweyi vito la yena a ku li Ataliya. Ku fana ni mamani wa yena, Ataliya na yena a a yendla swilo swa ku biha hintamu. Ataliya a chade ni wanuna lweyi a a li hosi ya Yuda, kambe nuna wa yena a game a fa. Se n’wana wa yena a sala a va hosi. Hi ku famba ka nkama n’wana wa yena na yena a game a fa. Se Ataliya a a lava ku va hosi ya Yuda, hi mhaka leyo a dlaye vavanuna hinkwavu lava a va ni mfanelo ya ku va tihosi, ku patsa ni vatukulu va yena. Phela vanhu hinkwavu a va mu chava Ataliya.

Yoyada Muprista Wamukulu ni nsati wa yena Yehoxabeti a va swi tiva leswaku leswi Ataliya a a swi yendla a swi bihile. Leswi vona a va nga chavi nchumu va fihle mun’we wa vatukulu va Ataliya atempeleni va tlhela va mu hlayisa na wa ha li xibebetani, vito la yena a ku li Yehowaxi.

Nkama lowu Yehowaxi a a ni 7 wa malembe, Yoyada a hlengelete vavanuna hinkwavu va lisima va Israyele a ku:

— Tshamani na mi vonelela tempele naswona mi nga tshiki munhu a nghena.

Se Yoyada a veke Yehowaxi leswaku a va hosi ya nyuwani ya Yuda, a tlhela a mu tlhateka korowa ka nhloko ya yena. Se xitshungu xa Yuda xi huwelela xi ku:

— Hanya hi masiku hosi.

Hosi ya xisati Ataliya a twe xitshungu na xi huwelela, se a tsutsuma a ya tempeleni. Loko a fike a vona hosi ya nyuwani a sungule ku huwelela a ku:

— Vaxengi, vaxengi!

Vavanuna van’wani va humese Ataliya ka tempele va fika va mu dlaya. Phela ka nkama wolowo a mfumu wa Yuda se a wu chunsekile ka hosi liyani leyi a yi yendla swilo swa ku biha. Kambe a ka ha chota leswaku ku helisiwa minchumu ya ku biha leyi a nga yi yendla. Se i mpsini leswi Yoyada a a ta swi yendla.

Yoyada ni vanhu hinkwavu va tshembise leswaku a va ta gandzela Yehovha ntsena. Va helise tempele ya Bali ni swifaniso swa kona. Loko se ku hundze leswo Yoyada a lange vaprista, Valevhi ni lava a va vonelela swipfalu leswaku va tirha ka tempele ya Yehovha. Phela vanhu se a va ta gandzela Yehovha hi ndlela yayinene. Loko se ku hundze leswo, Yoyada ni vavanuna van’wani va teke Yehowaxi va mu yisa ka yindlo ya wuhosi leswaku a ta va hosi. Vanhu hinkwavu va tsake swinene, se a va ta tlhela va gandzela Yehovha na va nga xengeteliwe hi Ataliya ni wugandzeli la Bali. Wa swi vona? Phela ku kala a nga chavi Yoyada swi pfune vanhu va ku tala.